19
Nunia hotu, gubernur Pilatus naruka sondadu sia baa no'at Yesus nodi oe besi tarak.a 2-3 Sondadu nia sia moos nola ai tarak lain, nalo baa sabeo tarak. Hotu tuku natama sabeo tarak nia baa Yesus ulun, nodi naleuk Nia, hanesan foti na'i foun nodi sabeo na'in. Sia moos natais faru klobor ida baa Nia. Faru nia ilas mean asuaten ahan nu'u na'i isi belun. Hotu sia naleuk nakdiuk Nia nodi na'ak, “Tonun-haboot Na'i Yahudi!” Sia moos basa lisuk Nia.4 Nunia hotu, gubernur sai tenik nodi katak baa ema wa'in nia na'ak, “Nune'e! Ha'u klatan kikar Nia baa emi. Emi musti hatene, ha'u kleno Nia ti'an, mais la ketan sala ida kois.” 5 Baa oras Yesus sai, Nia sei tau sabeo tarak nia, no faru klobor nia. Hotu, gubernur katak baa ema wa'in nia na'ak, “Mana mai! Nia mak ne'e.”
6 Oras na'ilulik ulun sia no makdaka sia naree Yesus sai, sia nahii bele-bele na'ak, “Ho'o Nia dei! Hedi Nia baa ai karuus!”
Mais gubernur katak baa sia na'ak, “Kalo emi atu hodi Nia baa ho'o iha ai karuus, loos emi dei. Tan Ha'u du'uk la ketan Niakaan salan ida kois. La fatan taa ukun mate baa Nia.”
7 Hotu, ema Yahudi sia nataa na'ak, “Ami hoo ukun-badu mak tuun mai nosi Na'i Maromak. Tuir ukun-badu nia, ema ne'e musti mate, tan nia foti aan ahan Na'i Maromak Oan.”
8 Rona nola siakaan dale nia, gubernur hetak nata'uk. 9 Nia tama nikar baa sondadu fatin, hotu nusu baa Yesus na'ak, “O ne'e, Ema nabee?” Mais Yesus la nataa.
10 Gubernur nakbehek na'ak, “Hoi! Tan saa O la mataa ha'u? O matene ka lale? Ha'u koo beran atu kalo O mate. Ha'u moos koo beran atu kabusik O.”
11 Mais Yesus nataa na'ak, “Nune'e, ama. Kalo ama noo beran tebes nunia, ama netan nosi Na'i Maromak, tan Nia mesan dei mak foo leet baa ama atu babilan Ha'u. Mais ema mak nodi Ha'u baa ama, siakaan salan todan liu ama salan.”
12 Nahuu baa oras nia, gubernur buka dalan atu nabusik Yesus. Mais ema Yahudi sia nahii bele-bele na'ak, “Ema ne'e foti aan hanesan na'in. Ne'e na'ak, Nia sakar Na'i Keser. Kalo ama nabusik Ema ne'e, malorek ti'an ama lahoos Na'i Keser belun.”
13 Rona nola sia nahii nunia, gubernur nodi Yesus sai baa luan. Hotu, nia tuur baa niakaan kadera hakotu lia iha fatin ida mak sia temi nodi lia Aram na'ak, Gabata. Ne'e na'ak, Rai Molik Fatuk Kabelak.
14 Loron nia, Loron Hadi'a Aan baa Dahur Paska. Takseer loro natetu, gubernur katak baa ema Yahudi sia na'ak, “Mana ona! Nia ne'e, emikaan na'in!”
15 Mais sia nahii hetak maka'as na'ak, “Hodi Nia sai hosi ne'e! Ho'o Nia dei! Hedi Nia baa ai karuus!”
Hotu gubernur nusu tenik na'ak, “Nunabee? Emi hakara ho'o emikaan na'in ne'e ka?”
Na'ilulik ulun sia moos nataa na'ak, “Amikaan na'in, ida dei. Nia mak Keser! La noo seluk!” 16a Tan lia nia, gubernur latan Yesus baa sondadu sia, nebee nedi no'o baa ai karuus.
Ema nedi Yesus baa ai karuus
16b Hotu, sondadu sia nodi Yesus baa, atu no'o Nia. 17 Sia naruka Nia natiu ai karuus, la'o sai nosi kota laran, nodi baa fatin ida mak sia temi nodi lia Aram na'ak, Golgota. Ne'e na'ak, “Fatin Ulun Ruin.”
18 To'o nebaa, sia nedi Yesus baa ai karuus, hotu taman ai karuus nia. Sia moos nedi ema seluk na'in rua baa ai karuus. Ida taman iha Yesus sorin kwana, ida tenik iha sorin karuk. Yesus, iha siakaan leet. 19 Hotu, sondadu sia nakerek baa ai kabelak ida, hotu nedi ai kabelak nia baa Yesus ulun fafuhun leten, tuir gubernur niakaan haruka. Iha ai kabelak nia, sia nakerek na'ak,
“Ne'e, Yesus, nosi Nasaret. Nia mak, Na'i Yahudi.”
20 Sia nakerek ai kabelak nia, nodi lia oik tolu: lia Aram, lia Yunani, no lia Latin mak ukunrai Roma lian. Ema Yahudi wa'in leno ai kabelak nia, tan fatin nia, kre'is Yerusalem. 21 Mais na'ilulik ulun sia la no'uk hakerek nunia. Hotu, sia baa katak gubernur na'ak, “Ama! Keta hakerek ha'ak, Nia mak ‘Na'i Yahudi’! Di'ak liu hakerek ha'ak, ‘Ema ne'e mak na'ak, Nia Na'i Yahudi.’”
22 Mais gubernur katak na'ak, “Ha'u mak karuka sia nakerek nunia. Dadi, habusik nunia dei!”
23 Sondadu sia nedi ti'an Yesus baa ai karuus, sia fa'e Niakaan faru, nalo baa fa'ek haat. Fa'ek ida bodik sondadu ida. Sia moos nola Niakaan faru klobor. Faru klobor nia, soru tomak nosi leten to'o raik, la noo lalitak. 24 Naree nunia, sia dale baa malu na'ak, “Keta lees karin faru klobor ne'e. Di'ak liu, ita suut liman atu hodi hatene see mak netan.” Lia nia nato'o saa mak hakerek ti'an iha Hakerek Moon na'ak,
“Sia fa'e ha'ukaan faru sia baa malu,
sia moos suut liman atu nodi netan ha'ukaan faru klobor.”
Oras nia, sondadu sia nalo tuir nunia.b
Yesus latan inan baa Yohanis
25 Oras sia nedi Yesus baa ai karuus, feto na'in hira moos nariik iha fatin nia. Sia ne'e mak: Yesus inan, no Yesus inan feto malun ida, no Maria mak Klopas feen, no Maria ida seluk nosi leo Magdala. 26 Yesus titu-naree inan no'i nariik bele-bele no maktuir ida mak Nia dadobe. Maktuir nia, mak ha'u, Yohanis. Hotu, Yesus katak baa Niakaan inan na'ak, “Ina. Oras ne'e, o oan mak ema ne'e.”
27 Yesus moos katak baa ha'u na'ak, “Oras ne'e, malo nia baa o inan.” Tan lia nia, nahuu baa oras nia, ha'u mak kaliku Yesus inan.
Yesus mate
28 Nunia hotu, Yesus natene Nia nala'ok Niakaan serwisu to'o mohu ti'an. Hotu Nia katak na'ak, “Ha'u kanroo.” Lia ne'e moos nato'o saa mak hakerek kedan ti'an hori uluk iha Hakerek Moon.c
29 Iha nia noo anggor siin iha fatik ida. Sondadu sia nola wee teen, lobas baa anggor nia. Hotu, tau wee teen nia baa ai lolon ida rohan,d nodi lolo baa Yesus ibun. 30 Norut nola anggor nosi wee teen nia, Yesus katak na'ak, “Serwisu hotu-hotu mohu ti'an.” Dale notu nunia, Nia sudur, hotu nawan kotu.
Sondadu nodi diman sona Yesus sorin iha ai karuus
31 Loron Yesus mate nia, kona baa loron lima. Tuir ema Yahudi siakaan ukun-badu lala'ok, musti nadi'a aan baa loron lima, tan awan sia simu loron hamulak. Loron hamulak nia, sia nalo baa loron lulik. Tan baa nia, sia la no'uk ema maten sei hisa iha ai karuus baa loron hamulak. Baa oras Yesus mate, Yahudi ulun sia nusu baa gubernur, nebee naruka ema baa ta'e tohar ain ruin nosi ema mak sei hisa iha ai karuus. Hodi nunia, ema nia sia bele mate lai-lais. Hotu ema bele natuun maten sia oras loron lulik sei la to'o dauk. 32 Rona nola nunia, sondadu sia baa. Sia ta'e tohar ema ida ain ruin. Nunia hotu, natohar tenik ema ida seluk ain ruin. Ema na'in rua nia, mak sia nedi bele-bele no Yesus. 33 Oras sia to'o Yesus baa, sia la natohar ain ruin, tan naree Yesus mate ti'an. 34 Hotu, sondadu ida nola diman, sona baa Yesus sorin. Raan no wee sai kedas.
35 (Oras Yesus mate nia, ema wa'in naree. Ha'u, Yohanis, moos karee. Dadi, lia hotu-hotu mak kakerek iha ne'e, ha'u karee du'uk. Emi bele fiar, tan ha'ukaan dalen ne'e tebes no loos.) 36 Lia ne'e sia hotu-hotu nato'o saa mak hakerek ti'an iha Hakerek Moon na'ak, “Niakaan ruin sia, la noo ruin ida moos mak ema natohar.”e 37 Hakerek Moon moos na'ak, “Ema sia nobun ema mak sia sona ti'an nia.”f
Ema nakoi Yesus
38 Noo ema ida, naran Yusuf. Nia nosi leo Arimatea. Nia tuir Yesus, mais nia tuir nodi nakfunin, tan nata'uk Yahudi ulun sia. Oras Yesus mate ti'an, nia baa nusu Gubernur Pilatus, nebee gubernur foo leet baa nia atu nola Yesus maten nodi baa nakoi. Rona nola nunia, gubernur moos no'uk. Hotu Yusuf baa natuun nola Yesus maten, nodi baa. 39 Nikodemus moos baa bele-bele no Yusuf. Nikodemus nia, mak uluk baa nasoru Yesus nodi kalan. Nia sosa nola ai raan morin wa'in, takseer kilo tolu nulu resin tolu, atu kose baa Yesus maten.g 40 Sia falun Yesus maten nodi tais mamar, nodi kose ai raan morin, tuir ema Yahudi siakaan adat nakoi maten.