Nitu ra malanggan sob'a-d'ou Tuhan Yesus
4
Lele' Yohanis sarani basa Yesus, boe ma Yesus lao hela loe Yordan. Lamatualain Dula-d'ale Meumaren na'ab'ue noo E. Basa ma Dula-d'ale' a noo E nisi' mamana rou' sa. 2 Yesus leo mia naa losa fai haa nulu. Lele' naa, Ana o nda naa saa-saa sa boe, losa ana ndoe nala seli. Boe ma, nitu ra malanggan nema sob'a-d'ou E.3 Ana 'ola' neu Yesus nae, “Mete ma mema' Ho Lamatualain Anan, na, mu'ena koasa. De denu fatu ia ra dad'i roti, fo mua se.”
4 Te Yesus nataa nae, “Hoko'! Nda bub'ulu' sa, do? Nenesura' sia Lamatualain Susura Meumaren 'oi,
‘Atahori nda rasod'a mia 'a nanaat sa!’”a
5-6 Basa ma nitu ra malanggan noo E nisi' mamana naru' sa, ma natud'u neu E basa manaparenda sia raefafo' noo manaseli na ra. Boe ma ana kokoe Yesus nae, “Basa manaparenda ra roo koasa na ra, ma manaseli na ra, au 'ena ngga ra. De au 'u'ena hak 'ae fee neu sud'i 'a see fo au hii. 7 Au 'ae fee basa se neu nggo. 'Aka' musi tao dala' sa dei, dei fo au fee nggo. Mud'a hie 'a! Ho be'utee neu au. 'Aka' naa ena!”
8 Te Yesus nataa nasafali nae, “Hambu sia bee ta'o naa? Te nenesura' sia Lamatualain Susura Meumaren 'oi,
‘Ho musi be'utee neu 'a Lamatualain.
Ma musi tao-ues fee neu E 'a.”b
9 Basa ma, nitu ra malanggan noo Yesus nisi' kota Yerusalem. Losa naa, ana nendi Yesus nisi' Ume Hule-o'e Huu' a ata-ata'. Ma ana nae, “Mete ma mema' Ho Lamatualain Anan, na, boke rae Muu leo! 10 Te nenesura' sia Lamatualain Susura Meumaren 'oi,
‘Dei fo Lamatualain denu ate na ra mia sorga,
ranea nggo.
11 Dei fo ara rema nggaso nggo,
fo Ei ma ra nda dai rae sa.’”c
12 Te Yesus nataa nae, “'Afi' sob'a-d'ou Au. Te nenesura' sia Lamatualain Susura Meumaren 'oi,
‘'Afi' sob'a-d'ou Lamatualain!’”d
13 Nitu ra malanggan sob'a Yesus noo dala' mata'-mata', te nda nala E sa. De ana lao hela Yesus, fo nahani kaka'e malole'.
Lamatua' Yesus Galilea neu nafad'e atahori so'al Lamatualain Hara-lii Malolen
14 Basa ma, Yesus bali' fai nisi' profinsi Galilea, huu Lamatualain Dula-d'alen fee koasa neu E. Nda doo' sa ma, atahori sia mamana' naa ra, mulai rahine naran boe. 15 Ana nanori sia atahori Yahud'i ra ume hule-o'en sia bee-b'ee. Boe ma atahori ra koa E rae, “Yesus naa, Atahori manaseli', o!”
Atahori ra nda simbo Lamatua' Yesus sia Nasaret sa
16 Lao esa, Yesus nema nisi' kambon Nasaret. Nandaa noo atahori Yahud'i ra fai hule-o'en, naeni ‘fai nggarei’, Ana nisi' ume hule-o'e' rala neu, 'ona' biasa na. Basa ma Ana nambarii' fo nae baca mia Lamatualain Susura Meumare na. 17 Boe ma ara loo fee ne ba'i Yesaya susura na. Ana nakambembela e, ma sangga tatad'a', de baca nae,
18 “Lamatualain Dula-d'alen koasan sia Au.
Naa de Ana dud'u Au,
fo 'ufad'e Lamatualain Hara-lii Malolen neu atahori mana tud'a-loloe' ra.
Ana denu Au ena,
fo 'ufad'e 'ae,
dei fo mana sia bui ra, nenembo'it;
dei fo poke' ra, rita bali';
dei fo nenetuni-ndeni' ra, rasod'a noo nenembo'it.
19 Te ia naa, Lamatua' fain losa ena,
fo fee masoi-masod'a' neu atahori na ra.”e f
20 Yesus baca basa susura naa, ma Ana lulu bali' de loo neu mana to'u nggarei' a, ma Ana 'endo'. Basa atahori mana sia ume hule-o'e' rala ra mete rahere' E. 21 Basa de Ana nafad'e se nae, “Saa fo hei rena mia Lamatualain Susura Meumaren faa' ra, ia naa dad'i ena!”
22 Boe ma atahori mana sia naa ra 'ola' so'u-so'u' Yesus rae, “Awii! Saa fo Ana 'ola' faa' ra naa, malolen seli! Te Eni ia, Usu Anan, to! Ta'o bee de ta'o ia?”
23 Boe ma Yesus nafad'e se nae, “Tantu basa nggi mihine ded'eat mana 'oi, “We, doter! Tao muhai' aom dei!” Hei mae mi'itutud'a Au mendi' ded'eat naa. Hei mae, ‘Ta'o bee de nda tao manad'ad'i manaseli' esa fee hai sia ia sa, 'ona' Ho tao mia kota Kapernaum naa?’ 24 Matetun ta'o ia: Atahori nda nau simbo Lamatualain mana 'ola-'ola na ra sia kambo na ra sa.g 25-26 Ha'i conto mia Lamatualain mana 'ola-'olan, ba'i Elia. Lao esa, 'ud'an nda nema sa too telu fula nee ena. Lele' naa, hambu ina falu hetar sia Isra'el. Te Lamatualain nda denu Elia fo tulu-fali se sia Isra'el sa. Lamatualain denu e nisi' 'aka' ina falu sa sia kambo Sarfat deka noo kota Sid'on. Tao-tao te ina lasi' a nda atahori Yahud'i sa. Te namahere neu Lamatualain koasa na.h
27 Ha'i conto laen fai mia Lamatualain mana 'ola-'olan Elisa. Lele' naa, hambu atahori Yahud'i hetar ramahed'i kusta sia Isra'el. Te Lamatualain nda na'ahahai' se sa. Lamatualain denu Elisa na'ahahai' 'aka' atahori kusta esa, naran Na'aman. Tao-tao te, eni, atahori Siria, nda atahori Yahud'i sa. Te namahere Lamatualain koasa na.”i
28 Lele' ara rena Yesus 'ola' ta'o naa, ma basa se ramanasa E seli. 29 Boe ma basa se fela randaa, ma mbuu hendi E mia ume hule-o'e' naa. Boe ma ara lea rendi E nisi' mbia' tonggon sia kambo' a suun, fo rae timba hendi E nisi' ndola' rala neu. 30 Te Ana sususi tungga atahori hetar talad'an, de lao hela se.
Lamatua' Yesus 'oi nitu mia atahori esa
31 Basa naa ma, Yesus 'onda nisi' kota Kapernaum sia dano Galilea suu na. Tungga-tungga fai hule-o'e', Ana nanori atahori sia ume hule-o'e' rala. 32 Atahori ra titindindii rena 'o'olan, huu Ana nahine teb'e nenori' naa isi na.j
33 Lao esa, Lele' Yesus nanori sia ume hule-o'e' rala, hambu atahori nitu dai' sa nameli nahere' nae, 34 “Woi! Yesus, atahori Nasaret! Ho mae tao saa neu hai! 'Uma mae tao mulutu hai, do? Hai mihine nggo. Ho ia, Atahori Meumare' fo fe'esa'an Lamatualain helu nae haitua nema' a.”
35 Te Yesus bua e nae, “Nee-nee! Kalua mia atahori naa!” 'Aib'oi' ma, nitu naa mbesi' atahori naa neu rae a sia atahori ra talad'a na ra. Mbesi' basa, ma nitu a lao hela atahori naa, ma nda tao nambeta aon sa.
36 Atahori ra mbomboo' a rae, “Seli, e! Atahori ia 'o'olan, na'ena koasa manaseli'! Losa nitu ra o tungga parendan de lao hela atahori ra!” 37 Basa de, dud'uit so'al Yesus mulai nened'ui-b'engga' sia basa nusa' naa.
Lamatua' Yesus na'ahahai' Simon ina arin noo atahori hetar
38 Lele' ara kalua mia ume hule-o'e' naa ma Yesus lao nisi' Simon ume na.k Simon ina arin namahed'i mafeo-matob'i', de aon natob'i roroo. Boe ma ara ro'e Yesus rae, “Ama'! Tulun mu'uhahai' ina lasi' a dei!” 39 Yesus neu ririi neu koi a suun, de 'oi mafeo-matob'i' a dea neu mia ina lasi' a. Hate-mata' naa boe ma, mafeo-matob'i' a mopo neu' ena. Boe ma ana fela neu' ena de neu lole-lau nanaat fee se.
40 Bob'o' naa, relo a nae mopo ma, atahori ra rendi basa atahori mamahed'i' ra risi' Yesus. Hed'i na ra mata'-mata'. Boe ma Ana ndae liman neu atahori mamahed'i' ra, de tao nahai' basa se. 41 Mia atahori mamahed'i' naa ra, hambu nitu tao' hira boe. De Yesus parenda nitu ra dea reu mia atahori naa ra. Ara dea reu ma rameli rae, “Ho ia, Lamatualain Anan!” Te huu nitu naa ra rahine rae, Eni, Kristus, fo Lamatualain helu basa mia dalahulun nae haitua nema' a. Naa de, Yesus 'ai se fo 'afi' 'ola' saa boe so'al Eni.
Lamatua' Yesus neu dui-b'engga Hara-lii Malole' sia ume-ume hule-o'e' ra
42 Mbila deka manggarelo ma Yesus fela de nisi' mamana rou' sa sia kota dea'. Atahori ra sangga E sia bee-b'ee. Lele' rita E, ma ara 'aka' kokoe E rae, “'Ama' leo moo hai! 'Afi' misi' mamana' laen!”
43 Te Ana nataa nae, “Au musi 'uu sia kambo' laen ra boe, fo 'uu dui-b'engga Hara-lii Malole' so'al Lamatualain parenda na. Huu Lamatualain denu Au 'ulalao ue-taos naa.”
44 Boe ma Ana lao' mia kambo' esa nisi' kambo' laen fo nanori sia ume-ume hule-o'e' sia profinsi Yud'ea.