Lamatua' Yesus Hara-lii Malolen
tungga
Mateos
Lamatua' Yesus bei-ba'i na ra
1
1-2 Susura ia dui so'al Yesus Kristus, Atahori fo Lamatualain helu-fuli mema' eni' a ma'ahulun fo nae haitua nema' a. Eni, mane Daud noo ba'i Abraham tititi-nonosi na.Reken mia ba'i Abraham losa mane Daud, hambu bei-ba'i' sanahulu haa. Bei-ba'i' naa ra tutungga na ra, ta'o ia:
Abraham anan Isak,
Isak anan Yakob
Yakob anan Yahud'a noo 'od'i-'a'a na ra,
3 Yahud'a anan Peres noo Sera (sira inan, naran Tamar),
Peres anan Hesron,
Hesron anan Ram,
4 Ram anan Aminadab,
Aminadab anan Nahason,
Nahason anan Salmon,
5 Salmon anan Boas (Eni inan naran Rahab),
Boas anan Obet (eni inan, naran Rut),
Obet anan Isai,
6a Isai anan Daud.
6b-11 Mia Daud losa lele' atahori Isra'el ra nenenggari' risi' Bab'el, hambu bei-ba'i' sanahulu haa fai, naeni:
Daud anan Soleman (eni inan naa, fe'esa'an Uria saon).
Soleman anan Rehabeam,
Rehabeam anan Abia,
Abia anan Asaf,a
Asaf anan Yosafat,
Yosafat anan Yoram,
Yoram anan Usia,
Usia anan Yotam,
Yotam anan Ahas,
Ahas anan Heskia,
Heskia anan Manase
Manase anan Amos,b
Amos anan Yosias,
Yosias anan Yekonya noo 'od'i na ra, lele' ara nenenggari' mia Bab'elc
12-16 Lele' ara nenenggari' mia Bab'el losa Yesus, hambu bei-ba'i' sanahulu haa fai, naeni:
Yekonya anan Sealtiel,
Sealtiel anan Serubabel,
Serubabel anan Abihut,
Abihut anan Elyakim,
Elyakim anan Asor,
Asor anan Sadok,
Sadok anan Akim,
Akim anan Eliut,
Eliut anan Eliasar,
Eliasar anan Matan,
Matan anan Yakob,
ma Yakob anan Yusuf.
Yusuf ia, sao Maria. Maria mana bonggi Yesus Kristus.
17 Dad'i eni' a mia Abraham losa Daud, hambu bei-ba'i' sanahulu haa; mia Daud losa ara nenenggari' risi' Bab'el hambu bei-ba'i' sanahulu haa; boe ma mia Bab'el losa bonggi Kristus, hambu bei-ba'i' sanahulu haa boe.
Maria bonggi Lamatua' Yesus
18 Maria bonggi Yesus naa, dud'uin ta'o ia:
Maria noo Yusuf nenehengge-nee basa' ena. Ru'a se nda fe'e sunggu' ra'ab'ue 'ona' masao' ra sa, te tao-tao te Maria nairu mia Lamatualain Dula-d'ale Meumaren ena.d 19 Lele' Yusuf nahine, boe ma ana nae no'e na'etu' sira ru'a se ne'eb'ue na ra. Te ana nda nau tao na'amamae' Maria sia atahori hetar matan sa, huu ralan meumare'. De ana nae na'etu' noo nee-nee' a.
20 Boe ma tetemba' sa, lele' ana fe'e du'a neu-nema, ma nalamein. Sia meit naa, nita Lamatualain aten mia sorga nema nafad'e nae, “Wee, Yusuf! Ho ia, mane Daud tititi-nonosi na. 'Afi' mumutau sao mala Maria. Te ana' mana sia tein rala naa mia Lamatualain Dula-d'ale na. 21 Dei fo, Maria bonggi ana tou' esa. Ho musi bab'ae naran, Yesus, te dei fo Eni mana fee masoi-masod'a' neu Lamatualain atahori na ra mia sala-kilu na ra.”e f
22 Dei fo dala' ia dad'i ta'o naa, huu Lamatualain nafad'e basa eni' a lele ulu' a. Ana pake mana 'ola-'olan Yesaya de sura' mema' nae,
23 “Hei rena, o! Hambu ana feto' sa nda fe'e sunggu' nita noo tou' sa,
te tao-tao te mairu' ena.
De ana bonggi Ana tou' sa.
Ara bab'ae naran, Imanuel.”
(Sia ded'ea Ibrani, ‘Imanuel’ sosoan:
Lamatualain na'ab'ue noo nggita.)g