Yesus nanorin iha foho ki'ik ida leten
5
Baa oras Yesus titu-naree ema lear lolok mai, Nia sa'e baa foho ki'ik ida atu tuur iha nia. Maktuir sia mak Nia boi ti'an nia mai kre'is atu nanono Nia. 2 Hotu Nia nahuu nanorin sia.Ema mak sotir lalek iha raiklaran, sia sotir iha Maromak fohorain
3 Yesus nanorin na'ak,“Ema kiak sia, sia sotir,
tan Na'i Maromak du'uk mak siakaan Na'in iha lale'an.
4 Ema mak laran susar sia, sia sotir,
tan Na'i Maromak du'uk namaus sia.a
5 Ema ki'ik sia, sia sotir,
tan sia atu simu fafa'ek nosi Na'i Maromak.b
6 Ema mak buka Na'i Maromak dalan moris loos, sia sotir,
tan Na'i Maromak atu foo saa mak sia buka.c
7 Ema mak neon monu baa ema, sia sotir,
tan Na'i Maromak moos atu neon monu baa sia.
8 Ema mak neon moon sia, sia sotir,
tan sia atu naree du'uk Na'i Maromak.d
9 Ema mak nalo ema dame malu, sia sotir,
tan Na'i Maromak atu temi sia na'ak, ‘Ha'ukaan oan.’
10 Ema mak netan susar tan tuir Na'i Maromak, sia sotir,
tan Na'i Maromak du'uk mak siakaan Na'in iha lale'an.e
11 Kalo ema nasusar emi tan emi tuir Ha'u, emi moos sotir. Kalo sia dale aat baa emi, no naktolek emi, nodi nahaat emikaan naran, emi moos sotir.f 12 Emi musti neon boot, tan Na'i Maromak atu foo saseban boot baa emi iha lale'an. Mais hanoin! Lahoos emi mesan mak hetan susar nunia, tan ema moos nalo aat nunia baa Maromak mako'an uluk aan sia.”g
Ema mak iha Maromak fohorain, sia musti moris hanesan masin no kroman
13 Hotu Yesus dale na'ak, “Emikaan moris musti dadi hanesan masin bodik ema raiklaran. Kalo ema beer haan midar, sia musti tau masin. Mais, kalo masin miis ti'an, la noo folin ona. Ema soe loos baa dalan, hotu sama tan.h
14 Emikaan moris moos musti dadi hanesan kroman bodik ema raiklaran. Emi musti haksinak hanesan kota ida iha foho leten mak ema wa'in bele titu-naree.i 15 Ema mak nalaka badut, la subar badut nia iha sasanan laran. Mais sia rai baa fatin aas, nebee bele naroma uma isin hotu-hotu.j 16 Emi musti moris nunia. Emi musti haksinak, nebee ema wa'in bele titu-naree emikaan moris mak di'ak, to'o sia tonu na'ak, ‘Emikaan Aman iha lale'an, maka'as tebes!’”k
Yesus mai atu nato'o Ukun-badu Musa, lahoos atu nalakon
17 Hotu Yesus dale na'ak, “Arumak emi haneo ha'ak, Ha'u kmai iha raiklaran ne'e atu kalakon Ukun-badu mak Na'i Maromak foo baa Bei Musa ka? Lale! Arumak emi haneo ha'ak, Ha'u la ktitu saa mak Maromak mako'an sia nanorin hori uluk ka? Lale! Ha'u kmai ne'e, atu kala'o kato'o lia nia sia hotu-hotu. 18 Rona, tan Ha'ukaan dalen ne'e, tebes no loos! Kalo lale'an no raiklaran sei iha, Ukun-badu nia sia nafati nohuun. Masik lia lotun oan ida moos, la lakon. Hotu-hotu nafati to'o tetuk.l 19 Noo ema mak la titu ukun balu, tan sia naneo na'ak, ‘Ukun ida ne'e, lia ki'ik. Dadi, ha'u la ktuir!’ Hotu ema nia nanorin baa ema seluk, nebee keta tuir. Tan lisan nunia, Na'i Maromak iha lale'an atu nafoli ema nia na'ak, ema ki'ik. Mais ema mak nala'o ukun nia sia nodi nanorin ema seluk nebee nalo tuir, Na'i Maromak atu nafoli ema nia na'ak, ema boot. 20 Fiar Ha'u! Kalo emi la moris tuir Na'i Maromak hakaran liu nosi ema manorik ukun no ema partee Farisi sia, emi la bele tama Niakaan fohorain no la bele dadi baa Niakaan ema.”
Ema mak iha Maromak fohorain, keta nawan sa'e malu
21 Hotu Yesus dale na'ak, “Emi hatene ti'an ukun sia mak Na'i Maromak foo baa itakaan bei uluk sia na'ak, ‘Keta ho'o ema. Noo tenik, kalo ema no'o ema, musti kona kastikar.’m 22 Mais ha'u katak nune'e: keta nawan sa'e malu, tan ema mak nawan sa'e niakaan maluk, nia sala. Ema mak de'an niakaan maluk na'ak, ‘O momok!’, ema nia musti nataa iha makotu lia oin. No ema mak nakbehek niakaan maluk na'ak, ‘O bulak!’, nia atu kona kastikar iha ha'i naraka.
23 Tan lia nia, kalo o modi sera baa Na'i Maromak, hotu manoin ma'ak okaan maluk sei nawan sa'e o, 24 di'ak liu rai hein sera nia lai, hotu baa dame malu, foin mai matetu sera nia baa Na'i Maromak.
25 Kalo ema nalo lia baa o, di'ak liu lai-lais baa musu dame mo nia. Kalo lale, ema nia atu dada nodi o baa makotu lia oin. Hotu makotu lia atu latan o baa ema makdaka bui, nebee natama o baa bui laran. 26 Ha'ukaan dalen ne'e, tebes no loos! O atu mein bei-beik iha bui laran, to'o selu kotu okaan tusan hotu-hotu.”
Ema mak iha Maromak fohorain, keta halo lia kfo'er
27 Hotu Yesus dale na'ak, “Emi hatene ti'an ukun-badu na'ak, ‘Keta halo lia kfo'er.’n 28 Mais Ha'u katak nune'e: Ema mak foti matan titu-naree feto ida, hotu nia beer toba no feto nia, ema nia nalo lia kfo'er ti'an iha neon laran. 29 Tan lia nia, kalo o malo sala modi okaan matan kwana, sukit soe dei. Di'ak liu o tama lale'an modi matan mesak dei, nosi o kona soe baa ha'i naraka modi matan rua.o 30 Kalo o malo sala modi okaan liman kwana, taa kotu baa dei. Di'ak liu o tama lale'an modi liman sorin dei, nosi o kona soe baa ha'i naraka modi liman rua.”p
Ema mak iha Maromak fohorain, keta soe malu
31 Hotu Yesus dale na'ak, “Emi hatene ti'an ukun-badu na'ak, ‘Ema mak soe feen, musti foo hakerek soe malu baa feto nia.’q 32 Mais Ha'u katak nune'e: Kalo la'en soe feen, mais feen la isin ida nakur biti-kluni, la'en nalo nia nakur biti-kluni ti'an. Kalo mane seluk nola feto nia, mane nia moos nakur biti-kluni.”r
Ema mak iha Maromak fohorain, sia nalo tuir siakaan mamenon
33 Hotu Yesus dale na'ak, “Emi hatene ti'an ukun-badu mak Na'i Maromak foo baa itakaan bei uluk sia na'ak, ‘Kalo ema namate menon nodi narai aan temi Na'i Maromak naran, ema nia tatalik no mamenon nia ti'an.’s 34 Mais Ha'u katak nune'e: Keta harai aan hodi temi lale'an, tan lale'an nia, Na'i Maromak Niakaan tofatik.t 35 Keta harai aan hodi temi raiklaran, tan raiklaran nia, Na'i Maromak Niakaan tau ain fatik. Keta harai aan hodi temi Yerusalem, tan Yerusalem nia, Na'i Boot Niakaan kota.u 36 Keta harai aan hodi temi okaan ulun, tan okaan ulun nia la noo beran atu naruka fuuk lahon ida moos atu dadi metan lale mutin. 37 Kalo o makara mamate menon, katak dei ma'ak, ‘Tebes’. Kalo la makara, katak dei ma'ak ‘Lale’. Kalo ma'ak liu tan tenik, lia nia nahabut baa diabu.”
Ema mak iha Maromak fohorain, keta selu aat hodi aat
38 Hotu Yesus dale na'ak, “Emi hatene ti'an ukun-badu na'ak, ‘Kalo ema nahaat okaan matan, mahaat sakar niakaan matan. Kalo ema nahonu okaan ne'an, mahonu sakar niakaan ne'an.’v 39 Mais Ha'u katak nune'e: Keta selu aat hodi aat. Kalo ema basa okaan hasan sorin, mabusik basa tenik sorin balu. 40 Kalo ema nalo lia baa o atu nola okaan faru, foo tenik okaan faru klobor baa. 41 Kalo sondadu seten o atu matiu niakaan naha to'o la'o kilo ida, matiu modi liu baa, to'o kilo rua. 42 Kalo ema nusu okaan naha ida, foo baa dei. Kalo ema beer nola hein okaan naha ida, foo baa dei.”
Ema mak iha Maromak fohorain, sia nadomi ema mak hirus sia
43 Hotu Yesus dale na'ak, “Emi rona ti'an ukun-badu na'ak, ‘Madomi okaan maluk, mais hirus ema mak hirus o.’w 44 Mais Ha'u katak nune'e: Musti madomi ema mak hirus o, modi makro'an nebee Na'i Maromak natuun matak-malirin baa ema mak nasusar o. 45 Kalo o malo nunia, o matudu ma'ak, o ne'e Ama iha lale'an Niakaan oan. Nia nase'i loro matan atu naksinak bodik ema di'ak. Nia moos nase'i atu naksinak bodik ema aat. Nia natuun udan ween bodik ema mak nalo tuir Niakaan haruka, namutuk no ema mak sakar Niakaan haruka. 46 Kalo o madomi loos ema mak nadomi o, o maneo ma'ak Na'i Maromak musti selu matak-malirin baa o ka? Lale! Tan ema aat moos nadomi siakaan belu mak nadomi sia. 47 Kalo o foo loos dame baa okaan belu, niakaan saa mak liu? Tan ema mak la fiar baa Na'i Maromak moos nalo tuir nunia. 48 Hanoin! Okaan Ama iha lale'an nadomi ema hotu-hotu. O moos musti malo tuir nunia!”x