Malangga mana tao-ues masi'et
16
Basa ma, Yesus dui selu' nekendandaa' esa fee neu ana ded'enu na ra nae, “Hambu atahori mamasu'i' esa fee ue-tataos neu atahori mana dad'i eni malangga mana tao ues na. Te doo-d'oo ma malangga rena mbasi' nae, malangga mana tao-ues naa nae pod'e-pad'i na'arurunggi' e. 2 Dad'i ana no'e malangga mana tao-ues, de nafad'e nae, ‘Ho ia, ta'o bee? Au rena nggo 'aka' pod'e-pad'i' au hata-heto ngga. De ia naa muu sura' ue-tataom ra fo au paresa' dei. Te basa na, au 'ae nda pake nggo sa ena.’3 Rena ta'o naa ma, malangga mana tao ues du'a neu-nema nae, ‘Au soe ena! 'Oras ia au 'ae tao saa? Tatati rae o, au nda be'i sa. Dad'i mana hule-hule' o, au mae. 4 Mete ma au nda tao ues sia ia sa, au musi sangga dala', fo 'ona bee na, atahori laen ra nau simbo au.’
5 Huu naa, ana no'e nala basa atahori mana rahuta malangga a. De natane atahori kaesan nae, ‘Wae! Muhuta ba'u saa neu malangga ngga?’
6 Atahori naa nataa nae, ‘Au 'uhuta mina saitun liter rifon haa.’a
Boe ma malangga mana tao ues a nae, ‘Teb'e. Ho susura hutam sie. Ia naa sika hendi leo, basa na 'endo' fo sura' lai-lai susura huta feu' fai mae, ho muhuta liter rifon rua' a.’
7 Basa de neu natane atahori karuan nae, ‘Muhuta malangga ngga ba'u saa fai?’
Ma nataa nae, ‘Au 'uhuta are karon rifon esa.’b
De malangga mana tao ues a denu e nae, ‘Sika hendi susura huta mbaraa' naa leo, fo sura' feu' mae, karon natun falu' a.’
8 Ana tao ta'o naa, losa malanggan bub'ulu' tatao na. Te malangga musi nataa nae malangga mana tao-ues de'ulaka' ia mema' masi'et.
Naa! Au 'ufad'e nekendandaa' ia fo mihine mae, mete ma na'asasama' noo atahori mamahere', atahori nda mamahere' sa mema' masi'et lena' sia rauinggu ra talad'a na ra 'ale' ia.
9 Dad'i hei du'a sob'a. 'Ona' mae atahori raefafo' tao manggenggeo' rendi' hata-heto na ra, te malole lena' pake hata-heto raefafo ma ra fo tulu-fali atahori. Noo ta'o naa, hei o hambu toronoo' hetar. Mae hata-heto' naa basa, te dei fo Lamatualain sad'ia hela mamana' fee nggi sia sorga.
10 Mete ma atahori tao dala ana' ra tungga ndoon, na, ana o tao dala monae' ra tungga ndoon boe. Te mete ma atahori pod'e-pad'i roo dala ana' ra, na, ana pod'e-pad'i noo dala' monae ra boe. 11 Mete ma atahori nda ramahere hei lole-lau hata-heto biasa noo dala-d'ala anak ra sia raefafo' ia, 'ona bee fo Lamatualain namahere nggi sia dala monae' fai? 12 Mete ma hei nda bisa mete-se'u atahori laen hata-heton sa, na, seka mbarani fee nggi hata-heto'?
13 Mana ded'enu' esa nda bisa rena malangga rua sa. Huu dei fo ralan mburu-oe' noo esa, ma sue esa. Ana na'atataa' noo esa, te nda taoafi' neu esa ka sa. Hei 'ona' naa boe, atahori nda bisa sue Lamatualain ma sue doi' sa.”c
Lamatua' Yesus 'ola' so'al doi', so'al Lamatualain Hara-lii Malolen, ma so'al sao ma mahela'
14 Lele' naa, hambu atahori Farisi hira tungga rena Yesus 'o'olan naa. De ara raneneut E, huu ara dale doi'. 15 Te Yesus nataa nae, “Wei! Mae hei tao mimeu ao ma ra sia atahori mata na ra, te Lamatualain nahine rala ma ra de'ulaka'. Hambu dala' nae' fo atahori so'u rananaru, tao-tao te Lamatualain nae naa ra dala de'ulaka', de melumud'u se.
16 Losa Yohanis mana sarani' neneman, hita atahori Yahud'i tasod'a tungga ba'i Musa noo Lamatualain mana 'ola-'ola na ra hohoro-lalane na. Te ia naa Lamatualain Hara-Lii Malolen nened'ui-b'engga' sia bee-b'ee ena. Atahori hetar sangga dala' rakandoo 'a fo masod'a na ra tungga Lamatualain hihii-nanau na.d 17 Mae lalai noo raefafo' sambu-lalo o, Lamatualain hohoro-lalanen mbei o nda mopo sa boe, titi'-koma sa boe o nda mopo sa!e
18 Atahori mana mahela' noo saon, basa ma sao selu' noo ina' laen, ana hohongge. Boe ma seka sao noo ina' fo mana mahela' noo saon, ana o hohongge boe.”f
Dud'uit so'al atahori mamasu'i' noo Lasarus
19 Yesus dui selu' nekendandaa' sa nae, “Hambu atahori mamasu'i' sa. Ana hii 'a pake bua-b'a'u meulau nenetao' mia teme meulau'. Hatu'-rerelon naa-ninu malad'a-malad'a', ma ma'ahee' a sosoa ao na. 20 Sia naa hambu atahori mana tud'a-loloe' sa, naran Lasarus. Aon sofe' noo bisu ma'afoo'. Fai-fai esa, na, nonoo na ra roo e nisi' atahori mamasu'i' a umen lesu mata na. 21 Ana hii nae naa atahori mamasu'i' a nanaa sisa na ra, te ana nda hambu saa sa boe. 'Aka' busa ra reu dad'alo bisu na ra nanan.
22 Basa ma, Lasarus mate, de Lamatualain ate na ra mia sorga rema ha'i rendi e, de ra'e'endo e sia ba'i Abraham bob'oa na. Nda doo' sa ma atahori mamasu'i' a o mate boe, de atahori ra ra'oi e.
23 Ana nda sorga neu sa, te ana maso' naraka neu, na'ab'ue noo atahori mana mate' hetar. Sia naa ana hambu huku-d'oki' ma doid'oso' nakandoo 'a. Lao esa, ana boti' matan ma nita Lasarus 'endo' namaho'o sia ba'i Abraham bob'oa na. 24 Boe ma ana randu nahere' nae, ‘Ba'i Abraham, e! Kasian au dei! Denu Lasarus dombo lima 'u'un neu oe, fo sad'i nema tao na'ad'oe maa tonggo ngga o malole. Huu au doid'oso 'ae' a mate ena sia naraka ia!’
25 Te Abraham nataa nae, ‘Naa! Ana ngga, e! Musuned'a malolole dei. Fai' naa, lele' musod'a sia raefafo', hambu mala basa malole' ra. Te Lasarus hambu 'aka' sususa' a. Dad'i ia naa Lamatualain fee ne namaho'o sia ia, ma doid'oso muu naa. 26 Lelenan fai, mia ho e nisi' ia nema, Lamatualain tad'a hita noo ndola roma', de atahori sia ia nda bisa naa reu sa, ma atahori sia naa nda bisa ia rema sa.’
27 Boe ma atahori mamasu'i' a no'e nae, ‘Mete ma ta'o naa, na, ba'i' tulun denu Lasarus neu sia ama ngga umen dei. 28 Huu sia naa fe'e hela 'od'i tou ngga ra atahori lima. Denu Lasarus neu nafad'e se, fo ara bali' risi' Lamatua, naa fo ara mate, na, ara 'afi risi' mamana doid'oso' ia.’
29 Te Abraham nataa nae, ‘Lamatualain fee se ba'i Musa ma mana 'ola-'ola' ra susura na ra ena. 'Od'i ma ra bisa baca rasafafali se, fo ara rahine Lamatualain hihii-nanau na.’
30 Te atahori mamasu'i' a nareresi nae, ‘Ba'i Abraham, e! Naa nda fe'e dai sa, huu ara nda taoafi' neu Lamatualain Ded'ea-'o'olan sa! Musi hambu atahori mates ra dea rema mia rates fo reu rafad'e se, fo ara fe'e rae rena ena, fo ramahere ma doa'.’
31 Te Abraham nataa nae, ‘Mete ma ara nda nau rena ba'i Musa noo Lamatualain mana 'ola-'ola na ra ded'ea-'o'olan na ra sa, na, mae atahori mana mate' ra dea rema mia rates fo reu 'ola' roo se o, ara nda rena sa boe.’”