Yesus foo lia hatetek nosi fini mak monu baa rai oi-oik
4
Baa loron ida, Yesus fila baa debu boot Galilea. Ema wa'in moos mai kabuun nola Nia. Hotu, Nia sa'e baa bero ida mak nanawa iha nia, nebee ema hotu-hotu iha rai bele rona Nia. 2 Nia nanorin lia wa'in baa sia, nodi lia hatetek na'ak,a3 “Rona di'a-di'ak! Noo ema mahalo to'os ida baa kari fini iha to'os. 4 Baa oras kari, fini balu monu baa dalan. Hotu, manu ai leten sia mai tutu nola mohu. 5 Fini balu monu baa rai fatuk. Fini nia sia tubu lai-lais tan kona rai isin ni'is. 6 Mais oras loro kona, tubun nia naklaik hotu mate, tan abut la tama le'an.
7 Fini balu tenik, monu baa ai tarak laran. Fini nia sia tubu buras, mais ai tarak neti nola to'o la nafua. 8 Fini balu tenik, monu baa rai isin. Fini nia sia tubu to'o boot no nafua wa'in. Oras ku'u, balu foo nikar folin to'o isin tolu nulu, balu to'o isin neen nulu, balu tenik to'o isin atus ida.
9 See mak noo tilun, rona di'a-di'ak!”
Tan saa Yesus dale nodi lia hatetek?
10 Baa oras Yesus tuur mesan, Niakaan maktuir na'in sanulu resin rua no ema seluk mak rona ti'an lia hatetek nosi fini nia, sia mai nusu lia nia isin baa Yesus. 11 Yesus nataa na'ak, “Tan emi ne'e beer hatene tebe-tebes Na'i Maromak ukun, Ha'u kloke malorek lia hatetek nia isin baa emi. Mais kalo ema seluk mak la no'uk natene, Ha'u kanorin kodi lia hatetek dei. 12 Maromak mako'an ida nakerek nela kedan kona baa ema hanesan sia na'ak:
‘Sia naree ti'an, mais la no'uk natene.
Sia rona ti'an, mais la no'uk rai baa neon.
Dadi habusik baa, nebee sia lalika fiar baa Na'i Maromak,
nebee Na'i Maromak moos lalika kasu siakaan salan.’”b
Yesus nalore lia isin nosi lia hatetek fini nia
13 Hotu, Yesus katak tenik na'ak, “Kalo emi sei la kohi dauk lia hatetek nia isin, nunabee tenik baa lia hatetek seluk sia? 14 Nune'e: Ema mak kari fini nia, hanesan ema mak katak keke Na'i Maromak Manfatin. 15 Fini mak monu baa dalan nia, mak manu ai leten tutu nola, hanesan ema mak rona Na'i Maromak Manfatin, mais nia la rai di'a-di'ak baa neon. Hotu, diabu ulun mai foti nola. 16 Fini mak monu baa rai fatuk, hanesan ema mak rona ti'an Na'i Maromak Manfatin, hotu nia simu di'a-di'ak nodi neon no laran. 17 Mais Manfatin nia la nahabut, tan ema nia la rai di'a-di'ak baa neon. Baa oras ema seluk nasusar nia tan nia simu Manfatin nia, nia nata'uk, to'o nabusik nela Manfatin nia. 18 Fini mak monu baa ai tarak laran, hanesan ema mak rona nola Manfatin nia, 19 mais nia nalai baa-mai buka soi no moris furak, to'o nalu'a Manfatin nia. 20 Mais fini mak monu baa rai isin, hanesan ema mak ta'an tilun nodi simu Manfatin nia. Hotu, nia moris tuir Na'i Maromak hakaran. Nia moos nalo lia di'ak, hanesan fini mak nafua wa'in, to'o isin tolu nulu, isin neen nulu, no isin atus ida.”
Keta taka badut hodi hanek
21 Hotu, Yesus nanorin natutan tenik nosi bero nia, nodi lia hatetek ida seluk na'ak, “Kalo ita sunu badut, ita taka hodi hanek ka? Lale, ita rai iha koi ohak ka? Lale! Kalo nunia, badut nanis la nakroma ona. Ita rai baa fatin aas, nebee laka naroma fatin nia.c 22 Nunia moos, lia hotu-hotu mak sei nakfunin baa oras ne'e, atu naksain. Lia hotu-hotu mak ema sei la hatene baa oras ne'e, ema atu natene.d 23 See mak no tilun, rona di'a-di'ak!”
24 Hotu, Yesus katak tenik na'ak, “Hanoin di'a-di'ak lia ne'e! Kalo emi sukat ema seluk, ema moos sukat fila emi. Na'i Maromak moos atu sukat emi. Mais Niakaan sasukat, todan liu tenik.e
25 Ema mak beer tebe-tebes atu natene Na'i Maromak hakaran, nia hetak natene. Mais ema mak la no'uk natene Na'i Maromak hakaran, nia hetak beik.”f
Yesus foo lia hatetek nosi fini mak tubu du'uk
26 Hotu, Yesus nalore tenik na'ak, “Na'i Maromak hutun-renun hanesan fini mak ema kari iha to'os laran. 27 Kari hotu, ema nia fila nikar, toba-nadeer, la nanoin tenik fini nia. Masik nunia moos, fini nia tubu du'uk to'o boot. 28 Hotu nataha, nasorun, nafuna, nafua, to'o noo isin. 29 Oras naktuuk ti'an, foin ema nia mai ku'u. Nunia moos Na'i Maromak hutun-renun sia. Sia moris tan Na'i Maromak mak foo moris baa sia. Lahoos ema raiklaran.”g
Yesus foo lia hatetek nosi fini mak ki'ik oan basuk
30 Hotu, Yesus katak tenik na'ak, “Ha'u tu'an tenik lia hatetek ida, nebee emi bele hatene oin nunabee Na'i Maromak dadi Na'in bodik ema lear. Uluk fohon, Na'i Maromak renun na'in hira dei, mais kleu-leur hetak wa'in tu'an. 31 Sia nahuu hanesan ai fuan musan mak ki'ik oan basuk.h 32 Mais kalo kuda baa rai ti'an, nia moris dadi ai huun boot, to'o manu ai leten mai rani baa, no nalo knuuk iha sorun.”
33 Hodi nunia, Yesus nanorin ema tuir siakaan babelen. 34 Kalo nanorin ema wa'in, Nia nodi lia hatetek dei. Mais kalo nanorin Niakaan maktuir sia du'uk, Nia nalore lia hatetek isin sia hotu-hotu.
Yesus nakahik anin dadurus
35 Yesus nanorin ema nia sia nosi bero nia, to'o loro malirin. Hotu, Nia tene Niakaan maktuir sia na'ak, “Mai ita baa balu baa.”
36 Rona nola nunia, Niakaan maktuir sia sa'e tuir baa bero. Hotu, sia la'o nela ema wa'in nia, mais ema balu tuir nodi bero seluk. 37-38 Baa oras la'o, Yesus toba luni kluni to'o dukur iha bero ikun. La kleur, anin dadurus mai. Laloran moos basak natama wee baa bero laran, to'o kre'is nakonu. Yesus Niakaan maktuir sia nata'uk tebes. Hotu, sia fu'a nadeer Nia na'ak, “Ama! Madeer lai! Ama la madomi ami ka?! Ita atu mate mout ona!”
39 Rona nola nunia, Yesus nadeer, hotu nakahik anin nia na'ak, “Makmatek!” Nia moos naruka debu boot nia na'ak, “Noo-nook ona!” Hotu, anin nia nanawa kedas. Nunia moos, laloran iha debu nia nakmatek kedas. 40 Hotu Yesus nasee Niakaan maktuir sia na'ak, “Tan saa emi hata'uk nunia? Emi sei la fiar baa Ha'u ka?”
41 Mais sia hotu-hotu nata'uk no blaar. Sia namaas baa malu na'ak, “Nia ne'e see? To'o anin no laloran moos rona baa Nia!”