Atahori Farisi ra sangga dala' fo rae te'e-sii Lamatua' Yesus rendi' so'al masao-mahela'
19
Yesus nanori basa naa ra ma, Ana lao hela Galilea de nisi' profinsi Yud'ea sia loe Yordan bob'oa na. 2 Atahori hetar tungga E, ma Ana na'ahahai' atahori hed'is mana sia naa ra.3 Hambu atahori Farisi hira rema rae te'e-sii ratud'a' E. Ara ratane rae, “Ama'! Tungga hita hohoro-lalane agaman, mete ma tou' sa sao ena, na, ana bole hela hendi saon nendi' sud'i 'a dala' saa, do? Do ta'o bee?”
4 Te Ana nataa nae, “Hei ia ra, atahori mana nahine agama. Te ta'o bee de ama nda mihine Lamatualain Susura Meumaren isin sa? Sia Dud'ui Fefeu' a, nenesura' 'oi, ‘Lamatualain na'ad'ad'ad'i' atahori, tou' noo ina'.’a 5 Boe ma nenesura' fai 'oi,
‘Huu naa, tou' musi lao hela ina-ama na ra,
fo neu nasod'a rala' esa noo saon,
huu ru'a se dad'i reu esa ena.’b
6 Huu naa de, mete ma Lamatualain tao nala ru'a se dad'i esa ena, na, atahori 'afi' fee se mahela' fai!”
7 Atahori Farisi ra rena Yesus 'ola' na'o naa ma, ara ratane fai rae, “Mete ma ta'o naa, na, ta'o bee de ba'i Musa nae, atahori bole mahela', sad'i ana fee susura mahela' neu saon dei?”c
8 Boe ma Yesus nataa fai nae, “Ba'i Musa hela bei-ba'i ma ra mahela' roo saon na ra, huu langga fatu na ra 'ona' nggi boe! Te lele' Lamatualain na'ad'ad'ad'i' raefafo' ia, masud na nda ta'o naa sa. 9 Naa de Au 'ufad'e, e! Mete ma ina' hohongge na'ahulu', na, tou' a bole mahela'. Te mete ma ina' nda hohongge sa, te tou' a hela hendi ina' a, ma sao selu' ina' laen, na, tou' a o hohongge ena boe!”d
10 Ana mana tungga na ra rena Ana 'ola' na'o naa, ma ara 'ola' rae, “Mete ma ta'o naa, na, malole lena' 'afi' sao.”
11 Boe ma Yesus nataa nae, “Nda basa atahori simbo Au 'o'ola ngga ia sa. 'Aka' atahori fo Lamatualain dud'u mema' a. 12 Hambu atahori nda sao sa, huu eni' a ara bonggi hendi' e, ao-sisin nenendin tao e nda bisa sao sa. Hambu atahori fai nda sao sa, huu atahori tao ra'amate ua sasao na ra. Boe ma hambu fai, mana nae nda sao sa, huu ana na'etu' nae nalalao 'a Lamatualain ue-tatao na. Atahori mana bisa nahine nenori' ia, na, hela e simbo.”
Lamatua' Yesus 'ola' papala-b'ab'anggi' fee anad'iki' ra
13 Lele' naa, atahori 'o'o roo ana na ra risi' Yesus, fo Ana ndae liman ma 'ola' papala-b'ab'anggi' fee se. Te ana mana tungga na ra ra'anggee atahori naa ra. 14 Ma Yesus namanasa se nae, “Hela anad'iki ra rema risi' Au! 'Afi' ne'enggee se! Te atahori mana 'ona' anad'iki' ia ra, naeni Lamatualain atahori na ra.”
15 Basa ma Ana ndae liman neu anad'iki' ra, de no'e Lamatualain fee se papala-b'ab'anggi'. Basa naa ma, Ana lao hela mamana' naa.
Atahori mamasu'i' sangga dala' fo nasod'a nakandoo noo Lamatualain
16 Lao esa ma, hambu atahori esa nema natane Yesus nae, “Ama meser! Au musi tao malole' ta'o bee, fo 'uhine teb'e 'ae, au bisa maso' sorga? Huu au nau 'usod'a 'u'ub'ue 'ukundoo 'oo Lamatualain.”
17 Boe ma Yesus nataa nae, “Ta'o bee de mutane Au so'al saa fo malole'? 'Aka' Lamatualain fo malole'. Mete ma mae musod'a moo E, na, musod'a tungga parenda na.”
18 Atahori naa natane fai nae, “Parenda' bee ka?”
Boe ma Yesus nataa nae,
“'Afi' misa atahori;
'afi' hohongge;
'afi' mumuna'o;
'afi' dad'i sakasii peko-leleko';e
19 fee had'a-hormat neu ina-ama ma ra;
ma sue toronoo ma ra 'ona' ho sue aom boe.”f
20 Atahori naa nataa nae, “Naa, basa parenda' naa ra, au tao ena. Fe'e kuran saa fai?”
21 Yesus rena ta'o naa, ma nae, “Naa! Mete ma mae tungga basa Lamatualain hihii-nanaun, na, bali' fo seo hendi basa hata-hetom. Fo muu bab'anggi doi na ra neu atahori mana to'a-taa' ra. Huu dei fo Lamatualain bala-b'ae fee nggo hata-heto' nae' sia sorga. Basa' fo, bali' 'uma tungga Au.”
22 Lele' atahori naa rena nala naa, ma ana bali' noo rala sususa', huu su'in nae na seli.
23 Basa ma Yesus 'ola' noo ana mana tungga na ra nae, “Mimihere Au, te atahori mamasu'i' a susa' fo ana maso' sorga. 24 Eni sususan, 'ona' banda onta monae' maso' nisi' lalaet na tungga sosoot ndola na.”
25 Ana mana tungga na ra rena rala ma, ara titindindii. Boe ma rataa rae, “Mete ma ta'o naa, na, seka bisa maso' sorga?”
26 Ana mete ma'ab'eb'esa se, ma Ana 'ola' nae, “Mete ma atahori mana tao, mema' nda bisa sa. Te mete ma Lamatualain mana tao, na, basa' e bisa dad'i!”
27 Boe ma Petrus fee nesenened'a' nae, “Ama'! Hai lao hela basa hata-heto ma ra ena, de tungga Ama'. Te hai hambu saa?”
28 Ana nataa nae, “Mimihere Au! Dei fo lele' Lamatualain tao nafefeu bali' basa' e, Au, Atahori Matetu' ia, 'endo' 'oo mandete-masa'a ngga sia kad'era parenda' a. Lele' naa, hei mana tungga Au' ra, 'endo' sia kad'era parenda' kasanahulu rua' ra ata, fo dad'i mana nggero so'a' neu hita leo Isra'el kasanahulu rua ta ra.g 29 Atahori mana lao hela umen, 'od'i-'a'an, ina-aman, ana na ra, osi-lutun, fo tungga Au, dei fo ana simbo bali' losa lao natun esa. Ma mete ma raefafo' ia nate'e, na, ana hambu nasod'a nakandoo noo Lamatualain. 30 De misined'a, e! Tungga Lamatualain dud'u'an, atahori hetar mana tao rananaru ao na ra, sira ia ra, atahori anad'iki manaseli'. Te atahori mana raloe ao na ra dad'i anad'iki manaseli', tungga Lamatualain dud'u'an, na, sira ia ra, atahori moko-monaen.”h