2 Au koa nggi, huu mae 'ona bee o, hei misined'a au mikindoo 'a. Boe ma ama fe'e tao tungga basa dala' fo 'unori neu nggi' a. Naa malolen seli! 3 Te au 'ae fee nesenened'a' neu nggi so'al dala' esa ta'o ia: 'afi' lilii' hei mia bee 'ima. Tou' mana namahere' a, na'oka sia Kristus mana dad'i eni malangga na. Ina' dad'i lao' mia tou'. Boe ma Kristus nema mia Lamatualain.^b

4 Naa! Tou' 'afi' mboti langgan lele' ana hule-o'e ma dui-b'engga Lamatualain hehelu-fufuli na. Huu naa 'ona' eni na'amamae' Kristus, huu eni nda fee had'a-hormat tungga hita had'a-d'alan sa. 5 Te ina' musi mboti langgan lele' ana hule-o'e, do lele' ana dui-b'engga Lamatualain hehelu-fufuli na. Te hoko' na, naa 'ona' ana tao na'amamae' saon, huu ana nda fee had'a-hormat tungga hita had'a-d'alan sa. Boe ma ana o tao na'amamae' bali' aon boe, 'ona' ina' mana 'eu hendi langga fulu na. 6 Huu mete ma hambu ina' nda nau mboti langgan sa, fo dad'i tatanda' 'oi, eni fee had'a-hormat neu saon sa, na, malole lena' nggute na'a'e'eku langga fulu na. Te mete ma ana med'a nae langga mbolin tao eni mae, malole lena' mboti langga na.

7 Sob'a du'a ta'o ia: tou' nda parluu mboti langgan sa, huu Lamatualain tao tou' ra tungga Eni mata-ao na. Naeni de tou' dad'i buna-b'oa' mana natud'u Lamatualain mandete-masa'a na. Boe ma ina' dad'i buna-b'oa' mana natud'u tou' ra mandete-masa'a na.^c 8 Huu lele' Lamatualain na'ad'ad'ad'i' raefafo' ia, Ana nda tao tou' mia ina' sa. Te Ana tao ina' mia tou' a. 9 Boe ma Ana nda tao tou' fee ina' sa. Te Ana tao ina' fee tou'.^d 10 Dad'i malole lena' ina' mboti langgan, fo atahori bub'ulu' rae, ana pake eni hak na fo hule-o'e ma dui-b'engga Lamatualain hehelu-fufulin tungga matetu na. Ate mana mia sorga ra o bub'ulu' ta'o naa boe. 11 Te mete ma nenepa'a' roo Lamatualain, na, ina' noo tou' nda rambarii' mesa' se sa. 12 Mia teterin, Lamatualain tao ina' mia tou'. Te basa naa ma, ina' mana bonggi nala tou'. Ma Lamatualain mana tao de basa' e dad'i.

13 Ama du'a sob'a dei! Mete ma ina' hule-o'e mbali Lamatualain, ma nda mboti langgan sa, tungga hei, na, naa malole', do hoko'? 14 Tungga hei had'a ma sia kota Korintus, mete ma tou' langga fulu naru', naa tao na'amamae' e, do? 15 Te mete ma ina' langga fulun naru' eni malolen seli, to? Lamatualain fee ne langga fulu naru' fo mboti nala langga na. Naa, fo matetu'.

16 Te mete ma hambu atahori rae rareresi rakandoo 'a so'al dala' ia, misined'a te, mia hai mana dad'i malangga, ma mia atahori sarani' ra sia bee-b'ee, ia hai had'a-d'ala ma ena.

17 Lele' ia, au 'ae 'ola' dala' esa fai. Sia dala' ia, au nda koa-b'o'u nggi sa. Huu lele' hei mi'ib'ue, ama nda tao tungga ndoo-tetu' a sa, te ama boe mimue-mianggii' fai.

18 Fefeun, au rena 'oi, lele' hei mi'ib'ue tao kasasi', ama bingga-b'anggi. Ruma mia au rena' naa ra, ne'o teb'e. 19 (Mema', huu hei esa-esa' moo nononggom naa, dei fo naa natud'u seka mana teb'e-teb'e' rena neu hita Malanggan, ma seka nda nau rena neu E sa.)

20 Lele' hei atahori sarani' ra mia mi'ib'ue sia Lamatua' mein, hei musi misined'a Lamatua' Yesus. Naa fo matetu'. Te hei nda tao ta'o naa sa. 21 Eni bukti na, naeni lele' hei 'endo' mia, ruma nda rahani atahori laen ra sa, ruma raa noo bare-na'o, ma ruma fai rinu mafu. De atahori laen ra ruma nda hambu sa, de ara ndoe rala seli. 22 Ta'o bee ia!? Hei nda maume' fo mia-minu sia naa sa, do? Do, ama mi'ena masud mae tao milutu Lamatua' atahori sarani na ra, nara malolen, do? Do, mae tao mi'imamae' atahori mana tud'a-loloe' ra? Hei nau au 'ola' ta'o bee fai? Nau au koa nggi sia dala' ia, do? 'Afi' harap!

23 Lamatua' Yesus mesa' ne nafad'e mema' dala' ia neu au, de au fee neu nggi fai. 'Oi, lele' atahori rahehere rae tao risa E, tetemba' naa, Ana ha'i nala roti balok esa. 24 Boe ma Ana hule-o'e no'e makasi mbali Lamatualain. Basa de Ana nafad'e ana mana tungga na ra nae, “Mia roti ia. Huu ia Au ao ngga. Dei fo ara tao ralutu ao ngga fee neu nggi. Dad'i ama musi mia roti ia fo misined'a Au.”

25 Lele' ara raa basa ma, Ana o tao 'ona' naa boe neu nggalaas oe anggor nae, “Oe anggor ia sosoan, naeni: Lamatualain nau pa'a hehelu-fufuli feu' noo nggi. Boe ma Au musi fee raa ngga nandali losa mate dei, naa fo hehelu-fufuli' naa fe'e dad'i ena. De mete ma hei minu oe anggor 'ona' ia, na, musi misined'a Au mamate ngga.”^e 26 Lele' hei mia roti 'ona' ia ma minu mia nggalaas 'ona' ia, losa Lamatua' bali' nema, naa 'ona' hei dui-b'engga selu' so'al Eni mamate na.

27 Naa! Huu naa, mete ma hambu atahori naa roti ma ninu anggor mia nggalaas naa, fo nasaned'a hita Lamatuan, te ralan nda matetu' sa, na, dei fo Lamatualain hukun e. Huu naa, Lamatua' Yesus aon ma raa na. Dad'i mete ma atahori ralan nda matetu' sa, na, ana nda nandaa naa ma ninu sia naa sa, huu naa tao ne'emutis neu Lamatua' Yesus. 28 Malole lena', atahori esa-esa' paresa' ralan dei. Basa fo, mete ma ana namahere teb'e nae ralan ndoos ena, dei fo fe'e naa roti ma ninu oe anggor naa ena. 29 Te hambu atahori raa ma rinu te rala na ra nda matetu' sa. Huu ara du'a rae, “Yesus mamaten nda na'ena sosoan saa sa boe. Yesus aon nda na'ena sosoa' neu au sa.” De atahori 'ona' naa lemba-d'oi sosoe' ao na ra, huu dei fo ara hambu huku-d'oki'. 30 Naeni de sia talad'a ma ra, hambu ruma nda be'i sa, ruma 'aka' hed'i-hed'i' a, ma ruma mate ena.

31 Te mete ma hita paresa' malolole rala ta ra dei, na, ata nda hambu huku-d'oki' 'ona' naa sa. 32 Mete ma hita Lamatuan huku-d'oki nggita, Ana tao ta'o naa fo nanori nggita tungga dala ndoo-tetu' a. Huu Ana nda nau hita hambu huku-d'oki', boe ma tambalutu 'ona esa' too basa atahori sia raefafo' ia sa.

33 Dad'i toronoo susue ngga ra, e! Lele' mi'ib'ue fo mia sia Lamatua' mein, na, esa musi nahani esa. 34 Mete ma ruma ndoe rala seli, na, malole lena' raa rala mbei sia ume dei. Basa fo, mete ma ama mi'ib'ue mii esa, na, ama 'afi' hambu huku-d'oki'.

So'al ded'eat laen fo hei mitane' ra, hela au 'eti fo au ator.