4 Lele' Yesus rena hara' naa, ma Ana 'ola' nae, “Hed'is ia nda tao e mate sa. Lamatualain nae natud'u manaselin nendi' dala' ia. Naa fo atahori ra so'u rananaru Au, naeni Lamatualain Ana na.”

5 Yesus sue Marta, Maria, ma ru'a se naan, Lasarus. 6 Lele' Ana rena 'oi, Lasarus namahed'i, Ana fe'e leo fai rua fai sia loe Yordan bob'oa na. 7 Boe ma Ana nafad'e neu ana mana tungga na ra nae, “'Ima fo ata teu selu' sia Lasarus mamanan sia profinsi Yud'ea.”

8 Te Ana mana tungga na ra rasapaa rae, “Papa Meser. Fe'e lai-lai' ia, atahori Yahud'i ra malangga na ra rae mbia risa Papa mia naa. De ia naa Papa mae bali' naa muu fai, do?”

9 Boe ma Yesus nataa nae, “'Afi' mimitau, e! Fais-fais na, relo a naronda mia fefetun losa bob'o'. Naa hambu jam sanahulu rua, to? Mete ma lao' sia manggarelo' a, na, atahori nda ra'atunu sa. Huu manggarelo' a naronda sia raefafo' ia, fo atahori mete rita. 10 Te mete ma atahori lao' sia ma'ahatu' a, na, ana na'atunu nasafafali, huu ana nda na'ena manggarelo' a sa.”^b

11 Yesus 'ola' basa ta'o naa, ma Ana nafad'e nae, “Hita nonoon Lasarus sunggu' ena. Te dei fo Au 'ufefela bali' e.”

12 Boe ma ana mana tungga na ra rae, “Papa. Mete ma ana sunggu' a, na, eni sosoan, dei fo ana malole bali', to?”

13 Ara 'ola' ta'o naa, huu ara du'a rae Yesus 'ola' so'al sunggu' biasa' a. Tao-tao te, Ana 'ola' so'al Lasarus mamate na. 14 Basa ma, Yesus nafad'e relo-relo nae, “Ta'o ia. Lasarus mate ena. 15 Au 'umuho'o Au nda sia naa sa, lele' ana nda fe'e mate sa, naa fo hei 'afi' susa. Huu saa nae dad'i lele' ia, tao nggi bisa mimihere Au. 'Ima fo ata teu sia naa leo!”

16 Basa ma Tomas, fo ara ro'e rae, “ana dua' ra,” nafad'e ana mana tungga laen ra nae, “'Ima leo! Malole lena' basa nggita tungga teu, fo hela ata mate ta'ab'ue too E.”

17-19 Basa ma Yesus se lao kambo Betania reu.

Kambo' naa, doon 'aka' kilo telu 'a mia kota Yerusalem. Atahori Yahud'i hetar rema mia naa de beb'e'ek ma tao manggatetee Marta noo Maria rala na.

Lele' Yesus se losa naa, dei de ara fe'e bub'ulu' rae, atahori ra'oi hendi Lasarus fai haa ena.

20 Basa de, lele' Marta rena 'oi, Yesus nema ena, ma ana dea neu nandaa noo Yesus. Te Maria neu 'a ume rala. 21 De Marta nafad'e Yesus nae, “Ad'uu, Papa, e! 'Ona' Papa sia ia, na, tantu naa ngga nda mate sa. 22 Te au o 'umuhere boe, Papa nau no'e saa mbali Lamatualain, tantu Papa hambu.”

23 Boe ma Yesus nafad'e e nae, “Marta! Dei fo naam nasod'a bali'.”

24 Marta nataa nae, “Au 'uhine, dei fo sia fai matete'en, mete ma Lamatualain tao basa atahori mana mate' ra rasod'a bali', na Ana tao nasod'a bali' au naa ngga boe.”

25 Boe ma Yesus nafad'e nae, “Au mana tao atahori mana mate' ra rasod'a bali'. Au o mana fee masoi-masod'a ndoo-tetu' a boe. Dad'i' atahori mana ramahere neu Au, dei fo ana hambu masod'a' naa, mae ana mate ena. 26 Boe ma atahori mana hambu masod'a' ndoo-tetu' naa, ma ramahere Au, dei fo rasod'a rakandoo. Marta, mumuhere Au 'o'ola ngga, to?”

27 Ana nataa nae, “Ia, Papa! Au 'umuhere 'ae, Papa ia, naeni Kristus, Atahori fo Lamatualain dud'u mema' mia fai ma'ahulun ena. Papa ia, Lamatualain Anan, Ana helu basa nae haitua nema sia raefafo' ia.”

28 Marta 'ola' basa na'o naa, ma ana lao bali'. De ana no'e 'od'in Maria, fo 'aka' ru'a se, ma nafad'e e nae, “Papa Meser nema ena. Ana nae nandaa noo nggo.” 29-31 Rena ta'o naa ma, Maria fela neu' ena de neu sangga Yesus. Atahori Yahud'i mana be'e ranea roo Maria sia ume rala, rita e fela de nela' dea neu. Basa ma ara tungga dea na. Huu ara du'a rae, ana nae neu nggae sia rates a.

Lele' naa, Yesus se nda fe'e kambo' rala reu sa. Ana fe'e mia mamana' fo Marta nandaa noo E. 32 Lele' Maria losa mamana' naa, ma nita Yesus. De ana sende' lulu-langgan sia Yesus ei na. De nafad'e nae, “Ad'uu, Papa, e! 'Ona' Papa sia ia naa, tantu naa ngga nda mate sa.”

33 Lele' Yesus nita e nggae, ma atahori Yahud'i mana tungga' ra o nggae ei-ei, boe ma Ana namanasa sia ralan ma susa. 34 Ana natane nae, “Hei mi'oi e sia bee?”

Ara rataa rae, “'Uma, Papa! 'Uma fo mete neu' ena.”

35 Boe ma Yesus nggae. 36 Basa ma atahori Yahud'i ra 'ola-'ola' rae, “Mete neu' ena. Ana sue naseli' Lasarus!”

37 Te hambu ruma fai 'ola-'ola' rae, “Atahori ia, mana na'ahahai' atahori poke' a matan, de nita bali'. Ta'o bee de Ana nda bisa bab'aa nala Lasarus fo Ana nda mate sa?”

38 Yesus ralan named'a beran seli. Boe ma Ana neu deka-d'eka sia luat fo ara ra'oi Lasarus. Ara tatana luat a rendi' fatu monae' sa. 39 De Yesus denu atahori mana sia naa ra nae, “'O'o hendi fatu ia, fo soi hendi luat ia lelesun dei!”

Te Marta, naeni atahori mana mate' a feton nae, “Awe', Papa! Ana mate fai haa ena, na! Tantu ma'afoo ena.”

40 Boe ma Yesus fee ne nesenened'a' nae, “Musuned'a faa' ra, to? Au 'ufad'e mema' 'ae, mete ma Marta teb'e-teb'e' mumuhere Au, dei fo bisa mita Lamatualain manaseli na.”

41 Basa ma hambu atahori hira soi fatu a mia luat a. Boe ma Yesus mbali lalai a, ma Ana nae, “Ama'! Au 'o'e makasi, huu Ama' rena Au. 42 Au bub'ulu' eni' a mia dalahulun 'ae, Ama' rena Au mukundoo 'a. Te Au 'ola' 'ona' naa lele' ia, naa fo atahori mana rambarii' sia ia ra bub'ulu' rae, Ama' mana denu Au.” 43 Lele' Ana 'ola' basa na'o naa, ma Ana nameli nahere' nae, “Lasarus! Dea 'uma leo!”

44 Boe ma atahori mana mate' naa dea nema mia luat a. Hambu teme mamates nenemboti' nala ei-lima na ra. Ma hambu teme' bab'ata nala matan boe. Ma Yesus denu atahori mana sia naa ra nae, “Si'u hendi teme' naa dei, naa fo ana lao'!”

45 Lele' ara rita Yesus tataon naa ma, atahori Yahud'i mana rema be'e roo Maria ra, ramahere Yesus. 46 Te hambu ruma fai reu randaa roo atahori partei Farisi ra, de rafad'e se Yesus tatao na.

47 Basa naa ma, malangga agama Yahud'i ra malangga na ra roo atahori Farisi ra, ra'ab'ue de ara 'ola-'ola' sangga dala'. Ara ratatane rae, “Atahori naa tao manad'ad'i manaseli' mata'-mata'! Dad'i hita musi tao ta'o bee fai? 48 Huu mete ma hita hela E neu' ena, na, dei fo basa atahori ramahena neu E 'ona' sira mane na. Noo ta'o naa, sold'ad'u mana parenda Roma ra, dei fo rema tao ralutu hita Ume Hule-o'e Huun noo hita atahori na ra.”

49 Too' naa, Kayafas dad'i agama Yahud'i malangga monae na. Ana 'ola' nae, “Nggoa', e! Hei nda mihine saa-saa sa boe! 50 De malole lena' soa' neu nggi, mete ma hambu atahori esa' a mate fee neu basa atahori. Mete ma hoko', dei fo sold'ad'u Roma ra ralutu hendi basa atahori Yahud'i ra!” 51 Kayafas nda 'ola' tungga 'aka' mesa' ne hihiin sa. Lamatualain pake bafan, huu eni dad'i agama Yahud'i malangga monaen sia too' naa. Naa de Kayafas nafad'e mema' nae, dei fo Yesus mate soa' neu basa atahori Yahud'i ra. 52 Tao-tao te, Ana nda mate soa' neu 'aka' atahori Yahud'i ra sa, te soa' neu basa Lamatualain ana na ra mana sea-saranggaa sia raefafo' ia. Dei fo Ana tao basa se dad'i nusa' esa isi na.

53 Huu Kayafas 'o'olan naa, naeni de, eni' a mia lele' naa, atahori Yahud'i ra malangga na ra sangga dala' rae tao risa Yesus.

54 Dad'i Yesus nda lao' relo-relo sia atahori Yahud'i ra malangga na ra talad'an na ra sa ena. Ana noo ana mana tungga na ra lao risi' kota esa, naran Efraim, mana deka-d'eka sia mamana rou'. Boe ma ara leo ra'atataa' sia naa.^c

55 Lele' naa, fai Paska agama Yahud'i ra deka-d'eka ena. Biasa na, atahori hetar mia dea' rema ra'ab'ue sia kota Yerusalem, fo tungga fefeta Paska sia naa. Ara losa ra'ahulu', fo tao rameu ao na ra tungga agama hohoro-lalane na. 56 Atahori hetar mana rema sia Yerusalem, sangga Yesus sia naa. Lele' ara rambarii' sia Ume Hule-o'e Huu' a sod'an, ara ratatane rae, “Tungga hei naa, ta'o bee? Hei du'a, na, Yesus nae nema tungga fefeta agama, do hoko'?” 57 Te malangga agama Yahud'i ra malangga na ra roo atahori Farisi ra parenda ena rae, “Mete ma hambu atahori bub'ulu' Yesus sia bee, na, mifad'e hai dei!” Tao-tao te, ara ra'ena masud rae humu E.