Yohanis mana sarani' a so'u ue-tataon
3
1-2 Lele' naa, Tiberius dad'i keser mana to'u parenda' sia Roma, too sanahulu lima ena. Pontius Pilatus dad'i hofernor sia profinsi Yud'ea. Herod'es dad'i hofernor sia profinsi Galilea. Herod'es 'a'an Filipus, dad'i hofernor sia profinsi Iturea noo profinsi Trakonitis. Boe ma Lisanias dad'i hofernor sia profinsi Abilene.aLele' naa Hanas noo Kayafas dad'i agama Yahud'i malangga monaen sia kota Yerusalem.
Lele' naa o, Yohanis, Sakaria anan, leo sia mamana rou' fo na'ad'oo' mia kambo'. Sia naa, Lamatualain fee hara-liin neu e. 3 Yohanis rena nala, ma ana lao nisi' basa kambo' mana deka noo loe Yordan, de nafad'e atahori ra nae, “Hei musi mitaa ma lao hela basa sala ma ra, fo Lamatualain 'ose hendi sala-kilu ma ra naa ra. Hei o musi sarani dei, fo dad'i tanda 'oi, hei malole moo Lamatualain ena.”
4 Dalahulun, Lamatualain mana 'ola-'olan ba'i Yesaya sura' so'al Yohanis nae,
“Hambu atahori sia mamana rou' nggasi nae,
‘Basa atahori mihehere tao mitetu dala', fo simbo Lamatua' neneman!
Tao mitetu dala' fo soru E.
5 Mbori misofe ndola roma'.
Poko mitetu lete' ra.
Tao mindoo dala penggo' ra,
tao mimilenu dala fatu-fatu' ra.
6 Naa fo atahori mia basa nusa' ra
bisa bub'ulu' rae, Lamatualain nae fee masoi-masod'a' neu atahori ra
mia sala-kilu na ra.’”b
7 Atahori hetar rema mia sud'i 'a bee fo ro'e Yohanis sarani se. Te ana bua se nae, “Weh! Hei mana peko-leleko'! Hei 'ona' mengge maraso' a! 'Afi' du'a mae hei nenembo'it mia Lamatualain huku-d'okin noo 'a leleko' miloe' tao sala! Hoko'! Nda doo' sa ena, Lamatualain fee huku-d'oki' neu basa atahori nda mana doa' tao sala' noo matetu' sa.c 8 Hei 'afi' du'a mae, ‘Au ia nda hambu huku-d'oki' sa, huu au ba'i Abraham tititi-nonosi na.’ Hambu sia bee ta'o naa? Naa nda tulun hei sa, huu nda bisa tao nggi dad'i atahori meumare' sa. Lamatualain bisa tao fatu ia ra dad'i ba'i Abraham tititi-nonosi na. Au 'ufad'e, e! Mitud'u noo hei tatao-nono'i ma ra, mae hei misid'ea lao hela sala ma ra, ma tungga bali' neu Lamatualain ena.d 9 Hei musi tao dala malole'. Mete ma hoko', dod'oo faa te hei hambu Lamatualain huku-d'oki mamberan, 'ona' atahori 'ungga hendi hau huu' rendi' ta'a. Mete ma hau huu' sa nda na'ena buna-b'oa malole' sa, na, nda mangguna' sa! De malole lena' 'ungga hendi e, fo tao ai rala neu.”e
10 Basa ma, atahori naa ra ratane Yohanis rae, “Dad'i hai musi tao saa?”
11 Boe ma ana nataa nae, “Mete ma mi'ena bad'u rua, na, fee esa neu atahori nda ma bad'u' sa. Mete ma mi'ena nanaat, na, banggi fee atahori nda mana na'ena nanaat sa.”
12 Basa ma, mana 'ed'a bea ra rema ro'e Yohanis sarani se. Ara ratane rae, “Papa meser! Hai musi tao ta'o bee?”f
13 Ana nataa nae, “Hei 'aka' peko-leleko'. Te ia naa, hei musi ue-tao noo ndoo-tetu'. 'Afi' mo'e bea lena'-lena' mia mana parenda ra atoran. Hela rauinggu ra bae bea tungga atoran.”
14 Hambu sold'ad'u hira o mia naa boe. Ara ratane Yohanis rae, “Hai ta'o bee? Hai musi tao saa?”
Basa ma nataa nae, “'Afi' mia mate' atahori ra doin, tungga hihii ma ra. Ma 'afi' fua sala' leli neu atahori. Hei musi mimiho'o-mitid'ale moo nggad'i ma ra.”
15 Rena 'o'olan ma, basa atahori ra esa keis esa ma 'utu-'utu rae, “Awee! Mbei ma Yohanis ia, Kristus, fo Lamatualain helu basa nae haitua nema eni' a dalahulun!”
16 Te Yohanis 'ai se nae, “Rena malolole! Dei fo hambu atahori sa manaseli' lena' au nae nema. 'Ona' mae dad'i' a ded'enun o, au nda 'undandaa sa.g Au bisa sarani hei noo 'a oe, te dei fo Ana tao lena' au, Ana tao nasofe rala ma ra noo Lamatualain Dula-d'ale Meumare na. Dei fo Ana tao nameu nggi, 'ona' atahori hotu manggarau' rendi' ai. 17 Ana huku-d'oki atahori mana tao sala' ra, 'ona' atahori mana tao mole' sa nalaid'i are-gandum deke'. Basa ma ana 'oni are-gandum deke meu' nisi' soka-pole' rala neu, ma hotu hendi manggenggeo' ra. 'Ona' naa boe, dei fo Kristus huku-d'oki atahori mana tao sala' ra, ma nggari se risi' ai mbila' nda mana mama'etu' a sa.”
18 Noo ta'o naa, Yohanis fee nesenened'a' mata-mata' neu atahori, ma nafad'e se Lamatualain Hara-lii Malole na.
19-20 Lele' naa, Yohanis o 'ola' relo-relo Herod'es tatao na. Eni salan ta'o ia: Herod'es naa, hofernor sia profinsi Galilea. Salan naen seli ena. Salan esa, naeni: Ana lea nala 'od'in saon, naran Herodias. Naa te, 'od'in fe'e masod'a', ma nda fe'e mahela' noo Herodias sa. Herod'es masod'an fo nda matetu' naa sa, tao Yohanis 'ai e noo relo-relo, de Herod'es nda hii e sa. Basa ma Herod'es to'u nala e, de nggari e bui rala neu.h
Yohanes sarani Lamatua' Yesus
21 Dalahulun, lele' ara nda fe'e humu Yohanes sa, ana sarani atahori hetar. Ma Ana o sarani Yesus boe. Basa naa ma Yesus hule-o'e ma lalai a sii. 22 Boe ma Lamatualain Dula-d'ale Meumaren 'onda neu E. Dula-d'ale' a mata-aon 'ona' mbui lunda. Boe ma hara' mia lalai nae,
“Ho ia, Au Ana susue ngga.
Ho tao mumuho'o Au mukundoo' a.”i
Lamatua' Yesus bei-ba'i na ra, tungga ama Yusuf
23 Lele' Yesus mulai nafad'e atahori Lamatualain dala masod'an, mbei ma Ana too telu nulu ena. Atahori rahine rae, Yesus naa, Yusuf Ana na. Yusuf bei-ba'i na ra, naeni:
Yusuf aman, Eli.
24 Eli aman, Matat.
Matat aman, Lewi.
Lewi aman, Melki.
Melki aman, Yanai.
Yanai aman, Yusuf.
25 Yusuf aman, Matatias.
Matatias aman, Amos.
Amos aman, Nahum.
Nahum aman, Hesli.
Hesli aman, Nagai.
26 Nagai aman, Maat.
Maat aman, Matatias.
Matatias aman, Semein.
Semein aman, Yosek.
Yosek aman, Yoda.
27 Yoda aman, Yohanan.
Yohanan aman, Resa.
Resa aman, Serubabel.
Serubabel aman, Sealtiel.
Sealtiel aman, Neri.
28 Neri aman, Melki.
Melki aman, Ad'i.
Ad'i aman, Kosam.
Kosam aman, Elmadam.
Elmadam aman, Er.
29 Er aman, Yosua.
Yosua aman, Elieser.
Elieser aman, Yorim.
Yorim aman, Matat.
Matat aman, Lewi.
30 Lewi aman, Simeon.
Simeon aman, Yehuda.
Yehuda aman, Yusuf.
Yusuf aman, Yonam.
Yonam aman, Elyakim.
31 Elyakim aman, Melea.
Melea aman, Mena.
Mena aman, Matata.
Matata aman, Natan.
Natan aman, Daud.
32 Daud aman, Isai.
Isai aman, Obet.
Obet aman, Boas.
Boas aman, Salmon.
Salmon aman, Nahason.
33 Nahason aman, Aminadab.
Aminadab aman, Admin.
Admin aman, Arni.
Arni aman, Hesron.
Hesron aman, Peres.
Peres aman, Yahud'a.
34 Yahud'a aman, Yakob.
Yakob aman, Isak.
Isak aman, Abraham.
Abraham aman, Tera.
Tera aman, Nahor.
35 Nahor aman, Seruk.
Seruk aman, Rehu.
Rehu aman, Pelek.
Pelek aman, Eber.
Eber aman, Sela.
36 Sela aman, Kenan.
Kenan aman, Arpaksad.
Arpaksad aman, Sem.
Sem aman, Noh.
Noh aman, Lamek.
37 Lamek aman, Metusalak.
Metusalak aman, Henok.
Henok aman, Yared.
Yared aman, Mahalalel.
Mahalalel aman, Kenan.
38 Kenan aman, Enos.
Enos aman, Set.
Set aman, Adam.
Adam naa, Lamatualain ana na'ad'ad'ad'i na.