Yesus foo lia hatetek nosi ema mak kari fini iha rai oi-oik
13
Baa loron nia moos, Yesus sai nosi uma nia, baa tuur iha debu Galilea tehen. 2 Ema lear moos mai kabuun nola Nia. Naree nunia, Nia sa'e baa bero ida mak nanawa iha nia, nebee ema hotu-hotu iha rai leten bele rona Niakaan hanorin.a 3 Oras nia, Nia nanorin lia wa'in nodi lia hatetek. Nia foti lia na'ak, “Noo ema mahalo to'os ida. Nia baa kari fini iha to'os. 4 Baa oras kari, fini balu monu baa dalan. Hotu manu ai leten sia mai tutu nola fini nia notu. 5 Fini balu monu baa rai fatuk. Fini nia tubu lais, tan kona rai ni'is. 6 Mais baa oras loro manas, tubun nia naklaik to'o mate maran tan abut tama la le'an. 7 Fini balu monu baa ai tarak laran. Ai tarak nia nabit no'o fini tubun sia. 8 Mais fini balu tenik monu baa rai isin. Sia tubu, hotu boot to'o nafua. Balu foo nikar folin to'o isin tolu nulu, balu to'o isin neen nulu, balu tenik to'o isin atus ida.9 See mak noo tilun, rona di'a-di'ak!”
Yesus nalore tan saa Nia nanorin nodi lia hatetek
10 Nunia hotu, Yesus Niakaan maktuir sia mai nusu na'ak, “Tan saa Ama nanorin ema nia sia nodi lia hatetek?”
11 Yesus nataa na'ak, “Emi ne'e beer hatene tebe-tebes Na'i Maromak ukun. Tan lia nia, Ha'u kloke malorek lia hatetek nia isin baa emi. Mais, kalo ema seluk, Ha'u kanorin kodi lia hatetek dei. 12 Ema mak buka atu natene tebe-tebes Na'i Maromak Niakaan beer, nia hetak natene. Mais ema mak la nanono baa Na'i Maromak Niakaan beer, nia hetak beik.b 13 Ha'u kanorin sia kodi lia hatetek nunia tan:
‘Sia naree ti'an,
mais la no'uk tolan.
Sia rona ti'an,
mais la no'uk natene.’
14 Sia nia hanesan ema mak Maromak mako'an Yesaya nakerek kedan na'ak,
‘Emi atu rona,
mais emi la ho'uk tolan.
Emi atu haree,
mais emi la ho'uk hatene saa mak dadi ti'an.
15 Ema ne'e sia, neon monas.
Sia nadiuk tilun.
Sia nadelek matan.
Habusik baa, nebee siakaan tilun diuk nunia dei,
Habusik baa, nebee siakaan matan delek nunia dei.
Nebee Ha'u lalika kadi'ak sia,
tan sia la nikir Ha'u.’c
16 Mais emi ne'e, sotir tebes tan haree ti'an hodi matan du'uk, no rona ti'an hodi tilun du'uk. 17 Rona! Ha'ukaan dalen ne'e, tebes no loos! Uluk aan, Maromak mako'an no ema neon loos sia beer atu naree saa mak emi haree ti'an ne'e, mais la bele. Sia moos beer atu rona saa mak emi rona ti'an ne'e, mais la bele.”d
Yesus nalore lia hatetek nosi fini
18 Dale notu nunia, Yesus katak baa sia na'ak, “Tan emi beer hatene Na'i Maromak ukun, hanono di'a-di'ak lia hatetek nia isin. 19 Fini mak monu baa dalan, hanesan ema mak rona Manfatin nosi lia Na'i Maromak kaer ukun, mais la tolan tebe-tebes. Hotu diabu ulun mai nadau nola Manfatin nia nosi neon. 20 Fini mak monu baa rai fatuk, hanesan ema mak rona Na'i Maromak Manfatin, hotu simu nodi neon di'ak. 21 Mais Manfatin nia la nahabut, tan ema nia la rai iha neon. Baa oras ema seluk nasusar nia tan nia simu Manfatin nia, nia nabusik nela kedan. 22 Fini mak monu iha ai tarak laran, hanesan ema mak rona nola Manfatin nia. Mais, tan nia nalau aan nodi lisan oi-oik atu moris furak, nia sesu sai Manfatin nia nosi neon, to'o la no folin ti'an. 23 Mais fini mak monu baa rai isin, hanesan ema mak simu Na'i Maromak Manfatin, hotu nalo tuir Niakaan beer. Nia nalo lia di'ak, hanesan fini mak nafua wa'in to'o isin tolu nulu, isin neen nulu, no isin atus ida.”
Yesus foo lia hatetek hae iha to'os laran
24 Hotu Yesus katak tenik lia hatetek ida na'ak, “Na'i Maromak babilan renun nune'e. Noo ema ida kari fini iha to'os. 25 Baa kalan, nia toba dukur bele-bele no niakaan ema serwisu sia. Hatene hodi baa, ema aat mai kari fini hae fuik iha to'os nia. 26 Baa oras to'os nahuu nasai isin, ema serwisu naree nola hae fuik moos tubu iha nia. 27 Hotu sia baa katak to'os na'in na'ak, ‘Ama boot! Hori hirak nia ama kuda fini di'ak iha to'os. Tan saa oras ne'e hae wa'in mak tubu?’
28 Ulun nia nataa na'ak, ‘Nia, funu niakaan hahalok.’
Hotu niakaan ema serwisu katak na'ak, ‘Ama boot, ami baa hafaho mohu hae nia sia ka?’
29 Mais ulun nataa na'ak, ‘Keta! Tan oras emi hafaho hae nia sia, itakaan ai horis di'ak sia moos nakfokit tuir. 30 Habusik baa, nebee sia tubu bele-bele. To'o oras ku'u, foin ha'u katak baa ema maku'u sia ka'ak, “Libur uluk hae fuik nia sia. Hotu kesi hola, sunu mohu. Foin libur hola to'os isin di'ak sia, hatama baa kanaha uman.’””
Yesus foo lia hatetek ai fuan musan ki'ik
31 Hotu Yesus dale tenik na'ak, “Ha'u ktu'an tenik lia hatetek ida, nebee emi bele hatene oin nunabee Na'i Maromak renun tu'an wa'in. Uluk fohon, Na'i Maromak renun na'in hira dei, hanesan ai fuan musan ki'ik oan mak ema kuda iha to'os.e 32 Masik ai fuan nia musan ki'ik oan basuk, kalo moris mai ti'an, nia dadi ai huun mak boot kaliuk iha to'os nia. To'o manu ai leten sia moos mai nalo knuuk iha sorun.”
Yesus foo lia hatetek tua teen tubi
33 Hotu Yesus tu'an tenik lia hatetek ida na'ak, “Na'i Maromak renun moos hanesan tua teen mak ema kahur baa tubi rahun. Tubi rahun nia sa'e to'o boot, tan tua teen mak oan basuk nia.”
Yesus nodi lia hatetek, nanorin lia foun sia mak ema sei la rona dauk
34 Oras nia, Yesus nanorin ema lear nodi lia hatetek oi-oik nunia. Nia la nodi lia seluk, mais nodi loos lia hatetek dei. 35 Nia nanorin nunia atu nato'o saa mak Maromak mako'an nakerek kedan hori uluk na'ak,
“Ha'u atu kanorin kodi lia hatetek.
Ha'u atu katak lia sia mak ema sei la rona dauk,
nahuu hori Na'i Maromak nase'i raiklaran to'o oras ne'e.”f
Yesus nalore lia hatetek nosi hae fuik
36 Hotu Yesus la'o nela ema lear nia sia, fila baa uma. Niakaan maktuir sia moos mai nusu baa Nia na'ak, “Ama! Tulun malore lia hatetek hae fuik nia!”
37 Yesus nataa na'ak, “Ema mak kari fini di'ak nia, ne'e mak Ha'u, Ema Raiklaran Isin nosi lale'an. 38 To'os nia, mak raiklaran ne'e. Fini di'ak nia, mak Na'i Maromak eman. Hae fuik nia, mak diabu ulun eman sia. 39 Ema aat mak mai kari hae fini nia, mak diabu ulun du'uk. Oras ku'u to'os isin nia, mak oras rai falu fila. Ema maku'u to'os isin nia, mak Maromak Niakaan makbukar lale'an sia. 40 Baa loron rai falu fila, sia atu libur nola hae nia sia, hotu sunu mohu. 41 Ha'u ne'e, Ema Raiklaran Isin, mak atu solok makbukar lale'an sia mai. Sia atu baa libur nola ema hotu-hotu mak la tuir Na'i Maromak ukun. Sia moos libur nola ema hotu-hotu mak sokur ema seluk, nebee keta tuir Na'i Maromak ukun. 42 Hotu sia atu soe ema aat nia sia hotu-hotu baa ha'i naraka, hanesan hae mak kona sunu nia. Iha nia, sia noran susar tebe-tebes nodi tanis nade'un aan la nanawa. 43 Mais ema mak nalo tuir Na'i Maromak hakaran, sia atu nein nima-nimak no siakaan Ama Na'i iha lale'an. Iha nia, sia naksinak nakroma hanesan loro. Rona mai! Ema mak no'uk nanono baa Ha'u, ta'an tilun di'a-di'ak!”
Yesus foo lia hatetek nosi naha mahoo folin todan
44 Hotu Yesus tu'an tenik lia hatetek ida na'ak, “Ema mak nakara dadi Na'i Maromak eman, hanesan ema ida mak nakara nola sasoin mahoo folin todan. Noo ema ida mak netan nola sasoin mean-matak iha rai rohan ida. Naree nola ti'an, nia neon di'ak nodi nakoi nikar kedas. Hotu fila lai-lais, baa fa'an mohu niakaan sasoin hotu-hotu. Hotu nia mai sosa nola kedan rai rohan nia, nebee sasoin folin todan nia dadi niakaan.”
Yesus foo lia hatetek nosi fatuk mahoo matan mak folin todan
45 Hotu Yesus tu'an tenik na'ak, “Ema mak nakara dadi Na'i Maromak eman, sia moos hanesan ema makfa'an sa-saa ida mak nakara netan fatuk mahoo matan mak folin todan. 46 Baa oras nasoru fatuk mahoo matan mak di'ak basuk, nia fila lai-lais, baa fa'an mohu sasoin seluk sia hotu-hotu. Hotu nia mai sosa nola fatuk mahoo matan nia, nebee dadi baa niakaan.”
Yesus foo lia hatetek hili daitiha isin
47 Hotu Yesus tu'an tenik na'ak, “Na'i Maromak moos ukun fohorain hanesan lia ne'e. Noo ema maktuun tasi nodi daitiha ida baa tiha iha debu laran. 48 Daitiha nia nakonu ti'an, sia firi sa'e baa tasi tehen. Hotu sia tuur nili na'an tasi nosi daitiha nia. Na'an tasi mak di'ak, sia natama baa ko'e. Na'an tasi mak la di'ak, sia soe lerek. 49 Nunia moos baa oras rai falu fila. Maromak Niakaan makbukar lale'an sia atu mai fa'e salin ema aat no ema di'ak. 50 Sia soe ema aat sia hotu-hotu baa ha'i naraka. Iha nia, sia noran susar basuk nodi tanis la nanawa.”
Yesus nanorin nosi hanorin tuan no hanorin foun
51 Dale notu nunia, Yesus nusu baa sia na'ak, “Emi hatene lia hotu-hotu mak Ha'u kdale ti'an nia ka lale?”
Sia nataa na'ak, “Ami hatene, Ama Boot!”
52 Hotu Yesus nataa fila na'ak, “Di'ak! Lia nia nu'u ema manorik ukun ida mak natene tebe-tebes hanorin uluk aan nosi Hakerek Moon. Hotu nia moos simu tenik Ha'ukaan hanorin baa oras ne'e. Nia hanesan uma ida na'in mak loke niakaan tanasak atu lalore niakaan sasoin tuan bele-bele no sasoin foun.”
Ema Nasaret dudu sai Yesus
53 Yesus nanorin notu ema lear nodi lia hatetek, Nia moos la'o nela fatin nia 54 atu fila baa Niakaan leo. To'o baa, Nia tama baa uma hamulak atu nanorin ema. Ema hotu-hotu mak rona Nia, blaar tebe-tebes nodi dale baa malu na'ak, “Ema ne'e, matenek tebes! See mak nanorin nia? Oin nunabee to'o Nia bele nalo tadak blaar nia sia? 55 Tuir loos, Nia ne'e, badaen ai ida oan loos dei. Ita hatene Niakaan inan Maria, no niakaan alin sia, mak Yakobus, Yusuf, Yudas no Simon. 56 Ita moos hatene Niakaan alin feto sia tan ita hotu-hotu leo ida! Nia netan Niakaan matenek nia, nosi nabee tenik? Nia netan Niakaan beran maka'as nia, nosi see tenik?” 57 Tan baa nia, sia la no'uk rona baa Yesus tenik.