5 Losa ume naa te, pangantin tou' a nda fe'e nema sa. Doo-d'oo ma ana feto' naa ra nduar, de ara sunggu' rasambeta'.

6 Tao-tao te neofaa banggi rua ma, ara rena atahori rameli rae, ‘Woi! Pangantin tou' a losa ena! 'Ima fo ata teu soru e leo!’ 7 Ana feto' ra rena ta'o naa, ma ara fela randaa. De reu raote lambu ana' ra. 8 Ma ana feto nggoa' ra 'ola' roo nonoo na ra rae, ‘Wee, toronoo' ra, e! Tulun banggi fee hai mina mbei dei, te hai lambu ma ra rae 'a mate ena!’ 9 Te ana feto mahine' ra rataa rae, ‘Awee'! 'Afi' miminasa, te nda bisa sa, o. Huu hai minam ia nda dai basa hita sa! Malole lena' mii hasa sia kios.’ 10 Boe ma ara lao reu hasa mina. Te lele' ara dea reu ma, pangantin a losa boe. De ana feto mahine' ra tungga rala reu risi' mamana kakab'i' a, ra'ab'ue roo pangantin ra ma basa fui' ra. Basa se rala ume rala ma, atahori 'ena lelesu a boe.

11 Basa ma, ana feto nggoa' ra o rema boe. Ara rameli de kokoe rae, ‘Papa! Papa, e! Tulun soi lelesu a dei!’ 12 Te pangantin a nataa nae, ‘Weh, nda bisa sa, o. Te au nda 'uhine nggi sa!’^b

13 Huu naa, hei musi mihehere fo minea mikindoo 'a, huu hei nda bub'ulu' Au 'u'uma ngga lele' bee sa boe, do lii' hira sa boe.”

14 Basa ma Yesus tute selu' nekendandaa' esa fai nae, “Mete ma Au lao hela nggi ena, na, ama musi tao ues malole' fee Au, 'ona' nekendandaa' ia. Ta'o ia: Malangga esa nae lao mamana doo-d'oo' neu. Lele' ana naote nala nae lao, ana no'e nala ded'enu' na ra, basa ma ana parenda se nae, ‘Ama pake doi' ia ra dad'i poko'. Dei fo mete ma au bali', na, ama musi mifad'e au, hei hambu buna' ba'u sa.’ 15 Basa de ana fee ded'enu kaesan doi mbilas saku lima,^c fo ana na'ab'ub'una' doi' naa. Boe ma, ana fee ded'enu karuan doi' saku rua, ma ded'enu katelun doi' saku esa, tungga esa-esa' beb'e'i na. Basa ma ana lao doo-d'oo' neu.

16 Lele' ded'enu kaesan simbo nala doi' ra, ma ana lao de neu danggan. Nda doo' sa ma, ana hambu doi buna' saku lima fai. 17 'Ona' naa boe, ded'enu karuan a. Ana hambu doi buna' saku rua fai. 18 Te ded'enu katelun mana simbo doi' saku esa, ana neu 'ali ndola' sia rae a, de susuu malanggan doin naa.

19 Doo-d'oo ma, malangga a bali'. De ana na'ab'ue ded'enu na ra de paresa' doin fo ara ra'ab'ub'una' naa. 20 Atahori kaesan rala neu de fee doi' saku sanahulu, de nae, ‘Malangga! Doim sia. Fai' naa malangga fee au doi' saku lima. Te ia naa, au hambu buna' saku lima fai.’

21 Rena nala ma, malangga namaho'o. Ana nafad'e nae, ‘Malole! Ho ia, ded'enu malole'. Mae au nese ia o, ho tao ues noo manggate' ma tungga mukundoo 'a au parenda ngga. Huu mete-se'u muhine dala anad'iki' 'ona' ia ena, de dei fo au so'u nggo fo mete-se'u dala monae' ra. Dei fo au tao fefetas fo basa nggita tamaho'o teu esa.’

22 Basa ma, ded'enu karuan nema fai de fee doi' saku haa neu malangga, ma nae, ‘Malangga! Dalahulun malangga fee au, doi' saku rua. Mita neu' ena, au hambu doi buna' saku rua fai.’

23 Malangga o namaho'o boe. Ana nafad'e nae, ‘Malole! Ho ia, ded'enu malole'. Ho tao ues noo manggate', ma mae au nese ia o, tungga mukundoo 'a au parenda ngga. Huu mete-se'u muhine dala anad'iki' 'ona' ia, de dei fo au so'u nggo fo mete se'u dala' monae' lena' fai. Dei fo au tao fefetas fo basa nggita tamaho'o teu esa.’

24 Boe ma, ded'enu katelun nema fai. Ma ana nafad'e nae, ‘Malangga, o! Au bub'ulu' malangga ia atahori rala manggate'. Huu malangga ha'i saa fo atahori laen tao, ma 'etu mala saa fo atahori laen sela-nggari. 25 Au 'umutau, 'afi' losa doi' ia ra mopo hendi se, ma malangga hukun au. Naa de au 'u'ufuni' se noo malole. Sie malangga! Ha'i mala bali' se. Doim saku kaesa' ia fe'e teme'!’

26 Malangga rena nala ma, ana bua kakaso' e nae, ‘Ho ia ded'enu de'ulaka' ma mana mbera-mbike'! Mete ma bub'ulu' mae, au ha'i 'ala saa fo atahori laen tao, ma 'etu 'ala saa fo atahori laen sela nggari, 27 na ta'o bee de nda muu mbed'a' doi ngga sia bank sa? Fo hela au bali', na, au hambu bali' bunan mbei boe o neu!’

28 Basa ma, malangga denu ded'enun laen ra nae, ‘Ha'i mala doi' naa ra mia e, fo fee neu ded'enu' mana hambu doi buna' saku lima' naa. 29 Te atahori mana tao mata' malole' neu saa fo ana to'u' ena, dei fo ana hambu nae' lena' fai. Te atahori fo nda nau tao mata' neu saa fo ana to'u' naa sa, dei fo ara ha'i rala bali' basa se mia e.^d

30 To'u mala ded'enu' nda mana na'ena ngguna-b'ara saa-saa ia. Lea roroso fo nggari e dea neu. Hela e nggae ei-ei ma doid'oso sia mamana ma'ahatu' naa!’”^e

31 Basa ma Yesus 'ola' nakandoo nae, “Au, Atahori Matetu' ia, dei fo 'onda bali' 'uma 'endi' Ama ngga mandete-masa'an, 'uma 'oo ate mana mia sorga na ra. Basa fo Au 'endo' sia kad'era parenda manaseli ngga, fo paresa' basa atahori masod'a na ra.^f 32 Dei fo basa atahori mana rasod'a mia raefafo', rema randaa roo Au. Dei fo Au bingga-b'anggi se, 'ona' manatad'a bingga-b'anggi bib'i lombo noo bib'i hiek fo dad'i nononggo' rua. 33 Atahori mana nasod'a tungga Lamatualain hihii-nanaun, Au tao e sia Au bob'oa 'ona ngga. Te laen ra, Au tao se sia bob'oa dii ngga. 34 Lele' naa, Au to'u parenda' 'ona' mane'. Dei fo Au 'ufad'e atahori mana sia bob'oa 'ona ngga 'ae, ‘Hei ia mana simbo papala-b'ab'anggi' mia Au Ama ngga. 'Ima misi' ume mana nenesad'ia mema' fee neu nggi eni' a mia fefeu na. 35 Au 'urolo nggi, huu fe'esa'an lele' Au ndoe, hei mana fee Au 'ua. Lele' Au 'u'umad'a, hei mana fee Au 'inu. Au 'uma 'ona' atahori fui', te hei mana simbo Au sia ume ma ra. 36 Au nda 'u'ena bua-lo'as sa, te hei mana fee Au bua-lo'as. Au 'umuhed'i, te hei 'ima tao mata' neu Au. Au sia bui rala, te hei 'ima se'u Au.’

37 Dei fo atahori rala ndoos sia Au bob'oa 'ona ngga naa rena 'ona' naa, ma ara rataa bali' rae, ‘Papa, ia ta'o bee ia ena? Papa nae, Papa ndoe, de hai mihao nggo. Papa na'amad'a, de hai o fee nggo minu. 38 Papa 'ona' atahori fui', de hai simbo nggo misi' hai umem. Papa nda na'ena bua-b'a'us saa, de hai fee. 39 Papa mumuhed'i, de hai tao mata' neu nggo. Papa sia bui rala, de hai mii tulu-fali nggo. Te eni bees hai tao dala' 'ona' naa?’

40 Dei fo Au 'utaa se 'ae, ‘Mimihere Au! Huu lele' hei tao dala' 'ona' naa neu Au atahori ngga ra, mae tao fee neu atahori mana tud'a-loloe' ra o, na, hei tao fee neu Au ena!’

41 Boe ma Au 'ufad'e neu atahori mana sia bob'oa dii ngga 'ae, ‘Hee, atahori de'ulaka ra, e! Lamatualain sumba-d'oon nggi. Dinggo' hela ia! Dei fo Au denu atahori reu piru hendi' nggi misi' ai naraka mana mbila roo-roo' nda mana mate' sa. Huu Lamatualain sad'ia mema' mamana huku-d'okin fee neu nitu ra roo malangga monae na. 42 Au mbuu hendi nggi, huu lele' Au ndoe, hei nda fee Au 'ua sa. Lele' Au 'u'umad'a, hei nda fee Au 'inu sa. 43 Au 'uma 'ona' atahori fui', te ama nda simbo au sia hei umem sa. Au nda 'u'ena bua-b'a'us sa, te hei nda fee Au bua-b'a'us sa. Au 'umuhed'i, te ama nda 'ima tao mata' neu Au sa. Au sia bui rala, te hei nda 'ima tulu-fali Au sa.’

44 Dei fo atahori de'ulaka' ra rena 'ona' naa, ma rataa rae, ‘Papa, ia ta'o bee ena ia? Papa nae Papa ndoe, te hai nda fee nanaat sa. Papa na'amad'a, te hai nda fee nggo minu sa. Papa 'ona' atahori fui', te hai nda simbo sia hai umem sa. Papa nda na'ena bua-b'a'us sa, te hai nda fee sa. Papa namahed'i, te hai nda mii tao mata' sa. Papa sia bui rala, te hai nda mii tulu-fali sa. Te eni bees hai tao Papa 'ona' naa?’

45 Dei fo Au 'utaa se 'ae, ‘Mimihere Au! Te lele' hei nda tulu-fali atahori mana tud'a-loloe' ra sa, na, 'ona' hei nda tulu-fali Au sa boe.’ 46 Basa naa ma, atahori de'ulaka' ra hambu doid'oso rakandoo 'a losa doo ndu'u-doon neu. Te atahori rala ndoos ra hambu masoi-masod'a' rakandoo roo Lamatualain losa doo ndu'u-doon neu.”^g