2 na'ak, “Hori hirak nia, O tokar lauk iha ne'e! See mak latan beran nia baa O? Katak kokon lai!”

3 Yesus nataa na'ak, “Ha'u kakara kusu lia ida lai, foin Ha'u kataa emi. 4 Nune'e: Ita hotu-hotu hatene Yohanis, ema nia mak sarani ema. See mak latan beran baa nia nebee sarani ema? Na'i Maromak ka, ema raiklaran? Emi ha'ak kokon!”

5 Rona nola nunia, sia ko'a lia baa-mai nodi dale na'ak, “Adeei! Ita tatalik ti'an. Kalo ita ha'ak, ‘Na'i Maromak mak latan beran,’ Nia atu nataa nikar na'ak, ‘Kalo nunia, tan saa emi la fiar Yohanis?’ 6 Mais ita moos la bele ha'ak, ‘Ema raiklaran mak latan beran,’ tan kalo ita ha'ak nunia, ema ne'e sia atu foti fatuk nitak no'o ita. Tan sia fiar na'ak, Yohanis nia, Maromak mako'an.” 7 Sia nanoin baa-mai nunia, hotu sia nataa Yesus na'ak, “Ami la hatene.”

8 Yesus moos nataa nikar na'ak, “Kalo nunia, Ha'u moos la ka'ak baa emi, see mak latan beran baa Ha'u.”

9 Hotu, Yesus dale baa ema lear iha nia nodi lia hatetek na'ak, “Noo ema ida mak nalo to'os anggor. Hotu nia seba to'os nia baa ema serwisu to'os, nebee sia fa'e to'os isin baa malu. Hotu to'os na'in lori baa rai seluk, nein kleu-leur iha nebaa.^a 10 To'o oras ku'u, to'os na'in naruka niakaan ema ain-liman ida baa simu niakaan fafa'ek. Mais ema mak serwisu to'os nia sia ta'e nahoras ema nia, hotu te'ur fila nodi liman mamuk. 11 Naree nunia, to'os na'in solok ema ain-liman ida seluk baa. Mais ema serwisu sia moos ta'e nahoras nodi namoe nia. Hotu sia te'ur fila tenik nodi liman mamuk. 12 Nunia hotu, to'os na'in solok tenik niakaan ema nomer tolu baa. Mais sia ta'e nakane nia, hotu soe sai.

13 Naree nunia, to'os na'in naneo na'ak, ‘Ha'u kmusti kalo nunabee tenik? Di'ak liu, ha'u ksolok ha'ukaan oan dadobe. Kalo ha'u ksolok nia, nanis sia simu no rona nia di'a-di'ak.’ Hotu, nia moos nakotu solok oan dadobe baa.

14 Mais baa oras ema serwisu sia titu-naree oan nia mai, sia dale baa malu na'ak, ‘Hoi, haree lai! Ama katuas solok oan du'uk mai ti'an. Nia ne'e mak atu simu katuas sasoin hotu-hotu. Di'ak liu ita ho'o nia, nebee hola to'os ne'e bodik ita.’ 15 Oan nia to'o baa, sia dada sai nia nosi to'os, hotu no'o.”

Dale notu nunia, Yesus nusu baa ema boot nia sia na'ak, “Oras ne'e, Ha'u atu kusu nune'e: To'os na'in nia atu nalo saa baa ema serwisu to'os nia sia? 16 Tuir Ha'u, nia nanis mai no'o mohu sia, hotu foo to'os nia baa ema seluk.”

Rona nola Yesus dale nunia, ema boot nia sia natene na'ak Yesus soe lia baa sia. Hotu sia nataa na'ak, “Kalo bele, keta to'o noo kastikar nunia!”

17 Mais Yesus natutuk maka'as sia, nodi nusu na'ak, “Kalo la noo kastikar nunia, tan saa Maromak mako'an nakerek nela kedan na'ak:

18 Rona di'a-di'ak. Ema mak nakloti kona fatuk nia, nanis netan kastikar. Mais kalo fatuk nia monu kona ema, ema nia netan kastikar todan liu tan.”

19 Rona nola nunia, manorik ukun no na'ilulik sia natene na'ak Yesus soe lia baa sia nodi lia hatetek nia. Sia manesak no ema serwisu to'os lisan aat sia no badaen mak soe fatuk nia. Tan baa nia, sia buka dalan atu kohi kedas Yesus. Mais sia nakerat baa ema lear mak beer Yesus hanorin. Hotu sia la'o nela Yesus.

20 Baa oras nia, ema mak funu Yesus buka dalan atu kohi Nia. Sia dale kabuar lia atu solok ema mak bele nalo aan nu'u ema matenek, atu baa nahonu Yesus. Sia nakara nebee Yesus sakar ukunrai Roma. Hodi nunia, sia bele nasa'e lia baa gubernur, nebee gubernur kohi Yesus. 21 Dale notu ti'an, sia solok ema baa nalo lia no Yesus. To'o baa, ema nia nasee Yesus na'ak, “Ama Boot! Ami hatene Ama neon loos. Ama la naktolek, no la fihir oin. Ama moos nanorin Maromak dalan moris nodi moon. 22 Oras ne'e, ami atu husu lia ida baa Ama nune'e: Tuir itakaan ukun-badu Yahudi, ita musti selu bea baa liurai Roma ka, lale?”

23 Yesus natene siakaan kakutak aat nia. Hotu nataa na'ak, 24 “Hatudu kokon osan murak tomak ida baa ha'u lai.” Hotu sia natudu osan baa. Yesus simu nola nodi leno di'a-di'ak, hotu nusu baa sia na'ak,“Ne'e, see niakaan oin? Ne'e, see niakaan naran?”

Sia nataa na'ak, “Nia, Keser, mak liurai Roma.”

25 Yesus moos katak na'ak, “Kalo nunia, foo baa ukunrai, saa mak ukunrai niakaan. Foo baa Maromak, saa mak Maromak Niakaan.”

26 Rona nola nunia, sia blaar karin, tan la bele nahonu Nia iha ema wa'in oin. Tan lia nia, sia taka ibun dei.

27 Nunia hotu, ema na'in hira nosi partee Saduki mai buka atu nahonu Yesus. Ema Saduki sia nanorin na'ak, loron ikus baa oras rai falu fila, ema mak mate ti'an, la moris nikar. Etuk, sia nalo lia no Yesus na'ak,^c

28 “Ama Boot! Ami husu Ama hanorin ami lia ne'e lai. Bei Musa nakerek nela baa ita ema Yahudi, ukun-badu ne'e na'ak: Kalo mane ida mate nela feen, mais la noo oan, niakaan alin musti nola feto faluk nia, nebee foo husar-binan baa niakaan maun mak mate ti'an nia.^d 29 Bei Musa nanorin uluk tebes nunia. Mais noo lia ida nune'e: Noo mane maun-alin na'in hitu. Mane ulun nola feto, hotu mate, mais la noo oan. 30 Hotu, alin mak tuir nia, nola nikar feto faluk nia. Mais la kleur, alin moos mate, la noo oan. 31 Nunia tenik, alin susu dala rua. Nia nola feto nia. Mais nia moos mate, la noo oan tenik. Nunia bei-beik to'o alin ikun moos mate. 32 Nosi ikus, feto faluk nia moos mate. 33 Oras ne'e, ami hakara husu Ama nune'e: Feto nia nala'e mane na'in hitu ti'an. Nosi ikus, baa oras rai falu fila, Na'i Maromak nalo ema maten sia moris nikar, feto nia dadi feen bodik mane mak nabee?”

34 Rona nola nunia, Yesus nataa na'ak, “Ema raiklaran nola malu iha raiklaran ne'e dei. 35-36 Iha lale'an, ema la nola malu tenik. Iha nebaa moos, sia la mate tenik. Tan sia dadi nu'u Maromak Niakaan makbukar lale'an sia ti'an. Baa oras Na'i Maromak nalo ema mak mate ti'an sia moris nikar, Nia moos boi nola sia, dadi baa Niakaan oan. 37 Ha'u moos kalore tenik kosi lia ema mak mate ti'an sia bele moris nikar ka, lale. Uluk aan, Bei Musa nakerek lia nosi ai huun ki'ik mak ha'i naa mais la namotuk. Baa oras ha'i naa ai huun nia, Bei Musa temi Na'i Maromak na'ak, ‘Ha'ukaan Bei Abraham, Bei Isak no Bei Yakob, siakaan Maromak. Sia hotu-hotu lo'u-sudur baa Na'i Maromak hori uluk to'o oras ne'e.’^e 38 Kalo ita leno lia nia, ita hatene ha'ak, baa oras Bei Musa dale nunia, bei nia sia mate kleur ti'an. Mais Bei Musa dale na'ak, sia sei lo'u-sudur baa Na'i Maromak. Lia nia na'ak, siakaan kmalar sei moris. Dadi, masik ema mate ti'an moos, bele moris nikar. Tan ema mak moris dei mak bele lo'u-sudur baa Na'i Maromak!”

39 Rona Yesus nataa nunia, manorik ukun na'in hira moos dale na'ak, “Ama Boot hataa nunia, kona basuk.” 40 Nahuu baa oras nia, la noo ema ida mak naksakar aan nusu tenik Yesus, tan la noo mak bele nahonu Nia.

41 Hotu, Yesus nanorin tenik ema iha Uma Hamulak Huun. Nia nusu fila sia na'ak, “Tuir emikaan hanoin, nunabee? Itakaan ema manorik sia nanorin na'ak, Kristus nia, Ema mak Na'i Maromak natudu hori uluk. Tuir sia, Nia dadi Na'i Daud husar-binan loos dei. Mais lia nia sei la to'o dauk. 42 Tan uluk Na'i Daud du'uk nakerek iha Kananuk laran na'ak,

44 Nosi hakerek nia, ita hatene Na'i Daud du'uk temi Kristus nia na'ak, ‘Na'i.’ Tan lia nia, ita bele hatene kalo ema na'ak Kristus nia, Na'i Daud husar-binan loos dei, lia nia sei la to'o dauk! Tan Nia moos Na'i Daud Na'in!”

45 Baa oras ema hotu-hotu ta'an tilun nanono Yesus, Nia moos dale baa Niakaan maktuir sia na'ak, 46 “Sintidu baa ema manorik ukun sia. Sia tau faru klobor dasa rai, nodi labu baa nasoru ema lear, nebee ema tonu sia na'ak, ema moon. Sia buka fatik kneter kaliuk iha uma hamulak, iha dahur, no iha ema lear oin. 47 Mais sintidu! Tan sia naktolek feto faluk to'o nadau nola siakaan uma. Mais iha ema lear oin, sia subar mate siakaan a'aat. Sia nariik nodi namulak to'o kleu-leur, tan nakara nebee ema tonu sia na'ak, ema moon. Mais Na'i Maromak natene siakaan a'aat. Nosi ikus, Nia atu natuun kastikar todan liu baa sia.”