Yesus foo lia hatetek nosi ema serwisu to'os anggor
12
Hotu, Yesus dale tenik baa ema boot nia sia nodi lia hatetek na'ak, “Noo ema ida nalo to'os baa niakaan rai rohan atu kuda ai anggor baa. Hotu, nia nalo ba'a satan leur. Nia moos ke'e kuak ida, nalo baa anggor ween fatik. Nia moos nariik uma tetu aas ida atu nodi daka to'os. Hotu, nia seba to'os nia baa ema mak serwisu to'os, nebee sia fa'e rua to'os isin. Nakotu lia ti'an, to'os na'in nia la'o baa rai dook.a 2 To'o oras ku'u, to'os na'in nia solok niakaan ema ain-liman ida baa nusu niakaan fafa'ek. 3 Mais, ema serwisu to'os nia sia, kohi nola nodi ta'e ema nia. Hotu, sia te'ur fila nodi liman mamuk.
4 Rona nola nunia, to'os na'in nia solok ema ida seluk baa. Mais, ema mak serwisu to'os nia sia ta'e nia, to'o ulun fatun kanek karin. Sia moos de'an namoe nia, hotu nalatu fila. 5 Rona tenik nunia, to'os na'in nia solok tenik ema ida baa. Mais ema serwisu to'os nia sia no'o nia. Masik sia nalo aat nunabee moos, to'os na'in solok niakaan ema sia baa bei-beik. Mais, ema serwisu to'os nia sia ta'e balu, no'o balu. 6 Baa ikus, hela mesan ema ida dei. Ema nia, to'os na'in oan mane mesak mak nia dadobe tebes. Tan la noo dalan seluk ti'an, to'os na'in solok luku oan baa. Nia naneo na'ak, ‘Kalo ha'u ksolok ha'ukaan oan du'uk, sia nanis simu di'a-di'ak nodi rona baa nia.’
7 Mais baa oras ema serwisu to'os nia sia naree oan nia mai, sia namaas baa malu na'ak, ‘Hoi! Haree baa! Katuas naruka oan du'uk mak mai! Awan-wainrua, kalo katuas mate, nia ne'e mak atu netan sasoin hotu-hotu. Di'ak liu, ita ho'o nia ona, nebee ita hadau hola to'os ne'e!’ 8 Hotu, sia kohi nola oan nia. Sia no'o ti'an, hotu soe maten baa to'os luan.”
9 Hotu Yesus natuka lia hatetek nia, nodi nusu baa ema boot nia sia na'ak, “Oras ne'e, Ha'u atu kusu nune'e: To'os na'in nia atu nalo saa baa ema serwisu sia? Tuir Ha'u, nia nanis mai no'o mohu sia. Hotu, nola nikar to'os nia, foo baa ema seluk.
10 Arumak emi sei la leno dauk saa mak hakerek ti'an iha Hakerek Moon na'ak,
‘Noo fatuk ida mak badaen fatuk sia soe lerek ti'an.
Mais, oras ne'e fatuk nia dadi baa uma tatuur fatuk ona.
11 Na'i Maromak du'uk mak boi nola no natuur fatuk nia.
Etuk oin, ita haree baa, kabaas tebes!’”b
12 Rona nola nunia, ema boot sia natene kedan na'ak, Yesus Niakaan lia hatetek nia kona baa sia. Sia manesak no ema serwisu aat nia sia no badaen mak soe fatuk nia. Tan lia nia, sia buka dalan atu kohi Yesus. Mais, sia nakerat ema lear mak nakara Yesus Niakaan hanorin. Hotu, sia la'o nela Yesus dei.
Ema nodi lia selu bea atu buka Yesus ain
13 Nunia hotu, ema boot Yahudi sia bolu nola ema Farisi no maktuir Herodes na'in hira, nebee baa nase'i lia atu nahonu Yesus. 14 Hotu, sia moos baa nusu Yesus na'ak, “Ama Boot! Ami hotu-hotu hatene ha'ak, Ama neon loos. Ama nanorin loke fore Na'i Maromak hakaran, no la fihir oin. Oras ne'e, ami atu husu lia ida nune'e: tuir itakaan ukun-badu Yahudi, ita musti selu bea baa liurai Roma ka lale?”
15 Mais Yesus natene sia atu nahonu Nia, nebee dale sakar ukunrai Roma. Tan baa nia, Nia nataa na'ak,“Tan saa emi hase'i lia atu hahonu Ha'u!? Hatudu kokon osan murak tomak ida baa Ha'u!”
16 Hotu, sia nodi osan murak tomak ida baa Yesus. Nia simu nola, hotu leno. Hotu, Nia nusu baa sia na'ak, “Ne'e, see niakaan oin? Ne'e, see niakaan naran?”
Sia nataa na'ak, “Nia, Keser mak liurai Roma.”
17 Hotu, Yesus dale tenik na'ak,“Kalo nunia, foo baa ukunrai saa mak ukunrai niakaan. No foo baa Maromak saa mak Maromak Niakaan.”
Rona nola Yesus nataa nunia, sia blaar karin, tan Yesus dale nia makonak. Masik sia buka Yesus ain moos, la bele.
Lia ema mate bele moris nikar no lia ema nola malu iha lale'an
18 Hotu, ema na'in hira seluk mai baa Yesus. Sia nia, nosi partee Saduki mak nanorin na'ak, nosi ikus baa oras rai falu fila, ema mak mate ti'an, la moris nikar.c 19 Sia katak baa Yesus na'ak, “Ama Boot! Bei Musa nakerek nela ukun-badu baa ita ema Yahudi na'ak: Kalo mane ida mate nela feen, mais la noo oan, niakaan alin musti nola feto faluk nia, nebee foo husar-binan baa niakaan maun mak mate ti'an nia.d 20 Uluk bei Musa nanorin nunia tebes. Mais noo lia ida nune'e: Noo mane maun-alin na'in hitu. Mane ulun nola feen, hotu mate, mais la noo oan. 21 Hotu, alin mak tuir nia, nola nikar feto faluk nia. Mais la kleur, alin nia moos mate, la noo oan. Nunia tenik alin susu dala rua. Nia nola feto nia. Mais nia moos mate, la noo oan tenik. 22 Nunia bei-beik to'o alin ikun moos mate. Nosi ikus, feto faluk nia moos mate.
23 Oras ne'e ami atu husu nune'e: Feto nia nola mane na'in hitu ti'an. Nosi ikus, baa oras rai falu fila Na'i Maromak nalo ema mate ti'an sia moris nikar, feto nia dadi baa mane ida nabee feen?”
24 Rona nola nunia, Yesus nataa na'ak, “Kalo emi husu nunia, emi sala ti'an! Emi la hatene Hakerek Moon isin. Emi moos la hatene Na'i Maromak beran maka'as!
25 Rona! Lia loos mak ne'e! Na'i Maromak Niakaan makbukar lale'an la nola malu. Oras rai falu fila Na'i Maromak nalo ema mate ti'an sia moris nikar, sia moos la nola malu ona, hanesan makbukar lale'an sia. 26 Ha'u moos kalore tenik kosi lia ema mak mate ti'an bele moris nikar ka lale. Uluk aan, Bei Musa nakerek lia nosi ai huun ki'ik mak ha'i naa mais la namotuk. Emi la leno lia nia ka? Baa oras ha'i naa ai huun nia, Na'i Maromak foo natene baa Bei Musa na'ak, ‘Ha'u ne'e Maromak, mak okaan Bei Abraham, Bei Isak no Bei Yakob, siakaan Maromak. Sia hotu-hotu lo'u-sudur baa Ha'u hori uluk to'o oras ne'e.’e 27 Kalo ita leno nunia, ita hatene ha'ak, baa oras Na'i Maromak dale nunia, bei nia sia mate kleur ti'an. Masik nunia moos, Na'i Maromak katak na'ak, sia sei lo'u-sudur baa Nia. Lia nia na'ak, sia sei moris. Dadi, masik ema mate ti'an, bele moris nikar. Ema moris mak lo'u-sudur baa Na'i Maromak, lahoos ema mate! Kalo emi kaer metis hanorin mak na'ak ema mak mate ti'an la bele moris nikar, emi sala ti'an!”
Hadomi Na'i Maromak no ema raiklaran
28 Baa oras nia, noo manorik ukun Yahudi ida mak tuir rona Yesus nanorin ema partee Saduki sia. Manorik ukun nia naneo na'ak, Yesus nataa di'a-di'ak lia mak sia nusu ohin nia. Hotu, nia nusu baa Yesus na'ak, “Ama Boot! Ha'u atu kusu lia ida nune'e: Itakaan ukun-badu nosi Bei Musa, wa'in loos. Nosi ukun nia sia hotu-hotu, ukun nabee mak boot kaliuk?”
29 Yesus moos nataa na'ak, “Ukun mak boot kaliuk mak ne'e:
‘Ema hotu-hotu iha rai Isra'el, rona di'a-di'ak!
Na'i Maromak mak itakaan Na'in,
no itakaan Maromak!
La noo seluk tenik. Nia mesan dei.
30 Dadi, ita musti hadomi Nia liu hotu-hotu.
Ita musti beer Nia bei-beik.
Ita musti hatene di'a-di'ak Nia.
Tenik, ita musti haka'as aan tuir Niakaan hakaran.’f
31 No ukun dala rua mak ne'e:
‘Ita musti hadomi itakaan maluk, oin nudaar ita hadomi itakaan isin lolon du'uk.’
Ukun rua ne'e, mak boot kaliuk. La no ukun seluk tenik mak boot liu ukun rua ne'e.”g
32 Hotu, manorik ukun nia simu Yesus na'ak, “Tebes Ama! Saa mak Ama Boot katak nia loos. Na'i Maromak ida dei! La noo seluk tenik. Nia mesan dei.h 33 Ita musti hadomi Nia liu hotu-hotu. Ita musti beer Nia bei-beik. Ita musti hatene di'a-di'ak Nia, no ita musti haka'as aan tuir Niakaan hakaran. Ita moos musti hadomi itakaan maluk, oin nudaar ita hadomi itakaan isin lolon du'uk. Nia, mak Na'i Maromak beer liu nosi itakaan sera hotu-hotu baa Nia.”i
34 Rona nola nunia, Yesus natene na'ak manorik ukun nia natene tebes ti'an. Hotu Yesus katak baa nia na'ak, “Ama kre'is ti'an dadi Na'i Maromak eman.”
Nunia hotu, la noo ema seluk tenik mak naksakar aan toe no Yesus, tan la noo mak bele nahonu Nia.j
Kristus, Na'i Daud husar-binan, mais Kristus moos Na'i Daud Ulun
35 Hotu, Yesus nanorin tenik ema iha Uma Hamulak Huun. Nia katak nalore na'ak, “Hori uluk aan Na'i Maromak nameno ti'an atu solok Kristus nodi sori Niakaan ema sia. Itakaan manorik ukun Yahudi sia nanorin na'ak, Kristus nia, Na'i Daud husar-binan. Mais siakaan hanorin nia, sei la to'o dauk. 36 Tan uluk Maromak Kmalar Lulik naruka Na'i Daud nakerek nosi lia Kristus na'ak:
‘Na'i Maromak katak ti'an baa ha'ukaan Ulun Boot na'ak,
“Mai tuur baa fatik kneter kaliuk ne'e iha Ha'ukaan sorin kwana,
tan Ha'u atu kalo okaan funu sia lo'u baa o.’”k
37a Nosi hakerek nia, ita hatene malorek ha'ak, Na'i Daud du'uk temi Kristus na'ak ‘Ulun’. Dadi, kalo ema na'ak Kristus nia, Na'i Daud husar-binan loos dei, lia nia sei la to'o dauk, tan Kristus moos, Na'i Daud Ulun!”
Yesus foo natene nebee sintidu baa manorik ukun mak subar siakaan salan
37b Rona Yesus nanorin nunia, ema wa'in beer tebes. 38 Hotu, Yesus katak tenik na'ak, “Sintidu baa manorik ukun sia. Sia tau faru klobor nodi la'o baa-mai lalore aan baa ema wa'in, nebee ema tonu sia na'ak, ‘Ema nia sia, moon tebes!’ 39 Oras tama uma hamulak, sia buka tuur fatik iha oin, nebee ema wa'in titu-naree sia. Iha dahur moos, sia nalo nunia. 40 Mais sintidu, tan sia bosok feto faluk sia, nodi nadau nola siakaan uma. Mais iha ema lear oin, sia subar mate siakaan a'aat. Sia nariik nodi namulak kleu-leur, tan sia beer ema tonu na'ak, sia ema moon. Mais nosi ikus, sia simu kastikar todan liu.”
Feto faluk mukit ida niakaan sera mak boot kaliuk
41 Hotu, Yesus baa tuur kre'is baa ai balun sera fatik iha Uma Hamulak Huun. Nia naree ema mai natama osan sera baa ai balun. Baa oras nia, ema maksoin sia mai natama osan wa'in boot. 42 La oras, feto faluk mukit ida moos mai namulak. Nia natama osan lahon rua baa ai balun nia. Osan nia folin ki'ik basuk.
43 Naree nunia, Yesus bolu nola Niakaan maktuir sia, hotu katak na'ak, “Haree baa! Feto mukit ne'e natama osan lahon rua dei, mais niakaan sera nia, boot liu ema hotu-hotu siakaan sera. 44 Ema seluk sia foo sera nosi siakaan osan resin. Mais, feto faluk ne'e sera mohu niakaan osan hotu-hotu, to'o osan atu nola haan moos, la noo ona.”