Yohanis mana sarani' a nanori atahori ra
3
Lele' Yesus na'amoko boe ma, Yohanis mana sarani' a mulai nanori atahori ra sia mamana' na'ad'oo' noo kambo', sia profinsi Yud'ea. 2 Ana nafad'e nae, “Toronoo susue ngga ra, e! Ama musi mitaa ma lao hela basa sala-kilu ma ra, fo bali' misi' Lamatualain leo. Te 'ale' ia basa atahori bisa maso' dad'i Lamatualain atahori na.”a3 Dalahulun Lamatualain mana 'ola-'olan esa, naran Yesaya sura' so'al Yohanis ena nae,
“Dei fo hambu atahori nameli sia mamana mana na'ad'oo' noo kambo' nae,
‘Basa atahori rahehere tao ralole dala',
fo soru Lamatualain neneman!
Tao mitetu dala' fee neu E!’”b
4 Yohanis ia dala masod'an 'ona' Lamatualain mana 'ola-'ola dalahulu na ra. Eni bua-b'aun, tao mia banda onta fulu na. Bob'orin, tao mia banda rou' a. Ma nanaa-nininun, lamat noo oni lasi oe'.c
5 Lele' naa atahori hetar rema rae randaa roo Yohanis. Ara rema mia Yerusalem, ma mia basa profinsi Yud'ea isi na. Ara o rema mia kambo-kambo' mana bad'eka roo loe Yordan. 6 Ara buka rala na ra ma rataa basa sala-kilu na ra, basa ma Yohanis sarani se mia loe Yordan.
7 Lele' naa, atahori mia partei Farisi ma partei agama Saduki ra o rema fo Yohanis sarani se. Te lele' ana nita se ma, ana bua se nae, “Heh! Ama 'ona' mengge mana peko-leleko'! Dei fo Lamatualain huku-d'oki nggi huu tatao-nono'i de'ulaka ma ra. Wae! 'Afi' du'a mae hei bisa mela mia Lamatualain huku-d'okin.d 8 De malole lena' bali' misi' Lamatualain, ma lao hela basa sala-kilu ma ra. Basa naa, tao dala-d'ala malole' ra, 'ona' hau huu' mana nab'oa boa malole'. 9 'Afi' du'a mae hei hambu masoi-masod'a' ena, huu hei ba'i Abraham tititi-nonosi na. Mimihere au! Huu Lamatualain bisa tao fatu ra dad'i ba'i Abraham tititi-nonosi na.e 10 Besa-b'esa, e! Te hambu atahori to'u ta'a fo rahehere rae 'ungga hendi basa hau huu' nda mana rab'oa malole' ra sa. 'Ungga basa, na, Ana nggari hendi se ai rala reu.f
11 'Ale' ia au sarani nggi 'endi' oe, fo dad'i tatanda' 'oi, hei hiru' misid'ea hela sala-kilu ma ra ena. Te dei fo Atahori sa manaseli' lena' au nae nema. Dad'i 'aka' ded'enun o au nda 'undandaa sa. Dei fo Ana tao nasofe rala ma ra nendi' Lamatualain Dula-d'ale Meumare na. Ana o tao nggi dad'i meumare' boe, 'ona' atahori hotu manggarau' rendi' ai.g 12 Huu Ana to'u nala lala'o esa isi' sia rala ena, fo nae tai hendi 'eto' mia isi' ra. Basa fo Ana 'oni isi' ra risi' soka' rala reu, ma Ana nggari hendi 'eto' ra risi' ai mana mbila' nda mana basa' sa.”
Yohanis sarani Lamatua' Yesus
13 Lele' naa, Yesus 'onda nema mia Galilea nisi' loe Yordan. Ana nema no'e Yohanis Sarani Eni, 14 te Yohanis nda nau sa. Ana nareresi nae, “Ta'o bee fo au musi sarani Papa? Nda tab'alek sa, do? Papa mana musi sarani au dei. Te au parluu naa!”
15 Te Yesus nataa nae, “Nda saa sa boe. Hela fo 'oras ia, 'a'a sarani Au. Noo ta'o naa hita tungga Lamatualain hihii-nanau na.”
Rena na'o naa ma Yohanis nataa nae, “Sia 'a, Papa.” Boe ma ana sarani Yesus.
16 Sarani basa ma, Yesus dea nema mia loe a. 'Aib'oi' ma, lalai a sii. Ma Ana nita Lamatualain Dula-d'alen 'onda nema neu E, 'ona' mbui lunda tee neu E. 17 Boe ma ara rena Lamatualain haran mia lalai a nae,
“Eni ia, Au Ana susue ngga.
Ana tao namaho'o Rala ngga nakandoo 'a.”h