Lamatua' Yesus nasod'a bali'
28
Basa ma nggarei fefetun, ma Maria mia Magdala noo Maria laen a, reu se'u rates a. 2 'Aib'oi' ma, raefafo' nanggenggo seli, huu Lamatualain aten esa mia sorga 'onda nema, ma neu lolir hendi fatu monae' mana tatana neu rates bafa na. Basa ma ana 'endo' neu fatu naa ata. 3 Ate naa matan naronda 'ona' ndelas, ma bua-b'a'u na ra muti fuu-fuu. 4 Atahori mana manea' ra ramatau rae mate, losa ara foti ngge'e-ngge'e, ma nda ra'aunda' sa 'ona' atahori mates ra.5 Boe ma ate mana mia sorga nafad'e neu mama ra nae, “Ama 'afi' mimitau! Au bub'ulu' hei 'ima sangga Yesus, Atahori fo ara mbaku risa E mia hau nggangge' a. 6 Te Ana nda sia ia sa ena. Ana nasod'a bali' ena, 'ona' Ana 'ola' basa mema' a ena. De rala 'ima fo mete mata' mamana' fo ara mbed'a' ao-sisi na. Mamana' naa rou' ena! 7 Naa, ia naa ama bali' lai-lai leo! Mii mifad'e ana mana tungga na ra mae, Yesus nasod'a bali' ena. Ana lao na'ahulu' Galilea neu ena. Ara musi reu randaa roo E sia naa, 'ona' fe'esa'an Ana helu-fuli mema' neu se. Mimihere leo. Bali' mii mifad'e malolole saa fo au 'ola' ia' a!”
8 Boe ma mama ra rela dea reu lao hela mamana' naa. Ara ramatau, te 'aka' na ramaho'o. Ara bali' halalai rendi hara' fee neu ana mana tungga na ra.
9 Te losa dala' talad'an, 'aib'oi' ma Yesus nema nandaa noo se. Ana 'ola' nae, “Sod'a-mole'” Ara rita 'ona' naa, ma rema deka-d'eka de holu ei na ra, ma be'utee mbali E. 10 Boe ma Ana 'ola' nae, “'Afi' mimitau, e! Mii mifad'e Au ana mana tungga ngga ra, fo reu rahani Au sia Galilea.”
Atahori mana manea ra reu rendi hara' so'al saa mana dad'i' sia Lamatua' rate na
11 Lele' mama ra fe'e sia dala' talad'an, ma atahori mana manea ra bali' kota reu. Ara reu rendi hara' neu malangga agama Yahud'i ra malangga na ra so'al basa saa manadad'i' ra. 12 Boe ma malangga sangga dala' roo lasi-lasi 'ad'at ra, fo fee mana manea ra doi' nae', fo ara tatana bafa na ra. 13 Malangga naa ra rafad'e rae, “Ta'o ia. Mete ma atahori ratane, na, hei musi mitaa mae, tetemba' naa, hei mana sunggu' masambeta'. Tao-tao te ana mana tungga na ra rema ramana'o rendi ao-sisi na. 14 Ma mete ma ama hofernor rena ded'eat ia, na, ama 'afi' mimitau, te dei fo hai mana bale moo tou lasi' a.”
15 Boe ma atahori mana manea ra ha'i rala doi' ra, de ara tao tungga malangga ra hihii-nanau na ra. Naa de losa fain ia atahori Yahud'i ra fe'e ramahere dud'ui pepeko-leleko' naa.
Lamatua' Yesus natud'u matan neu ana mana tungga na ra
16 Yesus ana mana tungga kasanahulu esa na ra rena basa mama ra dud'uin, ma ara reu risi' profinsi Galilea fo randaa roo E sia lete' esa, tungga hehelu-fufuli na.a 17 Lele' ara rita E sia naa, ma ara be'utee neu E. Mae ta'o naa o, fe'e hambu ruma rala na ra nenebanggi-b'anggi'.
18 Boe ma Ana neu deka-d'eka noo se, de 'ola' nae, “Lamatualain fee Au koasa ena, fo parenda basa mana sia sorga, ma basa mana sia raefafo' ia ra. 19 Dad'i hei mii sia bee-b'ee, na, hei musi dui-b'engga Au Hara-lii Malole ngga neu basa nusa' ra. Hei musi minori se malolole, naa fo ara dad'i Au ana ded'enu ngga. Ma musi sarani se fo dad'i tatanda' 'oi, ara ra'ab'ue reu esa roo Ama', ma Anan, boe ma Dula-d'ale Meumaren.b 20 Ma nenori se fo ara tao tungga basa parenda' fo Au 'ufad'e basa neu nggi' a ena. Misined'a, e! Au sia hei talad'a ma ra 'ukundoo 'a, losa raefafo' ia sambu-lalo.”