“Ama. Ha'ukaan oras to'o ti'an, nebee Ama foti-nahaas Ha'u. Ha'u ne'e, Ama Oan. Ama latan beran ti'an baa Ha'u atu kbabilan ema hotu-hotu iha raiklaran ne'e. Hodi nunia, Ha'u kbele foo moris loos to'o nima-nimak baa ema hotu-hotu mak Ama latan ti'an, dadi baa Ha'ukaan ema. Oras ne'e, Ha'u kusu nebee Ama foti-nahaas Ha'u, nebee Ha'u moos bele katudu Ama Niakaan kabaas. 3 Ema bele netan moris nima-nimak, kalo sia simu na'ak, Ama mesan mak Maromak malolok. Sia moos musti simu na'ak, Ha'u mak Yesus Kristus, mak Ama solok ti'an mai raiklaran ne'e. 4 Ha'u katudu Ama Niakaan kabaas ti'an iha raiklaran ne'e kodi kala'ok mohu serwisu mak Ama latan baa Ha'u. 5 Uluk, baa oras raiklaran sei la iha dauk, Ha'u kamutuk ko Ama. Ha'ukaan kabaas moos manesak no Ama. Oras ne'e, Ha'u kusu nebee Ama foti-nahaas Ha'u, nebee Ha'u kabaas kikar hanesan Ama.”

6 Hotu, Yesus namulak tenik na'ak, “Ama boi nola Ha'ukaan belun ne'e sia nosi raiklaran, hotu Ama latan sia baa Ha'u, dadi baa Ha'ukaan eman. Ha'u kanorin sia ti'an, nebee natene Ama. Sia moos nalo tuir Ama Manfatin. 7 Oras ne'e, sia natene na'ak, lia hotu-hotu mak Ama latan baa Ha'u, nahabut baa Ama. 8 Ha'u kanorin ti'an Manfatin hotu-hotu mak Ama foo baa Ha'u. Sia moos simu ti'an Manfatin nia. Sia natene, Ha'u kmai kosi Ama. Sia moos fiar, Ama mak solok Ha'u kmai iha raiklaran ne'e.

9 Ha'u kamulak bodik sia. Ha'u la kamulak bodik ema hotu-hotu iha raiklaran ne'e, mais kamulak loos bodik ema ne'e sia mak Ama latan ti'an baa Ha'u, tan sia, Ama Niakaan. 10 Ema hotu-hotu mak dadi baa Ha'ukaan moos, dadi baa Ama Niakaan. Hotu-hotu mak dadi Ama Niakaan moos, dadi baa Ha'ukaan. Sia nia, mak nahaas Ha'u. 11 Ha'u la kein kafati iha raiklaran ne'e, tan la kleur ona, Ha'u kfila kikar baa Ama. Mais, Ha'ukaan ema ne'e sia nein nafati iha raiklaran ne'e. Ama mak moon kaliuk, Ha'u kusu nebee Ama daka sia, modi Ama beran mak Ama foo ti'an baa Ha'u. Ha'u moos kusu nebee, sia talin malu dadi mesak, hanesan Ha'u ktalin aan dadi mesak ko Ama. 12 Baa oras Ha'u ksei kamutuk ko sia iha raiklaran ne'e, Ha'u kaliku sia kodi beran mak Ama latan ti'an baa Ha'u. Ha'u kdaka sia di'a-di'ak, nebee sia talin aan no Ama bei-beik. La noo ida mak lakon. Hela Yudas dei mak lakon, tuir saa mak hakerek kedan hori uluk iha Hakerek Moon.^a

13 Oras ne'e, Ha'u kre'is fila kikar baa Ama. Mais Ha'u katak lia ne'e sia, oras Ha'u ksei iha raiklaran ne'e, nebee Ha'ukaan ema ne'e sia bele neon boot lo-loos, hanesan Ha'u. 14 Ha'u katak ti'an Ama Manfatin baa sia. Tan baa nia, ema seluk iha raiklaran ne'e hirus sia, tan sia la moris tuir raiklaran. Ema raiklaran moos hirus Ha'u, tan Ha'u la kmoris tuir raiklaran. 15 Ha'u la kusu Ama foti sai Ha'ukaan ema ne'e sia nosi raiklaran. Mais Ha'u kusu Ama daka sia, nebee nadook aan nosi a'aat huun. 16 Ha'u la ktuir raiklaran. Sia moos nunia.

17 Hamoos siakaan neon hodi hanorin loos, tan Ama Manfatin nia, mak tebes no loos. 18 Ama solok Ha'u kmai raiklaran ne'e. Hotu, Ha'u moos solok sia, nebee baa moris keke lema iha ema raiklaran leet. 19 Ha'u klatan ti'an Ha'ukaan moris, kodi kala'o Ama Niakaan serwisu moon. Hodi nunia, Ha'ukaan ema sia dadi moon. No sia bele latan siakaan moris bodik Ama, tan sia moris tuir Ama Manfatin mak tebes no loos.”

20 Hotu, Yesus namulak tenik na'ak, “Ha'u kamulak ti'an bodik Ha'ukaan ema ne'e sia mak tuir Ha'u iha raiklaran. Oras ne'e, Ha'u moos kamulak bodik ema seluk sia mak nosi ikus mai fiar baa Ha'u, tan Ha'ukaan maktuir ne'e sia natutan Ha'ukaan hanorin.

21 Ama. Ha'u ktalin aan ko Ama, Ama moos talin aan no Ha'u. Ha'u kusu nebee, Ha'ukaan maktuir sia talin malu dadi mesak, hanesan Ita. Ha'u moos kusu nebee sia talin aan dadi mesak no Ita. Hodi nunia, ema seluk iha raiklaran ne'e bele fiar na'ak, Ama mak solok Ha'u. 22 Ha'u katudu ti'an Ama Niakaan kabaas baa sia, nebee sia bele talin malu dadi mesak, hanesan Ita. 23 Ha'u ktalin aan ko sia. Ama talin aan no Ha'u. Sia moos musti talin malu dadi mesak nunia, to'o sia tebe-tebes moris neon ida. Hodi nunia, ema seluk iha raiklaran ne'e bele natene na'ak, Ama nadomi sia hanesan Ama nadomi Ha'u. Sia moos bele natene na'ak, Ama mak solok Ha'u.

24 Ama. Ha'u kusu nebee ema hotu-hotu mak Ama latan ti'an baa Ha'u, bele namutuk nafati no Ha'u. Hodi nunia, sia bele naree Ha'ukaan kabaas mak Ama foo ti'an baa Ha'u. Tan oras raiklaran sei la iha dauk, Ama nadomi Ha'u ti'an.

25 Ama. Ama mak loos kaliuk. Ema iha raiklaran ne'e la natene Ama. Ha'u mak katene Ama. Ha'ukaan ema ne'e sia moos natene na'ak, Ama mak solok Ha'u kmai raiklaran ne'e. 26 Ha'u katak baa sia ti'an, Ama ne'e See. Ha'u katak bei-beik nunia baa sia, tan kakara nebee, sia natene tebes Ama dadomin nu'u Ha'u moos katene tebes Ama dadomin. Hodi nunia, Ha'u kbele talin aan ko sia.”