Maromak naruka Abraham latan Isak dadi baa sera
22
La kleur falik, Maromak koko Abraham neon atu natene Abraham rona baa Nia ka lale. Maromak bolu na'ak, “Abraham!”Abraham moos nataa na'ak, “He'e, Na'i Maromak!”
2 Hotu Maromak naruka na'ak, “Rona di'a-di'ak! Mola okaan oan mane mesak mak o madomi tebe-tebes nia, modi baa rai Moria, malo nia baa sera tunun bodik Ha'u. To'o nebaa, foin Ha'u katudu sera fatik iha foho ida.”
3 Awan seisawan, Abraham nola ai maran, tula baa kuda keledai. Hotu, nia no Isak no klosan na'in rua baa fatin mak Maromak katak ti'an nia. 4 Sia la'o bei-beik to'o wainrua, Abraham titu naree foho nia nosi dook. 5 Hotu, nia katak baa klosan rua nia na'ak, “Emi na'in rua hein heik iha ne'e, hodi daka kuda keledai. Ha'u ko ha'ukaan oan baa lo'u-sudur baa Maromak iha leten nebaa. Lo'u-sudur ti'an, ami fila hikar mai.”
6 Dale hotu nunia, Abraham nola ai maran nia sia, nasaan baa Isak. Nia na'in du'uk nodi tudik no ha'i. Sia rua sei la'o, 7 Isak bolu aman na'ak, “Ama!”
Abraham nataa na'ak, “Saa Isak!”
Isak moos nusu na'ak, “Ama! Ita atu tunu sera! Ha'i no ai maran iha ne'e ti'an! Mais bibi malae oan mak ita atu halo baa sera nia, iha nabee?”
8 Abraham nataa na'ak, “Oa! Maromak du'uk mak atu foo Niakaan bibi malae oan, nebee halo baa sera.”
Sia rua moos sa'e liu, 9 to'o fatin mak Maromak katak ti'an nia. Hotu Abraham nalo taroman, nodi nada ai maran baa fohon. Hotu, nia kesi niakaan oan, natoba baa ai maran leten. 10 Hotu, nia nola tudik atu nodi sona no'o 11 Mais teki-tekis MAROMAK Niakaan makbukar nahii nosi lale'an na'ak, “Abraham, Abraham!”
Abraham nataa na'ak, “Ha'u iha ne'e, Na'i Maromak. Nansaa?”
12 Hotu lia maliak nia moos nataa na'ak, “Keta mo'o oan nia! Keta malo sa-saa baa nia! Oras ne'e, Ha'u katene ti'an ka'ak, o tuir tebe-tebes Ha'ukaan hakaran modi madi'a aan ti'an, latan okaan oan mane mesak nia, dadi baa sera bodik Maromak .”
13 Rona nola nunia, Abraham naree bibi malae aman ida mak dikur tatalik baa ai tarak sorun. Abraham baa nola bibi malae nia, hotu tunu nalo baa sera bodik Maromak, seluk niakaan oan. 14 Tan lia nia, Abraham nanaran fatin nia Yahofa Yire, tan lia isin na'ak ‘Maromak atu nadi'a saa mak ita buka’. Etuk, to'o oras ne'e moos, ema na'ak, “Iha MAROMAK foho leten, Nia atu nadi'a saa mak ita buka.”
15 Hotu, MAROMAK Niakaan makbukar nahii tenik nosi lale'an na'ak, 16 “MAROMAK du'uk na'ak, ‘O madi'a aan ti'an atu foo okaan oan mesak nia, dadi sera bodik Ha'u. Dadi, Ha'u karai aan kodi Ha'ukaan naran du'uk 17 ka'ak, Ha'u kameno katuun matak-malirin wa'in lear baa o mo okaan husar-binan. Sia atu bea tu'an hanesan fitun iha lale'an, no raihenek iha tasi tehen mak ema la bele sura nola. Okaan husar-binan sia atu natoba nola funu. 18 Nosi okaan husar-binan, ema klubun hotu-hotu iha raiklaran netan matak-malirin, tan o tuir Ha'ukaan ukun.’”
19 Hotu, Abraham no Isak tuun mai nikar baa klosan na'in rua nia, atu fila nikar bele-bele baa Beer Syeba. Sia moos nein ona iha nebaa.
Nahor husar-binan
20 Nunia hotu, Abraham rona na'ak, alin Nahor feen Milka, nahoris oan ti'an. 21 Oan ulun naran Us. Alin naran Bus. Bus alin naran Kemuel (mak Aram aman). 22 Hotu, Kesed, Haso, Pildasy, Yidlaf no Betuel. 23 Betuel nia, Ribka aman. 24 Nahor moos netan oan nosi feen ki'ik, naran Reuma. Reuma nahoris Teba, Gaham, Tahas no Maaka.