Nitu ra malanggan sob'a-d'ou Lamatua' Yesus
4
Basa ma, Lamatualain Dula-d'alen noo Yesus nisi' mamana rou', fo nitu ra malanggan sob'a-d'ou E.a 2 Boe ma Ana puasa sia naa rerelo' fai haa nulu (40) ma tetemba' fai haa nulu (40). Basa boe ma, Ana ndoe nala seli. 3 Lele' Ana ndoe nala seli ma, nitu ra malanggan neu sob'a-d'ou E nae, “Ho ia, teb'e-teb'e' Lamatualain Anan, to? Mete ma teb'e, na, parenda fatu ia ra dad'i nanaat leo.”4 Te Yesus nataa nae, “Nenesura' mema' sia Lamatualain Susura Meumaren 'oi:
‘Atahori nda rasod'a mia 'a nanaat sa.
Te ara o musi rena Lamatualain Ded'ea-'o'olan,
ma tao tungga hihii-nanau na boe.’”b
5 Boe ma, nitu a nendi Yesus nisi' kota Yerusalem, Lamatualain kota meumaren a. Ma noo Yesus hene risi' Ume Hule-o'e Huu' a mamana naru na. 6 Boe ma nitu a nae, “Mete ma mema' Ho teb'e-teb'e' Lamatualain Anan, na, sob'a boke rae muu leo. Huu nenesura' sia Lamatualain Susura Meumaren 'oi,
‘Dei fo Lamatualain parenda aten mia sorga ra,
fo ranea nggo.’
Ma sia Lamatualain Susura Meumaren o nenesura' 'oi,
‘Dei fo ara ratanee nggo rendi' lima na ra,
naa fo eim nda na'atunu dai fatu sa boe.’”c
7 Te Yesus nataa nae, “Nenesura' sia Lamatualain Susura Meumaren boe 'oi,
‘Lamatualain naa, Lamatua ma.
Naeni de 'afi' sob'a-d'ou E.’”d
8 Boe ma nitu a noo Yesus nisi' lete naru' sa ata. De natud'u basa nusa' ra sia raefafo' ia, roo basa mandete-masa'a na ra. 9 Nitu a natud'u basa naa ra ma, ana nafad'e nae, “Sad'i sende' lulu-langgam neu au, dei fo au fee basa-b'asa ia ra reu nggo.”
10 Te Yesus 'ola' mbali e nae, “Hee, nitu! Dinggo' hela mamana' ia! Te nenesura' sia Lamatualain Susura Meumaren 'oi,
‘Ho musi be'utee neu Lamatualain,
ma musi tao-ues fee neu E 'a.’”e
11 Rena ta'o naa ma, nitu a lao hela Yesus. Te Lamatualain aten mia sorga ra reu tao mata' neu E.
Lamatua' Yesus mulai nanori sia Galilea
12 Lele' naa, mane Herod'es tao Yohanis mana sarani' a bui rala neu. Lele' Yesus rena nala, boe ma Ana lao bali' Galilea neu.f 13 Ana neu sia kambon Nasaret, boe ma lao nakandoo de leo sia kambo Kapernaum. Kambo' naa sia dano Galilea suun, sia Sebulon noo Naftali rae na.g 14 Noo ta'o naa, Ana tao tungga saa fo Lamatualain mana 'ola-'olan Yesaya sura' mema' ena nae,
15 “Sebulon noo Naftali raen
mana deka sia dano Galilea, sia loe Yordan bob'oa na.
Atahori nda Yahud'i ra sa leo sia naa.
16 Masod'a na ra sia ma'ahatu' a
te ia naa ara sia Manggarelo' a ena.
Huu Manggarelo' a naronda
neu basa atahori nda mana fe'e rahine Lamatualain sa.”h
17 Eni' a lele' naa, boe ma Yesus nanori atahori nae, “Ama musi misid'ea ma lao hela sala-kilu ma ra, fo misod'a noo meumare' leo! Huu ia naa basa atahori bisa dad'i Lamatualain atahorin ena.”i
Lamatua' Yesus no'e mana tasi atahori haa fo tungga Eni
18 Fai' sa, Yesus lao' tungga dano Galilea suu na. Ana nandaa noo atahori rua 'od'i-'a'a'. Esa naran Simon, te atahori biasa ro'e na rae, Petrus. Noo 'od'in naran Anderias. Ara dala 'u'u mia dano, huu ru'a se mana tasi ra. 19 Boe ma Yesus no'e se nae, “Wae, 'ima tungga Au leo! Hei mana dolu 'u'u, te ia naa Au 'ae 'unori nggi, fo ama dad'i mana sangga ao samana'.” 20 Rena basa ma, ru'a se lao hela dala na ra, de tungga Yesus neu' ena.
21 Basa ma, Yesus lao nakandoo mbei fai, boe ma nita Sab'ad'eus ana na ra. 'A'a ka naran Yakob'is, noo 'od'in naran Yohanis. Ru'a se ralolole pu'a na ra sia 'ofa' rala roo sira ama na. Boe ma Yesus no'e ru'a se fo tungga E. 22 Ara rena rala ma, lao hela sira aman noo 'ofa' a, de tungga Yesus neu' ena.
Lamatua' Yesus nanori atahori ma na'ahahai' atahori mamahed'i' ra
23 Boe ma, Yesus se lao-lao' ndule profinsi Galilea, fo ranori sia atahori Yahud'i ra ume hule-o'e na ra. Nanori Lamatualain Hara-lii Malolen, boe ma nafad'e tao ta'o bee fo atahori nau tungga Lamatualain parenda na. Boe ma Ana o na'ahahai' basa atahori mia hed'is mata'-mata'.j 24 Nda doo' sa ma, hara' so'al Yesus tataon naa, nened'ui-b'engga' ndule basa profinsi Siria. Basa ma, atahori rendi atahori mamahed'i' mata'-mata' reu E. Ara o rendi atahori nitu tao' ra, mulu bib'i', ma mana mamalu'u' ra. De Ana na'ahahai' basa se. 25 Lele' naa, atahori hetar rema tungga E. Ara rema mia profinsi Galilea, ma mia rae Kota Sanahulu, fo ara ro'e rae, Dekapolis. Ruma fai rema mia kota Yerusalem, mia profinsi Yud'ea, ma mia loe Yordan bob'oa na.