Ema mak iha Maromak fohorain, sia naliku ema susar
6
Hotu Yesus nanorin tenik na'ak, “Hanoin! Keta tuir ukun-badu nebee ema tonu emi. Tan kalo halo nunia, emikaan Ama iha lale'an la selu sa-saa baa emi.a2 Kalo emi hakara tulun ema kiak sia, keta dale hamina aan iha ema wa'in oin. Tan kalo halo nunia, emi halo tuir ema mak dale seluk, nalo seluk. Sia labu baa uma hamulak nebee ema tonun sia na'ak, ‘Ema ne'e, ema boot!’ Rona, tan Ha'ukaan dalen ne'e, tebes no loos! Nodi netan tonun nunia, sia simu mohu siakaan saseban ti'an. 3 Dadi, kalo emi hakara tulun ema kiak sia, keta katak baa se-see. 4 Hodi nunia, ema iha raiklaran la natene. Mais emikaan Ama iha lale'an natene saa mak emi halo no-nook nia. Nia nanis selu nikar baa emi.”
Ema mak iha Maromak fohorain, sia natene hamulak lala'ok
5 Hotu Yesus dale na'ak, “Baa oras emi hamulak, keta halo aan hanesan ema mak dale seluk, nalo seluk. Sia nakara baa labu iha dalan dahur, nodi nariik iha uma hamulak, nebee ema lear naree nodi tonun sia na'ak, ‘Ema ne'e, ema moos tebes!’ Mais rona! Nodi simu tonun nunia, sia simu mohu siakaan saseban ti'an.b 6 Emi keta nunia. Oras hamulak, tama baa ke'an laran, taka odamatan, foin hamulak no-nook baa emikaan Ama. Masik ema seluk la naree moos, emikaan Ama naree. Nia nanis selu baa emi.
7 Oras hamulak, keta dale lale'u baa-mai. Tan ema mak la natene Na'i Maromak moos bele namulak nunia. Sia naneo na'ak Na'i Maromak beer siakaan hamulak mak naru-naruk nia. 8 Keta halo tuir sia! Masik emi sei la husu baa Ama iha lale'an moos, Nia natene ti'an saa mak emi buka. 9 Dadi kalo hamulak, tuir knaninuk ne'e:
‘Amikaan Ama iha lale'an! Ita Boot naran mak lulik kaliuk.
Nebee ema hotu-hotu foti-nahaas Ita Boot naran.
10 Nebee Ita Boot dadi Na'in bodik ema hotu-hotu!
Nebee ema hotu-hotu nalo tuir Ita Boot harukan iha raiklaran,
oin nudaar makbukar lale'an sia nalo tuir Ita Boot harukan iha lale'an.
11 Foo baa ami haan mak to'o sura loron.
12 Malu'a lakon amikaan salan,
hanesan ami moos halu'a lakon salan mak ema nalo baa ami.
13 Daka ami nebee ami keta halo aat.
Sori ami mosi diabu niakaan a'aat.
[Tan Ita Boot beran kaliuk, maka'as kaliuk.
Ita Boot mak kaer ukun hori nima-nimak to'o nima-nimak.
Nunia tebes. Amen.]’c
14 Hanono di'a-di'ak! Kalo emi halu'a lakon sala mak ema nalo baa emi, emikaan Ama iha lale'an moos atu nalu'a lakon emikaan salan. 15 Mais, kalo emi la ho'uk halu'a lakon sala mak ema nalo baa emi, emikaan Ama moos la nalu'a lakon emikaan salan.”d
Ema mak iha Maromak fohorain, sia natene halirin aan lala'ok
16 Hotu Yesus dale na'ak “Kalo emi hamulak hodi halirin aan, keta hakfinik oin hanesan ema mak dale seluk, nalo seluk. Sia nalo nunia, nebee ema tonun sia na'ak, ‘Ema ne'e, ema moon tebes!’ Mais rona, tan Ha'ukaan dalen ne'e, tebes no loos! Nodi simu tonun nunia, sia simu mohu siakaan saseban ti'an. 17 Kalo emi halirin aan, haro'is halo moos, hodi sisi fuuk di'a-di'ak. 18 Nodi nunia, ema mak naree emi la natene na'ak, emi ho'i halirin aan. Mais emikaan Ama natene. Nia nanis selu baa emi.”
Ema mak iha Maromak fohorain, sia libur sasoin iha lale'an
19 Hotu Yesus dale na'ak, “Keta serwisu maka'as atu libur sasoin iha raiklaran. Tan fuhuk no besi teen bele nahaat sasoin nia. Ema na'ok moos bele sobu, foti nodi baa.e 20 Di'ak liu emi serwisu maka'as atu libur sasoin iha lale'an. Iha nebaa, fuhuk no besi teen la bele nahaat. Ema na'ok moos la bele mai sobu nodi baa. 21 Emi rai emikaan sasoin iha nabee, emikaan neon moos nanis nakri'it aan iha nebaa.”
Ema mak iha Na'i Maromak fohorain, sia moris iha kroman
22 Hotu Yesus dale na'ak, “Ema matan, hanesan badut mak naroma neon laran. Kalo matan nakroma, nia la'o tuir dalan loos, hanesan ema mak la'o iha kroman. 23 Mais, kalo matan babaur, nia la la'o tuir dalan, hanesan ema mak la'o lemas aan iha makukun. Kalo kroman iha emikaan neon laran makukun ti'an, ne'e na'ak emi moris iha makukun.”
Ema mak iha Maromak fohorain, sia lalika neo-neon baa moris
24 Hotu Yesus dale na'ak, “Ema ida la bele serwisu bodik ulun na'in rua, tan nia nanis beer ida, tali'ur ida. Kalo ita hana'i baa osan, ita la fatan ha'ak Na'i Maromak mak itakaan Na'in.
25 Ha'u katak nune'e: Lalika malau aan modi neo-neon ma'ak, ‘Ha'u atu kmoris oin nunabee? Ha'u atu kaa saa, atu kemu saa, atu ktau saa?’ Emi haneo ha'ak moris nia bodik haa dei ka? Isin moos, bodik tau faru dei ka? Lahoos nunia. 26 Haree kokon manu ai leten sia mak semo iha kalo'an. Sia la nalau aan atu kuda no ku'u. Sia la rai haan iha kanaha uman. Mais emikaan Ama iha lale'an naliku sia nohuun. Nia nanis bele naliku emi di'ak liu nosi sia tenik. Hanoin di'a-di'ak, tan Nia nafoli emi liu tan manu ai leten sia. 27 Kalo ema nariik iha lalenok oin, hotu nalau aan no niakaan isin lolon, nia bele nalo niakaan isin hetak aas ka? La bele! 28 Kalo la bele, tan saa emi neo-neon atu hatais saa? Baa haree kokon ai funan sia iha hae molik. Sia la niri kabas, la soru tais.
29 Mais hanono di'a-di'ak! Na'i Soleman niakaan isi belun mak kabaas basuk moos, la bele liu ai funan nia siakaan kabaas.f 30 Na'i Maromak rai neon baa ai funan mak moris baa ohin loron, mais awan mate, hotu ema soe baa ha'i. Kalo Nia rai neon nunia, Nia nanis natais emi liu tan ai funan nia sia. Dadi, tan saa emi la fiar tebe-tebes baa Nia? 31 Lalika neo-neon ha'ak, ‘Ita atu haa saa? Atu hemu saa? Atu tau saa?’ 32 Ema mak la fiar baa Na'i Maromak narui aan atu buka lia nia sia hotu-hotu. Mais emi keta nunia, tan emikaan Ama iha lale'an natene hotu-hotu mak emi buka. 33 Mais emi musti hala'o uluk Niakaan serwisu no tuir uluk Niakaan ukun lai, foin Nia foo tu'an lia hotu-hotu mak emi buka. 34 Tan lia nia, keta neo-neon baa saa mak emi buka bodik awan. Tan awan noo niakaan halau aan du'uk. Susar ohin loron ne'e, to'o ti'an.”