Yesus te'ur sai diabu lear nosi ema bulak ida
5
Hotu, Yesus no Niakaan maktuir sia to'o debu Galilea balu baa, iha fatin ida naran Gerasa. 2-6 Iha nia, noo mane ida mak diabu tekar to'o bula. Nia nein iha rate sia. Loron-kalan nia nakwalan dei, sa'e-tuun foho nodi nahii nahutan karin. Nia nitak aan nodi fatuk, to'o isin lolon kanek mohu. Nia biit tebes, to'o ema la bele kesi nola nia. Ema kesi rua-ruan niakaan ain-liman nodi besi talik, mais nia nasiit nosi liman, no natohar nosi ain. Nia biit resik, to'o la noo ema ida mak bele namaus nola. Baa oras Yesus no Niakaan maktuir sia tuun nosi bero, sama ain baa rai maran, ema bulak nia naree sia nosi dook. Hotu, nia nalai sai nosi rate baa Yesus. To'o baa, nia nakni'a iha Yesus oin. 7-8 Naree nola nunia, Yesus naruka na'ak, “Hoi! Diabu aat! Sai mela ema ne'e ona!”
Hotu, ema nia nahii maka'as na'ak, “Hoi! Ita Boot atu halo saa baa ha'u?! Ha'u katene Ita Boot ne'e Yesus, mak Na'i Maromak Boot Kaliuk Oan. Ha'u kaloon nebee Ita Boot keta hasusar ha'u.”
9 Hotu, Yesus nakusuk nia na'ak, “O naran see?”
Ema nia nataa na'ak, “Ha'u naran Legion, tan ami ne'e wa'in lear, hanesan sondadu klibur boot ida!”
10 Hotu, diabu nodi ema nia atu nakro'an nebee Yesus keta naruka sia sai nosi rai nia.
11 Kre'is baa nia, ema na'in hira no'i daka fahi lear mak buka haan iha foho leten. Sura fahi nia sia hotu-hotu, bele tama matan rihun rua. 12 Diabu sia nakro'an baa Yesus na'ak, “Ita Boot haruka ami tama baa fahi nia sia dei.”
13 Rona nola nunia, Yesus moos no'uk. Hotu, diabu sia nalai sai nela ema nia, tama kedan baa fahi nia sia. Fahi nia sia hotu-hotu bula karin, nalai lakon tuun nosi foho nia, tama baa debu boot laran. Hotu, mate mout.
14 Titu-naree nunia, ema makdaka fahi nia sia nata'uk tebes. Sia nalai baa katak ema sura leo. Rona sia dale nunia, ema lear nalai sai mai atu naree saa mak dadi nia. 15 Sia baa nasoru Yesus, hotu naree ema mak diabu tekar nia no'i tuur iha nia. Nia di'ak nikar no tau tais ti'an. Naree nunia, sia nata'uk hotu, tan sia natene nanis, see mak bele te'ur sai diabu nosi ema nia, maka'as tebes. 16 Hotu, sia baa katak lema rai na'ak, sia naree du'uk ema bulak nia di'ak ti'an, no fahi nia sia moos mate mout ti'an. 17 Sia moos nakro'an, nebee Yesus sai nela rai nia.
18 Oras Yesus sa'e baa bero, ema bulak ohin nia nakro'an atu tuir no Yesus.
19 Mais, Yesus la no'uk. Nia katak na'ak, “Di'ak liu o fila mikar, baa masara okaan familin sia nosi lia mak Na'i Maromak nalo ti'an baa o. O moos katak ma'ak, Na'i Maromak nadomi tebes o.”
20 Hotu, ema nia baa la'o lema rai ida mak noo leo sanulu, mak ema nanaran na'ak, ‘Dekapolis’. Nia katak saa mak Yesus nalo ti'an baa nia. Rona nola nunia, ema hotu-hotu blaar nodi na'ak, “Maka'as tebes!”
Yesus nalo Yairus oan moris nikar no nadi'ak nola feto ida mak moras
21 Hotu, Yesus no maktuir sia sa'e bero, fila nikar debu boot balu baa. Oras sia tuun, ema wa'in mai baa Yesus. 22 Iha nia noo ema ida naran Yairus. Nia, mak ema uma hamulak ulun iha leo nia. Oras naree Yesus, nia mai nakni'a iha Yesus oin, 23 nodi nakro'an na'ak, “Ama, tulun lai! Ha'ukaan oan feto moras todan atu mate. Niakaan otas foin tinan sanulu resin rua. Kalo bele, Ama tulun ha'u. Mai iha ha'ukaan uma, madi'ak mola nia lai.”a
24 Rona nola nunia, Yesus tuir kedas baa Yairus uman.
Mais oras sia atu la'o, ema wa'in moos tuir, to'o sia sesu malu oin-kotuk no karuk-kwana.
25 Iha ema wa'in nia klaran, noo feto ida. Tinan sanulu resin rua ti'an, nia netan fulan mak la nanawa tuir loos. 26 Nia namohu niakaan osan no sasoin hotu-hotu, nodi selu makdook sia, nebee nadi'ak nola nia. Mais, la noo makdook ida mak bele nadi'ak nola nia. Niakaan moras nia, hetak kleur, hetak tu'an. 27-29 Nia rona ti'an lia wa'in nosi Yesus. Tan lia nia, nia naka'as aan iha ema wa'in klaran, atu bele to'o baa Yesus nosi kotuk. Nia naneo na'ak, “Surak ha'u koko Niakaan faru dei, nanis ha'u di'ak!”
Oras nia koko lerek Yesus farun, laku matan dei, niakaan moras nanawa kedas. Nia noran di'ak tebes. 30 Oras nia moos, Yesus noran beran sai. Tan baa nia, Nia titu fila baa ema wa'in nia nodi nusu na'ak, “See mak koko Ha'ukaan faru?”
31 Mais Niakaan maktuir sia nataa na'ak, “Ama! Ama maree du'uk baa. Ema lear sesu malu nune'e. Oin nunabee, ita bele hatene see?”
32 Mais Yesus titu baa-mai atu nodi natene see mak koko farun. 33 Rona nola Yesus nusu nunia, feto nia nata'uk tebe-tebes. Hotu, nia nakni'a iha Yesus oin nodi naberan aan katak na'ak, “Ama! Ha'u mak koko Ita Boot farun!”
34 Yesus moos nataa na'ak, “Tan ina fiar tebe-tebes baa Ha'u, ina di'ak ti'an. Oras ne'e, ina fila baa uma ona modi neon di'ak.”
35 Yesus sei dale nunia, ema ida mai nosi Yairus uman nodi katak na'ak, “Aikee! Ama oan mate ti'an. Lalika makole Ama Boot ona.”
36 Mais Yesus la titu dalen nia. Nia katak baa Yairus na'ak, “Keta mata'uk! Fiar baa dei.” 37 Hotu, Yesus la'o nela Niakaan maktuir rumak sia, nodi mesan Petrus, Yakobus, no Yohanis liu baa. 38 Oras to'o Yairus uman baa, sia naree ema nalai baa-mai, no rona ema tanis nakrake. 39 Hotu, Yesus tama liu baa uma laran, nusu baa ema nia sia na'ak, “Tan saa emi hasusar aan hodi tanis nunia? Oa ne'e la mate. Nia toba dei.”
40 Rona nola Yesus dale nunia, sia nanasa Nia.
Mais Yesus naruka sia sai hotu. Nia bolu nola maktuir na'in tolu nia, no oa nia inan-aman, tama baa ke'an laran. 41 Yesus kaer oa nia liman, hotu katak nodi siakaan lian na'ak, “Talita kum!” Ne'e na'ak, “Bete! Madeer ona!”
42-43 Laku matan dei, oa nia nadeer nodi la'o kedas. Hotu, Yesus naruka oa nia inan na'ak, “Mahaan nia lai!”
Ema hotu-hotu mak naree, blaar karin. Mais Yesus nakahik sia na'ak, “Keta hasara baa ema, ha'ak Ha'u mak kalo nia moris nikar!”