3 Fai' naa, malangga agama Yahud'i ra malangga na ra roo lasi-lasi 'ad'at ra ra'ab'ue sia Kayafas ume na. Kayafas naa, naeni agama Yahud'i malangga monae na. 4 Ara sangga dala' fo rae humu Yesus noo nee-nee, fo rae risa E. 5 Te ara rala hara' rae, “Helafi' dei! Ata 'afi' humu E lai-lai' huu fai-fai malole' sangga losa ena. 'Afi' losa atahori hetar mana hii E, fela ramue.”

6 Sia kambo Betania, hambu atahori esa, naran Simon. Fe'esa'an, atahori melumud'u e, huu ana namahed'i kusta. Te ia naa, ana hai ena. Lele' fai malole ra nda fe'e losa sa, ma Yesus se reu raa mia Simon ume na. 7 Lele' ara raa, ma ina' esa nema nandaa noo Yesus. Ana to'u boto esa, tao mia fatu mafelit.^b Boto a isin mina ma'ameni mafelit. Basa ma, ina' a poko tiku boto a tatana na. De ana mbori na'andandali' mina naa mbei-mbei neu Yesus langgan, fo dad'i tanda eni fee had'a-hormat neu E.

8 Te lele' Yesus ana mana tungga na ra rita ina' a tao ta'o naa, ma ramanasa, de ara 'ola-'ola' rae, “Hee! 'Afi' nggari hendi mina ma'ameni' mafelit naa neu' ena! 9 Malole lena' eni seo mina naa! Fo doin, bab'anggi fee neu atahori mana to'a-taa' ra!”

10 Te Yesus nahine dud'u'a na ra, de Ana 'ola' nae, “Hei 'afi' tao mi'isususa' ina' ia! Hela neu leo! Au ma'ahee huu ana po'a mina ia neu ao ngga ena. Te saa fo ana tao neu Au' ia malole'. 11 Atahori mana to'a-taa' ra sia hei talad'a ma ra rakandoo 'a. Te nda doo' sa ena, te Au ia, nda 'u'ub'ue 'oo nggi sa ena.^c 12 Noo ina' ia mbori mina ia, ana sad'ia Au ao ngga 'ona' ana rambe mema' Au ao-sisi mana mate ngga. Huu Au masod'a ngga nda doo' sa ena. 13 Misined'a matalolole, o! Sia bee-b'ee Lamatualain Hara-lii Malolen nened'ui-b'engga' ndule raefafo' ia, ne'o ara o dui ina' ia malolen boe! Naa fo basa atahori rasaned'a e.”

14 Hambu atahori esa mia Yesus ana mana tungga kasanahulu rua na ra, naran Yud'as Iskariot. Fai' naa boe o, ana lao neu sangga malangga agama Yahud'i ra malangga na ra, fo nae fee hendi Yesus neu se. 15 Losa se ma, ana natane nae, “Ama' ra, e! Mete ma au tulun humu Yesus fee neu nggi, na, ama fee au saa?”

Boe ma rataa rae, “Mete ma nau seo E neu hai, na, hai bae.” Basa ma, ara reken rala doi fula' telu nulu de fee neu Yud'as.^d 16 Basa ma, Yud'as lao dea neu, ma ana sangga dala' fo nae fee Yesus neu se.

17 Tungga-tungga too, atahori Yahud'i ra fai malole na ra doon fai hitu. Ara ro'e fai malole naa ra rae, ‘Fefeta Roti nda pake bib'it sa’.^e Lele' ara sad'ia rae feta ma, Yesus ana mana tungga na ra rema ratane E rae, “Ama'! Tetemba' ia hita musi mulai tao fai malole ta ra. Dad'i Ama' nau hai mii mbau bib'i Lombo, ma mii sad'ia mamana feta Paska sia bee?”

18 Boe ma Ana nataa nae, “Ama kota rala mii, dei fo hei mindaa moo ama' esa. Mifad'e mbali e ma'o ia, ‘'A'a, e! Ama Meser med'a-med'a na nda doo' sa te Eni mate ena. De Ana no'e mamana' sia 'a'a umen, fo Ana tao fefeta Paska noo ana mana tungga na ra.’”

19 Ana mana tungga nara rena ta'o naa ma, ara reu tao tungga 'o'ola na. De ara lole-lau nanaa fefeta Paska sia naa.

20 Tetemban ma, Yesus noo ana mana tungga kasanahulu rua na ra 'endo' ra fefetas. 21 Lele' ara raa ma, Ana 'ola' nae, “Hei rena, e! Hambu esa mia hei e, dei fo mana seo hendi Au neu atahori fea' ra.”

22 Ara rena rala ma, rala na ra susa. Boe ma esa-esa' natane Yesus nae, “Atahori fo Ama' 'ola' naa, nda au sa, to?”

23 Boe ma Ana nataa nae, “Atahori fo mana boro' rotin nandaa noo Au nisi' manggo a rala, dei fo ana mana seo hendi Au.^f 24 Misined'a, e! Au, Atahori Matetu' ia, musi mate 'ona' ara sura' mema' sia Lamatualain Susura Meumare na. Te besa-b'esa! Atahori mana nae seo hendi Au' naa, dei fo ana lemba-nasaa sosoen! Malole lena' maman nda bonggi e sa!”

25 Basa naa ma, Yud'as o tungga natane nae, “Ne'o atahori fo Ama' 'ola' naa, nda au sa, to?”

Boe ma Yesus nataa nae, “Mema' mesa' nggo mana ma'o naa ena. Te seka fai?”

26 Lele' ara fe'e raa ma, Yesus ha'i roti bala' esa, de no'e makasi mbali Lamatualain. Basa de Ana bib'ib'i roti a, ma 'ola' nae, “Roti ia, Au ao ngga. Ama ha'i fo mia leo!”

27 Basa naa ma, Ana ha'i nala nggalaas esa sofe' noo anggor, de no'e makasi mbali Lamatualain. Basa ma Ana loo neu ana mana tungga na ra, ma 'ola' nae, “Basa nggi ha'i fo minu leo. 28 Huu anggor ia, Au raa ngga. Dei fo Au mate, na, raa ngga nandali fo fee masoi-masod'a' neu atahori hetar mia sala-kilu na ra. Raa' ia dad'i tanda nesenened'a' 'oi, saa fo Lamatualain helu-fuli' a, ia naa dad'i ena. Naa, ha'i fo minu leo!^g 29 Te rena malolole! Eni' a mia tetemba' ia, Au nda 'inu anggor sa ena. Dei fo mete ma Ama ngga 'endo' to'u parenda' sia sorga, fo Au fe'e 'inu 'oo nggi fai.”

30 Basa ma, ara sod'a sosod'at esa de koa-kio Lamatualain. Ma tetemba naa boe o, ara lao risi' lete Saitun.

31 Lele' ara lao-lao' ma, Yesus nafad'e ana mana tungga na ra nae, “Dei fo tetemba' ia, basa hei mela hela Au. Te ara sura' mema' sia Lamatualain Susura Meumaren 'oi,

32 Mema' au mate. Te dei fo Au 'usod'a bali', na, Au 'uu 'uhani nggi sia profinsi Galilea.”ⁱ

33 Te Petrus nareresi nae, “Ama'! 'Ona' mae atahori laen ra basa se rela hela Ama', te au nda 'ela hela nggo sa!”

34 Boe ma Yesus nataa nae, “Teb'e ta'o naa do, Petrus? Mumuhere neu Au! Tetemba' ia, manu nda fe'e ko'okee sa, te ho 'ola' lao telu ena mae, nda muhine Au sa!”

35 Te Petrus nareresi nae, “Hoko', Ama'! Mete ma Ama' mate, na, au o mate 'oo nggo boe. Huu au nda 'ela hela Ama' sa!” Petrus nonoon laen ra o esa-esa' ra'o naa boe.

36 Basa ma Yesus se lao rakandoo risi' lete Saitun, losa osi esa naran Getsemani.^j Sia naa Ana 'ola' noo ana mana tungga na ra nae, “Ama 'endo' tahan sia ia dei, te Au 'ae 'uu hule-o'e sia naa.” 37 Te Ana no'e nala Petrus, Yakob'is, noo Yohanis, fo telu' se reu ramalolo' roo E. Eni' a mia lele' naa, ma ralan susa nala seli ma nda fefeet sa. 38 Ara fe'e lao' rala mbei, te Ana nafad'e se nae, “Au rala ngga susa nala seli! Au med'a 'ona' Au 'ae 'a mate! Ama 'endo' be'e minea moo au sia ia dei.”

39 Basa de ana mata neu na'ad'od'oo' mbei, ma Ana sende' lulu-langgan de hule-o'e nae, “Ama bo'i'! Mete ma Ama' na'ahei', na, Au 'afi' lemba-d'oi doid'oso' ia. Te 'afi' tungga Au hihii ngga; tungga 'a Ama' hihii na.”

40 Hule-o'e basa, ma Ana bali' nisi' ana mana tungga katelu na ra. Te mana sunggu' masambeta' ra. De Ana fafae se ma 'ola' noo Petrus nae, “Hee, Petrus! Saa de hei sunggu'? Au mia naa losa 'a, te ama nda be'e minea moo Au mbei sa boe, do! 41 Kukur mimeu mata ma ra dei. Basa' fo fela minea moo Au! Huu mema' hei rala ma ra mae tao malole', 'aka' na ao-sisi ma ra nda be'i sa. Dad'i malole lena' ama hule-o'e fo mete ma hambu sosob'a-d'od'ou', na, bisa mi'itataa'.”

42 Basa de Ana neu hule-o'e fai nae, “Ama'! Mete ma Au musi lemba doid'oso' ia, na, tungga 'a Ama' hihii-nanau na.” 43 Hule-o'e basa ma, Ana bali' nema nisi' ana mana tungga katelu na ra. Te ara sunggu' bali' fai, huu ara nduar rala seli.

44 Boe ma Ana lao hela se, de bali' neu hule-o'e lao esa fai'. Ana no'e selu' Aman, fo 'afi' fee Eni lemba-nasaa doid'oso' naa, te tungga neu 'aka' Ama' hihii-nanau na. 45 Hule-o'e basa ma, Ana bali' neu de fafae Ana mana tungga na ra nae, “Hei fe'e sunggu mikindoo, do? Fela leo! Te atahori mana nae seo Au, Atahori Matetu' ia, sangga losa ena. Lele' ia, ara rae humu Au, fo fee neu atahori de'ulaka' ra lima na. 46 Weh! Fela leo! Milaa mata ma ra fo mete sob'a sia naa dei! Te atahori mana seo Au a, nema ena.”

47 Lele' Yesus fe'e 'ola-'ola' ta'o naa, ma Yud'as nema noo atahori nononggo' sa. Ara rema rendi fela tafa' noo hau 'e'etu', fo rae humu E. Ara tao ta'o naa, tungga agama Yahud'i ra malangga monaen ma lasi-lasi 'ad'at ra parenda na. 48 Yud'as nafad'e mema' se nae, “Hei mete malolole, e! Atahori fo au 'id'u' a, hei to'u E leo! Te Eni, atahori fo hei sangga' a!”

49 Lele' ara losa Yesus, boe ma Yud'as neu nisi' Yesus matan, de nae, “Sod'a-mole', Ama Meser!” Boe ma Yud'as holu ma 'id'u E.

50 Boe ma Yesus natane mbali e nae, “Hee, Yud'as! 'U'umam noo masud ia, do?” Boe ma, atahori naa ra mata reu, fo rae humu E.

51 Ma nda bub'ulu' sa te, Yesus atahorin esa lesu felan de, soe na'etu' atahori esa ndiki roo na. (Atahori mana hambu bisu naa, naeni agama Yahud'i malangga monaen ate na.) 52 Yesus nita ta'o naa ma, Ana nafad'e nae, “Doso' bali' felam neu ngguma na. Huu atahori mana nasod'a na'amimina' tafa', dei fo ana o mate noo tafa' boe. 53 Nda muhine sa, do? Au bisa 'o'e Ama ngga fo Ana haitua ana mana tunggan rifon-rifon^k sia sorga, fo rema tulu-fali Au. 54 Te hela neu leo. Hela fo atahori ia ra humu rala Au. Te basa saa fo nenesura' mema' sia Lamatualain Susura Meumaren so'al Au, musi dad'i.”

55 Boe ma Yesus 'ola' neu atahori hetar mana rema humu E nae, “Weh! Hei mae Au ia, atahori de'ulaka', do? Ta'o bee de ama 'ima mae humu Au mendi' tafa' noo hau 'e'etu'? Tao-tao te, tungga-tungga fai Au 'unori nggi sia Lamatualain Ume Hule-o'e Huun, te nda hambu atahori esa o tao saa-saa mbali Au sa boe.^l 56 Te hela neu! 'Ima, to'u mala Au leo! Te basa ia nenesura' mema' eni' a lele ulu' a sia Lamatualain Susura Meumare na.”

Yesus ana mana tungga na ra rita ta'o naa ma, ara ramatau rala seli. Boe ma ara fela rela hela E.

57 Basa ma, atahori humu rala Yesus de roo E nisi' agama Yahud'i malangga monaen Kayafas umen, huu atahori moko-monaen ra ra'ab'ue sia naa ena. Naeni, malangga agama Yahud'i ra malangga na ra, meser agama ra, roo lasi-lasi 'ad'at ra. 58 Lele' ara to'u roo E, ma Petrus lao' na'ab'ab'ambi' aon tungga-tungga dea', losa malangga monae' a ume na. Petrus o rala neu nisi' nembeleon, de tungga 'endo' na'ab'ue noo atahori mana sia naa ra. Huu ana nae nahine saa mana nae dad'i. 59 Sia ume naa rala, malangga agama Yahud'i ra malangga na ra ra'ab'ue roo basa atahori mana ma'etu' ded'ea agama ra. Ara rae sangga bukti ma sangga dala' rae ra'etu' hukun risa Yesus. 60 Te mae ara sangga bukti rendi' sakasii leleko' hetar o, ara nda hambu bukti saa-saa sa boe. Dei de ara hambu mana sakasii atahori rua. 61 Atahori karua' naa ra sakasii rae, “Hai rena mita atahori ia 'ola' nae, ‘Dei fo Au ofe hendi Ume Hule-o'e Huu' a. Te Au 'ufefela bali' e, sia 'a fai telu rala.’”^m

62 Basa ma, agama Yahud'i malangga monaen nambarii' sia basa atahori mana 'endo' sia naa ra mata na ra. Boe ma natane Yesus nae, “Ho rena atahori nae' fua sala' neu nggo. Te ta'o bee de nee-nee 'a?” 63 Te Yesus nda nataa saa-saa sa boe. Boe ma malangga monae' a natane fai nae, “Au 'ae 'utane ia fai! Te musi mutaa noo matetu' 'ona' mutaa neu Lamatualain mana nasod'a sia sorga. Hambu atahori rae, Ho ia, Kristus, Lamatualain Anan fo Ana helu-fuli mia lele ulu' a. Naa teb'e, do?”

64 Basa boe ma, Yesus nataa nae, “Mema' teb'e, 'ona' pak 'o'ola na. Te musuned'a, e! Dei fo basa nggi mita Au, Atahori Matetu' ia. Dei fo Au 'endo' sia sorga sia Lamatualain bob'oa 'onan, fo to'u parenda' 'u'ub'ue 'oo E, mana koasa manaseli' a. Basa naa dei fo, Au 'onda bali' 'uma 'oo lelee' a.”ⁿ

65 Malangga monae' a rena Ana 'ola' na'o naa, ma ana namanasa nala seli, losa ana sii nasika' hendi bad'u naru na. Ma randu nahere' neu basa atahori mana 'endo' sia naa ra nae, “Woe! Hita nda parluu sangga sakasii sa ena! Hei rena 'o'olan noo ndiki ma ra ena, to? Ana so'u aon dad'i Lamatualain Anan ena. Ia ne'emutis! Basa hei bub'ulu' mae, tungga hita atoran agaman, mete ma hambu atahori tao aon 'ona' Lamatualain, na, atahori naa musi mate! 66 Dad'i ia naa, tae ta'etu', ta'o bee?”

Boe ma basa se randu rahere' rae, “Atahori ia mema' sala teb'e ena! Dad'i Ana musi nenehukun mate!”^o

67 Basa ma, hambu atahori hira mata reu de puras miru neu Yesus. Ma ara poko-paru ra'amimina' ma mbasa E.^p 68 Basa ma ara ra'a'e'ei' E rae, “Weh! Ho ia, Kristus, to? Mufad'e sob'a dei! Seka mana tutu nggo?”

69 Lele' naa, Petrus tungga de fe'e 'endo' sia ume a nembeloa na. Boe ma ate ina' esa neu de 'ola' mbali e nae, “Faa' ra, ho o 'uma mu'ub'ue moo Yesus, atahori Nasaret naa, to?”

70 Te ana nafanii sia atahori hetar matan nae, “Hoko'! Ta'o bee de mutane ta'o naa! Au nda 'uhine atahori naa sa ma.” 71 Basa ma, Petrus dea neu de nambarii' sia lelesu ine' a mata'.

Boe ma, ina' laen esa fai nita e mia naa. Boe ma, ana nafad'e neu atahori mana sia naa ra nae, “Wee, faa' ra au 'ita atahori ia nema noo Yesus, atahori Nasaret naa.”

72 Boe ma Petrus namue nae, “Mbei ma ho mulu', do! Au nda 'uhine atahori naa sa ma! Au sumba!”

73 Nda doo sa fai ma, atahori laen mana sia naa ra 'ola' roo e fai rae, “Hee! Ho 'afi' 'ombo-koson fai mae, ho nda mu'ub'ue moo atahori naa sa! Huu hai rena ded'eam naa, 'ona' atahori Galilea ra boe!”

74 Te ana rarai-o'ole, ma lab'an nae, “Weh! Au sumba 'endi' Lamatualain naran, te au nda 'uhine Atahori ia sa!” Ana 'ola' ta'o naa, boe ma manu a ko'okee boe.

75 Lele' Petrus rena manu ko'okee ma, ana nasaned'a Yesus 'o'olan faa' ra nae, “Manu nda fe'e ko'okee sa te, ho mutaa mae nda muhine Au sa lao telu ena.” Ana nasaned'a nala ta'o naa ma, ana lao dea' neu de nggae mesu'ud'u.