Ara humu rala Lamatua' Yesus
18
Lele' Yesus hule-o'e basa, ma Ana dea neu namalolo' noo ana mana tungga na ra. Ara reu sia 'osi esa sia loe Kidron bob'oa na. Boe ma ara rala reu.2-3 Lele' naa, malangga agama Yahud'i ra malangga na ra roo atahori mia partei agama Farisi ra, fee sold'ad'u roo mana nanea atahori hira reu Yud'as, huu ana nae seo hendi Yesus. Yud'as bub'ulu' 'osi a boe, huu Yesus na'ab'ue lao hetar mia naa noo ana mana tungga na ra ena. De Yud'as se reu risi' 'osi a rendi mbele, lambu lantera, ma tee-tande'.
4 Tao-tao te, Yesus bub'ulu' basa mana nae dad'i neu Eni ena. De Ana lali mata' neu ma natane nae, “Hei sangga seka?”
5 Boe ma rataa rae, “Hai sangga atahori esa, naran Yesus, mia kambo Nasaret.”
Ma Yesus nafad'e nae, “Au ena.” Lele' naa, Yud'as nambarii' na'ab'ue noo se. Eni mana seo hendi Yesus. 6 Lele' Yesus 'ola' nae, “Au ena,” boe ma atahori ra dinggo' hela E, ma ra'aloli reu rae a.
7 Boe ma Yesus natane selu' se nae, “Hei sangga seka?”
Ara rataa rae, “Yesus, atahori Nasaret.”
8 Boe ma Yesus 'ola' nae, “Au 'ufad'e faa' ra ena 'ae, Au ena. Dad'i mete ma ama sangga Au, na, 'afi' humu laen ra. Hela se reu leo.” 9 (Ana 'ola' na'o naa fo tao dad'i saa fo Eni 'ola' nita nae, “Ama'. Basa atahori fo Ama' fee neu Au' ra, esa o nda mopo sa boe.”)
10 Lele' naa, Simon Petrus nendi tafa 'e'eku' esa. Ana lesu e, de nae tati atahori. Tao-tao te, ana tati na'etu' atahori esa ndiki 'ona na. (Atahori naa, naran Malkus. Eni agama Yahud'i malangga monaen ate na.) 11 Boe ma Yesus denu Petrus nae, “Wae, Petrus! Doso' bali' tafam nisi' ngguman rala. Huu Ama ngga nafad'e basa ena 'oi, Au musi hambu doid'oso' mata' ia. Dad'i hela neu leo! Naa 'ona' Ana fee Au nggalaas esa isin mana meru'. Hela neu fo Au 'inu 'ub'asa' e.”a
Ara roo Lamatua' Yesus neu nataa mbali agama Yahud'i malangga monae na
12 Basa ma, malangga ra, sold'ad'u ra, roo atahori Yahud'i ra mana nanea na ra, humu rala Yesus, de futu E. 13 De ara roo E nisi' Anas. Anas naa, naeni Kayafas ama ari na. Too' naa, Kayafas dad'i agama Yahud'i malangga monae na. 14 Kayafas ia, mana nanori nita atahori Yahud'i ra malangga na ra 'oi, “Malole lena' soa' neu nggi, mete ma atahori esa' a mate fee neu basa atahori.”b
Petrus nafanii nae, eni nda nahine Lamatua' Yesus sa
15 Simon Petrus tungga-tungga 'a Yesus dean, namalolo' noo Yesus ana mana tunggan esa fai, naeni au, Yohanis. Agama Yahud'i a malangga monaen nahine au. Naa de au bisa 'umulolo' 'oo Yesus misi' eni umen sod'an rala. 16 Te Petrus nambarii' sia 'a dea', deka-d'eka noo lutu-mbaa lelesu na. Au dea 'uu, ma 'ola' 'oo ina' esa mana nanea sia naa, fo 'ona bee, na, au bisa 'oo Petrus rala neu boe. 17 Boe ma ina' a natane Petrus 'oi, “Wee! Ho ia, Atahori naa ana mana tunggan esa boe, to?”
Te Petrus nataa nae, “Hoko'!”
18 Lele' naa, ma'arini'. Naa de atahori mana ranea roo ate ra rambarii' dara ai. Boe ma Petrus neu, de dara ai na'ab'ue noo se.
Agama Yahud'i malangga monaen paresa' Lamatua' Yesus
19 Lele' naa, agama Yahud'i malangga monaen dalahulu' a paresa' Yesus so'al nenorin, ma so'al ana mana tungga na ra.
20 Boe ma Yesus nafad'e nae, “Au 'ola' relo-relo fo basa atahori rena. Au 'unori 'ukundoo 'a sia mamana' fo hita atahori Yahud'i ra biasa ra'ab'ue sia 'a, naeni sia hita ume hule-o'e na ra, ma sia Ume Hule-o'e Huu' a. Au nda 'ola' funi-funi' 'ita sa. 21 Ta'o bee de mutane Au? Mutane sia 'a atahori mana rena 'o'ola ngga ra. Huu tantu rahine saa fo Au 'ola' ena.”
22 Lele' Ana 'ola' na'o naa, atahori mana nanea esa mana nambarii' sia naa mbasa E, ma 'ola' nae, “'Afi' 'ola' ma'o naa moo malangga monae' a!”
23 Boe ma Yesus nafad'e mbali e nae, “Mete ma Au 'ola' sala ena, na, mutud'u sala' saa. Te mete ma Au 'ola' ndaa, na, ta'o bee de ho mbasa Au?”
24 Basa naa ma, Anas denu se rendi E nisi' Kayafas, mana dad'i agama Yahud'i malangga monae na. Lele' ara roo E neu, Ana fe'e manapa'a'.
Petrus nafanii selu' Lamatua' Yesus fai
25 Lele' naa, Simon Petrus fe'e nambarii' dara ai. Boe ma atahori laen mana sia naa ra ratane mbali e rae, “Ho ia, Eni ana mana tunggan esa, to?”
Te Petrus nafanii nae, “Hoko'!”
26 Sia naa hambu agama Yahud'i malangga monaen aten esa. Eni bob'onggi' mia atahori fo Petrus tati 'etu ndiki roo na. Ana natane nae, “Wee! Faa' ra ho mia 'osi naa boe, to? Au 'ita nggo mia naa boe!”
27 Te Petrus nafanii selu' fai, ma manu a o ko'okee boe.
Lamatua' Yesus neu nataa mbali hofernor Pilatus
28 Fe'e fefetu anan, ara roo Yesus mia Kayafas, reu risi' hofernor ume panggat na, sia sold'ad'u Roma ra mamana nanea na.c Atahori Yahud'i ra nda maso' risi' atahori Roma ra mamanan rala sa, huu naa tao se ranggenggeo, fo nda bisa raa fefeta Paska sa. 29 Basa ma, hofernor Pilatus dea neu de nandaa noo atahori Yahud'i ra. Boe ma natane nae, “Hei fua sala' saa neu Atahori ia?”
30 Boe ma ara rataa rae, “Ta'o ia, pak. Mete ma Eni ia nda atahori de'ulaka' sa, tantu hai nda 'ima ngganggu pak sa. Saa fai fee E neu pak lima ma.”
31 Boe ma hofernor nafad'e se nae, “Ta'o ia. Hela hei mana tao-afi' neu ded'ean, tungga hei atahori Yahud'i ra hohoro-lalane na.”
Boe ma atahori Yahud'i ra malangga na ra rafad'e rae, “Nda bisa sa, pak. Hai atahori Yahud'i ra nda mi'ena hak fo mi'etu' hukun mate sa. Naa 'aka' mana parenda Roma ra fo mi'ena hak 'ona' naa.” 32 (Lele' ara 'ola' ra'o naa, saa fo Yesus 'ola' nita ma'ahulun, dad'i ena. Huu Ana nafad'e neu atahori na ra nae, dei fo Ana mate tungga mana parenda Roma ra had'a-d'alan, naeni ara mbaku E sia hau nggangge' a.)d
33 Boe ma hofernor bali' nisi' sold'ad'u ra mamana nanean rala. De no'e nala Yesus, ma natane nae, “'Ona bee? Ho ia, atahori Yahud'i ra manen, do?”
34 Yesus natane bali' mbali e nae, “Pak mana mutane 'ona' naa, do, atahori laen mana rafad'e pak so'al Au?”
35 Boe ma hofernor nataa nae, “Hee! Au ia, nda atahori Yahud'i sa, to? Atahori ma ra mesa' se, mana fee nggo neu au. Lelenan fai malangga agama Yahud'i ra malangga na ra. Ho ia, tao saa? Mufad'e sob'a dei!”
36 Boe ma Yesus nafad'e nae, “Au nda mane' esa mia raefafo' ia sa boe. Huu mete ma Au dad'i mane' mata' naa, tantu Au atahori ded'enu ngga ra ramue fo atahori Yahud'i ra nda dad'i humu Au sa. Mema' Au dad'i Mane'. Te nda hambu atahori sia raefafo' ia mana so'u Au ta'o naa sa.”
37 De hofernor natane selu' fai nae, “Dad'i ho ia, Mane', do?”
Boe ma Yesus nataa nae, “Pak mana nae Au, Mane'. Matetun, Au neneb'onggi' fo dad'i Mane'. Au raefafo' ia 'uma dad'i Mane', fo 'ona' bee na 'ufad'e so'al dala-d'ala ndoo-tetu' ra. Basa atahori mana to'u rahere' dala-d'ala ndoo-tetu' ra, na, ara rena Au.”
38a Basa ma hofernor natane mbali E nae, “Ndoo-tetu' naa, saa?”
Ara ra'etu' hukun mate Lamatua' Yesus
38b Lele' hofernor Pilatus 'ola' basa na'o naa, ma bali' dea neu nisi' atahori Yahud'i ra. Ana 'ola' nae, “Au paresa' E ena, te au nda hambu salan saa sa boe.
39 Te hei had'a-d'ala ma ra, tungga too sia fai fefeta Paska, au musi mbo'i atahori bui esa fee neu nggi. Dad'i too' ia, hei nau au mbo'i hendi atahori Yahud'i ra manen, do ta'o bee?”
40 Basa se randu randaa rae, “'Afi' mbo'i Atahori ia! Mbo'i 'a Barab'as!” Tao-tao te, Barab'as naa, atahori esa fo de'ulakan seli teb'e.e