2 Ara losa hofernor ma, ana natane Yesus nae, “Ta'o bee? Ho ia, teb'e-teb'e' atahori Yahud'i Manen, do?”

Yesus nataa nae, “Teb'e. Papa hofernor 'ola' ndaa ena.”

3 Basa ma malangga agama Yahud'i ra malangga na ra 'ola' roo hofernor rae, “Atahori ia tao sala' nda mbei-mbei' a sa!” Boe ma ara rafad'e sala na ra, esa-esa'.

4 Basa ma hofernor natane selu' Yesus nae, “Ho nda rena 'o'ola na ra sa, do? Ara fee sala' naen seli neu nggo. Sob'a mutaa dei!”

5 Te Yesus nda 'ola' saa-saa sa boe, losa hofernor a ndii-ndii' a.

6 Tungga too, lele' atahori Yahud'i ra tao fefeta Paska, na, atahori hetar biasa pili atahori bui esa, fo hofernor mbo'i e. 7 Lele' naa, atahori bui esa, naran Barab'as. Ma'ahulun, ara humu e de tao e bui rala neu, huu ana lab'an mana parenda Roma ra, ma tao nisa atahori boe. 8 Huu fefeta Paska deka-d'eka ena, naa de atahori hetar risi' hofernor Pilatus, de rameli rae, “Papa hofernor! Fai Paska losa ena! Meta ma bisa, na, papa hofernor tulun mbo'i atahori bui esa 'ona' hita biasa na!”

9 Basa ma hofernor 'ola' nae, “Au mbo'i see? Mete ma au mbo'i hendi hei atahori Yahud'i ra manen ia, na, hei nau, do?” 10 Hofernor 'ola' na'o naa, huu ana nahine malangga agama Yahud'i ra malangga na ra roo Yesus nisi' eni, huu ara nda hii E sa, ma mbed'a' rala' roo E.

11 Te malangga agama naa ra dunggu-mbau atahori hetar naa ra, de basa se ro'e mbali hofernor rae, “Hai nda nau mbo'i E sa! Mbo'i hendi' a Barab'as!”

12 Basa ma hofernor natane selu' nae, “Mete ma ta'o naa, au musi tao saa mbali Yesus ia, fo ara ro'e rae, ‘Mane Yahud'i’?”

13 Boe ma basa se rameli randaa rae, “Tao nemate' E! Mbaku E neu hau nggangge'!”

14 Basa ma hofernor natane nae, “Te Ana sala saa? Au paresa' basa ena, te nda hambu salan saa-saa sa boe!”

Te basa se randu rahere' selu' rae, “Tao nemate' E! Mbaku E neu hau nggangge'!”

15 Huu hofernor nae tao namaho'o atahori naa ra rala na ra, naa de, ana mbo'i hendi Barab'as, tungga hihii-nanau na ra. Basa ma ana parenda atahori mana ranea' ra, fo reu filo Yesus rendi' ue.^a Filo basa ma, sold'ad'u ra ha'i rendi E, fo rae reu mbaku risa E sia hau nggangge'.

16 Basa naa ma, sold'ad'u ra nore rendi Yesus nisi' sira nembeleo monae na.^b Sia naa, ara ro'e rala sira nonoo na ra batalion esa. 17 Boe ma ara 'olu bad'u naru mbilas-maranggeo' esa neu Yesus, 'ona' a mane' ra biasa pake. Basa ma, ara ha'i rala hau manggou' danan de hano neu solo'. Boe ma ara ndeni solo manggou' a neu Yesus langgan, de tao ra'amimina' 'ona' sira rae so'u mane feu' pake solo panggat.

18 Boe ma, basa se fee had'a-hormat ne'emimina' neu E rae, “Sod'a', Mane Yahud'i'!” 19 Boe ma ara be'utee 'e'ed'ik fee had'a-hormat neu Yesus. Ma ara puras miru bali-b'ali' neu mata na. Basa ma, ara hemba rasafafali E. 20 Ara ra'amimina' basa E, boe ma ara 'olu hendi bad'u naru' a. De 'olu bali' bad'u na. Basa ma ara rendi E lao hela kota Yerusalem, fo rae reu mbaku E sia hau nggangge' losa mate.

21 Lele' ara lao hela Yerusalem, ma randaa roo atahori esa sia dala' talad'a na. Naran Simon, ana mia kota Kirene. Eni, Aleksander noo Rufus papa na. Ana fe'e nae maso' nisi' Yerusalem, te sold'ad'u ra to'u rala e, de ra'asusuu' e lemba Yesus hau nggangge na.^c 22 Ara nore rendi Yesus losa mamana' esa, naran Golgotaa. (Sosoan nae, ‘mamana langga rui'’.) 23 Sia naa, ara rae fee Yesus ninu oe anggor ma'ei' nenesambor noo mod'o, fo Ana bisa na'atataa' nembeta na. Te Yesus nda nau ninu sa. 24-25 Basa de, ara mbaku ra'alelengga' Yesus sia hau nggangge' a. Boe ma ara raririi hau naa, nandaa noo lii' sio fefetu na. Boe ma sold'ad'u ra lea lot fo rae rahine seka hambu Yesus bad'u na.^d 26 Basa ma ara sura' sia papa' esa, fo rae mbaku neu Yesus langgan fafon 'oi,

Ara pake dala' naa, fo hukun Yesus. 27 Sia naa o, ara mbaku risa atahori na'o rua boe. Esa sia Yesus bob'oa 'onan, ma esa sia bob'oa dii na. 28 [Noo ta'o naa, ara tungga saa mana nenesura' mema' sia Lamatualain Susuran Meumaren 'oi, “Ara tao E 'ona' a atahori de'ulaka'.”]^{e f}

29 Basa atahori mana lao' tungga naa ra, rita Yesus nenembaku' sia hau nggangge'. Boe ma ara kakaler langga na ra de 'ola' raneneut Yesus rae, “Woi! Ho mae, Ho bisa ndefa' Ume Hule-o'e Huu' a. Basa fo mufefela bali' e sia fai telu rala, to?^g 30 Sob'a Ho 'onda mia hau nggangge' a, fo mbo'i hendi aom leo! Mete ma bisa ta'o naa, dei fo hai mimihere mae, Ho mema' Lamatualain Ana na.”

31 Malangga agama Yahud'i ra malangga na ra, ma meser agama ra o raneneut Yesus rae, “Ana tao nasod'a atahori laen, te nda tao nasod'a nala aon sa! 32 Ana 'oi Eni ‘Kristus’, naeni Atahori fo Lamatualain helu mema' mia ma'ahulu na. Atahori laen rae, Eni ia, atahori Isra'el mane na. Mete ma teb'e ta'o naa, na, hela fo Ana 'onda mia hau nggangge' a fo tita dei. Tita dei, fo fe'e bisa tamahere E ena.”

Atahori karua' mana nenembaku' ra'ab'ue roo Yesus sia hau nggangge' ra o tungga raneneut E boe.

33 Basa naa ma, ma'ahatu' a tatana nala mamana' naa mia reorendu' losa lii' telu bob'o na.

34 Lii' telu bob'on boe ma, Yesus nameli nendi' ded'ea Aram nae, “Eloi! Eloi! Lema sabaktani?” (Sosoan 'oi, “Au Lamatua ngga! Au Lamatualain ngga, e! Ta'o bee de Papa hiru' musud'ea hela Au ta'o ia?”)^h

35 Hambu atahori hira deka-d'eka sia naa rena Yesus haran, ma rae, “We! Rena dei. Ana no'e Elia, Lamatualain mana 'ola-'olan ma'ahulu na!” 36 Basa ma atahori esa nela-nela' neu ha'i lolombu', de dombo neu oe anggor ma'ei' a rala. Boe ma ana dunggu lolombu' naa neu teteas tonggon, de loo neu Yesus nud'un fo Ana musi. Basa ma, atahori naa 'ola' nae, “Tahati fo mete sob'a! See bub'ulu' mbei ma Elia nema na'onda' E mia hau nggangge' naa.”ⁱ

37 Basa ma Yesus nameli selu' fai, boe ma Ana mate.

38 Sia Ume Hule-o'e Huu' a, hambu teme pepele monae' esa mana londa' bab'ata Lamatualain Kama Meumare na. Lele' 'etu Yesus hahaen, ma teme pepele' naa sika neu rua, mia ata' losa rae'.^j

39 Sia Golgotaa, hambu malangga sold'ad'u' esa nambarii' deka Yesus hau nggangge na. Lele' ana nita Yesus mamaten, ma ana nggengger. De nae, “Awii! Atahori ia, mema' teb'e-teb'e' Lamatualain Anan, e!”

40-41 Hambu ina' hira rita Yesus mamaten mia 'a doo-d'oo'. Ma'ahulun ara tao mata' neu Yesus se sia Galilea. Ina' naa ra, naeni: Salome, Maria mia kambo' Magdala, Maria esa fai (naeni Yakob'is soru' a noo Yoses^k maman), ma ina' laen hetar mana rema tungga sia Yerusalem ramalolo' roo Yesus.^l

42-43 Basa ma, hambu atahori esa sangga dala' fo nae na'onda' Yesus ao-sisin mia hau nggangge' naa. Atahori naa, naran Yusuf. Ana mia kota Arimatea nema. Ma ana o mana nggero-furi sia agama Yahud'i mamana ne'etu' ded'ea na. Eni ralan malole'. Ma ana 'aka' nahani Lamatualain parendan nenema na.

Yesus mamaten naa, nandaa noo hari lima. De mbila' neu ma, nandaa noo atahori Yahud'i ra fai hule-o'e na. Naa de, hari lima naa, Yusuf nae na'onda' na'ahulu' Yesus ao-sisi na. De ana nambararani ralan, fo neu no'e Yesus ao-sisin mbali hofernor Pilatus. 44 Lele' hofernor rena Yusuf nono'en, ma ana titindindii. Boe ma nae, “Awii! Atahori naa mate haelai! Au 'ae ne'oko nda dad'i ta'o naa sa!”

Boe ma ana denu atahori reu ro'e malangga sold'ad'u' a, de natane nae, “Ta'o bee! Yesus mate ena do, fe'e hoko'?”

45 Malangga sold'ad'u' a nataa nae, “Mema' Ana mate eni' a faa' ra, papa.” Hofernor rena ta'o naa, ma ana hela Yusuf neu ha'i nendi Yesus ao-sisi na.

46 Basa de Yusuf neu hasa teme naru mafelit. Boe ma ana Golgotaa neu, de na'onda' Yesus ao-sisin mia hau nggangge'. Ana mboti malolole ao-sisi' noo tenaa nendi' teme feu' naa. Lele' naa, ara fe'e paa basa rates sa sia mbuku fatu'. Boe ma Yusuf se 'o'o rala Yesus ao-sisin, de tao rates naa rala neu. Boe ma ara lolir rala fatu beb'ela monae' esa, de tatana ralolole neu rates naa bafa na. Boe ma Yusuf se bali'.

47 Lele' naa, Maria mia Magdala noo Maria laen (naeni Yoses maman) o, tungga losa naa boe. Ru'a se mete matalolole fo rasaned'a mamana' fo ara tao Yesus ao-sisi na.