Ema simu Yesus iha kota Yerusalem hanesan Na'in
21
Nunia hotu, Yesus sia la'o liu baa leo ida naran Betfage iha Foho Saitun tehen.a Leo nia kre'is baa kota Yerusalem. Iha nia, sia nanawa heik. Hotu Yesus solok Niakaan maktuir na'in rua baa uluk. 2 Nia naruka sia na'ak, “Emi rua baa leo nebaa. Oras emi tama baa, emi atu haree kuda keledai inan ida no oan, mak ema kesi iha nia. Baa kore hola, dada hodi mai Ha'u. 3 Kalo ema mai nusu emi na'ak, ‘Tan saa emi dada hodi ema niakaan kuda keledai?’ Emi musti hataa ha'ak, ‘Na'in atu sa'e. Sa'e notu, Nia solok nikar mai kedas.’4 Lia ne'e sia hotu-hotu nato'o lia mak Maromak mako'an nakerek kedan hori uluk na'ak,
5 ‘Hei, emi ema Yerusalem sia!b
Mana lai!
Emikaan Na'in namaan aan mai.
Nia namaan aan mai nodi naraik aan.
Nia namaan aan mai sa'e kuda keledai oan.’”c
6 Yesus naruka nunia ti'an, maktuir nia sia baa, nalo tuir hotu-hotu mak Yesus nameno nia. 7 Sia dada nodi kuda keledai inan nia no oan mai baa Yesus. Hotu sia taka siakaan tais hafu'ut baa, nebee Yesus sa'e, tama baa kota. 8 Ema lear moos nola siakaan tais hafu'ut no tais sakat, na'e baa dalan. Balu moos baa taa nola beet tahand felar keke baa dalan klaran. Hodi nunia, sia foo kneter nodi simu Yesus hanesan na'in. 9 Baa oras nia, ema balu la'o uluk Yesus, balu tenik tuir nosi kotuk. Sia nahii bele-bele na'ak,
“Hosana! Ami tonu-haboot Na'i Maromak!e
Na'i Daud husar-binan namaan aan mai ti'an!
Hosana! Ami tonu-haboot Na'i Maromak!
Na'i Maromak solok Ema ne'e mai ti'an.
Hosana! Ami tonu-haboot Na'i Maromak,
mak nabesi aan iha lale'an mak aas kaliuk!”f
10 Baa oras Yesus tama Yerusalem nodi dahur nunia, ema kota laran tomak sai mai nodi nusu na'ak, “Hoi! See mak mai nia?”
11 Ema lear nia nataa na'ak, “Ema ne'e, mak Maromak mako'an, naran Yesus. Nia, ema Nasaret nosi rai Galilea.”
Yesus tama baa Uma Hamulak Huun, nalatu ema makfa'an iha nia
12 Hotu Yesus sia la'o liu to'o Na'i Maromak Niakaan Uma Hamulak Huun. Iha Uma Hamulak Huun lalawar, noo ema makfa'an oi-oik iha nia. Titu-naree nunia, Yesus baa nalatu sai sia nodi sobu karin fatin sia mak sia nodi taruka osan, no fa'an manu lakateu sina mak ema nalo baa sera. 13 Hotu Nia katak baa sia na'ak, “Maromak mako'an nakerek kedan hori uluk na'ak,
‘Ha'u kariik Ha'ukaan Uma,
nebee dadi fatin hamulak.’
Na'i Maromak nakara nunia, mais emi halo Uma ne'e, dadi baa ema na'ok knuuk!”g
14 Nunia hotu, ema matan delek no ema ai asak sia mai baa Yesus iha Uma Hamulak Huun. Nia moos nadi'ak nola sia hotu-hotu. 15 Mais baa oras na'ilulik ulun sia no manorik ukun sia titu-naree Yesus nalo tadak blaar nunia, sia krakat. Iha nia moos lawarik oan sia nahii bele-bele na'ak,
“Hosana! Ami tonu-haboot Na'i Maromak,
tan Na'i Daud husar-binan mai ti'an!”
16 Rona lawarik oan sia nahii nunia, na'ilulik ulun sia krakat liu tan tenik, tan sia la simu dalen nia. Hotu sia katak baa Yesus na'ak, “Hoi! O rona lawarik oan nia sia ka lale?”
Yesus nataa na'ak, “Ha'u krona. Nansaa? Emi sei la leno dauk iha Hakerek Moon nosi lawarik oan mak tonu-naboot Na'i Maromak ka? Hakerek ti'an na'ak,
‘Na'i Maromak babilan kau mea oan no lawarik ki'ik oan sia,
nebee sia tonu-naboot Nia.’”h
17 Hotu Yesus no Niakaan maktuir sia sai nela kota, baa toba iha leo Betania.
Yesus natuka ai huun ida nebee keta nafua ona
18 Baa awan seisawan, Yesus sia baa nikar kota Yerusalem. Mais iha dalan klaran, Yesus noran salaen. 19 Hotu titu-naree ai huun ida iha dalan tehen. Ema naa nanis ai huun nia fuan.i Nia baa nare'is aan baa ai huun nia atu naree kokon, noo fuan ka lale. Mais to'o baa, Nia la naree fuan ida kois, tan ai huun nia foin nataha. Nia moos dale baa ai huun nia na'ak, “Tan o la masai fuan baa Ha'u, o la mafua ona!” Dale notu nunia, ai huun nia moos maran kedas.
20 Naree nunia, Niakaan maktuir sia sarebak. Sia nusu na'ak, “Tan saa, teki-tekis dei, ai huun ne'e maran kedas?”
21 Yesus nataa na'ak, “Rona, tan Ha'ukaan dalen ne'e, tebes no loos! Kalo emi fiar tebe-tebes baa Na'i Maromak hodi la hakerat kedan, emi bele halo nu'u Ha'u kalo baa ai huun nia. Lahoos nia dei, tan emi moos bele halo liu tan tenik. Emi bele haruka foho ida ni'it aan lori baa tasi. Na'i Maromak nanis lori foho nia kedas, surak emi fiar tebe-tebes baa Nia!j 22 Lia hotu-hotu mak emi husu baa Na'i Maromak, emi nanis simu, surak fiar tebe-tebes baa Nia.”
Na'ilulik ulun sia nakusuk lia nosi Yesus beran
23 Hotu Yesus sia la'o liu. To'o Yerusalem baa, sia tama nikar baa Uma Hamulak Huun. Baa oras foin tama baa lalawar, na'ilulik ulun sia no fukun adat sia mai nakusuk baa Yesus na'ak, “Hori sehik aan, see mak naruka o mai tokar lauk iha ne'e? See mak latan beran nia baa o?”
24 Mais Yesus natene sia buka dalan atu nahonu Nia. Hotu Nia nataa na'ak, “Ha'u moos kakara kusu lia ida baa emi. Emi hataa Ha'u lai, foin kataa emi. 25 Ha'u atu kusu nune'e: ita hotu-hotu hatene Yohanis, ema nia mak sarani ema. See mak latan beran baa nia nebee nia sarani ema? Na'i Maromak ka, ema raiklaran?”
Rona nola Yesus dale nunia, sia nanoin baa-mai nodi dale baa malu na'ak, “Adeei! Ita kona di'a ti'an! Kalo ita hataa ha'ak, ‘Na'i Maromak mak latan beran’, Nia atu nataa fila na'ak, ‘Kalo nunia, tan saa emi la fiar Yohanis!’ 26 Mais ita moos la bele hataa ha'ak, ‘Ema raiklaran mak latan beran’, tan ema hotu-hotu bele krakat ita. Sia fiar na'ak, Yohanis nia, Maromak mako'an.” 27 Tan lia nia, sia nataa Yesus na'ak, “Ami la hatene.”
Yesus moos simu na'ak, “Kalo nunia, Ha'u moos lalika katak see mak latan beran baa Ha'u.”
Yesus foo lia hatetek nosi ama ida no oan mane na'in rua
28 Hotu Yesus dale liu no ema boot nia sia na'ak, “Emi hanoin nunabee baa lia hatetek nune'e: Noo ama ida no oan mane na'in rua. Baa loron ida, Aman naruka oan na'in ida na'ak, ‘Oa! Ohin loron ne'e, o baa serwisu iha to'os lai.’
29 Mais oan nia nataa na'ak, ‘Aa! Ha'u la kbaa.’ Mais la kleur, oan nia sadi'a. Hotu nia baa.
30 Hotu ama nia naruka oan ida tenik na'ak, ‘Oa! Ohin loron ne'e, o baa serwisu iha to'os lai.’
Hotu oan nia nataa na'ak, ‘Di'ak ama. Ha'u kbaa’. Mais hatene hodi baa, nia la baa.”
31 Dale notu nunia, Yesus nusu baa sia na'ak, “Oras ne'e Ha'u atu kusu nune'e: Nosi oan na'in rua nia, nabee mak nalo tuir aman harukan?”
Sia moos nataa na'ak, “Mak uluk!”
Hotu Yesus dale na'ak, “Tebes! Mais rona, tan Ha'ukaan dalen ne'e, tebes no loos! Ema aat nu'u ema maksisi bea no feto dalan aat sia atu tama uluk emi, dadi baa Na'i Maromak eman. Tan emi hatene simu loos Na'i Maromak dei, mais la halo tuir Niakaan hakara. 32 Uluk, Yohanis Mak Sarani Ema nanorin emi ti'an, oin nunabee emi bele moris loos. Mais emi la hikir nia. Tuir loos, ema aat sia moos nanono baa Yohanis ti'an. Sia la'o nela siakaan salan nodi nalo tuir niakaan hanorin. Mais emi la ho'uk hanawa hosi emikaan salan no halo tuir niakaan hanorin.”k
Yesus foo lia hatetek nosi ema aat mak seba to'os
33 Nunia hotu, Yesus dale lia hatetek ida tenik baa ema boot nia sia na'ak, “Noo ema rai na'in ida. Nia loke niakaan rai rohan ida, nalo baa to'os foun atu kuda ai anggor baa. Hotu nia ba'a nalik. Nia moos ke'e kuak ida, atu nalo baa fatik rai anggor ween. Nia moos nariik uma to'os aas ida atu nodi daka to'os. Hotu nia seba to'os nia baa ema serwisu to'os, nebee sia fa'e to'os isin no nia. Hotu nia la'o baa rai dook.l
34 To'o oras ku'u, to'os na'in solok niakaan ema ain-liman sia baa ema serwisu to'os nia, atu nusu niakaan fafa'ek. 35 Mais ema serwisu sia la nikir sia. Niakaan ema ain-liman balu kona ta'e, balu kona ho'o, no balu tenik kona tuda hodi fatuk. 36 Natene nola nunia, to'os na'in solok tenik ema ain-liman klibur boot ida, liu nosi mak nia solok uluk nia. Mais ema serwisu nia sia moos nalo aat baa sia.
37 Kleu-leur, ema to'os na'in solok oan du'uk. Nia naneo na'ak, ‘Kalo ha'u ksolok ha'ukaan oan du'uk, sia nanis simu nia no nanono baa nia.’
38 Mais baa oras ema serwisu sia naree nola oan nia, sia moos dale baa malu na'ak, ‘Mana lai! Katuas solok oan du'uk. Nia mak atu simu katuas sasoin hotu-hotu. Di'ak liu ita ho'o nia ona, nebee hola to'os ne'e baa ita.’ 39 Hotu sia kohi nola oan nia, dada baa to'os luan, hotu no'o nia.”
40 Dale notu nunia, Yesus natuka lia hatetek nia nodi nusu baa ema boot nia sia na'ak, “Oras ne'e, atu kusu nune'e: Kalo to'os na'in nia mai nikar, emi hanoin nia nalo oinsaa baa ema serwisu nia sia?”
41 Hotu ema boot nia sia nataa na'ak, “Nanis nia no'o ema aat nia sia hotu-hotu. Hotu nia seba to'os nia baa ema seluk mak fa'e to'os isin kona baa niakaan oras.”
42 Hotu Yesus dale tenik na'ak, “Arumak emi sei la leno dauk saa mak hakerek ti'an iha Hakerek Moon na'ak,
‘Noo fatuk ida mak badaen fatuk sia soe lerek ti'an.
Mais oras ne'e fatuk nia dadi baa uma tatuur fatuk ti'an!
Na'i Maromak du'uk mak boi nola, nodi natuur fatuk nia.
Etuk ita haree baa, kabaas tebes!’”m
43 Hotu Yesus dale natutan na'ak, “Rona! Uluk, Na'i Maromak boi ita ema Yahudi ne'e, nebee ita dadi baa Niakaan ema. Mais, tan emi la ho'uk hikir Ha'u, Na'i Maromak atu boi ema seluk, tan ema mak tuir Niakaan hakara dei mak bele tama dadi baa Niakaan ema. 44 [Rona di'a-di'ak! Ema mak nakloti kona fatuk ne'e, nanis netan kastikar. Mais, kalo fatuk nia monu kona ema, ema nia netan kastikar todan liu.]”n
45 Rona nola Yesus dale nunia, ema boot nia sia natene na'ak, Nia nakrai lia baa sia. Sia manesak no ema serwisu to'os mak aat nia, no badaen fatuk mak soe lerek fatuk tatuur nia. 46 Tan baa nia, sia nawan sa'e tebe-tebes. Sia moos buka dalan atu kohi nola Nia. Mais sia nakerat ema lear, tan ema lear sia filak Yesus na'ak, Maromak mako'an. Tan lia nia, ema boot nia sia la nalo sa-saa baa Yesus.