2 Huu naa, atahori rema mia bee-b'ee, de rakaseseti rakase'e sia ume rala, losa dea' boe. Basa ma, Yesus nafad'e se Lamatualain hihii-nanau na.

3 Yesus fe'e 'ola-'ola' boe ma, atahori haa ndoro rendi atahori mamalu'u esa nisi' E. 4 Te huu atahori manaheta', de ara nda bisa rendi atahori naa losa Yesus matan sa. Boe ma ara hene risi' ume mbunin, de ofe hendi mbunin nandaa noo Yesus fafo na. Ofe rala ma, ara ra'onda' atahori naa noo nenei na.^a 5 Yesus nita se boe, ma nahine nae ara ramahere teb'e-teb'e' neu Eni. Boe ma nafad'e atahori mamalu'u' a nae, “Ana ngga, e! Au fee ambon neu sala ma ra ena!”

6 Te hambu meser agama Yahud'i hira o nggua-nggua sia naa boe. Rena Yesus 'o'olan naa, ma ramed'a nda malole' sa. 7 De ara 'ola-'ola' rae, “Te atahori ia nambarani 'ola' ta'o naa! 'Aka' Lamatualain mesa' ne bisa fee ambon neu atahori sala na ra. Te atahori ia 'o'olan, tao aon 'ona' Eni, Lamatualain. Ana na'amuti ena!”

8 Te Yesus bub'ulu' mema' rala na ra ena. De Ana 'ola' nae, “Ama 'afi' du'a ta'o naa! 9-10 Bee ka mud'a' lena'? Mete ma 'ufad'e mbali atahori mamalu'u ia 'ae, ‘Ho salam nenefee ambon ena,’ hei nda bub'ulu' dad'i ta'o naa, do hoko' sa. Te mete ma 'ufad'e 'ae, ‘Fela leo! Ha'i mala neneim fo bali'.’ Mete ma ana fela neu' ena, hei fe'e mita bukti mae Au 'u'ena koasa fee ambon neu atahori sala na ra. Huu, Au ia, teb'e-teb'e' Atahori Matetu' a.”

Boe ma Ana nafad'e atahori mamalu'u naa nae, 11 “Rena', e! Ia naa, ho hai ena! Fela, ha'i neneim fo bali' leo.”

12 Ana rena nala ma, ana fela neu' ena. Ma ha'i nenein, de lao dea neu. Basa atahori mana sia naa ra rita noo mata na ra. Basa se titindindii, de 'oi, “Wii! Hita fe'e tita 'ona' ia ena! Lamatualain mema' manaseli'!”

13 Basa ma, Yesus neu selu' sia dano Galilea suu na. Atahori hetar rema randaa roo E, de nafad'e se Lamatualain hihii-nanau na.

14 Sia naa, hambu atahori esa, naran Lewi, Alfius ana na. Ue-tataon 'ed'a bea fee mana parenda Roma. Lele' Yesus lao' tungga naa, ma nita Lewi. De nafad'e nae, “Wae! 'Uma tungga Au!”

Lewi rena nala ma, ana fela tungga E neu' ena.

15 Basa ma, Yesus se 'endo' raa sia Lewi umen, roo nonoo mana 'ed'a bea na ra. Hambu atahori fea' boe, fo atahori Yahud'i ra rae atahori nda malole' ra sa, raa roo se boe. Mia atahori mana 'endo' raa' ra, hambu hetar hii rena Yesus.

16 Lele' naa, hambu meser agama hira mia partei Farisi, rita Yesus 'endo' naa noo mana 'ed'a bea ra, ma atahori fo sira rae atahori nda malole' ra sa. Boe ma ratane mana tungga na ra rae, “Ta'o bee de hei Meser ma 'endo' naa noo atahori mana 'ed'a bea ra, ma atahori nda malole' naa ra sa?”

17 Yesus rena nala ara ratatane ta'o naa, ma nataa nae, “Atahori mamahed'i' ra parluu doter, te atahori nda mamahed'i' ra sa nda parluu sa. Au 'uma tao mata' neu atahori nda malole' ra sa. Te nda 'uma tao mata' neu atahori mana med'a aon malole' ena sa.”

18 Lao esa, atahori partei agama Farisi ra puasa. Ara rita Yohanis mana sarani' a mana tungga na ra o puasa boe. Te ara nda rita Yesus ana mana tungga na ra puasa 'ona' sira sa. Basa ma atahori na ra rema randaa roo Yesus, de ratane rae, “Papa. Hai puasa. Yohanis atahori na ra o puasa boe. Te, ta'o bee de Papa ana mana tungga ma ra nda puasa sa?”

19 Yesus nataa nae, “Hei bub'ulu' ena, mete ma hambu fefeta kakab'i', fui' ra nda puasa sa, te raa losa ra'ab'eta. Mete ma tou' a fe'e sia naa, tantu basa se raa ra'ab'ue. 20 Te mete ma atahori fea' lea rendi tou' a, na, nonoo na ra susa, dei fo ara fe'e puasa ena.”

21 Boe ma, Yesus 'ola' fee nekendandaa' esa fai nae, “Atahori nda tanda teme feu' neu bad'u mbaraa' sa. Huu mete ma safe, na, teme feu' a kukundu fo tao nasid'e selu' bad'u mbaraa' a. 22 'Ona' naa boe, atahori nda ombo tua feu' neu mba'o mboko' sa. Te mete ma mba'o a fanggi, na, tua' a nandali hendi e. De tua feu' musi ombo neu mba'o feu'.”^b [Noo ta'o naa, Yesus nanori se nae, Eni nenorin feu', de 'afi' neb'ali noo atahori Farisi ra nenori mbaraa na.]

23 Lao esa, nandaa noo atahori Yahud'i ra fai hule-o'en, Yesus se lao' tungga osi suu na. Boe ma Ana mana tungga na ra 'oru are-gandum, de raa.^c 24 Te atahori Farisi ra rita, de rafad'e Yesus rae, “Ta'o bee de mana tungga ma ra ralena-langga hita atoran agama na? Ara 'oru are-gandum nandaa noo fai hahae ao'! Ama 'afi' tao ta'o naa!”

25-26 Nataa nae, “Ta'o bee? Ama nda misined'a ba'i Daud dud'uin sa. Lele' naa' Abiatar dad'i agama Yahud'i malangga monae na. Ba'i Daud noo mana tungga na ra ndoe rala seli. Boe ma ara risi' Lamatualain Lalaat Hule-o'en rala, de ha'i roti fo malangga agama ra fee basa neu Lamatualain, de raa. Tao-tao te 'aka' malangga agama ra bole raa, te atahori laen ra hoko'. Ma ba'i Daud se raa, te nda hambu atahori fee sala' neu se sa.”^d

27 Yesus tute 'o'olan nae, “Ama 'afi' lilii', Lamatualain tao fai hahae ao' fo dad'i papala-b'ab'anggi' tulu-fali hita atahori. Te Ana nda tao hita atahori fo tungga 'a fai hahae ao' a atoran na sa. 28 Dad'i Au ia, Atahori Matetu'. Au 'u'ena hak fo 'ae atahori bole, do nda bole tao saa-saa nandaa noo fai hahae ao' a sa.”