Ara 'ola-'ola' ra'o naa, huu fe'e hela fai rua fai, te atahori Yahud'i ra fai malole na ra ena, fo ara rae ‘Fai Paska’ noo ‘Fefeta Roti Nda Tao Bib'it sa’. Sia fai malole naa ra, ara rasaned'a fai ma'ahulun, lele' sira bei-ba'i na ra lao hela nusa Masir.^a

3 Sia kambo Betania, hambu atahori esa, naran Simon. Ma'ahulun, eni namahed'i kusta. Te ia naa, ana hai ena.

Fai malole ra nda fe'e losa sa, Yesus se reu raa mia Simon ume na. Lele' ara raa, ina' esa maso' rala neu. Ana to'u boto fatu' esa. Isin mina ma'ameni' mafelit.^b Basa ma, ina' a helu-tiku boto' a tatana na. De ana mbo'a nandali mbei-mbei neu Yesus langgan, fo fee had'at neu E.

4 Te hambu atahori laen hira tungga raa sia naa boe. Rita ina' a tao ta'o naa, ara ramanasa, de 'ola' koao rae, “Hmm! Ina saa a ia! Ana mbo'a hendi parsuma 'a mina ma'ameni mafelit a! 5 Malole lena' seo, fo banggi doi naa ra, neu mana to'a-taa' ra!”

6 Te Yesus naselu nae, “Hei 'ona' mi'isususa' ina' ia! Hela neu! Au 'umuho'o, huu ana mbo'a mina ma'ameni' ia neu langga ngga. 7 Atahori mana to'a-taa' ra ra'ab'ue roo hei rakandoo a. De hei bisa tulun se sud'i 'a lele' bee. Te nda doo sa' ena, Au nda 'u'ub'ue 'oo hei sa.^c 8 Au masod'a ngga nda doo sa' ena. Noo mbo'a mina ia a, ina' ia sad'ia mema' au ao ngga, soa neu au fai na'oi ngga. 9 Misined'a matalolole! Sia bee atahori dui-b'engga' Lamatualain Hara-lii Malolen, sa naa o ara dui-b'engga ina' ia tatao malolen, fo basa atahori rasaned'a e.”

10 Boe ma Yesus mana tungga kasanahulu rua na ra esa, naran Yud'as Iskariot, neu sangga malangga agama Yahud'i ra malangga na ra, fo nae seo Yesus neu se. Ana nandaa noo se ma, nafad'e dud'u'a na. 11 Lele' malangga ra rena Yud'as 'o'olan, ma ramaho'o rala seli. De ara helu rae, “Mete ma ho mae seo Yesus, na, hai bae.” Boe ma Yud'as dea neu, de mulai sangga dala' fo fee Yesus neu se.

12 Fai' naa, fai kaesan mia atahori Yahud'i ra fai malole na ra. Sia fai' naa, ara biasa tunu roti nda tao bib'it sa, ma mbau bib'i lombo boe. Boe ma, Yesus mana tungga na ra rema ratane E rae, “Papa! Fai' ia, hita fai malole Paska na. De Papa nau hai mii sad'ia mamana fefetas sia bee?”

13 Boe ma, Yesus denu mana tungga na ra rua nae, “Mii mi'ihulu' sia kota. Sia naa, dei fo mindaa moo tou' esa, nasaa oe nggusi ana' esa. Ama tungga e leo. 14 Mete ma ana maso' nisi' ume bee, na, ama tungga e. Boe ma mifad'e tenu ume' a mae, ‘Papa! Hai papa meser ma no'e mamana' esa, fo nae tao fefeta Paska noo mana tungga na ra.’ 15 Dei fo ana dud'u kama loa' esa sia tad'a' ata ka. Ana sad'ia nala kama naa ena. Hela' a ru'a nggi mii sad'ia nanaat sia naa.”

16 Boe ma ru'a se lao kota reu. Sia naa, randaa roo basa saa fo Yesus nafad'e' a. De ara sad'ia basa' e, fo Yesus se raa fefeta Paska sia naa. Basa ma ru'a se bali' reu ro'e Yesus noo mana tungga laen ra.

17 Lele' relo a mopo boe, ma Yesus noo mana tungga kasanahulu rua na ra lao naa reu.

18 Basa ma ara 'endo' raa ra'ab'ue. Ara fe'e raa ma, Yesus 'ola' nae, “Ama rena, e! Hambu esa mia hei, nae seo Au neu atahori laen ra.”^d

19 Ara rena rala ma, rala na ra liuali. Boe ma esa-esa natane Yesus 'oi, “Atahori fo Papa 'ola' naa, nda au sa, to?”

20 Ma Yesus nataa nae, “Atahori mana boro' rotin nisi' manggo ia rala na'ab'ue noo Au, na, eni mana seo Au. 21 Misined'a, e! Au, Atahori Matetu' ia, musi mate 'ona' nenesura' hela sia Lamatualain Susura Meumare na. Te besa-b'esa! Atahori mana seo Au a, dei fo ana lemba huku-d'oki na! Malole lena', maman nda bonggi nala e sa!”

22 Lele' ara fe'e raa, ma Yesus ha'i nala roti bue' esa, de no'e makasi neu Lamatualain. Ana bib'ib'i roti naa, de loo fee neu mana tungga na ra, ma nafad'e nae, “Roti ia, Au ao ngga. Ha'i, fo mia leo.”

23 Basa ma, Ana ha'i nala oe anggor nggalaas esa. Ana no'e makasi neu Lamatualain, de loo nggalaas naa neu mana tungga na ra fo rinu. 24 Ana nafad'e nae, “Oe anggor ia, Au raa ngga. Dei fo raa' ia nandali fo fee masoi-masod'a' neu atahori hetar. Raa' ia o dad'i bukti fo fee nesenened'a' 'oi, saa fo Lamatualain helu-fuli ena, mema' dad'i lele' ia ena. De ha'i fo minu leo.^e

25 Rena malolole! Mulai mia tetemba' ia, Au nda 'inu oe anggor sa ena. Losa Au 'endo' parenda 'u'ub'ue 'oo Ama ngga sia sorga, fo Au fe'e 'inu selu' ena.”

26 Basa boe ma, ara sod'a sosod'at esa fo koa-kio Lamatualain. De tetemba' naa, ara lao risi' lete Saitun.

27 Ara lao' boe ma, Yesus nafad'e mema' nae, “Tetemba' ia, dei fo basa nggi mela hela Au. Te naa, nenesura' mema' sia Lamatualain Susura Meumaren 'oi,

28 Mema' Au mate. Te dei fo lele' Au 'usod'a bali', na, Au lao 'u'uhulu' nggi 'isi' profinsi Galilea.”^g

29 Lele' Petrus rena Yesus 'ola' na'o naa, ma ana nasapaa nae, “Papa! Mae atahori laen ra basa se rela hela Papa o, au hoko'!”

30 Yesus nataa nae, “Petrus! Musuned'a, e! Tetemba' ia, manu ra nda fe'e ko'o-kee lao rua sa, te ho 'ola' lao telu ena mae, ho nda muhine Au sa!”

31 Te Petrus 'ola' nahere' fai nae, “Hoko'! Mete ma Papa mate, na, au o mate tungga boe. Te au nda 'ela hela Papa, ma nda ufunii Papa sa boe!”

Petrus nonoo na ra o, basa se esa-esa' ra'o naa boe.

32 Basa naa ma, Yesus se lao' rakandoo losa osi esa sia lete Saitun, naran ‘Getsemani’. Boe ma Yesus nafad'e se nae, “Ama 'endo' mihani ia. Au 'ae 'uu hule-o'e sia naa.”

33 Boe ma Yesus no'e Petrus, Yakob'is, ma Yohanis, fo reu ramalolo' roo E. Mia fai' naa, Yesus ralan named'a susa ma nda malolole' sa. 34 Ana nafad'e se nae, “Rala ngga susa nala seli! Au med'a, na, 'ona' a 'ae' a mate. Ama 'endo' minea sia ia dei.”

35-36 Boe ma Ana lao na'ad'oo' mbei, de sende' lulu-langgan neu rae a, ma hule-o'e nae, “Papa bonggi', e! Mete ma Papa nau, na, 'afi' fee Au lemba doid'oso' naa losa mate 'ona' ia. Mema' Au bub'ulu' 'ae, nda hambu saa fo Papa nda bisa tao sa. De mete ma bisa, na, Papa na'ad'od'oo' hendi doid'oso' ia mia Au. Te 'afi' tungga hihii ngga; tungga 'a Papa hihii na.”

37 Basa ma, Ana bali' nisi' mana tungga katelu na ra, te mana sunggu masambeta ra ena. Ana fafae se, de 'ola' noo Petrus nae, “Hee! Petrus!^h Ho sunggu', do? Au sia naa nda doo' sa, te ama nda bisa minea mbei sa boe! 38 Kukukur mumeu matam dei, fo fela munea moo Au! Mema' hei rala ma ra du'a tao malole', te huu ao-sisi ma ra nda be'i sa. De malole lena' ama hule-o'e, fo mete ma hambu sosob'a-d'od'ou', na, ama nda tud'a sa.”ⁱ

39 Basa ma Yesus neu hule-o'e selu' lao esa fai. De no'e selu' neu Lamatualain, fo 'afi' fee Eni lemba-d'oi doid'oso' naa. 40 Basa ma Ana bali' nisi' mana tungga katelu na ra. Te ara sunggu' selu' fai, huu ara nduar rala seli. Boe ma Ana fafae selu' se, te ara nda rita' rae rataa saa mbali E sa boe.

41 Basa naa, Yesus lao hela se, de neu hule-o'e lao katelun a. Ana bali' de fafae se nae, “Ama fe'e sunggu' fai, do? Dai ena! Fela leo! Huu atahori mana nae seo Au, Atahori Matetu' ia, ana deka ena. Ia naa, ara rae humu Au ena, fo fee neu atahori de'ulaka' ra lima na. 42 Fela leo! Milaa mata ma ra fo mete sob'a sia naa dei! Atahori mana nae seo hendi Au a, nema ena. 'Ima fo teu tandaa too se!”

43 Lele' Yesus fe'e 'ola' na'o naa, 'aib'oi' ma, Yud'as nema noo atahori hetar. Ara rema rendi fela tafa' noo hau 'e'etu', fo rae humu Yesus. Ara tao ta'o naa, tungga parenda' mia moko-monaen Yahud'i ra. Naeni, malangga agama Yahud'i ra malangga na ra, meser agama ra, ma lasi-lasi 'ad'at ra. 44 Yud'as nafad'e mema' neu se nae, “Mete malolole! Au 'id'u see, na, ama humu mala E leo! Atahori fo hei sangga' a, naa Eni ena!”

45 De lele' Yud'as se losa naa ma, ana neu nandaa noo Yesus tute 'a. Natea nae, “Papa Meser!” De holu ma 'id'u E. 46 Boe ma, atahori hetar mata reu, de humu rala Yesus.

47 Boe ma Yesus atahorin esa lesu nala felan, de soe na'etu' atahori esa ndiki roo na. Atahori ma'ahina' naa, agama Yahud'i malangga monaen ate na. 48 Basa ma Yesus 'ola' noo atahori mana rema humu E nae, “Ta'o bee? Ama mae Au ia atahori de'ulaka', do? De 'ima humu Au mendi' felas ma hau 'e'etu'! 49 Tungga fai, Au 'unori nggi sia Lamatualain Ume Hule-o'e Huun, te nda hambu atahori esa sa boe, nema humu Au. 'Ima humu Au leo! Te nenesura' mema' ta'o naa eni' a fai ma'ahulun sia Lamatualain Susura Meumare na.”^j

50 Yesus mana tungga na ra ramatau rala seli. De rela hela mesa' ne.

51 Sia naa o hambu atahori soru esa tungga-tungga Yesus dea na. Ana nalusa aon nendi' teme' 'e'etu' esa. Atahori ra o rae humu e boe. 52 Te ara to'u rala' a teme na. De ana nela noo ma'aholan, huu namatau nae mate.

53 Basa ma, ara to'u rendi Yesus nisi' agama Yahud'i malangga monaen ume na. Sia naa, atahori moko-monaen ra ra'ab'ue ena. Naeni, malangga agama Yahud'i ra malangga na ra, meser agama ra, ma lasi-lasi 'ad'at ra.

54 Lele' ara to'u rendi Yesus, Petrus o keke tungga-tungga dea', losa agama Yahud'i malangga monaen ume na. Ana o nisi' nembeleon rala, de 'endo' dara ai noo atahori mana ranea sia naa ra.

55 Sia ume naa rala, malangga agama Yahud'i ra malangga na ra 'ola-'ola' roo atahori mana 'endo' sia agama mamana ne'etu' ded'ea na. Basa se sangga dala' fo rae fua sala' neu Yesus, huu rae hukun risa e. Te ara nda hambu dalan saa sa boe. 56 Boe ma ara ro'e rala mana sakasii hetar fo rae ra'atutud'a' Yesus. Te ded'ea-'o'ola na ra, esa nda nandaa noo esa sa boe.

57 Boe ma hambu mana sakasii hira fela rambarii', de 'ola' pepeko-leleko' rae, 58 “Hai rena atahori ia 'ola' nae, ‘Dei fo Au ndefa' hendi Ume Hule-o'e Huu' fo atahori rafafela rendi' lima na ra. Te fai telu fai dei fo, Au 'ufefela bali' e, te nda pake atahori liman sa.’”^k 59 Te sira 'o'olan naa, esa nda nandaa noo esa sa boe.

60 Basa ma agama Yahud'i malangga monaen fela nambarii' sia basa atahori mata na ra. De natane Yesus nae, “Atahori hetar kalaak nggo ena. Te saa de ho nee-nee' a?”

61 Yesus nda 'ola' mbei sa boe. Basa ma agama Yahud'i malangga monaen natane selu' E nae, “Mufad'e sob'a dei! Mema' Ho ia, teb'e-teb'e' Kristus, Lamatualain Anan fo Ana helu-fuli eni' ma'ahulun, do?”

62 Yesus nataa nae, “Mema' teb'e! Eni, Au ena. Dei fo basa nggi mita Au, Atahori Matetu' ia, 'endo' sia sorga sia Lamatualain bob'oa 'ona na. Eni koasan manaseli'! Au to'u parenda' 'u'ub'ue 'oo E! Basa dei fo, Au 'onda mia sorga 'oo lelee' a.”^l

63 Lele' agama Yahud'i malangga monaen rena Yesus 'ola' na'o naa ma, ana namanasa, losa ana sid'a nalutu bad'u naru na. Boe ma ana nggasi nafad'e basa atahori mana 'endo' sia mamana ne'etu' ded'eat naa nae, “Ata nda parluu sangga sakasii selu' sa ena! 64 Ama rena noo ndiki ma ra ena, mesa' ne 'ola' na'o naa ena, to? Ana so'u aon dad'i Lamatualain Ana na. Ia ne'emutis! Tungga atoran agama, mete ma atahori so'u aon 'ona' Lamatualain, na, atahori naa musi mate! De ia naa, ama mae mi'etu' ta'o bee?”

Boe ma basa se ra'etu' rae, “Mema' atahori ia sala ena! De ana musi hambu hukun mate!”^m

65 Basa ma atahori hira mata reu, de puras miru neu Yesus. Ara mboti rala matan, de popoko E. Basa ma ara denu E rae, “Mete ma ho Lamatualain mana 'ola-'olan, na, ho rai sob'a. Seka mana tutu nggo?” Basa ma ara parenda atahori mana ranea Ume Hule-o'e Huu' a, fo rema rendi Yesus. Ara rendi Yesus neu, ma ara mbasa ra'amimina' E.

66-67 Lele' naa, Petrus fe'e 'endo' sia ume a nembeleo na. Sia naa o hambu agama Yahud'i malangga monaen ate inan esa. Ana nema nita Petrus dara ai. Ana mete namemeu matan, ma 'ola' nae, “Faa' ra, ho o mu'ub'ue moo Yesus, atahori Nasaret naa, to? Teb'e, to?”

68 Te Petrus nafanii nae, “Hoko'! Ta'o bee de mutane ma'o naa? Au nda 'uhine E sa.” Basa ma, Petrus dea neu nambarii' sia lelesu ine' a. [Nandaa noo lele' naa ma, manu ko'o-kee boe.]ⁿ

69 Basa ma, ate naa nita Petrus fai. De nafad'e atahori mana sia naa ra nae, “Atahori ia, esa mia atahori naa ra boe!”

70 Te Petrus nareresi nae, “Se'u te, ho mulu'! Au nda 'uhine atahori naa sa!”

Nda doo' sa fai ma, atahori laen esa sia naa 'ola' neu Petrus nae, “Hee! Ho fe'e mae leleko' mae ho nda mu'ub'ue moo atahori naa ra sa!? Wee! Basa nggi, atahori Galilea, to?”

71 Te Petrus lab'an selu' nae, “Wee! Au sumba! Au nda 'uhine atahori naa sa!”

72 Petrus fe'e 'ola' na'o naa ma, manu a ko'o-kee lao rua boe. Boe ma Petrus nasaned'a Yesus 'o'olan faa' ra nae, “Manu a nda fe'e ko'o-kee lao rua sa, te ho mufunii Au lao telu ena.”

Ana nasaned'a nala ta'o naa ma, ana nggae ei-ei.