2 Noo sondadu ulun Roma ida iha nebaa. Niakaan ema serwisu ida mak nia fiar, moras todan kre'is mate. 3 Sondadu ulun nia rona nola lia Yesus, hotu nia solok fukun Yahudi na'in hira atu baa nusu Yesus nebee mai nadi'ak nola niakaan ema nia. 4 Sia to'o mai ti'an, sia nakro'an nebee Yesus mai no sia. Sia katak na'ak, “Ama! Ema Roma nia, ema di'ak! Fatan Ama tulun nia. 5 Nia nariik uma hamulak ida bodik ita, tan nadomi ita ema Yahudi.” 6 Rona nola nunia, Yesus moos baa no sia.

Sia sei la to'o dauk, ulun nia solok mamaluk mai nasoru Yesus nodi katak na'ak, “Ama Boot lalika hakole aan, tan ha'u la kfatan simu Ama iha ha'ukaan uma. 7-8 Ha'u moos la fatan mai kasoru Ama, tan katene malorek Ama noo beran. Surak Ama dale hosi ne'e dei, ha'ukaan ema serwisu di'ak kedan. Ha'u katene lia ne'e, tan ha'ukaan ulun sia noo beran naruka ha'u. Ha'u moos koo beran karuka ha'ukaan sondadu sia. Kalo karuka sasi'an ka'ak, ‘Baa nebaa!’ nia nanis baa. Kalo ka'ak, ‘Mai ne'e!’ nia nanis mai. Kalo karuka ha'ukaan ema serwisu ka'ak, ‘Serwisu ne'e!’ nia nanis nalo. Dadi surak Ama dale dei, ha'ukaan ema moras, di'ak kedan.”

9 Rona nola nunia, Yesus blaar. Hotu Nia feur oin baa ema mak tuir no Nia sia. Nia katak na'ak, “Ha'u kblaar! Hori wain ti'an Ha'u la kasoru dauk ema Yahudi ida mak fiar biit nu'u ema Roma ne'e!”

10 Dale notu nunia, Yesus la'o to'o nia dei. Sondadu ulun mamaluk sia moos fila. Oras sia to'o ulun uman baa, sia naree ema moras nia di'ak ti'an.

11 Baa awan, Yesus no maktuir sia baa leo ida, naran Nain. Ema wa'in la'o bele-bele no sia.

12 Kre'is baa leo nanokar, ema lolok ida sai baa nakoi maten. Maten nia, feto faluk ida oan mane mesak. 13 Naree feto faluk nia, Yesus neon monu. Hotu Nia katak baa na'ak, “Ina! To'o ona, lalika tanis!”

14 Hotu Yesus nare'is aan baa, lolo liman koko ai balun maten nia. Ema matiu ai balun moos nanawa la'o. Hotu Yesus dale baa maten nia na'ak, “Manek! Madeer ona!” 15 Oras nia moos, oa nia moris nikar. Nia nadeer kedas, hotu tuur nodi dale no ema iha nia sia. Hotu Yesus katak baa inan na'ak, “Ina! Ne'e, okaan oan.”

16 Ema iha nia sia hotu-hotu nata'uk liu! Sia moos tonu-naboot Na'i Maromak na'ak, “Na'i Maromak namaan aan mai ti'an iha itakaan klaran! Nia solok ti'an Niakaan mako'an maka'as ida baa ita!” 17 Hotu lia nia keke lema fatin hotu-hotu iha rai Yudea, to'o rai seluk sia.

18-20 Baa oras nia, Yohanis niakaan maktuir sia moos rona lia Yesus. Hotu sia baa nasara Yohanis iha bui laran. Rona nola lia Yesus nunia, Yohanis solok niakaan ema na'in rua baa nusu Yesus na'ak, “Ama ne'e, tebe-tebes Kristus mak ami hein ka, ami musti hein tenik ema seluk?”

Nasoru nola Yesus, Yohanis eman sia nusu nunia.

21 Baa oras sia mai nia, Yesus no'i nadi'ak nola ema moras oi-oik. Nia moos te'ur sai diabu nosi ema. No nadi'ak nola ema delek.

22 Yesus katak baa Yohanis eman sia na'ak, “Fila baa katak Mau Yohanis ma'ak, hotu-hotu mak emi rona no emi haree du'uk nia, dadi tuir saa mak Maromak mako'an Yesaya nakerek nela kedan na'ak:

23 Fila baa, katak Mau Yohanis ha'ak, ‘Ema mak la moe simu Ha'u, atu netan sotir.’”

24 Rona nola nunia, Yohanis eman sia moos fila. Hotu Yesus katak baa ema wa'in nia sia lia nosi Yohanis na'ak, “Uluk emi buka Yohanis iha fatin fuik nebaa, emi hanoin emi atu hasoru ho ema ilas oin nu'u saa? Nanis emi la buka ema mak naweruk aan, nu'u au mak anin nuu. 25 Nanis emi la buka ema mak tau tais kabaas, tan ema nunia iha tofatik dei! 26 Uluk nia, emi baa buka see? Emi buka Maromak mako'an ka? Tebes! Yohanis nia, mako'an maka'as basuk. 27 Iha Hakerek Moon noo lia nosi Yohanis na'ak:

28 Iha raiklaran ne'e, la noo ema ida moos mak boot liu Yohanis. Mais iha Na'i Maromak fohorai, ema mak ki'ik basuk dei moos, boot liu Yohanis.”

29 Ema mak rona Yesus dalen nia, sia simu, tan sia natene ti'an na'ak, Na'i Maromak dalan nia, loos no tebes. Sia simu nunia, tan uluk Yohanis sarani sia no nanorin sia. Ema maksisi bea sia moos simu nunia. 30 Mais ema nosi partee Farisi no ema manorik ukun Yahudi sia, la simu. Uluk sia moos la no'uk Yohanis sarani sia.^c

31 Hotu Yesus nusu na'ak, “Ha'u atu katete ema raiklaran oras ne'e baa saa? Sia ema oin nu'u saa? 32 Nune'e. Sia hanesan lawarik mak na'i tu-tuur iha dalan. Sia nahii baa malu na'ak,

33 Uluk Yohanis Mak Sarani Ema sei iha emikaan klaran. Nia nalirin aan no la nemu anggor ween. Mais emi hasalak nia ha'ak, ‘Diabu tekar!’ 34 Mais Ha'u ne'e, Ema Raiklaran Isin kosi lale'an. Loron-kalan Ha'u kaa tubi no kemu anggor ween. Emi moos hasalak Ha'u ha'ak, ‘Rotus teen! Lanuk teen! Nia nadulur no maksisi bea sia! Nia partee ida no ema mak la noo folin sia! Nia la natene aan!’ 35 Tebes! Emi hasalak Ha'u nunia. Mais hatadan Ha'ukaan dalen ne'e! Ema mak natene tebes Na'i Maromak, sia mak moris tuir Maromak dalan.”

36 Iha kota nia, noo ema Farisi ida naran Simon. Dala ida, nia namata Yesus sia mai niakaan uma. Simu nola hamata nia, Yesus sia baa. To'o baa, ema naliku sia tuur naa.

37 Oras nia, feto aat ida rona Yesus atu naa iha Simon uma nia. Feto nia moos mai, kaer nodi botir ida nahisi no mina morin folin todan.^d 38 Nia nare'is aan baa Yesus nosi kotuk. Hotu nia nakni'a iha Yesus ain. Nia tanis nade'un aan, to'o luun turu kona Yesus ain. Nia no'as Yesus ain nodi fuuk du'uk, hotu de'i Yesus ain. Hotu nia fui mina morin nia baa Yesus ain.^e

39 Simon natene feto nia tuur-hariik. Nia naneo na'ak, “Hahalok ne'e dadi kakaer ti'an na'ak, Yesus ne'e lahoos Maromak mako'an. Kalo tebe-tebes Maromak mak solok Nia, nanis Nia natene feto mak roos aan baa Nia ne'e, feto aat. Maromak mako'an lahoos nu'u Nia ne'e, tan ema moos la bele nare'is aan baa ema sasobos!”

40 Mais Yesus natene Simon neon. Nia dale baa Simon na'ak, “Mau Simon! Ha'u atu katak lia ida baa mau nune'e.”

Simon nataa na'ak, “Di'ak, Ama! Katak baa dei.”

41 Hotu Yesus soe lia na'ak, “Noo ema ida mak buka moris nodi foo tusan osan baa ema seluk. Dala ida, nia foo tusan bodik ema na'in rua. Bodik ida, nia foo murak mutin atus lima. Bodik ida seluk, lima nulu. 42 To'o oras foo fila, sia rua la bele selu. Mais makfoo tusan nia, neon monu baa sia rua. Hotu nia no'as siakaan tusan. Oras ne'e, Ha'u atu kusu nune'e: tuir mau, nosi ema na'in rua nia, nabee mak nadomi liu ema makfoo tusan?”

43 Simon nataa kedan na'ak, “Nanis, mak natusan boot kaliuk!”

Yesus nataa nikar na'ak, “Kona, mau!”

44 Hotu Yesus mana nikar baa feto nia, nodi katak baa Simon na'ak, “Mau Simon, titu feto ne'e. Hori ohin nia nakni'a iha ne'e. Oras ha'u ktama mai mau uman, mau la nadi'a wee atu fasi Ha'ukaan ain tuir itakaan adat. Mais feto ne'e nabotes Ha'ukaan ain nodi luun, hotu no'as namara nodi fuuk. 45 Ohin nia moos, Ha'u ktama mau uman, mau la de'i Ha'u tuir itakaan adat. Mais nahuu nosi Ha'u ktama baa uma ne'e laran, feto ne'e la nanawa de'i Ha'ukaan ain. 46 Mau moos nalu'a adat fui mina baa bainaka ulun. Mais feto ne'e fui mina morin mak folin todan kaliuk baa Ha'ukaan ain. 47 Rona mai, mau! Feto ne'e noo sala wa'in tebes. Mais Na'i Maromak kasu mohu ti'an, tan nia natudu dadomin wa'in baa Ha'u. Ema mak la noo sala wa'in, la natudu dadomin wa'in nunia baa Ha'u.”

48 Dale hotu nunia, Yesus katak baa feto nia na'ak, “Ha'u kasu mohu okaan salan sia ti'an!”

49 Rona nola Yesus dalen nia, ema mak tuur naa bele-bele iha nia namaas baa malu na'ak, “Hoi! Nia naneo na'ak, Nia ne'e, see?! Nia naberan aan kasu ema salan! Tuir loos, Maromak mesan dei mak noo beran kasu mohu ema salan! Lalika hanono!”

50 Mais Yesus katak baa feto nia na'ak, “Tan o fiar ti'an, Na'i Maromak sori o ti'an. Fila ona modi dame!”