Lamatua' Yesus safe ana mana tungga na ra ei na ra
13
Lele' fai malole Paska nda fe'e mulai sa, Yesus bub'ulu' ena 'oi, Eni fain losa ena, fo Eni musi lao hela raefafo' ia, fo bali' nisi' Aman sia sorga. Te Ana sue naseli' atahori na ra mana sia raefafo' ia, losa Ana fee masod'an teme-ao neu se.2 Lele' naa, nitu ra malanggan dunggu-mbau Yud'as, naeni Simon Iskariot anan, fo seo hendi Yesus. De Yud'as na'etu' fo nae tao ta'o naa, lele' Yesus se 'endo' raa fefeta Paska.
3 Yesus bub'ulu' ena nae, Lamatualain mana denu Eni raefafo' nema, de mbei fai te Eni musi heo' bali' nisi' Lamatualain. Boe ma Ana o bub'ulu' nae, Eni Aman sia sorga fee basa-b'asa' e neu Eni liman ena. 4 Basa ma Yesus fela mia mei a, de 'olu hendi bad'u dea na. Boe ma ha'i nala handuk esa, de pa'a neu leleb'o na. 5 Boe ma Ana 'ombo oe neu bokor ana' esa, de mulai safe ana mana tungga na ra ei na ra. Safe basa esa, na, Ana 'ose namad'a' nendi' handuk ana' mana nenepa'a' sia leleb'o na. 6 Ana safe esa-esa' ei na. Losa Simon Petrus, ma Petrus natane nae, “Papa o mae safe au ei ngga boe, do?”
7 Yesus nataa nae, “Lele' ia, nda fe'e muhine saa fo Au tao' ia sa. Te dei fo muhine.”
8 Te Petrus 'ola' nasapaa nae, “'Afi' ta'o naa, Papa! Au nda nau fee Papa safe ei ngga sa.”
Boe ma Yesus nataa nae, “Mete ma Au nda safe 'umeu eim sa, na, nda nenepa'a' moo Au sa.”
9 Boe ma Simon Petrus nataa nae, “Mete ma ta'o naa, Papa 'afi' safe 'aka' ei ngga. Te safe lima ngga noo langga ngga boe!”
10 Basa ma Yesus nafad'e mbali e nae, “Atahori mana nariu basa ena, parluu safe 'aka' ei na. Huu aon meu' ena. Mema' rala ma ra meu' ena, te nda basa se meu' sa.” 11 (Yesus 'ola' ta'o naa, huu Ana nahine seka mana nae seo hendi Eni. Naa de nafad'e nae, “Nda basa e meu' sa.”)
12 Lele' Yesus safe basa ei na ra, boe ma Ana 'olu bali' bad'un, de neu 'endo' bali' sia mei a. Basa ma natane se nae, “'Ona bee? Lele' Au safe ei ma ra, hei mihine Au tatao ngga, do hoko'? 13 Hei hii 'a mo'e Au mae, ‘Papa Meser’ ma ‘Lamatua'’ mana na'ena hak parenda nggi. Naa nandaa ena, huu Au mema' 'ona' naa. 14 Te mete ma hei Meser ma noo Lamatuam ia, safe ei ma ra 'ona' ate esa, na, 'ona bee noo hei? Hei esa musi mete-se'u esa. 'Ona' hei o musi safe esa noo esa ei na ra boe. 15 Huu Au dad'i conto fee nggi ena. Au tao ta'o bee, na, hei o musi tao tungga ta'o naa boe.a 16 Teb'e! Au 'ufad'e nggi. Ate esa nda manaseli' lena' eni malanggan sa. Ma ded'enu' esa nda manaseli' lena' atahori mana denu e sa.b 17 Huu hei bub'ulu' basa dala' ia ra ena, de hei 'onton mete ma hei tao tungga ta'o naa.
18 Au nda 'ola' so'al basa nggi sa. Au 'uhine teb'e atahori fo pili 'ala' ra. Mae 'ona' naa o, naa musi dad'i 'ona'; saa fo nenesura' mema' sia Lamatualain Susura Meumaren 'oi, ‘Atahori mana 'endo' naa na'ab'ue noo Au, ana hiru' nasad'ea lao hela Au ena.’c 19 Au 'ufad'e mema' neu nggi, dei fo mete ma atahori lao hela Au 'ona' naa, na, ama mimihere mae, Au ia, Kristus. 20 Teb'e! Au o 'ufad'e 'ae, seka mana soi ralan fo simbo noo malole atahori fo Au denu' a, na, eni o simbo Au boe. Ma seka simbo Au noo malole, na, eni o simbo Mana denu Au' a boe.”d
Lamatua' Yesus nafad'e mema' nae, dei fo hambu mana seo hendi Eni
21 Yesus 'ola' basa na'o naa ma, ralan named'a nda malole' sa. Basa ma, Ana nafad'e nae, “Au 'ola' ia, teb'e. Dei fo hei esa seo hendi Au.”
22 Rena 'ona' naa, ma Ana mana tungga na ra esa mete esa, huu ara bingun. Ara nda rahine Ana 'ola' naa neu see sa boe. 23 Sia naa hambu sira esa, fo Yesus sue' a (naeni au, Yohanis, mana sura' buku ia).e Au 'endo' sia Yesus bob'oa na. 24 Boe ma Simon Petrus sein nendi' langgan, fo 'utane sob'a Yesus masud na, see.
25 Basa de, au 'u'usosoko' ao ngga deka-d'eka 'oo Yesus, de 'utane 'ae, “Atahori fo Papa masud na, seka, e?”
26 Boe ma Yesus nataa nae, “Ta'o ia. Au 'ae ha'i roti bib'ia' esa, fo boro' manggo rala neu, basa naa Au fee neu atahori fo Au masud ngga.” Ana boro' nala roti a, ma Ana fee neu Yud'as, naeni Simon Iskariot ana na. 27 Simbo nala roti a, ma nitu a malanggan maso' nisi' Yud'as rala. Boe ma Yesus nafad'e neu e nae, “Lai-lai leo! Mae tao saa, na, tao leo. 'Afi' doo-d'oo fai.” 28 Te atahori mana 'endo' sia naa ra, esa o nda nahine sa boe, saa de Yesus 'ola' na'o naa. 29 Huu Yud'as naa sira mana to'u doin, de ruma du'a Yesus masud naa faa' ra, lele' Ana denu Yud'as, 'oi, “Muu hasa saa fo hita parluu taa sia fefeta Paska ia.” Ma ruma o du'a Eni masud na 'oi, “Muu fee doi' mbei neu mana tud'a-loloe' ra.”
30 Lele' Yud'as simbo nala roti a, ma ana lao lai-lai dea neu. Lele' ana dea neu, te hatu' ena.
Parenda feu' a
31 Lele' Yud'as dea neu, ma Yesus nafad'e nae, “Au ia, Atahori Matetu' a. Lele' ia, fain losa ena fo Lamatualain so'u nananaru Au. Ma naa o tao atahori mete-rita Lamatualain manaseli na boe. 32 Huu Au nenepa'a' 'oo Lamatualain, ma 'utud'u manaselin, naa de Ana so'u nananaru Au. Ana nda nahati doo-d'oo sa ena.
33 Ana ngga ra, e! 'Ona' mae Au sue 'useli' nggi o, nda doo' sa te Au nda 'u'ub'ue 'oo nggi sa ena. Dei fo Ama sangga Au, te nda hambu sa. Au 'ufad'e nggi ia, 'ona' saa fo Au 'ufad'e neu atahori Yahud'i ra malangga na ra 'ae, ‘Au 'uu sia mamana' esa, te hei nda bisa tungga sa.’f 34 Au fee nggi parenda feu' esa, ta'o ia: hei esa musi sue-lai esa, 'ona' Au sue nggi boe. Dad'i hei o esa musi sue esa boe.g 35 Mete ma hei esa sue esa 'ona' naa, na, basa atahori bisa bub'ulu' rae, hei ia, Au ana mana tungga ngga ra.”
Lamatua' Yesus nafad'e mema' 'oi, Petrus nae nafanii Eni
36 Basa ma Simon Petrus natane E nae, “Papa mae muu sia bee?”
Boe ma Yesus nafad'e nae, “Au 'uu sia mamana' esa, te ho nda fe'e bisa muu lele' ia sa. Te neu ma'ab'uin fo muu sia naa boe.”
37 Petrus natane nae, “Papa, e! Ta'o bee de au nda fe'e bisa 'uu lele' ia sa? Huu au 'uhehere fo mate fee Papa ena!”
38 Yesus nataa nae, “Teb'e, do? Mae fee masod'am fo mate soa' neu Au? Matetun, ta'o ia: manu a nda fe'e ko'okee sa, te mufunii Au lao telu ena.”