4 Te Yesus ana mana tunggan esa, naran Yud'as Iskariot, dei fo mana seo hendi Yesus a, 'ola' nae, 5 “Woi! Ta'o bee de ana nda seo mina ma'ameni' ia sa? Huu felin ba'u 'ona' atahori sa nggad'in too esa. Malole lena' seo e, fo doin fee neu atahori mana tud'a-loloe' ra!”^c 6 Tao-tao te, Yud'as 'ola' na'o naa, nda huu eni sue atahori mana tud'a-loloe' ra sa. Te, huu eni, na'o. Ana dad'i Yesus se mana to'u doin, te ana 'aka' loi doi' sia mamana mbed'a' doi' a.

7 Te Yesus nataa nae, “Hela ina' a tao ta'o naa. Huu ana mbed'a' mina ma'ameni' ia, fo sad'ia mema' fee Au ao-sisi ngga fo ra'oi Au. 8 Atahori mana tud'a-loloe' ra sia roo hei rakandoo 'a sia talad'a ma ra. Te Au nda hambu 'oo nggi 'ukundoo sa.”^d

9 Basa ma atahori Yahud'i hetar bub'ulu' rae, Yesus sia kambo Betania. De ara rema rae rita E. Ara o rema rae rita Lasarus boe. Huu ara rena 'oi, Yesus tao nasod'a bali' Lasarus mia mamaten ena. 10 Te malangga agama Yahud'i ra malangga na ra 'ola-'ola' sangga dala' rae tao risa Lasarus boe. 11 Huu atahori Yahud'i hetar rena so'al Lasarus dud'uin, de ara ramahere Yesus. Ara nda nau rena atahori Yahud'i ra malangga na ra sa ena.

12 Mbila' neu ma, atahori hetar mana rema tungga fefeta Paska sia kota Yerusalem, rena rala rae, Yesus nae nema sia naa boe. 13 De ara reu beta palma roo' fo simbo rendi' neu Yesus neneman, 'ona' Eni atahori monaen. Boe ma ara nggasi randaa rae,

14 Boe ma Yesus hambu banda keled'ei tena' esa, de Ana sae neu ata. Naa 'ona' nenesura' mema' sia Lamatualain Susura Meumaren nae,

16 Lele' naa, Yesus ana mana tungga na ra nda rahine dala' ia ra sosoan sa. Te dei fo, lele' Ana nasod'a bali' mia mamaten, ma Lamatualain so'u nanaru E, dei de ara rasaned'a dala-d'ala' fo nenesura' sia Lamatualain Susura Meumaren so'al Eni. Ara o rasaned'a atahori ia ra tatao na ra mbali E boe.

17 Lele' Yesus tao nasod'a bali' Lasarus mia mamaten, ma no'e nala e dea nema mia rates a, hambu atahori hetar ra'ab'ue roo Yesus. Dad'i ia naa, ara dui-b'engga dii-'ona so'al saa fo dalahulun ara mete rita' a. 18 Naa de atahori hetar rema soru Yesus deka-d'eka noo Yerusalem, huu ara rena rae, Ana tao manad'ad'i manaseli' naa ena. 19 De atahori Farisi ra 'ola-'ola' rae, “Cii! Mita dei! Basa atahori sia raefafo' ia seb'o-mue fo rae tungga E! Dei fo neu mate'en, hita mana susa! Mete ma ta'o naa, na, hita tae tao ta'o bee fai?”

20 Hambu atahori Yunani hira o rema sia kota Yerusalem, ramalolo' roo atahori laen ra, fo rae tungga fefeta Paska sia naa. Ara rae be'utee neu Lamatualain sia naa boe. 21 Boe ma ara rema randaa roo Filipus, mana nema mia kambo Betsaida sia profinsi Galilea. Ara ro'e rae, “'A'a! Hai mae mindaa moo Yesus.”

22 Basa de Filipus neu nafad'e Anderias. Boe ma ru'a se reu 'ola' roo Yesus. 23-24 De Yesus nafad'e ru'a se nae, “Au fai ngga nema ena. Dad'i Au musi mate dei, dei fo Lamatualain so'u nananaru Au. Naa teb'e'! Ata ta'asasama' noo fini esa. Mete ma hita sela are fini deke' esa, na, ana musi noe sia rae rala, dei fo ana mori, fo nab'una-nab'oa hetar. Huu mete ma nda ta'o naa sa, eni dad'i' a are deke' esa ta'o 'a naa ena. 25 Atahori nda mana tao-afi' neu Lamatualain hihiin sa, huu sue naseli' masod'an sia raefafo' ia, dei fo masod'a' naa noe hendi e. Te atahori mana nahehere fee masod'an sia raefafo' ia, dei fo hambu masod'a ndoo-tetu' nda mana basa' a sa.^h 26 Atahori mana nau mete-se'u Au, eni musi tungga Au nakandoo. Naeni de, Au sia bee, na, Au atahori ded'enu ngga ra sia naa boe. Huu mete ma hambu atahori mete-se'u Au, dei fo Ama ngga sia sorga fee had'a-hormat neu e boe.”

27 Yesus tute 'o'olan nae, “Au med'a rala ngga susa. Te Au 'ae ta'o bee fai? Au musi 'o'e 'ae, ‘Ama'! Mbo'i' Au, naa fo au 'afi' mate lele' ia,’ do? Hoko'! Au nda 'o'e ta'o naa sa, huu Ana denu Au 'uma, fo mate. 28 Dad'i Au 'o'e, ta'o ia: ‘Ama'. Hela neu, Au tungga 'a Ama' hihiin, naa fo basa atahori so'u rananaru Ama' nara na.’”

Boe ma hara' esa mia lalai a nae, “Au so'u 'unanaru nara ngga ena. Ma Au 'ae so'u 'unanaru selu' fai.”

29 Basa ma atahori mana rambarii' sia naa ra, rena hara' naa, boe ma rae, “Naa! Lalai a ndukurulu!”

Hambu atahori ruma fai rae, “Hoko'! Lamatualain aten esa mia sorga 'ola-'ola' noo E.”

30 Te Yesus nafad'e nae, “Hara' naa faa' ra, soa' neu nggi, nda soa' neu Au sa. 31 Lele' ia, atahori sia raefafo' ia musi rataa mbali Lamatualain, fo Ana na'etu' ded'ea na ra. Ana nae 'use-'oi hendi mana tao de'ulaka' mana to'u parenda' sia raefafo' ia. 32 Dei fo lele' atahori londa Au sia hau nggangge', dei fo Au nore basa atahori fo ramahere Au.” 33 (Eni 'o'olan ta'o naa, fo natud'u dei fo Eni mate noo dala' 'ona bee.)

34 Basa ma, atahori mana sia naa ra ratane rae, “Hai parnaa rena mia Lamatualain Hohoro-lalanen nae, dei fo Kristus nasod'a nakandoo. Naa, Kristus noo Atahori Matetu' naa, 'ona esa', to? Dad'i ta'o bee de malangga nae, ‘Dei fo ara londa Atahori Matetu' a sia hau nggangge' a?’ Atahori Matetu' naa, seka?”ⁱ

35 Boe ma Yesus nataa nae, “Nda doo' sa te, Au manggarelo ngga nda naronda sia nggi sa ena. Dad'i lele' Au fe'e sia, ama musi misod'a noo matetu', naa fo de'ulaka' 'afi' tatana nala manggarelo' mana sia rala ma ra. Huu atahori mana lao' sia ma'ahatu' a, nda bub'ulu' nae eni neu sia bee sa boe. 36 Lele' Au manggarelo ngga fe'e sia, hei musi mimihere Au, naa fo hei dad'i atahori mana nasod'a sia manggarelo' a, bub'ulu' hei mii sia bee.”

Yesus 'ola' basa 'ona' naa, ma Ana dinggo' hela atahori naa ra, fo Eni bisa mesa' ne.

37 Mae Yesus tao manad'ad'i manaseli' hetar sia atahori hetar matan ena o, ara nda nau ramahere E sa. 38 Naa 'ona' Lamatualain mana 'ola-'olan, Yesaya, parnaa 'ola' mema' nae,

39 Naa de atahori Yahud'i ra ruma nda bisa ramahere Lamatualain lele' ia sa, 'ona' Yesaya sura' sia mamana' laen nae,

41 Yesaya 'ola' ta'o naa, huu ana nita Yesus manaselin ena, de ana dui mema' so'al Yesus.

42 'Ona' mae ta'o naa o, atahori hetar ramahere Yesus. Nda 'aka' atahori biasa ra sa, te hambu atahori Yahud'i ra malangga na ra ruma o ramahere E boe. Te ara nda rataa Yesus sia atahori hetar matan sa, huu ara ramatau, 'afi' losa atahori Farisi ra 'use-'oi hendi se dea reu mia ume hule-o'e' ra. 43 Malangga naa ra nda tao-afi' 'ita' mae Lamatualain nae koa se do hoko' sa, huu ara hii lena' simbo kokoat mia atahori.

44 Basa ma Yesus 'ola' nahere' nae, “Atahori mana namahere Au a, ana nda namahere neu 'aka' Au mesa' nggo sa, te ana o namahere neu Mana denu Au' a. 45 Huu mete ma atahori sa nita Au, na, ana o nita Mana denu Au' a boe. 46 Au 'uma fo dad'i 'ona' manggarelo' sia raefafo' ia. Naa fo basa atahori mana ramahere Au a nda rasod'a sia ma'ahatu' a sa. 47 Mete ma atahori esa rena Au Ded'ea-'o'ola ngga, te nda tao tungga sa, na, Au nda 'u'etu' eni huku-d'okin sa. Huu Au raefafo' 'uma ia, nda 'ae 'uma 'u'etu' atahori ra huku-d'okin sa, te Au 'ae fee masoi-masod'a' neu atahori mia sala-kilu na ra. 48 Te basa atahori nda mana simbo Au sa, ma nda nau rena Ded'ea-'o'ola ngga sa, eni mana nggero-furin sia ena. Huu mete ma losa fai matete'en, Ded'ea-'o'ola ngga fo Au 'ola' 'ita' ra, dei fo mana na'etu' atahori mata' naa ra huku-d'oki na. 49 Huu Au nda parnaa 'ola' 'endi 'aka' Au mesa' nggo nara ngga sa. Te Au 'ola' 'endi' Ama ngga sia sorga nara na. Huu Eni, mana denu Au. Ma Eni mana parenda fo Au musi 'ola' saa. 50 Au o bub'ulu' 'ae, Eni parendan naa nendi masoi-masod'a ndoo-tetu' nda mana basa' sa. Naa de Au 'o'ola ngga tungga matetu' noo saa fo Ama ngga denu Au 'ola'.”