Ema mak iha Maromak fohorain, sia keta tula lia baa ema
7
Hotu Yesus dale na'ak, “Keta tula lia baa ema, nebee Na'i Maromak la tula lia baa emi. 2 Emi hafoli ema seluk oin nunabee, Na'i Maromak moos nafoli emi oin nunia. Emi sukat ema seluk salan oin nunabee, Na'i Maromak moos atu sukat emi oin nunia.a 3 Tan saa emi hatadan ema seluk salan ki'ik, mais emikaan salan boot, emi filak la noo? Nudaar emi haree rai ahun musan iha maluk matan. Mais ai baluk boot ida mak neli emikaan matan, emi la horan. 4 Oin nunabee emi bele dale ha'ak, ‘Belu! Mai nebee ha'u ko'as kasai rai ahun nia kosi okaan matan.’ Emi dale nunia, mais emi du'uk la bele haree, tan ai baluk sara natoos emikaan matan. 5 Etuk oin, emi ne'e huun oin-kotuk tebes! Foti soe ai baluk nia hosi emikaan matan lai, nebee bele haree hikar, foin ho'as rai ahun nia hosi belun matan.6 Keta hanorin lia moon hosi Na'i Maromak bodik ema maleuk teen sia. Sia nia, hanesan asu krakat mak atu tata fila emi. Sia moos beik nu'u fahi. Kalo ema foo henu mahoo folin baa, fahi la titu! Nia sama loos dei.”
Ema mak iha Maromak fohorain, sia namulak bei-beik
7 Hotu Yesus dale na'ak,
“Oras hamulak,
kalo hakro'an bei-beik baa Na'i Maromak;
Nia nanis foo.
Kalo buka bei-beik;
Nia nanis natudu dalan.
Kalo bolu bei-beik;
Nia nanis loke odamatan.
8 Ema mak nakro'an bei-beik baa Na'i Maromak,
nanis simu.
Ema mak buka bei-beik,
nanis netan.
Ema mak bolu bei-beik,
nanis Nia loke odamatan.
9 Hanoin kokon! Kalo oan nusu tubi, aman foo fatuk ka? Lale! 10 Kalo nusu na'an tasi, ama foo samea ka? Lale! 11 Emikaan Ama iha lale'an, laran di'ak tebes. Kalo emi ema raiklaran mak nalo aat sei nakara foo buat di'ak baa oan, nu'u saa tenik emikaan Ama! Nia nanis foo saa mak emi husu.
12 Saa mak emi hakara ema seluk nalo bodik emi, emi musti halo nunia bodik nia. Lia ne'e, lia tatuur nosi lia hotu-hotu mak Bei Musa no Maromak mako'an seluk sia nanorin kedan hori uluk aan.”b
Ema tama Maromak fohorain, tuir odamatan mak loot
13 Hotu Yesus dale na'ak, “Kalo ema beer tama lale'an, musti la'o tuir odamatan mak loot. Ema lear nakara la'o tuir dalan mak maus, no odamatan maluak. Mais sintidu, tan dalan oin nunia, nodi ema baa moris dodok. 14 Ema mak beer tama lale'an musti la'o tuir dalan mak susar no tama tuir odamatan mak loot. Masik ema na'in hira dei mak la'o tuir nia moos, dalan loot nia mak nodi ema baa Na'i Maromak.”
Ema mak iha Maromak fohorain, sia keta tuir maktolek teen
15 Hotu Yesus dale na'ak, “Sintidu ho ema maktolek teen mak asu fanu na'ak, sia Maromak mako'an. Sia nalo aan di'ak nu'u bibi malae. Mais tuir loos, sia ema aat nu'u asu fuik mak mai folan bibi malae. 16 Emi bele hatene ema oin nunia sia nune'e: haree loos saa mak sia nalo, hanesan emi haree ai fuan atu hatene fuan nia nosi ai huun nabee. Ita hatene fuan di'ak, la sai nosi huun aat. 17 Kalo huun di'ak, fuan di'ak. Huun aat, fuan aat. 18 Huun di'ak la nafua fuan aat. Nunia moos, huun aat la nafua fuan di'ak. 19 Ai huun mak nafua fuan aat, nanis ema mai nu'an nola, soe baa ha'i.c 20 Emi moos bele hatene mako'an tolek teen nia sia, hosi siakaan hahalok.”d
Ema mak iha Maromak fohorain, sia keta temi Yesus iha ibun dei
21 Hotu Yesus dale na'ak, “Ema wa'in temi Ha'u na'ak, ‘Ita Boot!’ nudaar Ha'u ne'e, tebe-tebes siakaan Ulun. Mais sia temi iha ibun dei. Nosi ikus, Na'i Maromak iha lale'an atu dudu sai sia. Hela mesan ema mak tuir tebe-tebes Niakaan hakara mak Nia simu nola dadi baa Niakaan ema. 22 Baa oras rai falu fila, ema wa'in atu katak sain na'ak, Ha'u ne'e siakaan Ulun. Sia atu namaus Ha'u na'ak, ‘Ita Boot! Ami baa keke lema ti'an Itakaan hanorin. Ami te'ur sai diabu sia hodi Itakaan naran. Ami moos hase'i tadak blaar oi-oik hodi Itakaan beran.’
23 Masik sia namaus Ha'u bei-beik moos, Ha'u atu kataa sia ka'ak, ‘Emi ne'e see? La katene emi! Emi la moris tuir Na'i Maromak hakaran. Sees hosi ne'e!’”e
Ema mak iha Maromak fohorain, sia moris matenek, keta moris beik
24 Hotu Yesus dale na'ak, “Ema mak nanono baa Ha'u nodi nala'o Ha'ukaan dalen, ema nia hanesan ema matenek mak nariik uma iha tatuur fatuk leten. 25 Kleu-leur udan boot tuun to'o motasa'e. Anin maka'as moos basak uma nia, mais la nakro'on tan nariik iha tatuur fatuk monas leten.
26 Ema mak nanono baa Ha'u mais la nala'o Ha'ukaan dalen, ema nia hanesan ema beik mak nariik uma baa raihenek. 27 Kleu-leur udan boot tuun to'o motasa'e. Anin maka'as moos basak uma nia, to'o nakro'on hotu.”
Ema blaar karin rona nola Yesus hanorin maka'as nosi Maromak fohorain