Yesus tama Yerusalem, ema wa'in simu Nia hanesan na'in boot
11
Hotu, Yesus sia la'o liu to'o kre'is Yerusalem. Sia nanawa sala-sala kre'is leo rua iha Foho Saituna tehen. Leo rua nia, ida naran Betfage, ida naran Betania. Iha nia, Yesus naruka Niakaan maktuir na'in rua baa uluk. 2 Nia katak na'ak, “Emi na'in rua baa uluk leo nebaa. Oras tama baa, emi atu haree kuda keledai oan matan ida mak ema kesi iha nia. Kuda keledai nia, ema sei la sa'e dauk. Baa kore hola hodi mai. 3 Kalo ema nusu na'ak, ‘Tan saa emi kore kuda keledai nia?’ emi musti hataa ha'ak, ‘Na'in atu sa'e. Sa'e notu, Nia solok fila kedan.’” 4 Rona nola nunia, maktuir na'in rua nia baa. To'o baa, sia netan kuda keledai oan nia, ema kesi iha dalan tehen. Sia moos kore nola, atu nodi baa Yesus. 5 Haree nunia, ema mak nariik iha nia sia nusu na'ak, “Tan saa emi kore hola ema niakaan kuda keledai nia?”
6 Sia moos nataa na'ak, “Na'in atu sa'e. Sa'e notu, Nia solok fila mai kedan.” Rona nola nunia, ema nia sia nabusik sia nodi baa. 7 To'o Yesus baa, sia nola tais nalo baa sela, taka baa kuda keledai nia. Hotu, Yesus sa'e baa.
8 Oras Yesus sia tama kota laran, ema wa'in moos nola siakaan tais, na'e baa dalan klaran. Balu baa taa nola beet tahanb iha dalan tehen, nodi baa, na'e keke iha dalan klaran. Nodi nafutar nunia, sia foo tadak na'ak, sia simu Yesus nodi kneter, hanesan sia simu na'in boot. 9 Ema nia sia balu la'o uluk Yesus, balu tenik nosi kotuk. Sia nahii bele-bele na'ak,
“Hosana! Ami tonu-haboot Na'i Maromak,c
tan Nia natuun matak-malirin baa Ema mak mai nodi Niakaan naran.d
10 Hosana! Ami tonu-haboot Na'i Maromak,
tan Nia atu nariik nikar Na'i Daud fohorain!
Hosana! Ami tonu-haboot Na'i Maromak,
tan Nia nabesi aan iha lale'an mak aas kaliuk!”
11 To'o kota laran, Yesus sia tama baa Uma Hamulak Huun. Iha Uma Hamulak Huun lalawar, Nia titu satan leur fatik nia. Mais, tan atu kalan ona, sia moos fila baa leo Betania.
Yesus nasee ai huun ida nebee keta nafua ona
12 Baa awan seisawan, Yesus sia sai nosi Betania, baa nikar Yerusalem. To'o dalan klaran, Yesus salaen. 13 Nia naree ai huun ida iha dalan tehen. Ai nia fuan ema bele naa.e Hotu, Yesus nare'is aan baa, atu naree kokon ai nia noo fuan ka lale. Mais, ai nia la no fuan, tan foin nataha. 14 Naree nunia, Yesus nasee ai nia na'ak, “Tan o la mafua bodik Ha'u, nahuu baa oras ne'e moos, o la mafua tenik bodik ema ona!”
Yesus Niakaan maktuir sia moos rona Nia nasee nunia.
Yesus tama baa Uma Hamulak Huun nodi sobu karin ema makfa'an iha nia
15 Yesus sia la'o liu to'o kota Yerusalem, hotu tama tenik baa Maromak Uma Hamulak Huun. Iha lalawar nia, noo ema mak fa'an manu lakateu sina mak ema nalo baa sera oras namulak. Titu-naree nunia, Yesus baa te'ur sai sia. Nia soe karin hadak mak ema nalo baa fatik taruka osan. Nia moos baku fila fatik mak ema nodi fa'an manu lakateu. 16 Nia moos badu ema hotu-hotu, nebee keta hodi siakaan naha sai-tama tesi tuir Uma Hamulak lalawar nia. 17 Hotu, Nia katak baa ema nia sia na'ak, “Hori uluk Maromak naruka Niakaan mako'an nakerek nela na'ak, ‘Ha'u kariik Ha'ukaan Uma, nebee ema raiklaran tomak bele mai namulak baa Ha'u iha nia!’ Emi hatene lia nia ti'an, mais emi sei halo luku Uma ne'e dadi baa ema na'ok nuuk!”f
18 Oras na'ilulik no manorik ukun Yahudi sia rona lia nosi Yesus Niakaan hahalok nia, sia hirus tebes. Sia buka dalan atu no'o Yesus, mais sia nakerat ema wa'in mak beer basuk Yesus Niakaan hanorin.
19 Kre'is loro monu, Yesus sia sai nela kota Yerusalem, fila baa toba iha Betania.
Kalo ita fiar metis baa Na'i Maromak, nanis Nia foo saa mak ita husu
20-21 Baa awan seisawan, Yesus sia fila nikar baa Yerusalem. To'o dalan klaran, sia la'o liu ai huun mak hori sehik Yesus nasee nia. Niakaan maktuir sia blaar, tan ai nia mate maran ti'an to'o abut. Petrus moos nanoin nola Yesus nasee hori sehik nia, hotu katak baa Yesus na'ak, “Ama Boot! Haree lai! Ai huun mak Ama nasai lian manas hori sehik nia, mate maran ti'an!”
22 Yesus nataa na'ak, “Tebes! Surak emi fiar baa Na'i Maromak. 23 Kalo emi fiar tebe-tebes, emi bele haruka foho ida nakfokit lori baa tasi. Nanis foho nia nakfokit lori baa tasi, surak emi fiar metis hodi neon no laran.g 24 Keta halu'a! Kalo emi hamulak hodi husu sa-saa baa Na'i Maromak, Nia nanis foo baa emi. Surak emi fiar tebe-tebes! 25 Mais baa oras hamulak, kalo ema ida nosi emi laran sei manas no ema seluk, musti baa di'ak hikar ho ema nia lai. Foin, emikaan Ama iha lale'an kasu mohu emikaan salan. 26 [Kalo emi rai hirus hodi la foo pardua baa ema, emikaan Ama iha lale'an moos la foo pardua baa emi.”]h i
Ema boot sia nalo lia nosi Yesus beran
27 Nunia hotu, Yesus sia la'o liu. To'o Yerusalem baa, sia tama nikar baa Uma Hamulak Huun. Baa oras tama baa lalawar, na'ilulik ulun sia no manorik ukun sia mai 28 nusu baa Yesus na'ak, “ Tan saa hori sehik O mai tokar lauk iha ne'e?! See mak naruka O?”
29 Mais Yesus natene sia buka Niakaan ain. Hotu, Nia nataa na'ak, “Ha'u moos kakara kusu lia ida baa emi. Emi hataa Ha'u lai, foin Ha'u kataa emi. 30 Ha'u kakara kusu nune'e: ita hotu-hotu hatene Yohanis nia mak sarani ema. See mak latan beran baa nia, nebee nia sarani ema? Na'i Maromak ka, ema raiklaran?”
31 Rona nola nunia, sia nanoin baa-mai. Hotu, sia kabuar lia fuan na'ak, “Adeei! Ita kona di'a ti'an! Kalo ita hataa ha'ak, ‘Na'i Maromak mak latan beran,’ Nia atu nataa nikar na'ak, ‘Kalo nunia, tan saa emi la fiar Yohanis?’ 32 Mais ita moos la bele hataa ha'ak, ‘Ema raiklaran mak latan beran’ keta arumak ema lear krakat ita, tan sia fiar na'ak, Yohanis nia, Maromak mako'an.”
33 Ko'a notu lia, sia nataa badak dei na'ak, “Ami la hatene!”
Yesus moos nataa nikar baa sia na'ak, “Kalo nunia, Ha'u moos la katak baa emi, see mak latan beran baa Ha'u.”