5 Hotu-hotu mak sia nalo, sia buka nebee ema tonu sia. Baa oras namulak, sia kesi Hakerek Moon baa ulun no nisa fafutar oi-oik baa faru klobor. Sia nalo bo-boot nunia, nebee ema mose sia na'ak, ‘Ema nia sia, moon tebes!’^a

6 Kalo tama uma hamulak, lale, tama nadahur, sia buka tuur fatik iha oin, nebee ema wa'in titu-naree sia. 7 Kalo la'o baa nabee, sia moos rotus kneter. Sia buka ema sudur baa sia na'ak, ‘Tabe, Ama Manorik.’

8 Mais emi keta tuir siakaan moris lala'ok nia! Keta buka ema temi emi na'ak, ‘Ulun’, tan emikaan Ulun mesak ida dei. Emi hotu-hotu moos, maun-alin. 9 Tan baa nia, keta mose ema iha raiklaran ha'ak, ‘Ama’, tan emikaan Ama iha lale'an mesak ida dei. 10 Emi moos keta buka ema temi emi na'ak, ‘Manorik’, tan emikaan Manorik mesak ida dei. Nia, mak Kristus. 11 Tan lia nia Ha'u katak ka'ak, keta foti aan hanesan ema mak rotus kneter sia. Emi see mak nakara dadi ema boot, nia musti dadi baa mataroos.^b 12 Ema mak foti aan, Na'i Maromak atu naraik nia. Mais ema mak naraik aan, Na'i Maromak atu nasa'ek nia.”^c

13 Hotu Yesus dale tenik na'ak, “Hoi emi ema manorik ukun no ema Farisi sia! Etuk oin emi oin-kotuk! Emi nanis hetan dinu! Ema buka dalan atu tama dadi Na'i Maromak eman, mais emi saseni hola sia! Emi du'uk la ho'uk tama, mais emi saseni hola ema seluk.

14 [Hoi emi ema manorik ukun no ema Farisi sia! Etuk oin emi oin-kotuk! Emi nanis hetan dinu! Emi tolek bosok feto faluk sia, hodi hadau hola siakaan uma. Mais iha ema lear oin, emi taka emikaan a'aat nia, hodi hariik hamulak kleu-leur, nebee ema mose na'ak emi, ema neon moos. Mais nosi ikus, Na'i Maromak atu taa ukun todan kaliuk baa emi.]^d

15 Hoi emi ema manorik ukun no ema Farisi sia! Etuk oin emi oin-kotuk! Emi nanis hetan dinu! Emi sa'e foho, tuun tasi, buka loos ema na'in ida, nebee nia dadi baa emikaan maktuir. Mais, kalo hetan ti'an, emi hanorin nia atu tuir emikaan a'aat, to'o nia moris aat liu tan tenik. Nosi ikus, nia atu netan kastikar iha ha'i naraka, isin rua todan liu emi.

16 Emi ne'e, ema momok mak matan tomak! Tan saa emi sei hakara hatudu dalan baa ema seluk? Emi atu hetan dinu, tan emi hanorin hahutan karin ha'ak, ‘Kalo ema ida namate menon nodi nabasuk lian temi Na'i Maromak Niakaan Uma Hamulak Huun, ema nia la kesi aan no mamenon nia. Mais, kalo nabasuk lian temi naha mean mak iha Uma Hamulak Huun, foin nia kesi aan no mamenon nia.’ 17 Emi ne'e, ema momok mak matan tomak! Emi haneo ha'ak, Na'i Maromak nafoli naha mean liu nosi Niakaan Uma Hamulak Huun ka? Lale! Tan Uma nia mak nalo naha nia sia dadi moos! 18 Emi moos hanorin hahutan karin ha'ak, ‘Kalo ema ida namate menon nodi nabasuk lian temi sera fatin mak iha Uma Hamulak Huun, ema nia la kesi aan no mamenon nia. Mais, kalo nabasuk lian temi sera mak iha fatin nia leten, foin nia kesi aan no mamenon nia.’ 19 Emi ne'e, delek tebe-tebes ti'an. Fatin sera nia, nanis folin liu sera mak iha fatin nia leten. Tan fatin nia, na'ilulik nodi sera saa mak ema nodi foo baa Na'i Maromak. 20 Kalo ema ida nabasuk lian temi sera fatin, ne'e na'ak, nia temi sera fatin no hotu-hotu mak iha fatin nia leten. 21 Kalo ema nabasuk lian temi Uma Hamulak Huun, ne'e na'ak, nia temi Uma Hamulak no Na'i Maromak naran, tan Nia mak nein iha nia. 22 Kalo ema nabasuk lian temi lale'an, ne'e na'ak, nia temi Na'i Maromak naran no Niakaan kadera ukun, tan Nia mak nabesi aan kaer ukun iha nia.^e

23 Hoi emi ema manorik ukun no ema Farisi sia! Etuk oin emi oin-kotuk! Emi nanis hetan dinu! Emi matenek basuk sura emikaan sasoin, nebee bele foo fa'ek ida nosi fafa'ek sanulu baa Na'i Maromak. Emi sura lotu-lotuk, to'o to'os isin ki'ik oan sia moos, emi sura mate. Emi sura lotu-lotuk emikaan salasi oan, kwenter oan no lisa oan sia, mais Ukun-badu mak folin kaliuk, emi halu'a lakon. Emi la tuir dalan moris loos. Emi la hadomi ema mukit sia. Emi la kalolon emikaan mamenon. Di'ak liu, tuir lia nia sia hotu-hotu lai, foin sura emikaan babudun sia, nebee foo fa'ek ida baa Na'i Maromak.^f 24 Emi matan tomak ti'an! Tan saa emi sei hakara hatudu dalan baa ema seluk? Emi hase'i ukun lotu-lotuk hodi haruka ema seluk nalo tuir. Mais Ukun-badu mak folin kaliuk, emi du'uk la halo tuir. Hanesan emi ta'es hasai lalar ki'ik oan nosi emikaan wee hemu, mais buat boot nu'u karau, emi folan hola to-tomak dei!

25 Hoi emi ema manorik ukun no ema Farisi sia! Etuk oin emi oin-kotuk! Emi nanis hetan dinu! Emi hanesan ema mak fasi haa-hemu fatin to'o milat, mais milat iha luan dei. Tan emikaan madauk teen no rotus teen nia nalo emikaan neon laran, sei mahobos no sei kadoor.

26 Hoi emi ema Farisi matan tomak sia! Fasi uluk laran lai! Hodi nunia, foin luan moos dadi moos!

27 Hoi emi mak ema manorik ukun no ema Farisi sia! Etuk oin emi oin-kotuk! Emi nanis hetan dinu! Emi hanesan rate mak ema kaser mutin. Ema naree nosi luan, kabaas basuk. Mais iha laran, nakonu no ema maten ruin no dois aat oi-oik.^g 28 Emi moos nunia! Ema naree emi nosi luan, nu'u ema neon loos. Mais emikaan neon laran, nakonu no lia aat oi-oik. Emi dale seluk, halo seluk, hodi halu'a lakon Na'i Maromak ukun sia.

29 Hoi emi ema manorik ukun no ema Farisi sia! Etuk oin emi oin-kotuk! Emi atu hetan dinu! Emi halo rate kabaas bodik Maromak mako'an mak emikaan bei uluk sia no'o, no emi hafutar rate bodik ema moon mak emikaan bei uluk sia nadodok. 30 Hotu emi katak ha'ak, ‘Kalo ami moris otas ida ho amikaan bei uluk sia, ami nanis la tuir sia hodi ho'o Maromak mako'an sia.’ 31 Mais hodi nunia, emi lalore aan ha'ak, emi ne'e ema aat husar-binan. 32 So'in baa, halo aat baa dei! Kalolon emikaan bei uluk sia!

33 Emi ne'e aat hanesan samea mahoo raso. Emi haneo Na'i Maromak la kastikar emi ka? Keta haloon kedan! Nia nanis soe lerek emi baa ha'i naraka! 34 Rona! Ha'u atu ksolok Ha'ukaan ema sia atu nanorin emi no natudu Na'i Maromak dalan moris baa emi. Mais emi atu ho'o balu, no hedi mate balu baa ai karuus. Balu moos emi fota ho'at iha uma hamulak laran. Balu tenik, emi haloot to'o sia nalai nosi kota ida baa kota ida. 35 Uluk aan, emikaan bei uluk sia no'o ema moon sia hosi otas baa otas, nahuu nosi Habel to'o Sakarias, mak Bakaria oan. Sia no'o Sakarias nia iha Uma Hamulak Huun lalawar, kre'is baa sera fatin. Mais, tan emi kalolon emikaan bei uluk siakaan a'aat, emi moos musti hatiu hola raan nosi ema moon nia sia. 36 Tebes! Ha'ukaan dalen ne'e, tebes no loos! Emi mak moris baa oras ne'e, atu kona kastikar tan lia aat mak emikaan bei uluk sia nalo hori uluk nia.”

37 Hotu Yesus katak tenik na'ak, “Hoi ema Yerusalem sia! Emi ne'e mak ho'o hei-hein Maromak mako'an sia. Emi ne'e mak hodi fatuk tuda ho'o ema mak mai tulun emi. Dala wa'in ti'an Ha'u atu klibur kodi lituk emi kosi aat, hanesan manu inan taka nola oan nodi liras. Mais emi la ho'uk. 38 Tan lia nia, Na'i Maromak la nikir tenik emikaan uma. Awan-wainrua, uma nia atu mamuk ona. 39 Rona! Emi la haree Ha'u tenik ona, to'o oras emi katak sain ha'ak, ‘Ita husu nebee Na'i Maromak natuun matak-malirin baa Ema ne'e, tan Na'i Maromak mak solok Nia.’ Emi katak sain nunia lai, foin bele haree hikar Ha'u.”