Lamatua' Yesus Hara-lii Malolen
tungga
Lukas
Saa de Lukas sura' dud'uit ia
1
1-3 Ama Teofilusa nenefee had'at.Sod'a-mole'
Atahori hetar sob'a sura' dud'uit so'al dala' mana dad'i' sia hai talad'a ma ra ena. Ara sura' dud'uit ra, rendi' dud'uit mana nened'ui' neu-nema mia hai, nisi' hai ma sia hai eni' a dalahulun, fo hai bub'ulu' mia Lamatua' Yesus atahori mana tungga na ra, ma mia atahori fea' mana rita noo mata na ra. Basa dud'uit naa ra, ndaa noo Lamatualain hehelu-fufulin eni' fai dalahulu na.
Dad'i au paresa' lutu'-lelo' basa dala' naa ra, eni' a mia teteri-netehu na. Dei de au 'u'etu' fo sura' basa naa ra noo malole tungga tutute na ra. Noo ta'o naa, ama' bisa bub'ulu' noo matetu' saa mana dad'i' ena. 4 Ma 'ama' o mumuhere, saa fo atahori ra dui' naa, nda dud'ui peko-leleko' sa. Basa naa ra, teb'e-teb'e' dad'i!
Lamatualain aten esa mia sorga nafad'e mema', 'oi dei fo Yohanis mana sarani' a neneb'onggi'
5 Dud'uit ia teteri-netehun ta'o ia: lele' mane Herod'es to'u parenda' sia profinsi Yud'ea, hambu atahori sa, naran Sakaria. Eni, malangga agama Yahud'i esa. Boe ma eni o, esa mia ba'i Abia nononggo malangga agama na. Sakaria saon, naran Elisabet. Eni o tititi-nonosi' mia malangga agama ra, huu eni ia, ba'i Musa 'a'an Harun tititi-nonosi na.b 6 Ru'a se rasod'a ndoos tungga basa Lamatualain parendan ma hohoro-lalane na ra. Atahori fee had'at neu se boe. 7 Ru'a se lasi' ena, te nda ma ana' sa, huu Elisabet mamana anan ma'ateme'.
8 Lao esa, Sakaria noo nononggon Abia hambu bab'anggi' tao ues sia Ume Hule-o'e Huu' sia kota Yerusalem. 9 Tungga sira had'at na, malangga agama naa ra lea lot, fo rahine seka mana hambu bab'anggi' nisi' kama Meumare' sia Ume Hule-o'e Huu' a. Sia naa, atahori naa musi ded'e hau ma'ameni' sia Lamatualain mata na. Fai' naa, Sakaria hambu lot a. 10 Boe ma ana rala neu. Lele' ana hotu hau ma'ameni' mia kama rala, atahori hetar hule-o'e sia ume sod'a na. 11 'Aib'oi' ma, Lamatualain aten esa mia sorga, nambarii' sia mamana ded'e hau ma'ameni' bob'oa 'ona na.
12 Nita ta'o naa, ma Sakaria namatau nae mate, de nda nita' nae tao saa sa boe. 13 Te ate mana mia sorga 'ola' nae, “Sakaria! 'Afi' mumutau, e! Huu Lamatualain rena hule-o'em ena. Dad'i dei fo saom bonggi fee nggo ana tou' sa. Musi bab'ae naran, Yohanis. 14 Dei fo atahori hetar ramaho'o roo nggi, huu hei hambu ana' ena. Dei fo ana' ia tao ralam namaho'o. 15 Lamatualain Dula-d'ale Meumaren koasan na'ab'ue noo e, eni' a maman nairu e. Ana musi naluli basa nininu' mana nendi mamafut. Lele' na'amoko dei fo Lamatualain, pake e dad'i atahori moko-monaen e.c 16 Dei fo ana kokoe atahori Isra'el hetar fo tungga bali' sira Lamatuan, naeni Lamatualain. 17 Ndolu-had'an ma koasan 'ona' ba'i Elia, naeni Lamatualain mana 'ola-'olan eni' a mia dalahulu na. Ana nema na'ahulu' hita Lamatua na. Ana tao ama-ina' ra rala na ra sue bali' ana na ra. Ma atahori mana lao hela Lamatualain ena o, ana ub'a rala na ra fo ara tungga bali' Lamatualain hihii-nanau na. Noo ta'o naa, ana tao atahori ra sad'ia rala na ra fo simbo Lamatua' nenema na.”d
18 Te Sakaria natane bali' ate a nae, “Bisa ta'o naa, do?! Au 'oo sao ngga lasi' 'ona' ia ena! Ta'o bee fo au 'uhine basa ia ra bisa dad'i?”
19 Boe ma, ate a nataa nae, “Ta'o ia! Au Gabriel, Lamatualain ded'enu na. Ana mana denu au 'uma, 'ufad'e hara-lii malolen neu nggo.e 20 Te nda nau mumuhere 'o'ola ngga sa. Dad'i tatanda' fo mo'e' a ta'o ia! Maam na'a'e'eku ma nda 'ola' mala sa eni' a mia 'oras ia, losa hambu mala ana' naa. Dei fo mete neu' ena. Saa fo au 'ola' ia dei fo dad'i, nandaa noo fai na.”
21 Atahori hetar mana hule-o'e sia dea' ra, du'a-d'u'a' a, huu Sakaria nda nau kalua-kalua sa. 22 Lele' ana dea nema, ana nda 'ola' nala sa ena. Boe ma ana lalaes mbali se, ma rahine boe rae, Lamatualain natud'u e manad'ad'i manaseli' sa mia Kama Meumare Manaseli' a.
23 Ue-tatao na ra basa, boe ma Sakaria bali' ume neu. 24-25 Nda doo' sa ma Elisabet nairu. Boe ma ana kama aon sia 'a ume losa fula lima. Ana 'ola' nae, “Koa-kio Lamatualain! Mate'en ma Lamatualain natud'u rala malolen neu au ena. Mete ma au hambu tititi-nonosi' ena, atahori nda ra'amamae' au sa ena.”
Lamatualain aten mia sorga nema nandaa noo Maria
26 Lele' Elisabet 'ambun fula nee, boe ma Lamatualain haitua aten mia sorga, nisi' kambo' sa sia profinsi Galilea, naran Nasaret. Ate a naran, Gabriel. 27 Sia Nasaret hambu ana feto' sa, naran Maria. Maria tunangan noo tou' sa, naran Yusuf. Yusuf naa, mane Daud tititi-nonosi na. Gabriel neu nandaa noo Maria.f 28 Ana natud'u aon neu ana feto' a, ma nae, “Sod'a-mole', ana feto'! Lamatualain pili nala nggo, fo nae tao dala malole' sa fee nggo. Maria, Lamatualain na'ab'ue noo nggo.”
29 Maria rena nala naa, ma ana tintindindii noo ate a 'o'ola na. Ana nda nahine naa sosoan saa sa boe. 30 Boe ma ate a 'ola' tute nae,
“Maria! 'Afi' mumutau.
Te Lamatualain sangga nae natud'u rala malolen neu nggo.
31 Nda doo sa te, muiru ena,
Ma, dei fo bonggi ana tou' sa.
Ho musi bab'ae naran, Yesus.g
32 Dei fo Ana dad'i Atahori monae'.
Dei fo Lamatualain no'e E nae, ‘Eni, Au Ana heheli ngga.’
Naeni, Lamatualain manaseli' a ana na.
Dei fo Lamatualain so'u E fo to'u parenda',
'Ona' ba'in, mane Daud.
33 Dei fo Eni mana to'u parenda' nakandoo 'a neu atahori Isra'el ra.h
Huu parendan nda mana basa' sa.”i
34 Te Maria natane Gabriel nae, “Au nda fe'e sunggu 'oo tou esa sa boe! Ta'o bee fo au bisa 'uiru?”
35 Ma Gabriel nataa nae, “Ta'o ia! Dei fo Lamatualain Dula-d'ale Meumaren nema nisi' nggo. Ma Lamatualain Manaseli' a koasan mboti nala nggo. Noo ta'o naa, Ana', dei fo bonggi mala' naa, teb'e-teb'e meumare'. Huu Eni, Lamatualain Ana na.
36 'Afi' titindindii! Te bob'onggim esa, naran Elisabet, nairu ena boe. Atahori rae ana nda bisa bonggi sa, huu namalasi ena. Tao-tao te ia naa 'ambun fula nee ena. 37 Huu, soa' neu Lamatualain, basa' e bisa dad'i!”j
38 Boe ma Maria nataa nae, “Malole. Au ia Lamatualain ate na. Hela neu fo basa e dad'i tungga 'o'olam naa. Au sad'ia tungga a Lamatualain hihii-nanau na.”
Basa ma ate mana mia sorga lao hela e.
Maria neu se'u Elisabet
39-40 Seli fai hira ma, Maria lao halalai mia Nasaret nisi' Zakaria kambon profinsi Yud'ea mamana mbuku lete'. Losa naa ma, ana maso' tute' nisi' Sakaria umen rala. Ma ana fee hara sod'a-mole' neu Elisabet.
41 Lele' Elisabet rena Maria haran ma, anad'iki' a natingga-nasamba sia Elisabet 'ambun rala. Ma Lamatualain Dula-d'ale Meumaren maso' nisi' Elisabet boe. 42 Boe ma ana 'ola' nae, “Maria! Dei fo atahori ra so'u rananaru naram lena' basa ina' sia raefafo' ia! Ma atahori o so'u rananaru Ana' mana sia 'ambum rala boe! 43 Au o nenenananaru' boe, huu Lamatua ngga maman nema nandaa noo au. 44 Lele' rala 'uma fee hara sod'a-mole' neu au, ma ana ngga natingga-nasamba tute' sia 'ambu ngga huu namaho'o. 45 Lamatualain natud'u rala malolen neu nggo, huu mumuhere mae, Ana nae tao tungga hehelu-fufuli na.”
Maria koa-kio Lamatualain
46 Maria 'ola' nae,
“Mia au rala ngga,
au so'u 'unanaru Lamatualain
47 Au rala ngga namaho'o,
huu Lamatualain fee au masoi-masod'a'!
48 Ana tao mata' neu au,
atahori ded'enun nda mana na'ena sosoa-ndandaa' ia sa.
Mia lele' ia basa atahori rae au ia,
ina ua-nale malole',k
49 huu Lamatualain tao dala manaseli' ra fee au.
Eni, mana koasa manaseli' noo Meumare manaseli'.
50 Lamatualain 'aka' natud'u rala susuen neu basa atahori mana fee had'a-hormat ma be'utee neu E.
mia tititi-nonosi' sa losa tititi-nonosi' laen.
51 Ana pake koasan,
fo tao atahori mana koao' ra ramue-raanggi'.
52 Ana na'atutud'a' atahori mana to'u koasa ra,
huu sira rananaru ao na ra.
Te Ana so'u nananaru atahori mana maloe-mad'ae rala na ra.l
53 Ana nahao atahori mana ndoe' ra losa ra'ab'eta,
te Ana 'oi hendi atahori mamasu'i ra
lao roo lima rou'.
54 Ana tulu-fali atahori Isra'el na ra,
ma 'aka' natud'u rala susuen neu se.
55 Dalahulun, Ana tao hehelu-fufuli' noo bei-ba'i ta ra,
naeni, ba'i Abraham noo basa tititi-nonosi na ra.
Losa fai' ia hehelu-fufuli' naa fe'e nenepa'a' nakandoo.”m
56 Basa de, Maria leo noo Elisabet losa fula telu. Dei de ana bali' nisi' umen sia Nasaret.
Elisabet bonggi Yohanis
57 Lele' fain losa ma, Elisabet bonggi ana tou' sa. 58 Hara' naa nened'ui-b'engga' losa bob'onggin ma basa kambo isi' ra 'oi, Lamatualain natud'u rala malolen, ma fee Elisabet ana' sa. Ma basa se o ramaho'o boe.
59 Ana' naa fai falu ma, ara sunat e tungga atahori Yahud'i ra 'ad'at na. Ara rae bab'ae naran, Sakaria, tungga ama na ra na.n 60 Te inan nda nau sa nae, “Nda ta'o naa sa! Naran, musi Yohanis!”
61 Te rataa rae, “Saa de nau 'a naran Yohanis? Sia hei bob'onggi ma ra nda hambu esa naran 'ona' naa sa boe!” 62 Boe ma ara laes Sakaria, fo rae rahine nae bab'ae ana' a naran neu see.
63 Sakaria laes no'e fatu lei. Ara fee, de ana sura' nae, “Naran Yohanis!” Boe ma basa atahori ra titindindii.
64 'Aib'oi' ma, Sakaria maa ma'a'e'ekun, banggana'u neu' ena. Boe ma ana so'u koa-kio Lamatualain. 65 Basa atahori mana leo deka naa ra, ramatau ma heran. Boe ma dud'uit naa nened'ui', losa basa atahori sia lete-lete' profinsi Yud'ea ra o bub'ulu' boe. 66 Atahori mana rena dud'uit naa, du'a-d'u'a rae, “Lamatualain koasan mema' noo ana' ia, De na'amoko neman, ana dad'i atahori 'ona' beek o?”
Sakaria koa-kio Lamatualain
67 Basa ma, Lamatualain Dula-d'ale Meumaren maso' nisi' Sakaria. Naa de ana 'ola' nae,
68 “Koa-kio Lamatualain, atahori Isra'el Lamatuan!
Huu nema de soi-tefa nala atahori na ra ena,
naa fo ara 'afi' 'ona' ate fai.
69 Lamatualain so'u nala Atahori sa koasan manaseli',
fo ana fee masoi-masod'a' neu nggita.
Eni ia, lao' mia mane Daud tititi-nonosi na.
70 Lamatualain helu basa ia ra eni' a lele ulu' a,
pake Eni mana 'ola-'ola na ra fo rala na ra mana ma'atataa' ra.
71 Ia naa nae mbo'i nggita
mia musu ta ra,
ma atahori mana rala na ra mera roo nggita.
72-73 Ana natud'u rala malolen neu bei-ba'i ta ra,
huu 'aka' nasaned'a hehelu-fufulin neu se,
fo Ana hengge-nee noo ba'i Abraham a.
74 Ana mbo'i' nggita mia musu ta ra ena,
fo ata bisa be'utee neu E,
ma sud'i tamatau fai.
75 Ana mbo'i' nggita ena,
fo tasod'a takandoo noo ndoo-tetu' ma meumare' sia mata na.
76 Yohanis! Ho ia, au ana ngga.
Dei fo atahori rahine nggo rae, ho Lamatualain manaseli' a mana 'ola-'ola na.
Dei fo muu mufad'e atahori ra,
fo ara simbo noo malole Lamatua' nenema na.o
77 Dei fo muu mutud'u dala' neu Lamatua' atahori na ra,
fo bisa rahine rae, sira o bisa hambu masoi-masod'a' boe,
huu Lamatualain 'ose hendi sala-kilu na ra ena.
78-79 Huu Lamatualain ralan banggana'us ma sue-lai nggita,
naa de Ana fee selu' nggita kaka'e feu',
'Ona' fai feu' nendi manggarelo feu'.
Hita mana leo-lao sia ma'ahatu' a
ma tamatau mate,
huu nda fe'e malole too Lamatualain sa,
dei fo hambu manggarelo' fo nalalao nggita tisi' dala mole-d'ame'.”p
80 Basa boe ma, Yohanis boe na'amoko. Lamatualain Dula-d'alen tao e ma'ad'ere. Na'amoko nema, boe ma neu leo sia mamana rou', losa ana so'u ue-tataos na fee atahori Isra'el ra.