2 To'o baa, sia katak Yesus salan sia na'ak, “Ema ne'e, maksakar ukunrai Roma. Nia nanorin na'ak, keta selu bea baa ukunrai. Nia moos naksa'ek aan na'ak, nia ne'e Kristus, mak ema Yahudi Na'in.”

3 Rona nola nunia, gubernur nusu baa Yesus na'ak, “Nunia tebes ka? O ne'e, ema Yahudi Na'in tebes ka?”

Yesus nataa na'ak, “Tebes! Ama dale nia, loos.”

4 Leno notu, gubernur se'i oin baa na'ilulik sia no ema lear nia nodi dale na'ak, “Nune'e. Ha'u la ketan ema ne'e salan.”

5 Mais sia naka'as aan dale na'ak, “Lale ama! Ema ne'e nanorin iha nabee dei, sasuku hutun-renu naksakar aan. Nia tokar lauk nahuu nosi rai Galilea to'o kota Yerusalem ne'e.”

6 Rona nola nunia, gubernur nusu baa sia na'ak, “Kalo nunia, Ema ne'e, ema Galilea ka?”

Sia nataa na'ak, “Tebes, Ama! Nia nosi Galilea.” 7 Natene nola nunia, gubernur solok Yesus baa na'i Herodes, tan Herodes mak kaer ukun baa rai Galilea. Baa oras nia, Herodes iha Yerusalem. 8 Herodes rona wa'in nosi lia Yesus ti'an. Nia nakara atu nasoru Yesus, tan naloon nebee bele naree Yesus natudu tadak blaar ida-rua sia. Tan lia nia, baa oras ema nala'o nodi Yesus baa, Herodes neon di'ak. 9 Nia nusu lia oi-oik baa Yesus, mais Yesus la nataa kois. 10 Nia sei dale no Yesus, na'ilulik no manorik ukun sia hetak tula sala oi-oik baa Yesus. 11 Hotu Herodes no niakaan sondadu sia tuir naleuk nahaat Yesus. Sia natais faru klobor kabaas ida baa Nia, nodi naleuk Nia hanesan na'in. Hotu sia solok Nia fila baa gubernur Pilatus. 12 Tuir loos, uluk Gubernur Pilatus no Na'i Herodes funu malu. Mais nahuu baa oras nia, sia rua soman malu nikar.

13 Naree ema nodi Yesus mai nikar, Gubernur Pilatus bolu nola na'ilulik no fukun Yahudi sia, namutuk no ema lear, atu mai rona niakaan lia kakotun. 14 Nia katak na'ak, “Emi hodi Yesus mai baa ha'u, hodi tula sala baa nia ha'ak, nia sasuku hutun-renu atu sakar ukunrai Roma. Ha'u kleno nia to'o lotu-lotuk iha emikaan oin ti'an, mais la ketan sala ida kois. 15 Na'i Herodes moos leno tenik Nia ti'an, mais nia moos la netan sala ida no. Tan baa nia, Na'i Herodes solok nikar ema ne'e baa ha'u. Mais ha'u la kbele taa ukun mate baa Nia, tan Nia la noo sala saa ida. 16 Dadi ha'u kakotu nune'e: Ha'u karuka ta'e nia dei. Ta'e hotu, foin ha'u kabusik Nia.”

17-18 Rona nola nunia, ema lear nahii bele-bele na'ak, “La bele! Musti ho'o Nia. Habusik Barabas dei.”

[Sia nahii nunia, tan sura tinan oras ema Yahudi sia nadahur Paska, gubernur nabusik ema bui ida, tuir siakaan hakara.]^a 19 (Barabas ne'e, tama bui tan nia sasu'at aat ema. Nia nakara sakar ukunrai Roma iha kota Yerusalem. Nia moos no'o ema.)

20 Masik ema lear nahii nunia moos, gubernur nakara nabusik luku Yesus. Nia nusu tenik baa ema lear sia na'ak, “Kalo ha'u kabusik Yesus, nunabee?”

21 Mais sia nahii bele-bele na'ak, “Lale! Musti ho'o Nia! Hedi baa ai karuus!”

22 Mais gubernur noran la makonak. Nia nusu tenik baa dala tolu na'ak, “Tan saa emi hakara ha'u kmusti ko'o Nia? Niakaan a'aat saa? Ha'u la ketan lia krarain ida moos bodik taa ukun mate baa Nia. Dadi ha'u atu karuka ta'e nia dei, foin kabusik.”

23 Mais ema nia sia hotu-hotu hetak nahii tu'an atu naseten luku gubernur nebee nisa Yesus baa ai karuus. Nosi ikus, gubernur la bele terus ona. 24 Nia nakotu tuir ema lear hakaran. 25 Nia nabusik Barabas, maksakar teen no maho'o ema nia. Mais latan Yesus, nebee sia nalo baa Nia tuir siakaan hakaran.

26 Gubernur Pilatus taa ukun mate baa Yesus ti'an, sondadu Roma dada nodi Nia sai nosi kota Yerusalem. Iha dalan klaran sia nasoru ema ida, naran Simon. Nia foin mai nosi kota Kirene. Sia seten nia seluk Yesus natiu ai karuus.

27 Baa oras nia, ema lear mai nobun Yesus. Naree Yesus nunia, feto sia tanis nade'un aan. 28 Rona sia tanis nunia, Yesus titu fila baa sia nodi katak na'ak, “Feto Yerusalem sia! Keta tanis baa Ha'u. Di'ak liu tanis baa emikaan isin lolon du'uk, no emikaan oan sia. 29 Awan-wainrua susar boot atu mai, to'o ema dale na'ak, ‘Sotir kaliuk, bodik feto kiuk mak la nasusu kedas oan.’ 30 Baa oras susar boot nia mai, ema susar liu, to'o sia nakro'an na'ak, ‘Di'ak liu foho nakro'on nola ita!’ Sia moos atu dale na'ak, ‘Tan susar oin nune'e, di'ak liu foho tunin nola ita!’^b 31 Kalo ema moon nu'u Ha'u ne'e bele netan susar nune'e, saa tenik baa ema seluk?”^c

32 Oras sondadu sia nodi Yesus baa, sia moos dada nodi no ema aat na'in rua, nebee sia simu ukun mate bele-bele no Yesus. 33 Sia la'o to'o fatin ida, naran ‘Fatin Ulun Ruin’. To'o baa, sia nedi Yesus no ema aat na'in rua nia ida-idak baa ai karuus. Hotu, taman nariik ai karuus tolu nia. Ema aat ida iha Yesus sorin kwana, ida iha sorin karuk. 34 [Baa oras nia, Yesus namulak na'ak, “Ama! Malu'a lakon siakaan salan, tan sia la natene saa mak sia nalo.”]^d Hotu, sondadu sia suut liman atu nodi natene see mak atu netan Yesus farun.^e

35 Baa oras nia ema wa'in mai nobun. Yahudi ulun sia moos naleuk Yesus na'ak, “Nia bele sori ema seluk, mais la bele sori aan du'uk. Kalo Nia tebe-tebes Kristus mak mai nosi Na'i Maromak, habusik Nia na'in tuun nosi ai karuus.”^f

36 Sondadu nia sia moos naleuk Nia. Sia naroo Nia nodi tua siin,^g 37 nodi nahii naleuk na'ak, “Kalo O ne'e tebe-tebes ema Yahudi na'in, sori aan du'uk ona!” 38 Hotu sia nakerek baa ai kabelak ida na'ak,

Hotu, sia nedi ai kabelak nia baa Yesus ulun fafuhun, atu katak lia krarain mak sia nodi taa ukun mate baa Nia.

39 Ema aat ida mak sia nisa iha Yesus sorin moos tuir naleuk na'ak, “O Kristus tebes ka? Kalo nunia tebes, sori mola ita hotu-hotu ona.”

40 Mais niakaan maluk de'an nia na'ak, “Hoi! O la mata'uk Maromak ka? O moos metan ukun mate nu'u ema ne'e. 41 Ita rua kona ukun makonak no itakaan a'aat. Mais ema ne'e la nalo aat.” 42 Hotu, ema nia dale tu'an na'ak, “Yesus! Oras Ama tama baa Ama Fohorai, manoin ha'u.”

43 Yesus nataa na'ak, “Rona mai! Ha'ukaan dalen ne'e, tebes no loos! Ha'u katak kedan, ohin loron ne'e moos, o tama lale'an bele-bele mo Ha'u.”

44-45 Baa oras nia, loro natetu ti'an. Mais loro matan la laka. Nakukun luri taka nola fatin nia, to'o tuku tolu loro malirin. Iha Uma Hamulak Huun noo tais odamatan belar, mak na'ilulik sia nodi heli Na'i Maromak Ke'an Lulik Kaliuk. Teki-tekis, tais odamatan nia naksira fa'e baa rua.^h

46 Iha Golgota, Yesus nahii na'ak, “Ama! Oras ne'e, Ha'u klatan Ha'ukaan kmalar baa Ama liman.” Dale notu nunia, Yesus nawan kotu.ⁱ

47 Noo sondadu ulun Roma ida mak nariik kre'is baa Yesus karuus. Baa oras titu-naree Yesus nawan kotu, nia tonu Na'i Maromak na'ak, “Adeei! Ema ne'e tebe-tebes ema moon!” 48 Ema wa'in iha nia titu-naree Yesus nawan kotu, sia laran moras. Hotu sia fila nodi neon susar. 49 Yesus eman sia mak nariik nosi dook moos naree Nia nawan kotu. Feto sia mak tuir Nia nosi Galilea to'o Yerusalem, moos iha nia.^j

50-51 Yesus mate ti'an, ema ida buka dalan atu natuun Yesus maten nosi ai karuus. Ema nia, naran Yusuf nosi kota Arimatea. Nia ema moon mak nalo lia di'ak wa'in. Nia nein bei-beik, nebee Na'i Maromak kaer ukun baa hutun-renu. Nia moos ema mak leno lia iha moon-metan Yahudi. Mais nia la simu siakaan lia kakotun ohin nia mak taa ukun mate baa Yesus. 52 Tan Yusuf nakara natuun Yesus maten nosi ai karuus, nia baa gubernur Pilatus atu nusu nahulin maten nia. 53 Gubernur foo leet ti'an, Yusuf moos baa natuun maten nia, falun nodi tais mamar. Hotu nia baa rai iha rate fatuk kuak ida, mak ema foin ba'at notu. Rate nia sei foun. 54 Yesus mate nia, kona baa loron lima. Baa oras sia nakoi Yesus, loro malirin ti'an. Kalo loro monu ona, ema Yahudi siakaan loron hamulak nahuu ona.

55 Feto mak mai namutuk no Yesus nosi Galilea sia moos tuir Yusuf atu naree Yusuf rai Yesus maten iha rate nabee. 56 Naree rate fatik ti'an, feto nia sia fila nadi'a ai morin no mina morin. Mais tan loro monu ona, sia musti nanawa serwisu, tuir ema Yahudi siakaan ukun-badu baa loron hamulak. Sia nein to'o loron hamulak siku lai, foin sia baa nisik Yesus maten.^k