2 Rona nola nunia, Yesus nataa na'ak, “Di'ak no! Hamulak hodi lia lala'ok nune'e:

5-6 Hotu, Yesus nanorin tu'an baa sia na'ak, “Lia hatetek ida nune'e. Kalan boot, okaan maluk ida mai nosi rai dook atu toba heik iha okaan uma. Mais o la moo sa-saa atu mahaan nia. Hotu o baa maluk seluk uman, deku odamatan mosi luan modi ma'ak, ‘Maluk! Foo heik tubi baluk tolu baa ha'u lai! Ha'u koo bainaka iha uma, mais ami mamuk liu! Tulun lai! Baluk tolu dei! Ha'u lei kfoo kikar!’

7 Takseer, okaan maluk nia atu nataa fila o na'ak, ‘Ema toba dukur ti'an moos, o sei mai kakoen! Odamatan kusa ti'an! Oan sia moos toba ti'an. Keta nawan sa'e o! Hein rai nakroma lai!’

8 Manoin di'a-di'ak. Masik nia la nakara nadeer tulun o tan o niakaan maluk, kalo o deku bei-beik, nanis nia nadeer tulun o.

9 Nunia moos, oras hamulak.

10 Ema hotu-hotu mak nakro'an bei-beik baa Na'i Maromak, nanis sia simu. Ema mak buka bei-beik, nanis sia netan. Ema mak bolu bei-beik, nanis Nia loke odamatan foo baa. 11 Hanoin kokon! Iha emi, kalo oan nusu na'an tasi baa aman, aman foo samea ka? 12 Kalo oan nusu manu tolun, aman foo sakunar ka? Lale. 13 Masik ema raiklaran huun aat nanis, la noo ama ida iha raiklaran mak nalo nunia. Emikaan Ama iha lale'an huun di'ak nanis. Kalo ema raiklaran mak aat nunia sei nakara foo buat di'ak baa oan, saa tenik Ama iha lale'an! Nia nanis foo Niakaan Kmalar Lulik baa ema mak nakro'an baa Nia.”

14 Baa dala ida, Yesus te'ur sai diabu nosi ema nunuk ida. Hotu, nunuk nia bele dale nikar. Ema hotu-hotu blaar karin. 15 Mais noo ema ida mak dale na'ak, “Tebes! Nia bele te'ur diabu, tan netan beran nosi diabu ulun naran Baalsebul.”^a

16 Ema seluk moos nakara sokur kokon Yesus. Sia nusu nebee nase'i tadak blaar tenik, atu natudu baa sia na'ak Niakaan beran nia, nosi Na'i Maromak ka, lale.^b

17 Mais Yesus natene kedan siakaan kakutak kadoor nia. Hotu Nia dale na'ak, “Kalo ema fohorai ida funu malu, nanis fohorai nia dodok welon. Kalo ema uma laran toe malu, nanis ema iha uma kain nia fa'e karin malu. 18 Nunia moos, kalo diabu sia funu malu no nabu'a malu, siakaan ulun la bele kaer ukun kleur. La tama kakutak kalo emi ha'ak, Ha'u kodi diabu beran te'ur diabu. 19 Hanoin! Emikaan ema sia moos natene te'ur diabu. Sia nodi beran nosi diabu ka? Lale! Dadi keta dale karin ha'ak, Ha'u kodi diabu beran te'ur diabu. Emikaan ema du'uk atu nakotu na'ak, saa mak emi dale nia, la kona. 20 Mais kalo tebe-tebes Ha'u kte'ur diabu kodi beran nosi Na'i Maromak, lia nia natudu na'ak, Na'i Maromak kaer ukun ti'an iha emikaan oin, mais emi la hatene.

21 Kalo ema ida nodi ro'at-meik daka uman, niakaan naha hotu-hotu nanis mamatek dei. 22 Mais kalo ema ida seluk mak biit liu nia mai sakar, ema biit nia bele nadau nola ro'at no meik nia sia, ra'ut nola naha sia, hotu fa'e baa niakaan maktuir sia. Masik uluk ema nia rai neon baa niakaan ro'at-meik kleur ti'an, oras ne'e, nia la bele rai tenik neon baa.

23 Hanoin! Ema mak la namutuk no Ha'u, sia sakar Ha'u. Ema mak la serwisu namutuk no Ha'u, sia tokar lauk.”^c

24 Hotu Yesus natutan na'ak, “Kalo ita te'ur sai diabu hosi ema ida, diabu nia la'o nasirin fatin fuik buka hanawa fatin. Kalo nia la netan fatin makonak, nia naneo na'ak, ‘Aa! La ketan fatin di'ak nune'e. Di'ak liu, fila kikar baa ema uluk nia.’ 25 Hotu, nia fila baa, netan fatin uluk nia moos no tetuk ti'an. 26 Hotu, nia baa bolu nola mamaluk na'in hitu mak aat liu nia. Sia tama bele-bele baa ema nia, nodi sira lisuk nia. To'o ema nia moris susar liu tenik.”

27 Yesus sei dale no ema lear nia, feto ida nahii na'ak, “Ama Boot inan mak sotir, tan nia bele nahoris nola Ama Boot no bele nasusu Ama Boot!”

28 Rona nola nunia, Yesus nataa na'ak, “Tebes, ina! Mais ema mak nanono Maromak Manfatin hotu nalo tuir, ema nia mak sotir kaliuk!”

29 Baa oras nia, ema lear kabuun satan nola Yesus. Nia moos nanorin sia na'ak, “Ema oras ne'e, natene nalo aat dei. Sia nusu tadak blaar nohuun, nebee netan kakaer na'ak, Ha'u ne'e, tebe-tebes Na'i Maromak eman. Mais tuir loos, uluk Na'i Maromak natudu ti'an tadak blaar, nodi mako'an Yunus. Lia nia to'o ti'an!

30 Lia Yunus dadi kakaer bodik ema Niniwe na'ak, Na'i Maromak mak solok nia. Nunia moos Ha'u ne'e. Lia Ema Raiklaran Isin dadi kakaer bodik ema oras ne'e na'ak, Na'i Maromak mak solok Ha'u.^d

31 Baa oras rai falu fila, Na'i Maromak nariik atu dadi makotu lia, na'i feto nosi lorokbelan atu moris nikar dadi saksiin. Nia atu tula sala baa emi, ema mak moris oras ne'e na'ak, ‘Emi ne'e, lokok tebes!’ Na'i feto nia atu dale nunia, tan uluk nia mai nosi rai dook atu naree du'uk Na'i Soleman matenek. Tuir loos, oras ne'e Ema mak maka'as liu Na'i Soleman iha emikaan klaran. Mais emi la titu kois Nia!^e 32 Mais lahoos na'i feto nia dei mak atu tula sala baa emi! Ema Niniwe sia moos atu tula sala na'ak, ‘Emi ne'e, lokok tebes!’ Sia atu dale nunia, tan uluk Yunus baa katak Na'i Maromak hakaran baa sia, sia neon aat kedas. Tuir loos, oras ne'e Ema mak maka'as liu Yunus iha emikaan klaran. Mais emi la halo neon aat kois!”^f

33 Hotu Yesus nanorin natutan na'ak, “Kalo ita sunu badut, ita la taka hodi hanek. Ita rai baa fatin aas, nebee naroma ke'an bodik ema hotu-hotu.^g 34 Itakaan matan hanesan badut. Kalo matan moon,ita bele haree malorek. Mais kalo matan babaur, hotu-hotu makukun. 35 Nunia moos itakaan neon laran. Kalo Na'i Maromak naroma ti'an itakaan neon laran ti'an, ita musti daka di'a-di'ak, keta halo makukun tenik. 36 Kalo Na'i Maromak naroma ita ti'an, to'o la noo makukun ona, ne'e na'ak itakaan moris hanesan badut mak laka naroma bodik ema hotu-hotu.”

37 Yesus nanorin notu, ema ida nosi partee Farisi tene Nia mai niakaan uma. To'o nebaa, Yesus tama baa uma laran, hotu tuur atu naa-nemu.

38 Baa oras nia, uma na'in blaar, tan naree Yesus la fasi liman tuir ema Farisi siakaan ukun-badu.

39 Mais Yesus katak baa nia na'ak, “Emi, ema Farisi, maka'as! Emi hanesan ema mak fasi haa-hemu fatik iha luan dei, mais laran sei kadoor. Emi kaer metin emikaan ukun-badu hamoos aan mak ema bele naree, mais emi la hamoos emikaan neon laran mak sei sasobos no rotus. 40 Hoi beik sia! Keta haneo ha'ak Na'i Maromak nase'i itakaan isin lolon dei. Tan Nia moos nase'i itakaan neon no laran. 41 Di'ak liu, hola saa mak emi hoo, foo baa ema mukit sia, nebee emikaan neon bele dadi moos iha Na'i Maromak oin.

42 Hoi! Farisi sia! Dinu atu kona emi! Oras emi sera baa Na'i Maromak fa'ek ida nosi fafa'ek sanulu, emi sura lotu-lotuk. To'o babudun musan nosi to'os moos, emi sura hotu. Mais emi la titu lia mak noo folin. Emi la titu lia moon. Emi la hadomi Na'i Maromak. Tebes! Ita musti sera fa'ek baa Na'i Maromak. Mais keta halu'a lia mak folin kaliuk.^h

43 Hoi! Farisi sia! Dinu atu kona emi, tan emi buka fatin kabaas iha uma hamulak laran. Emi buka kneter iha fatin dahur. 44 Hoi! Farisi sia! Dinu atu kona emi! Emi nu'u rate mak la hatadan. Ema sama kona, mais la natene iha laran noo sasobo no dois. Iha luan emi halo aan moos liu. Mais iha neon laran, sasobo no dois.”

45 Yesus dale notu nunia, ema matenek ukun Yahudi ida sobak nola na'ak, “Ama! Lia nia naraik ami!”

46 Yesus nataa na'ak, “Kona! Emi matenek ukun sia moos atu hetan dinu! Emi hatodan ema hodi tula emikaan ukun-badu oi-oik baa. Mais emi du'uk la hodi liman fuan ida hatiu bodik. 47 Hoi! Emi atu hetan dinu! Emi halau aan hariik fatuk atu hodi hanoin no hakneter Maromak mako'an uluk sia. Mais tuir loos, emikaan bei uluk du'uk mak no'o mako'an nia sia! 48 Emi oik ida ho emikaan bei uluk nia sia. Uluk sia dudu sees Maromak mako'an sia, hotu no'o sia. Oras ne'e, emi hariik rate fatuk bodik sia hodi hanoin emikaan bei uluk siakaan hahalok nia. 49 Mais Na'i Maromak hakaran malorek ti'an. Uluk Nia dale na'ak, ‘Ha'u atu ksolok Ha'ukaan mako'an no klosan seluk sia mai baa ema nia sia. To'o baa, ema nasusar balu, ema no'o balu.’

50-51 Ema mak moris oras ne'e, musti natiu nola siakaan salan nia. Lia nia sai hori Na'i Maromak nase'i raiklaran ne'e, nahuu nosi Habel mate, da-dau to'o Sakaria mak ema no'o iha sera fatin no Ke'an Lulik leet iha Na'i Maromak Niakaan Uma Hamulak Huun laran. Emi musti hatiu hola siakaan kastikar nia!ⁱ

52 Hoi! Emi matenek ukun sia! Emi atu hetan dinu! Emi kaer odamatan kakoren baa Maromak, mais emi du'uk la tama. Aat liu tenik, emi saseni hola ema nebee keta tama!”

53-54 Yesus dale notu nunia, matenek ukun no Farisi sia krakat. Nahuu baa oras nia, sia nusu lia oi-oik atu nahonu Nia. Sia moos buka dalan bei-beik atu nalo lia no Nia.