2 Hambu atahori Farisi hira rema rae tao ra'atutud'a' E. Ara ratane rae, “Tungga hita atoran agaman, na, mete ma tou' a sao ena, na, bole mahela', do hoko'?”

3 Yesus nataa se nae, “Misined'a dei! Atoran sasaot fo ba'i Musa fee hela neu nggita, nae ta'o bee?”

4 Ara rataa rae, “Ba'i Musa atoran na nae, tou' bole mahela', sad'i fee susura mahela' neu saon dei.”^a

5 Yesus naselu bali' nae, “Hee! Rena, e! Huu langga fatu ma ra, naa de ba'i Musa sura' ta'o naa! 6 'Afi' lilii' dud'ui fefeun, lele' Lamatualain tao lalai noo raefafo'! Nenesura' sia Lamatualain Susura Meumaren 'oi,

9 Mete ma Lamatualain tao nala ru'a se dad'i esa ena, atahori 'afi' fee se mahela' fai!”

10 Basa ma, Yesus noo mana tungga na ra risi' ume esa rala reu. Sia naa, ratane Yesus nenorin faa' ra.

11 Yesus nataa nae, “See hela hendi saon, basa ma ana sao selu', na, naa hohongge ena! 12 Ina' o 'ona' naa boe! Mete ma ana hela hendi saon, basa ma sao selu' fai, na, naa o hohongge boe!”^d

13 Lele' esa, atahori ra rendi ana na ra risi' Yesus, ro'e fee se papala-b'ab'anggi'. Te Yesus mana tungga na ra 'ai atahori naa ra.

14 Yesus nita ta'o naa, ma namanasa mana tungga na ra nae, “Hela anak ara rema risi' Au! 'Afi' mi'inggee se! Te atahori 'ona' sira ia ra, Lamatualain atahori na ra. 15 Misined'a matalolole! See nau nema nandaa noo Lamatualain, na, ana musi hii E, 'ona' anak ara hii rae randaa roo ina-ama na ra. Mete ma nda ta'o naa sa, na, ara nda randaa dad'i Lamatualain atahorin sa.”^e 16 Basa ma, Yesus holu nala anak ara naa ra, ma tao liman neu se esa-esa', de fee se papala-b'ab'anggi'.

17 Lele' Yesus se rae lao boe, ma atahori mamasu'i' esa nela-nela' nema nae nandaa noo E. Ana sende' lulu-langgan neu Yesus matan, ma natane nae, “Papa Meser nenefee had'a-hormat! Au 'ae 'utane mbei. Ta'o ia, Papa. Au musi tao ta'o bee, fo 'uhine teb'e' au bisa maso' sorga fo 'usod'a 'ukundoo 'oo Lamatualain?”

18 Yesus nataa nae, “Ta'o bee de mae Au, ‘nenefee had'a-hormat’!? Nda hambu atahori esa nenefee had'a-hormat sa, 'aka' a Lamatualain. 19 Muhine Lamatualain parendan mia fai ma'ahulun ena nae,

20 Atahori naa nataa nae, “Teb'e, Papa Meser! Eni' a au fe'e soru', te au tungga basa parenda' naa ra ena.”

21 Yesus kasian atahori naa, de nafad'e nae, “Teb'e! Te fe'e hela dala' esa. Ia naa, bali' fo muu seo hendi basa su'i ma ra. Basa naa, muu bab'anggi doi na ra fee neu atahori mana to'a-taa' ra. Basa naa fo fe'e 'uma tungga Au leo. Dei fo Lamatualain pala-b'a'e fee nggo su'i-b'etas laen sia sorga!”

22 Atahori naa rena Yesus 'o'olan ta'o naa, ma ralan nambalulutu. Ana bali' noo rala sususa', huu su'in nae'.

23 Boe ma Yesus mete neu-nema, ma 'ola' noo mana tungga na ra nae, “Rena, e! Atahori mamasu'i' mema' susa lao esa' nisi' sorga!”

24 Yesus mana tungga na ra rena ta'o naa boe, ma ara bingun. Te Yesus 'ola' fai nae, “Rena matalolole! Mae dad'i Lamatualain atahorin, na, susa lao esa'! 'Afi' du'a mae naa mud'a' a. 25 Atahori mamasu'i' a nisi' sorga dad'i Lamatualain atahorin, sususan 'ona' a banda onta monae' esa nisi' lalaen tungga sosoot ndola na.”

26 Yesus 'o'olan naa, tao se boe bingun. De ratane rae, “Mete ma teb'e ta'o naa, na, see bisa hambu masoi-masod'a'?”

27 Yesus mete se esa-esa', ma nafad'e nae, “Soa' neu atahori, mema' nda bisa sa. Te 'afi' lilii': soa' neu Lamatualain, basa' e bisa dad'i!”

28 Basa ma, Petrus 'ola' nae, “Papa. Hai lao hela basa sud'i 'a saa ma ra ena fo tungga nggo. Te hai hambu saa?”

29-30 Yesus nataa nae, “Au 'ae 'ufad'e nggi ta'o ia! Atahori mana tungga Au, ma lao hela ina-aman, 'od'i-'a'a na ra, ana na ra, osi na ra, ue-tataon, noo basa hata-heton, fo neu dui-b'engga Lamatualain Hara-lii Malolen neu atahori sia bee-b'ee, na, dei fo ana simbo bali' buna-b'oa' lao natun esa. Basa saa fo ana lao hela' naa ra, ana simbo bali' lena' naa ra fai. Ma dei fo ana hambu doid'oso', huu ana tungga Au. Te mete ma raefafo' ia natete'e, na, ana nasod'a nakandoo noo Lamatualain. Naa, eni bala-b'ae na! 31 Misined'a, e! Atahori mana so'u na'amoko aon, na, tungga Lamatualain dud'u'an, dei fo ana dad'i atahori anad'iki' seli. Te atahori mana naloe aon, na, tungga Lamatualain dud'u'an, dei fo ana dad'i atahori monae'.”^g

32 Lele' naa, Yesus se lao risi' Yerusalem. Yesus lao' sia mata'. Mana tungga kasanahulu rua na ra roo atahori laen ra lao' tungga dea na. Ara rasaned'a saa fo Ana 'ola' dalahulun nae, atahori rae tao risa Eni sia Yerusalem. Huu na, ara bingun ma ramatau boe. Yesus rena ta'o naa, ma no'e nala mana tungga na ra, de nafad'e selu' se saa fo atahori rae tao neu Eni sia Yerusalem.

33 Ana 'ola' nae, “Rena, e! Ia naa, ata tae Yerusalem teu. Au ia, Atahori Matetu' a. Te sia naa, ara seo Au neu malangga agama Yahud'i ra malangga na ra roo meser agama ra. Basa ma ara hukun risa Au. Boe ma ara fee Au neu atahori laen mana nda rahine Lamatualain sa. 34 Basa ma ara 'ola' ra'amamae' Au. Ara puras miru neu Au. Ara filo ralulutu ao ngga. Dei de, ara risa Au. Mema' Au mate teb'e. Te fini-esan ma, Au 'usod'a bali'.”^h

35 Basa ma Yakob'is noo Yohanis, Sab'ad'eus ana na ra, rema risi' Yesus. Ara ro'e mbali Yesus rae, “Papa Meser! Hai parluu.”

36 Yesus natane se nae, “Ama parluu saa?”

37 Ara rataa rae, “Ta'o ia, Papa! Lele' Papa 'endo' to'u parenda' noo mandete-masa'am ena, na, hai mo'e Papa mu'e'endo hai, esa sia bob'oa 'onam, ma esa sia bob'oa dii ma. Fo hai o to'u parenda' boe.”

38 Yesus nataa nae, “Hei ru'a nggi nda mihine saa fo hei mo'e' a sa. Te Au ia, dei fo hambu doid'oso' nae'. De ta'o bee? Ama du'a mae, ama o bisa lemba doid'oso' naa moo Au losa mate boe, do?”ⁱ

39 Rataa rae, “Hai bisa, Papa!”

Yesus 'ola' noo se fai, nae, “Mema' hei bisa lemba doid'oso' naa, 'ona' Au boe. 40 Te seka 'endo' sia Au bob'oa dii noo 'ona ngga, naa Au nda 'u'etu' sa. Naa, Lamatualain mana na'etu'. Ana na'etu' basa ena, seka mana 'endo' sia mamana' naa.”

41 Lele' mana tungga laen na ra rena Yakob'is noo Yohanis ro'e ta'o naa ma, ramanasa. 42 Basa ma Yesus no'e nala basa se, de nae, “Mihine ena, to? Moko-monaen mana to'u parenda' ra 'aka' a tuni-ndeni manggarau na ra, losa ara nda bisa tao rala saa sa boe. Boe ma malangga nusa' mana nda rahine Lamatualain sa, ara parenda ra'a'lelena', losa manggarau na ra nda bisa boti' rala langga na ra sa. 43 Te ama 'afi' tao ta'o naa! See mia hei ia ra, nae dad'i neu atahori monae', eni musi dad'i 'ona' atahori ded'enu' fo mete-se'u atahori laen ra.^j 44 Ma see nae dad'i malangga, na, eni musi dad'i 'ona' ate.^k 45 Te Au, Atahori Matetu' ia, nda 'uma fo atahori mete-se'u Au sa. Te Au 'uma fo mete-se'u atahori hetar. Au 'uma fee masod'a ngga teme-ao' fo soi-tefa atahori hetar mia sala-singgo na ra.”

46 Yesus noo mana tungga na ra ma atahori hetar losa kota Yeriko. Lele' ara rae lao rakandoo, te hambu atahori poke' esa 'endo' hule-hule' sia dala' a bife na. Naran Bartimeos, Timeos ana na. 47 Ana rena nae, Yesus mia Nasaret lao' tungga naa, ma ana nggasi nahere' nae, “Yesus! Daud tititi-nonosin, e! Hai mihani nggo doo' ena! Kasian au dei!”

48 Atahori rena ana nggasi na'o naa, ma ara 'ai e rae, “Hee! Nee-nee!”

Te ana boe nggasi nahere' fai nae, “Yesus! Daud tititi-nonosin, e! Kasian au dei!”

49 Boe ma Yesus nambarii'. Ana denu nae, “Moo e nema!”

Ma ara reu, de rafad'e rae, “Nee-nee leo! Papa Meser no'e nggo. De 'uma leo!”

50 Bartimeos rena nala ma, ana piru hendi lafen, boe ma ana nambarii' haelalai, de neu nandaa noo Yesus.

51 Losa ma, Yesus natane e nae, “Ho nau saa?”

Ana nataa nae, “Papa, e! Au 'o'e fo au bisa 'ita.”

52 Yesus nafad'e e nae, “Huu mumuhere mae Au bisa 'u'uhahai' nggo, de lele' ia o, ho hai boe! Muu leo!”

Boe ma Bartimeos matan hai neu' ena, de ana tungga noo Yesus.