Yesus foo lia hatetek nosi feto nurak matenek no feto nurak momok
25
Hotu Yesus dale natutan na'ak, “Emi musti hadi'a aan atu simu Ha'u kmai kikar, hanesan feto matenek iha lia hatetek ne'e: Noo feto nurak na'in sanulu. Kalan ida, sia sai nodi badut atu baa simu sasudin mane ida iha siakaan maluk uman.a 2 Nosi sia, noo lima mak momok. Lima seluk, matenek. 3 Mak momok sia, nalu'a nodi mina resin. 4 Mais mak matenek sia, nodi kedas.5 To'o uma nia baa, sasudin sei la mai dauk. Kleu-leur feto nurak nia sia matan nakati, to'o toba dukur.
6 Baa kalan boot, ema nahii na'ak, ‘Hoi! Sasudin mane mai ti'an! Mai simu nia!’ 7 Rona nola nunia, feto nurak nia sia nadeer bele-bele. Hotu sia baa nola siakaan badut atu simu sasudin mane nia. 8 Mais feto momok sia nusu baa feto matenek sia na'ak, ‘Hoi mamaluk sia! Tulun foo ami mina oan ida lai, tan amikaan badut atu mate ona!’ 9 Mais feto matenek sia nataa na'ak, ‘Aikee! Keta nawan sa'e, tan la bele. Amikaan mina ne'e la to'o bodik ita hotu-hotu! Di'ak liu emi baa sosa iha makfa'an mina sia.’ 10 Hotu sia sai baa sosa mina. Mais baa oras sia sai ti'an, sasudin mane moos to'o mai. Feto matenek sia tama baa dahur fatin bele-bele no sasudin no bainaka hotu-hotu. Tama hotu ti'an, ema sena odamatan.
11 La kleur, feto momok sia fila mai. Sia nariik iha luan nodi nahii na'ak, ‘Ama Na'i! Ama Na'i! Tulun loke odamatan baa ami lai!’ 12 Mais na'in nataa na'ak, ‘Hoi! La bele! Ha'u la katene emi!’”b
13 Hotu Yesus taka lia hatetek nia na'ak, “Emi moos musti hadi'a aan nohuun, tan emi la hatene Ha'u kmai kona baa loron saa, lale, kona baa tuku hira.”
Yesus foo lia hatetek nosi ema serwisu mak babilan ulun osan
14 Hotu Yesus dale natutan nodi lia hatetek ida tenik na'ak, “Kalo Ha'u kla'o kela emi ti'an, emi musti serwisu di'a-di'ak bodik Ha'u, hanesan lia hatetek ne'e: Noo ema ulun ida atu baa rai dook. Oras atu la'o, nia bolu nola niakaan ema serwisu na'in tolu, hotu naruka na'ak, ‘Hola osan ne'e, halo baa osan na'in. Kalo ha'u kmai kikar, emi musti hasara baa ha'u, emi hetan funan hira ti'an.’ 15 Dale notu nunia, nia foo osan kakaluk lima baa ema serwisu nomer ida,c nebee nia nala'o osan nia to'o noo funan. Hotu nia foo osan kakaluk rua baa ema serwisu nomer rua, no osan kakaluk ida baa ema serwisu nomer tolu, tuir ida-idak niakaan babelen. Hotu ulun nia la'o baa rai dook.
16 Simu nola osan nia, ema serwisu nomer ida sai kedan baa fatin fa'an. La kleur, nia netan funan kakaluk lima. 17 Nunia moos ema serwisu nomer rua. Nia netan funan kakaluk rua. 18 Mais ema serwisu nomer tolu mak simu nola osan kakaluk ida nia, nia baa ke'e kuak, hotu rai subar osan nia.
19 La kleur, ulun mai nikar. Nia libur nola niakaan ema serwisu na'in tolu nia atu leno niakaan osan mak sia babilan ti'an nia. 20 Ema serwisu nomer ida tama baa, latan osan kakaluk sanulu. Nia dale na'ak, ‘Ama boot! Hori hirak nia ita boot latan osan kakaluk lima baa ha'u. Oras ne'e, ketan osan funan kakaluk lima tenik.’
21 Rona nola nunia, ulun neon di'ak. Nia dale na'ak, ‘Kabaas! O ne'e, ema serwisu mak di'ak. Masik ha'u la iha ne'e moos, o serwisu bei-beik tuir ha'ukaan harukan. Tan o bele babilan lia ki'ik nune'e, ha'u kfoti o atu babilan lia mak boot kaliuk. Ha'u moos kalo dahur, nebee ita hotu-hotu neon di'ak bele-bele.’
22 Hotu ema serwisu nomer rua mai latan osan kakaluk haat. Nia dale na'ak, ‘Ama boot! Uluk ita boot latan osan kakaluk rua baa ha'u. Ita haree mai, tan ha'u ketan osan funan kakaluk rua tenik.’
23 Rona nola nunia, ulun moos neon di'ak. Nia dale na'ak, ‘Kabaas! O ne'e moos ema serwisu mak di'ak. Masik ha'u la iha ne'e moos, o serwisu bei-beik tuir ha'ukaan harukan. Tan o bele babilan lia ki'ik nune'e, ha'u kfoti o atu babilan lia mak boot kaliuk. Ha'u moos kalo dahur, nebee ita hotu-hotu neon di'ak bele-bele.’
24 Hotu ema serwisu nomer tolu tama. Nia dale na'ak, ‘Ama boot! Ha'u katene ita boot, ema mak laran maka'as. Ita boot hola saa mak ema seluk nalo, no ku'u hola saa mak ema seluk kuda. 25 Ha'u kata'uk, keta to'o osan ne'e lakon mohu, hotu ita boot taa ukun baa ha'u. Tan lia nia, ha'u ksubar osan ne'e di'a-di'ak. Ne'e, ama boot! Mola mikar ona ama boot osan kakaluk ida ne'e, tan nafati dei!’
26 Rona nola nunia, ulun nakbehek nia na'ak, ‘O ne'e, ema serwisu mak aat no baruk teen! Kalo o matene ti'an ma'ak, ha'u kola saa mak ema seluk nalo, no ku'u kola saa mak ema seluk kuda, 27 tan saa o la baa rai osan ne'e iha uma rai osan dei? Nebee kalo ha'u kmai kikar, bele ketan funan. Masik oan ida dei moos, so'in!’
28 Hotu ulun naruka niakaan ema serwisu seluk sia na'ak, ‘Hola hikar osan hosi ema ne'e, latan baa ema serwisu mak netan funan kakaluk lima nia. 29 Ema mak babilan di'a-di'ak saa mak nia kaer ti'an, nia atu netan hetak wa'in tenik. Mais ema mak la no'uk babilan saa mak nia kaer ti'an, ema atu nola nikar hotu-hotu nosi nia.’d
30 Hotu ulun natutan tenik na'ak, ‘Kohi hola ema serwisu mak la folin ne'e. Dada sarat hodi nia baa luan. Habusik nia noran susar basuk nodi tanis la nanawa iha fatin makukun nebaa!’”e
Yesus katak na'ak, Nia atu natetu ema ida-idak moris baa oras rai falu fila
31 Hotu Yesus dale liu na'ak, “Ha'u ne'e, Ema Raiklaran Isin nosi lale'an. Ha'u atu ktuun mai kikar kodi Ha'ukaan Ama beran mak maka'as, bele-bele ko Niakaan makbukar lale'an sia. Hotu Ha'u kabesi aan baa Ha'ukaan kadera ukun maka'as, nebee kleno ema ida-idak hahalok, tuir saa mak sia nalo ti'an iha raiklaran.f 32 Baa oras nia, ema nosi rai hotu-hotu iha raiklaran naklibur. Sia ida-idak atu mai nasoru Ha'u. Ha'u atu ksasa-fa'e sia, hanesan ema makbalin sasa fa'e bibi malae nosi bibi dadi baa klibur rua. 33 Ema sia mak nalo tuir Na'i Maromak hakaran, Ha'u atu ktau sia baa Ha'ukaan sorin kwana. Mais seluk sia, Ha'u atu ktau baa sorin karuk. 34 Baa oras nia, Ha'u kaer ukun Na'in. Ha'u katak baa ema mak iha Ha'ukaan sorin kwana ka'ak, ‘Emi ne'e mak simu matak-malirin hosi Ha'ukaan Ama. Mai tama baa fatin kabaas mak Nia babilan kedan bodik emi. Oras raiklaran sei la iha dauk, Nia babilan kedan ti'an fatin Nia bodik emi. 35 Emi bele tama, tan uluk baa oras Ha'u ksalaen, emi hahaan Ha'u. Baa oras Ha'u kanroo, emi haroo Ha'u. Ha'u kmai hanesan ema matak, emi simu Ha'u iha emikaan uma. 36 Ha'u la koo tais, emi foo tais baa Ha'u. Ha'u kmoras, emi mai babilan Ha'u. Ha'u iha bui, emi mai haliku Ha'u.’
37 Rona nola nunia, ema moon sia iha Ha'ukaan sorin kwana atu nataa nikar na'ak, ‘Ama na'i boot, ne'e nunabee ti'an? Ama na'i na'ak, Ama na'i salaen, ami hahaan. Ama na'i nanroo, ami haroo. 38 Ama na'i hanesan ema matak, ami simu iha amikaan uma. Ama na'i la noo tais, ami foo tais. 39 Ama na'i moras, ami baa babilan. Ama na'i iha bui, ami haliku. Hori hirak ami halo lia nia sia?’
40 Ha'u atu kataa sia ka'ak, ‘Rona! Ha'ukaan dalen ne'e, tebes no loos! Baa oras emi halo lia nunia sia bodik Ha'ukaan ema, masik sia ema ki'ik basuk moos, emi halo ti'an bodik Ha'u!’
41 Hotu Ha'u katak kedan baa ema seluk sia mak iha Ha'ukaan sorin karuk ka'ak, ‘Hoi ema aat sia! Sees hosi ne'e! Na'i Maromak lelen emi. Nia atu soe tama emi baa ha'i naraka mak laka la nanawa. Nia nadi'a ti'an fatin susar nia bodik diabu sia no siakaan ulun. 42 Emi kona lelen nia, tan oras Ha'u ksalaen, emi la hahaan ha'u. Oras Ha'u kanroo, emi la haroo Ha'u. 43 Ha'u kmai hanesan ema matak, emi la simu Ha'u iha emikaan uma. Ha'u la koo tais, emi la foo. Ha'u kmoras, emi la babilan. Ha'u iha bui, emi la haliku.’
44 Rona nola nunia, ema aat nia sia atu nataa na'ak, ‘Ama na'i boot, ne'e nunabee ti'an? Ama na'i na'ak, Ama na'i salaen, ami la hahaan. Ama na'i nanroo, ami la haroo. Ama na'i mai hanesan ema matak, ami la simu iha amikaan uma. Ama na'i la noo tais, ami la foo. Ama na'i moras, ami la babilan. Ama na'i iha bui, ami la haliku. Hori hirak ami halo ama na'i nunia?’