3 Mia Yesus ana ded'enu kasanahulu rua na ra, esa naran Yud'as Iskariot. Lele' malangga agama Yahud'i ra malangga na ra sangga dala' rae tao risa Yesus, nitu ra malanggan maso' nisi' Yud'as rala na. 4 Basa ma, ana neu sangga malangga agama ra malangga na ra ma malangga mana nanea Ume Hule-o'e Huu' a. Ana nae ma'ira' fo seo hendi Yesus neu se. 5 Lele' malangga ra rena Yud'as 'ola' ta'o naa, ma, ara ramaho'o rala seli. Ara helu rae, “Neu! Mete ma mae seo Yesus neu hai, tantu hai bae.” 6 Yud'as o na'ahei' boe. Boe ma ana sangga kaka'e' fo seo nee-nee hendi Yesus neu se, naa fo atahori hetar 'afi' rahine.

7 Atahori Yahud'i ra fai malolen losa, de ara rae mbau bib'i lombo ana' fo tao fefeta Paska. 8 Basa ma, Yesus denu Petrus noo Yohanis nae, “Ru'a nggi mi'ihulu', fo sad'ia hela nanaat fee nggita fo taa fefeta Paska ta'ab'ue.”

9 Boe ma ru'a se ratane rae, “Ama'! Hai musi mii sad'ia mei sia bee?”

10 Ana nataa nae, “Mete ma hei kota Yerusalem rala mii, dei fo hei mindaa moo tou' esa nasaa nggusi oe. Ama tungga e losa ume. 11 Mifad'e tenu ume' a sia naa mae, ‘Hai Ama Meser ma no'e kama fo nae tao fefeta Paska noo ana ded'enu na ra sia rala. Sia, do?’ 12 Dei fo tenu ume' a dud'u fee nggi kama loa' esa sia tad'a' ata'. Ana sad'ia nala kama naa ena. Hela' a ru'a nggi mii fo sad'ia nanaat neu naa.”

13 Basa de ru'a se reu. Boe ma rita basa saa fo Yesus nafad'e mema' neu se ena. De ru'a se sad'ia nanaat Paska mia naa.

14 Lele' basa' e nenesad'ia' ena ma, Yesus se losa. Ana 'endo' sia mei a, ma ded'enu na ra o 'endo' boe, de raa fefetas. 15 Boe ma Yesus nafad'e se nae, “Au 'ae' a doo bee fo 'endo' 'ua fefeta Paska ia 'oo nggi, na'ahulu mia Au doid'oso ngga. 16 Misined'a ia malolole. Huu basa ia, na, Au nda 'endo' 'ua selu' nanaat fefeta Paska 'oo nggi sa ena. Dei fo atahori rahine relo-relo rae, Ama' to'u parenda', dei fo Au fe'e 'ua selu' fefetas fai.”

17 Basa ma Ana boti' nggalaas nene'isi oe anggor sia rala. Boe ma Ana no'e makasi neu Lamatualain, ma loo nggalaas neu se. Ana 'ola' nae, “Simbo nggalaas ia, fo esa-esa' minu. 18 Misined'a, e! Eni' mia tetemba' ia, Au nda 'inu oe anggor sa ena. Dei fo atahori rahine relo-relo rae, Ama' to'u parenda', dei fo Au fe'e 'inu selu' fai.”

19 Boe ma Ana to'u nala roti bue' sa, ma no'e makasi neu Lamatualain. Basa ma, Ana bib'ib'i roti a, de loo neu se. Ana 'oi, “Roti ia, Au ao-sisi ngga fo Au fee neu basa nggi. Mete ma mia roti ia, na, hei musi misined'a Au.”^b 20 Lele' ara raa basa, ma Ana ha'i nala nggalaas nene'isi' noo oe anggor. Ma Ana 'ola' nae, “Anggor ia, Au raa ngga, mana nenembo'a' fo fee nggi masoi-masod'a'. Lamatualain pake raa' ia fo tao hehelu-fufuli feu' noo nggi.

21 Te besa-b'esa, hambu atahori sa 'oras ia 'endo' naa na'ab'ue sia mei ia, dei fo ana seo hendi Au.^c 22 Mema' Au, Atahori Matetu' a, musi mate tungga Lamatualain hihii-nanaun. Te atahori mana seo hendi Au a, besa-b'esa! Huu dei fo ana lemba-d'oi sosoen!”

23 Yesus ana ded'enu na ra rena rala ma esa natane esa rae, “Te seka mana nae tao de'ulaka' neu E ta'o naa e?”

24 Boe ma Yesus ana ded'enu na ra mulai rareresi rae, seka mia sira e monae' lena'.^d 25 Te Yesus 'ai se nae, “Sia nusa-nusa' nda mana rahine Lamatualain sa, mane' ra tuni-ndeni rauinggu na ra ma parenda se ra'alelena'. Tao-tao te ara nau fo rauinggu na ra ro'e se rae, ‘Ama' mana tulun rauinggu.’ 26 Te ama 'afi' ta'o naa. Seka nau dad'i atahori monae', masod'an musi teb'e-teb'e' dad'i 'ona' atahori anak e, fo tulu-fali basa atahori. Ma seka nau dad'i malangga musi tulu-fali 'ona' atahori ded'enu' ra.^e 27 Ama du'a sob'a, atahori monaen a, seka? Atahori mana 'endo' sia mei a, do, mana lole-lau mei a? Ne'o ko atahori mana 'endo' a, eni atahori monaen, to? Te Au ia nda tao ao ngga ta'o naa sa. Au 'uma fo tulu-fali nggi. ^f

28 Hei ia ra mi'ib'ue moo Au mikindoo 'a lele' Au hambu doid'oso'. 29 Au Ama ngga so'u nala Au fo to'u parenda' sia Nusa' namo na. Dad'i ia naa Au so'u nggi boe, 30 Naa fo hei o 'endo' mia mei esa moo Au sia sorga. Au o fee nggi koasa fo ama to'u parenda' sia leo kasanahulu rua' mana sia Isra'el ra boe.”^g

31 Basa ma Yesus nafad'e Petrus nae, “Petrus, Petrus. Nitu ra malanggan nae tao saranggaa basa hei moo Au, 'ona' atahori tai isi' fo here hendi are taa' mia isi'^h 32 Te Au hule-o'e fee nggo, Petrus, fo mumuhere mukundoo neu Au. Dei fo mete ma ho bali' 'uma misi' Au, na, musi tao manggatee toronoo ma ra rala na ra.”

33 Boe ma Petrus nataa nae, “Hoko', Ama'! Au nda lao hela Ama' mbei sa boe. Au sad'ia maso' bui rala 'uu 'oo Ama'. Mae mate 'u'ub'ue 'oo Ama' o, malole boe.”

34 Te Yesus nataa nae, “Petrus! Rena malolole. Tetemba' ia, manu ra nda fe'e ko'okee sa, te ho mufunii Au lao telu ena mae, ho nda muhine Au sa.”

35 Basa ma, Yesus 'ola' noo se nae, “Fai' naa, lele' Au denu nggi mii mifad'e Hara-lii Malole ngga sia bee-b'ee, Au 'ufad'e 'ae ama 'afi' mendi doi', kapi', boe ma lao-pei'. Lele' naa, hei to'a saa?”

Boe ma ara rataa randaa rae, “Fai' naa, hai nda to'a saa sa boe!”ⁱ

36 Basa de Ana 'ola' fai, nae “Te ia naa laen ena. Mete ma hei madoi', na, mendi. Mete ma tas sia, na, mendi boe. Mete ma fela tafa' nese, na, mii seo bad'u ma ra esa, fo hasa. 37 Huu atahori Yahud'i ra rae Au ia atahori de'ulaka'. De mbeifen te ara rema to'u Au ena. Te naa nandaa noo ba'i Yesaya sura' mema' ena, nae:

38 Ara rafad'e rae, “Ama'! Hai mendi felas rua.”

Boe ma Yesus nataa nae, “Dai ena. Sud'i boe 'ola' naa leo!”

39 Ara raa basa fefeta Paska ma, Yesus noo ana ded'enu na ra lao lete Saitun reu, 'ona' fai mana lao' ra boe. 40 Losa naa ma, Ana nafad'e se nae, “Hei musi hule-o'e naa fo 'afi' hambu sosob'a-d'od'ou'.”

41 Basa de Ana dinggo' hela se mbei. Ana lao' na'ad'oo' mbei, ma sende' lulu-langgan de hule-o'e nae, 42 “Ama'! Mete ma Ama' nau, na, mu'ud'od'oo' hendi doid'oso' ia mia Au. Te 'afi' tungga Au hihii-nanau ngga; tungga 'a Ama' hihii-nanau na.” 43 [Basa ma Lamatualain aten esa mia sorga nema tao manggatee rala na. 44 Huu Ana doid'oso nita' mamaten, losa mbusan titi 'ona' raa' a tititin boe.]^k

45 Hule-o'e basa ma Ana neu nandaa noo ana ded'enu na ra. Te mana sunggu' ra, huu ara bengge ma rala na ra susa. 46 Boe ma Yesus 'ai se nae, “Naa! Ta'o bee de hei sunggu'?! Malole lena' hei hule-o'e fo 'ita' sosob'a' nema o, hei nda tud'a sa.”

47 Yesus fe'e 'ola' ta'o naa, ma Yud'as (fo esa mia ana ded'enu kasanahulu rua na ra), nema noo atahori hetar. Ana nema deka-d'eka Yesus fo nae holu ma 'id'u E. 48 Te Yesus 'ai e nae, “Wii, Yud'as! Mae seo Atahori Matetu' a noo 'a 'i'id'u', do?”

49 Lele' Yesus ana ded'enu laen na ra rahine Yud'as dud'u'a de'ulakan 'ona' naa, ma ratane Yesus rae, “Ama'! Hai lab'an se leo, do? Huu hai mendi felas.” 50 Boe ma esa mia sira e lesu felan, de soe 'etu atahori naa ra esa ndiki 'ona na. Atahori naa, agama Yahud'i malangga monaen ate na.

51 Te Yesus nataa nae, “Miloe' leo! 'Afi' lab'an se!” Boe ma Ana nggama atahori naa ndikin, de tao nahai' e.

52 Atahori mana rema humu Yesus, naeni: malangga agama Yahud'i ra malangga na ra, lasi-lasi 'ad'at roo mana manea Ume Hule-o'e Huu' a, ma atahori laen ra fai. Yesus natane se nae, “Ta'o bee? Hei du'a mae Au ia, atahori de'ulaka', losa hei 'ima humu Au mendi' fela tafa' ma hau 'e'etu', do? 53 Tungga fai Au 'unori nggi sia Ume Hule-o'e Huu' a, te nda hambu atahori esa o nema humu Au sa boe. Te hela neu! Ia, hei fai ma. Huu 'oras ia nitu ra malanggan koasan ia!”^l

54 Basa ma ara humu rala Yesus, de lea roo E nisi' agama Yahud'i malangga monaen ume na. Petrus o keke tungga-tungga dea' 55 Sia ume sod'an atahori tao ai monae'. Petrus o neu 'endo' dara ai sia naa boe. 56 Ate ina' esa nita Petrus 'endo' deka ai a. Ana mete namemeu Petrus matan, basa ma nafad'e atahori laen mana sia naa ra nae, “Hee! Atahori ia o tungga-tungga' Yesus boe!”

57 Te Petrus nafanii nae, “Hoko'! Au nda 'uhine atahori naa sa. Ho muhine saa?”

58 Nda doo' sa ma atahori esa puik nita Petrus, ma 'ola' nae, “Mema', ho ia, Yesus atahorin esa, to?”

Te Petrus nareresi nae, “Hoko'! Ho tao leli!”

59 Mbei ma 'ona' jam esa fai ma, atahori laen esa 'ola' nae, “Woi! Au bub'ulu', atahori ia, Yesus ana ded'enun esa, huu eni atahori Galilea.”

60 Te Petrus nafanii nahere' nae, “Ho peko-leleko'!” Petrus 'ola' ta'o naa ma, manu o ko'okee boe.

61 Ma Yesus heo' dean, de mete e. Boe ma Petrus nasaned'a Yesus 'o'olan faa' ra na nae, “Tetemba' ia, manu ra nda fe'e ko'okee sa, te ho mufunii Au lao telu ena.” 62 Petrus nasaned'a nala ta'o naa ma, ana lao dea neu mia mamana' naa, ma nggae mesu'ud'u.

63 Basa naa ma, atahori mana ranea Yesus mulai ra'a'e'ei' ma momoko ra'amimina' E. 64 Boe ma ara bab'ata matan rendi' teme', ma ratane rae, “Woi! Mete ma ho Lamatualain mana 'ola-'olan, na, mufad'e sob'a! Seka mana tutu nggo?” 65 Basa ma ara ole-rarai E.

66 Fe'e fefetu ana', te malangga agama Yahud'i ra malangga na ra, meser agama, roo lasi-lasi 'ad'at ra ra'ab'ue fo rae paresa' Yesus ded'ea na. Ara denu atahori lea roo Yesus nisi' mamana nggero-furi ded'eat agama. 67 Lele' Ana rala neu, ma ratane mbali E rae, “Mufad'e sob'a dei! Mema' teb'e-teb'e' Ho ia Kristus, do?”

Te Ana nataa nae, “Mae Au 'utaa teb'e o, hei nda mimihere sa. 68 Ma mete ma Au 'utane bali' nggi dala' esa, tantu hei o nda mitaa sa boe. 69 Nda doo' sa te, Lamatualain nae pake koasa manaselin fo so'u Au, Atahori Matetu' ia, ata' 'uu. Basa naa, Au 'endo' sia bob'oa 'onan, fo parenda 'u'ub'ue 'oo E.”^m

70 Rena ta'o naa ma, basa se ratane rae, “Mete ma ta'o naa, na, ho du'a mae, ho ia, Lamatualain Anan, do?”

Ma Yesus nataa nae, “Mema', hei 'o'olam naa, teb'e.”

71 Boe ma atahori mana nggero-furi ded'eat naa ra 'ola' randa rae, “Basa nggita rena ena, to? Ana so'u aon dad'i Lamatualain Ana na. Ia, ne'emutis! Tungga hita agaman hohoro-lalanen, mete ma hambu atahori tao aon 'ona' Lamatualain, atahori naa, musi mate. Dad'i, ta'o bee? Hita nda parluu sakasii sa ena. Hukun tisa E leo.”