Ema nasee Yesus nosi lia loron hanawa serwisu
12
Baa loron ida, kona baa ema Yahudi siakaan loron hanawa serwisu, Yesus no Niakaan maktuir sia la'o tuir to'os ida. Tan salaen, maktuir sia ku'u nola hare gandum, nodi naa la-la'ok.a 2 Iha nia moos, noo ema na'in hira nosi partee Farisi. Sia kaer metin adat Yahudi. Oras titu-naree Yesus maktuir sia ku'u hare gandum baa loron hanawa serwisu, sia nasee Yesus na'ak, “La bele nunia! Ku'u hare gandum baa loron hanawa serwisu, nakur itakaan ukun-badu!”3-4 Mais Yesus nataa na'ak, “Nunabee? Emi la hanoin lia Bei Daud iha Hakerek Moon ka? Oras uluk nia, Bei Daud no niakaan maktuir sia kabun nakeo, tan salaen tebe-tebes. Sia tama baa Batane Hamulak, hotu naa nola tubi mak na'ilulik sia sera ti'an baa Na'i Maromak. Tuir loos, na'ilulik sia mesan mak bele naa tubi nia. Ema seluk la bele. Mais masik Bei Daud sia naa moos, ema la nasalak sia. Emi nu'u la leno Hakerek Moon!b 5 Iha Hakerek Moon moos hakerek nosi na'ilulik sia mak serwisu iha uma hamulak kona baa loron hanawa serwisu. Sia moos la sala.c 6 Hanono! Uluk, uma hamulak mak folin. Mais oras ne'e, Ha'u, Ema Raiklaran Isin mai ti'an. Ha'u folin liu tenik uma hamulak. 7 Iha Hakerek Moon, Na'i Maromak katak na'ak, ‘Ha'u kakara nune'e: Ha'ukaan eman sia musti dodan malu. Kalo lale, sera tunun mak sia nodi natetu baa Ha'u, la noo folin.’ Kalo emi hatene di'a-di'ak Na'i Maromak hakaran nia, nanis emi la tula sala baa Ha'ukaan maktuir sia! Tan sia la sala.d 8 Ha'u ne'e, Ema Raiklaran Isin nosi lale'an. Ha'u mak koo beran atu kakotu saa mak ema bele nalo baa loron hanawa serwisu.”
Yesus nadi'ak nola ema ida kona baa loron hanawa serwisu
9 Nunia hotu, Yesus la'o nela fatin nia atu baa uma hamulak. 10 Iha uma hamulak nia, noo mane ida mak liman sorin matek. Ema Farisi sia buka dalan atu tula sala baa Yesus kalo nia nadi'ak nola ema nia kona baa loron hanawa serwisu. Tan lia nia, sia nusu baa Yesus na'ak, “Tuir itakaan ukun-badu, ema bele nadi'ak nola ema kona baa loron hanawa serwisu ka lale?”
11 Yesus nataa na'ak, “Kalo bibi malae monu baa kuak kona baa loron hanawa serwisu, bibi malae na'in nanis baa foti nasai.e 12 Na'i Maromak nadomi nanis ema raiklaran liu nosi bibi malae na'in nadomi niakaan bibi malae. Tan lia nia, ita hatene ha'ak ema bele nalo lia di'ak kona baa loron hanawa serwisu.”
13 Hotu Yesus dale baa ema liman matek nia na'ak, “Mau! Lolo liman mai!” Ema nia moos lolo liman baa. Baa oras nia moos, liman di'ak kedas nu'u liman sorin mak di'ak nia.
14 Naree nola nunia, ema Farisi sia krakat tebe-tebes. Sia nariik la'o nela uma hamulak nia, baa dale kabuar lia na'ak, “Ita musti buka dalan ho'o Nia!”
Na'i Maromak solok Yesus atu serwisu bodik Nia
15 Mais Yesus natene siakaan kakotun aat nia. Tan lia nia, Yesus la'o nela fatin nia. Ema wa'in moos tuir. Nia moos nadi'ak nola ema moras hotu-hotu. 16 Mais Nia nakahik sia na'ak, “Keta katak ema seluk ha'ak, Ha'u ne'e see. 17 Lia nia nato'o saa mak Na'i Maromak katak kedan baa mako'an Yesaya hori uluk na'ak,
18 ‘Haree kokon! Ema ne'e, mak Ha'ukaan ema ain-liman mak Ha'u kboi ti'an.
Ha'u kadomi nia.
Nia nalo Ha'u neon di'ak tebes.
Ha'u atu kfoo Ha'ukaan Kmalar baa nia,
nebee nia baa nanorin ema klubun hotu-hotu
nosi Ha'ukaan dalan moris mak loos.
19 Nia la basa karas.
Nia la naksa'ek aan.
20 Nia laran di'ak.
Nia la nasusar ema.
Ai mak kre'is naktohar, nia la silu.
Badut lakan mak kre'is mate, nia la nuu namate.
Nia nanorin ema to'o ema hotu-hotu natene tuir Na'i Maromak dalan loos.
21 Ema nosi klubun hotu-hotu iha raiklaran atu haloon baa Nia, tan sia natene Nia ne'e see.’”f
Manorik Yahudi sia tula sala baa Yesus na'ak, diabu ulun mak foo beran
22 Dala ida, ema nodi ema moras ida mai baa Yesus. Ema nia, diabu tekar to'o matan delek no la bele dale. Yesus moos nadi'ak nola nia nodi te'ur sai diabu. Hotu ema nia matan moon. Nia moos bele dale kedas. 23 Naree nola nunia, ema hotu-hotu blaar karin nodi na'ak, “Arumak Ema ne'e Daud husar-binan mak Na'i Maromak nameno hori uluk atu solok mai. Nia ne'e nanis Ema mak ita hei-hein ti'an nia!”
24 Mais oras ema Farisi sia rona nola nunia, sia la simu. Sia dale na'ak, “Lale! Ema ne'e bele te'ur sai diabu tan diabu ulun Baalsebul mak foo beran baa Nia.”g
25 Mais Yesus natene ema Farisi siakaan hanoin. Nia katak baa sia na'ak, “Emi dale nia la tama kakutak! Kalo renu rai ida natuda malu, oin nunabee rai nia bele nariik metin! Nunia moos kalo ema kota ida, lale ema uma laran ida, toe malu, sia nanis keen karin malu to'o dodok welon. 26 Dadi kalo diabu sia funu malu no te'ur malu, siakaan ulun la bele kaer ukun kleur. 27 Hanoin! Emikaan ema sia moos te'ur diabu. Sia nodi beran nosi diabu ka? Lale! Dadi keta na'in da-dale ha'ak, Ha'u kodi diabu beran kte'ur diabu. Emikaan ema du'uk atu nakotu na'ak sala mak emi tula nia la kona. 28 Mais hanoin! Kalo Ha'u kte'ur diabu kodi Na'i Maromak beran, lia nia natudu na'ak Na'i Maromak kaer ukun ti'an iha emikaan oin.
29 Kalo ema mai atu nadau nola naha iha ema biit ida uman, nia musti kesi uluk ema nia lai, foin bele nadau nola naha.h
30 Hanoin! Ema mak la nakbelan no Ha'u, nia funu Ha'u. Ema mak la tulun Ha'ukaan serwisu, nia tokar lauk.i 31 Hanono di'a-di'ak Ha'ukaan dalen ne'e! Na'i Maromak nadi'a aan ti'an atu kasu ema salan. Kalo ema ida dale nahaat ema seluk, Na'i Maromak kasu sala nia. Mais, kalo ema naksakar aan dale nahaat Maromak Kmalar Lulik, Na'i Maromak la kasu sala nia. 32 Ha'u ne'e, Ema Raiklaran Isin nosi lale'an. Kalo ema dale nahaat Ha'u, Na'i Maromak sei kasu sala nia. Mais, kalo dale nahaat Maromak Kmalar Lulik, masik to'o rai falu fila moos, Na'i Maromak la kasu sala nia!”j
Ai huun no fuan
33 Hotu Yesus dale liu baa ema Farisi sia na'ak, “Ai huun di'ak nasai fuan di'ak. Ai huun aat nasai fuan aat. Nosi ai fuan, ema bele natene ai huun nia, di'ak ka lale.k 34 Emi ne'e, hanesan samea maktolek teen! Emi la hatene dale lia di'ak, tan lia mak emi rai iha neon laran, nia mak atu sai nosi emikaan ibun.l 35 Ema di'ak nanis dale lia di'ak tan nia rai lia di'ak iha neon laran. Ema aat nanis dale aat tan nia rai lia aat iha neon laran.
36 Fiar Ha'u! Oras rai falu fila Na'i Maromak atu natetu ema hotu-hotu siakaan moris. Baa oras nia, ema ida-idak musti nataa nosi niakaan lia fuan mak sai nosi ibun. 37 Dadi sintidu! Na'i Maromak atu tetu emikaan lia fuan sia nodi nakotu na'ak, emi kona kastikar ka lale.”
Ema nusu Yesus natudu kakaer
38 Rona nola Yesus dale nunia, manorik ukun Yahudi na'in hira no ema Farisi sia nusu baa Nia na'ak, “Ama Manorik, ami husu Ama nalo tadak blaar, nebee ami bele hatene Ama beran nia tebe-tebes nosi Na'i Maromak.”m
39 Mais Yesus nakbehek sia na'ak, “Hoi! Emi, ema oras ne'e, la ho'uk tuir Na'i Maromak! Emi hatene halo aat dei! Masik emi husu tadak blaar moos, Ha'u la kfoo. Uluk, Na'i Maromak foo ti'an tadak blaar nodi Niakaan mako'an Yunus. Nia to'o ti'an!n 40 Baa oras nia, Yunus nein loron tolu, kalan tolu, iha na'an tasi boot kabun laran. Nunia moos Ha'u, mak Ema Raiklaran Isin nosi lale'an. Ha'u atu kein loron tolu, kalan tolu iha fatuk kuak iha ema maten fatin.o 41 Baa loron rai falu fila, Na'i Maromak atu nariik dadi makotu lia. Ema Niniwe sia moos atu nariik dadi baa mataa lia, nodi tula sala baa emi na'ak, ‘Emi hotu-hotu ne'e, beik!’ Uluk, ema Niniwe nia sia nanono baa Maromak mako'an Yunus, hotu sia la'o nela siakaan salan. Mais emi lale! Tuir loos, oras ne'e noo ti'an Ema ida iha emikaan klaran mak maka'as liu Yunus. Nia mak Ha'u ne'e. Mais emi la titu kedan.p 42 Baa loron rai falu fila, Na'i Maromak nariik dadi makotu lia, Na'i Feto Seba nosi lorokbelan nebaa moos atu nariik dadi baa mataa lia. Nia atu natudu liman fuan nodi tula sala baa emi hotu-hotu mak moris baa oras ne'e na'ak, ‘Emi ne'e hotu-hotu, beik!’ Uluk, na'i feto nia mai nosi rai dook atu naree nodi matan du'uk Na'i Salomo niakaan matenek. Tuir loos, oras ne'e noo ti'an Ema ida iha emikaan klaran mak maka'as liu Na'i Salomo. Nia mak Ha'u ne'e. Mais emi la titu kedan.”q
Diabu fila nikar baa ema mak uluk nein fatin
43 Hotu Yesus dale na'ak, “Kalo diabu kona te'ur sai nosi ema ida, diabu nia baa fatin fuik atu buka hanawa fatin. Mais, kalo la netan fatin makonak, 44 nia naneo na'ak, ‘Aa! Tan la ketan fatin, di'ak liu ha'u kfila kikar baa kein iha ema uluk nia.’ Hotu diabu nia fila nikar, naree fatin nia tetuk no nesan ti'an. 45 Hotu nia baa bolu tenik niakaan maluk na'in hitu mak aat liu tan nia. Sia hotu-hotu baa nein iha ema nia nodi nababu nia bele-bele. Tan baa nia, ema nia moris hetak susar tenik.”
Yesus Niakaan familin malolok
46 Baa oras Yesus sei dale no ema lear, Niakaan inan no alin sia mai atu nasoru Nia. Sia nariik iha luan, naruka ema bolu Yesus. 47 Hotu ema baa katak baa Nia na'ak, “Ama! Ama inan no ama alin sia iha luan. Sia atu nasoru Ama.”