Ara pu'a rala 'u'u hetar
5
Lao esa, Yesus nanori atahori ra sia dano Galilea suu na.a Atahori hetar rema rae rena Lamatualain Ded'ea-'o'ola na. Losa ara rakaseseti heo rala Yesus. 2 Deka naa, hambu manatasi ra raisi pu'a na ra sia mad'a' ata. Boe ma Yesus nita 'ofa rou' rua mananafu' sia naa. 3 'ofa' naa ra Simon 'enan esa. Boe ma Yesus hene nisi' Simon 'ofan, ma no'e e tola 'ofa' nisi' oe roma' mbei. Basa ma Ana 'endo' nanori atahori hetar naa ra.b4 Ana nanori basa, ma 'ola' neu Simon nae, “Simon! Misi' mamana roma' mbei fo nggari pu'at sia naa. Te dei fo hei hambu 'u'u hetar.”
5 Te Simon nataa nae, “Papa dei! Hai pu'a tetemba' sa teme-ao, te nda mala 'u'u boa' esa sa boe! Te huu Papa ma'o naa ena, de, au 'u'onda' sob'a.”c 6 Boe ma ara ra'onda' pu'at. Lele' rae lea bali' ata neu, pu'at a sofe' noo 'a 'u'u, losa pu'at a sii mbei ena.d 7 Boe ma Simon randu nonoon mana sia 'ofa' laen fo rema tulun se. De ara 'ao 'u'u 'ofa' rala neu, de 'ofa karua' naa ra sofe' roo 'a 'u'u, de rae' a molo.e 8-10 Simon nonoo manatasi na ra, Yakob'is noo Yohanis, naeni Sab'ad'eus ana na ra, ara o sia naa boe. Ara o titindindii' a, huu rala 'u'u hetar seli. Lele' Simon Petrus nita saa mana dad'i' naa, ma ana sende' lulu-langgan sia Yesus matan nae, “Au ia, atahori mana tao sala-kilu' naen seli ena. Dad'i malole lena' Papa 'afi' deka-d'eka moo au fai.”
Te Yesus nataa nae, “Simon! 'Afi' du'a nae-nae dala' naa, huu Au 'ae pake nggi. Hei ia, biasa sangga 'u'u. Te ia naa Au 'unori nggi sangga atahori fo tungga Au.”
11 Basa ma ara lea tute 'a 'ofa na ra mad'a' ata reu. Boe ma ara lao hela basa saa-saa na ra, fo tungga Yesus.
Lamatua' Yesus na'ahahai' atahori mana mamahed'i kusta esa
12 Sia kambo' sa, Yesus nandaa noo atahori sa hed'i kusta ndule ao na. Lele' ana nita Yesus, boe ma neu sende' lulu-langgan ma be'utee sia matan losa rae a. Boe ma nae, “Ama', e! Tulun au dei! Au bub'ulu', Ama' bisa mu'uhahai' hed'i ngga ia. Sad'i Ama' nau. Naa fo atahori sud'i boe melumud'u au fai.”
13 Boe ma Yesus loo liman de nggama e. Boe ma 'ola' nae, “Au nau! Hai leon!” 'ola' basa ma, hed'i kusta mop'o neu' ena mia atahori naa ao na. 14 Boe ma Yesus 'ola' fee nesenened'a' neu e nae, “Musuned'a malolole! Ho hai ena, te 'afi' mufad'e esa boe! Ho musi tungga ba'i Musa parendan dei. Dad'i muu sia malangga agama leo, fo ana paresa' aom, naa fo ana nahine hed'is ma hai teb'e ena, do hoko'. Basa naa, ho musi mendi tutunu-hohotu' mo'e makasi, fo basa atahori bub'ulu' 'oi, ho hai teb'e ena.”f
15 Mae Yesus 'ai o, nda doo' sa ma dud'uit so'al koasan naa, nened'ui-b'engga' sia bee-b'ee. Dad'i atahori ra 'aka' nonggo-nonggo rema rae rena E nanori se. Boe ma Ana na'ahahai' atahori hetar mia hed'is mata'-mata' 16 Te Yesus o hii dinggo' aon mia atahori hetar, fo neu hule-o'e sia mamana rou'.
Lamatua' Yesus na'ahahai' atahori mamalu'u' esa
17 Lao esa, Yesus nanori atahori sia ume sa. Lele' naa hambu atahori mia partei agama Farisi roo meser agama hira, rema rena E. Ara rema mia kambo-kambo' sia profinsi Galilea, profinsi Yud'ea, ma kota Yerusalem. Lamatualain fee koasa neu Yesus fo na'ahahai' atahori mamahed'i' ra. 18-19 Lele' naa, hambu atahori hira ndoro rendi atahori mamalu'u sa sia rad'at sa ata. Ara sangga dala' fo roo atahori mamalu'u' naa nisi' Yesus fo na'ahahai' e. Te ume naa sofe' noo atahori ena, de ra'asusuu' rala reu, te nda bisa sa. Naa de, ara rendi atahori mamalu'u' a ume ata neu. Boe ma ara ofe randola ume a sinin, de ra'onda' atahori mamalu'u' mana sia rad'at ata naa. Ara ra'onda' e, nisi' atahori hetar talad'a na ra, nandaa noo Yesus mata na. 20 Yesus nita ma nahine nae, ara ramahere Eni bisa na'ahahai' sira nonoo na. Boe ma Ana 'ola' neu atahori mamalu'u' naa nae, “Ana ngga, e! Au 'ose hendi sala ma ra ena.”
21 Rena Yesus 'ola' na'o naa, boe ma atahori Farisi roo meser agama ra mulai ratatane rae, “He'e! 'Aka' Lamatualain mesa' ne na'ena hak 'ose hendi atahori sala-kilu na ra. Te eni ia, seka, de tao aon 'ona' Lamatualain! Ia, ne'emutis!”
22 Te Yesus bub'ulu' rala na ra. De Ana 'ola' nae, “Ta'o bee de hei du'a mae Au ia, 'ola' ne'emutis? 23-24 Au ia, Atahori Matetu' a. Au 'u'ena hak fee ambon neu atahori sala-kilu na ra. Mete ma Au 'ufad'e 'a atahori mamalu'u' ia 'ae, ‘Au fee ambon neu sala ma ra ena’, hei nda mita Au koasa ngga saa sia raefafo' ia sa. Te mete ma Au 'ae, ‘Fela leo! Ha'i mala rad'at ma fo bali'.’ Mete ma ana fela neu' ena, hei fe'e mita koasa ngga. Naa de, Au 'ae 'u'uhahai' atahori mamalu'u' ia, naa fo hei o bub'ulu', Au 'u'ena hak fee ambon neu atahori sala-kilu na.”
Boe ma Ana heo' mbali atahori mamalu'u' a, de 'ola' nae, “Mumburii' leo! Ha'i mala rad'at ma, fo lao bali' ume muu!”
25 'Aib'oi' ma, atahori naa fela nambarii' sia atahori hetar mata na ra, de ha'i nala rad'at na. Boe ma ana lao bali' noo koa-kio Lamatualain. 26 Rita ta'o naa ma basa atahori mboo-mboo' a. Boe ma ara so'u rananaru Lamatualain naran rae, “Lamatualain manaseli', o! Fai' ia, hita tita dala manaseli' noo mata ao ta ra ena!”
Lamatua' Yesus no'e Lewi fo tungga Eni
27 Nda doo' sa ma, Yesus dea nema mia ume naa, ma nita atahori mana 'ed'a bea sa 'endo' sia mamana 'ed'a bea na. Atahori naa naran Lewi.g Boe ma Yesus no'e nae, “'Uma tungga Au!” 28 Lewi rena nala, ma ana fela neu' ena, lao hela basa-b'asa' e sia naa, de neu tungga Yesus.
29 Basa ma, Lewi tao fefetas fo no'e Yesus neu sia ume na. Ana o no'e nonoo mana 'ed'a bea na ra, roo fui' ra, fo rema ra fefetas. 30 Te hambu atahori partei agama Farisi hira, roo meser agama ra, 'o'ola' Yesus ana ded'enu na ra rae, “Ta'o bee de hei 'endo' mia moo atahori nda papake' ra sa, 'ona' mana 'ed'a bea roo atahori nda malolole' naa ra sa? Atahori malole' 'afi' mi'ib'ue moo atahori mata' naa ra!”h
31 Te Yesus nafad'e se nae, “Atahori mamahed'i' mema' parluu doter. Te atahori nda mamahed'i' ra sa, nda parluu sa. 32 Au 'uma fo mete-se'u atahori nda malole' ra sa. Te nda 'uma fo mete-se'u atahori mana du'a rae sira aon ndoo-tetu' ena.”
Meser agama ra rareresi roo Lamatua' Yesus so'al puasa
33 Basa ma, atahori mia partei agama Farisi roo meser agama ra 'o'ola' mbali Yesus rae, “Ta'o ia, Ama'! Yohanis mana sarani' a ana mana tungga na ra puasa ma hule-o'e rakandoo 'a. Atahori Farisi ra ana mana tungga na ra o tao 'ona' naa boe. Te ta'o bee de Ama' ana mana tungga ma ra 'aka' raa rinu rakandoo 'a? Ara nda puasa rita sa, do?”
34 Te Yesus 'ola' noo se nendi' nekendandaa' nae, “Mema' hei bub'ulu' ena, mete ma hambu feta kakab'i', mana neu fefetas ra nda puasa sa, te raa-rinu ra'ab'eta. Mete ma tou' mana masao feu' a fe'e sia naa, na, tantu basa se raa-rinu ra'ab'ue. 35 Te dei fo lao esa, mete ma atahori fea' to'u rendi tou mana sao feu' a, na, nonoo na ra susa, fo ara fe'e puasa ena.”
36 Basa ma, Yesus nafad'e nekendandaa' esa fai nae, “Nda hambu atahori ha'i teme feu' 'e'etu' esa, fo tanda neu bad'u mbara manasika' sa. Te mete ma safe bad'u a, na, teme feu' naa kukundu ma bad'u a boe sika.i 37-38 'Ona' naa boe atahori nda 'oni tua feu' nisi' sambat mana mboko' sa. Te mete ma sambat fanggi e, na, tua' nandali hendi e. Dad'i tua feu' musi 'oni neu sambat feu' boe. [Noo ta'o naa, Yesus nanori se nae, Eni nenori feun, 'afi' ne'eb'ue noo atahori Farisi ra nenori mbaraa na.] 39 Atahori mana ninu nita oe anggor mbaraa' ena, nda hii ninu anggor feu' sa. Huu nahine nae, ‘Anggor mana nenembed'a mbaraa' naa, malad'an seli!’”