Kristus Klosan Lian
Na'i Maromak nameno atu solok Niakaan Kmalar Lulik mai
1
1-3 Ama Teofilusa mak di'ak. Tabe nosi ha'u Lukas.Uluk, ha'u kakerek ti'an kosi lia hotu-hotu mak Yesus nalo no nanorin, nahuu nosi uluk fohon to'o Nia namaan aan sa'e nikar baa lale'an. Nia nahuu Niakaan serwisu nodi boi nola Niakaan klosan sia. Nosi ikus, ema nasusar Nia to'o no'o Nia, mais Na'i Maromak nalo Nia moris nikar. Baa oras Nia moris nikar ti'an, Nia natadu aan bei-beik baa Niakaan klosan sia iha loron haat nulu laran. Nia moos nalore baa sia oin nunabee Na'i Maromak sori ema nebee sia bele tama dadi baa Niakaan ema. Hotu, Yesus solok Niakaan klosan sia nodi Maromak Kmalar Lulik beran.
Lia ne'e sia, ha'u kakerek ti'an baa ama iha ha'ukaan hakerek uluk.
4-5 Hotu, baa dala ida, Yesus tuur namutuk no Niakaan klosan sia iha Foho Saitun. Nia katak baa sia na'ak,
“Rona! Uluk Yohanis sarani ema nodi wee. Mais kalo emi hein loron hira tenik, Na'i Maromak atu nalo lia boot liu tenik bodik emi. Tan Nia atu naruka Niakaan Kmalar Lulik tuun baa emi. Tan baa nia, emi keta la'o hela kota Yerusalem ne'e lai. Hein iha ne'e to'o Ha'ukaan Ama naruka Niakaan Kmalar Lulik tuun baa emi. Ha'u katak kedan lia ne'e baa emi, tan Ha'ukaan Ama nameno nunia ti'an.”b
Yesus namaan aan sa'e baa lale'an
6 Baa loron ida, Yesus namutuk tenik no klosan sia. Sia nusu baa Nia na'ak, “Ama! Oras ne'e Ama atu sori ita nosi funu nebee itakaan rai Isra'el ukun du'uk aan ka, ita sei hein tenik?”
7 Yesus nataa na'ak, “Emi lalika hatene niakaan oras! Ha'ukaan Ama mesan mak babilan oras nia. 8 Mais kalo Niakaan Kmalar Lulik tuun baa emi ti'an, emi atu hetan beran. Hotu emi musti baa katak lia nosi Ha'u baa ema hotu-hotu iha kota Yerusalem, no leo hotu-hotu iha rai Yudea no rai Samaria, liu to'o raiklaran sikun sia.”c 9 Dale notu nunia, Yesus namaan aan sa'e baa lale'an iha siakaan oin. Hotu kalo'an taka nola Nia, to'o sia la naree Nia tenik.d
10 Sia sei titu baa lale'an, teki-tekis ema na'in rua nariik iha siakaan klaran. Sia rua tau faru mutin moos. 11 Hotu sia dale baa klosan sia na'ak, “Hei! Ema Galilea sia! Tan saa emi hakaka mana baa lale'an? Yesus namaan aan sa'e baa lale'an ti'an. Nosi ikus, Nia moos namaan aan mai nikar oin nunia.”
Kristus klosan sia boi ema ida atu seluk Yudas
12 Nunia hotu, klosan sia tuun nikar nosi Foho Saitun, fila baa kota Yerusalem. Foho nia dook nosi kota, takseer kilo ida.e
13 To'o kota, sia tama baa uma mak sia nein, hotu sa'e baa ke'an tetu. Kristus klosan sia naran, mak ne'e:
Petrus,
Yohanis
Yakobus,
Andreas,
Filipus,
Tomas,
Bartolomeus,
Mateus,
Yakobus (Alfeus oan),
Simon (ema partee Selot),f
no Yudas (Yakobus oan).g
14 Sia hotu-hotu namulak nodi neon ida. Sia namulak namutuk no Yesus inan Maria, no ina seluk sia, no feto nurak sia, no tenik Yesus alin sia.
15 Baa loron ida, sia namutuk tenik, takseer ema na'in atus ida rua nulu. Hotu Petrus nariik dale na'ak, 16 “Mamaluk sia! Emi nanis sei hanoin Yudas mak uluk nodi ema baa kohi Yesus. Lia hotu-hotu kona baa Yudas nia, nato'o saa mak Maromak Kmalar Lulik naruka Na'i Daud nakerek kedan hori uluk iha Hakerek Moon. 17 Yudas nia, itakaan ema mak serwisu namutuk no ita.”
18 (Baa oras Yudas fa'an Yesus ti'an, nia nola osan kadoor nia, nodi sosa rai rohan ida. Hotu, rai nia dadi baa Yudas mate fatin, tan nia monu tabarakat iha rai nia, to'o kabun taba no teen nakbudi sai. 19 Ema dale lia nia nosi ibun baa ibun, to'o ema hotu-hotu iha kota Yerusalem, rona nola Yudas mamaten nia. Tan lia nia, sia nanaran rai nia nodi siakaan lia Aram na'ak, ‘Akeldama’. Lia fuan ne'e na'ak ‘Rai Raa’).h
20 Hotu Petrus dale liu tenik na'ak, “Hori uluk, Na'i Daud nakerek kedan nunia iha Hakerek Kananuk na'ak,
‘Habusik niakaan hein fatin dadi fuik,
tan ema la nein tenik iha nia ona.’
Na'i Daud moos nakerek na'ak,
‘Habusik niakaan serwisu nia, latan baa ema seluk.’i
21-22 Tan lia nia, ita musti buka ema nebee seluk Yudas. Ita buka ema mak namutuk no ita kleur ti'an. Nia musti tuir kre-re'is no Na'i Yesus baa fatin hotu-hotu, nahuu nosi Yohanis sarani Nia. Nia moos musti naree du'uk Na'i Yesus moris nikar nosi mate, to'o namaan aan sa'e nikar baa lale'an.”j
23 Petrus dale notu nunia, sia natama naran rua. Ida naran Matias, ida tenik naran Yusuf (nosi Yustus ema uma laran. Ema moos bolu nia, Barsabas). 24-25 Hotu sia namulak na'ak, “Ama iha lale'an! Ita Boot hatene tebe-tebes ema hotu-hotu neon. Yudas monu mate nela niakaan serwisu. Tan nunia, ami husu Ita Boot hatudu baa ami nosi ema na'in rua ne'e, see ida mak Ita Boot boi hola hodi seluk Yudas, nebee ami foti nia dadi baa Kristus klosan.” 26 Namulak notu, sia suut liman. Suut liman nia kona baa Matias. Hotu sia foti Matias dadi klosan namutuk no sia na'in sanulu resin ida nia.