Sara katak na'ak, “Maromak nalo ha'u kanasa. Ha'u neon di'ak. Ema naneo na'ak, ha'u la kbele ketan oan baa otas ferik nune'e. Ha'ukaan la'en moos katuas basuk ti'an, mais ha'u ksei bele kahoris oan bodik nia! Dadi, oras ne'e, se-see dei mak rona lia ne'e, sia moos nanasa bele-bele no ha'u.”

Baa oras lawarik nia otas loron walu, Abraham moos nalo hamane aan baa nia, tuir Maromak ukun.

8 Hotu, Isak hetak boot. Baa oras Sara atu keta nia, Abraham nalo dahur boot.

9-10 Baa oras nia, Sara naree Abraham feen ki'ik Hagar oan Ismael kakoen Isak. Naree nunia, Sara katak baa la'en na'ak, “Te'ur sai ata feto Mesir ne'e no niakaan oan! Ha'u la ko'uk niakaan oan simu itakaan sasoin! Ha'ukaan oan Isak dei, mak netan hotu-hotu.”

11 Rona nola nunia, Abraham noran la di'ak, tan Ismael moos niakaan oan susu. 12 Mais, Maromak katak baa Abraham na'ak, “Abraham! Keta maneo feen ki'ik no oan nia. Tuir Sara hakaran dei, tan o metan husar-binan mak Ha'u kameno ti'an nia, tuir Isak. 13 Mais Ha'u moos katuun matak-malirin baa okaan feen ki'ik oan Ismael. Tan Ismael moos, okaan oan susu du'uk. Nosi ikus, niakaan husar-binan dadi ema klubun ida!”

14 Rona nola nunia, awan seisawan Abraham nalo bakae, foo baa Hagar, no tara wee fatik boot ida^a baa niakaan baas. Hotu, nia nabusik feto nia no oan Ismael la'o. Hagar no oan Ismael moos la'o nasirin rai mamuk ida kre'is Beer Syeba.

15 Baa oras wee hemun moos ti'an, Hagar la'o nela Ismael iha ai huun ki'ik ida leon, 16 tan nia naneo na'ak, “Ha'u la kterus karee oan ne'e mate.” Hotu, Hagar nakiduk takseer ro'a lima nulu nosi oan nia, hotu tuur, tanis nade'un aan.

17 Ismael moos tanis. Maromak moos rona niakaan lian. Hotu, Maromak Niakan makbukar lale'an ida bolu Hagar na'ak, “Hagar! Tan saa o susar nune'e? Keta mata'uk, tan Maromak rona ti'an okaan oan tanis. 18 Mariik, baa maliku nia! Makbiit niakaan neon, tan Ha'u atu kalo niakaan husar-binan dadi ema klubun boot.”

19 Hotu, Maromak namoo Hagar matan, to'o nia bele naree wee knuuk ida. Nia nodi wee fatik baa tii wee, nodi naroo oan nia.

20-21 Nunia hotu, Ismael no inan Hagar nein iha raihenek molik ida, naran Paran. Ismael boot mai, nia dadi ema mahanak matenek. Niakaan inan moos sasudin nia no feto Mesir ida. Hotu-hotu ne'e dadi, tan Maromak namutuk no Ismael.

22 Baa oras nia, Na'i Abimelek niakaan meo ulun ida, naran Pikol. Baa loron ida, sia rua mai nasoru Abraham. Na'i Abimelek dale baa Abraham na'ak, “Abraham! Ami hatene Maromak namutuk no o. Etuk, o malo sa-saa dei, dadi. 23 Oras ne'e, ha'u kusu o mameno modi marai aan iha Maromak oin ma'ak, o la be'ur ha'u ko ha'ukaan husar-binan. Ha'u di'ak ko o ti'an, dadi o moos musti di'ak mo ha'u ko ha'ukaan renun rai ne'e.”

24 Abraham moos simu na'ak, “Di'ak! Ha'u karai aan.”

25 Mais la kleur, Abraham nasa'e lia baa Na'i Abimelek na'ak, “Ama na'i eman sia nadau nola ha'ukaan wee knuuk ida ti'an.”

26 Rona nola nunia, Na'i Abimelek na'ak, “Hei! Ha'u kfoin rona lia ne'e. Tan saa o la masara kedan lia nia? Ha'u la katene see mak nadau.”

27-28 Nunia hotu, Abraham no Na'i Abimelek namate menon no malu. Abraham nola karau baka no bibi malae, latan baa na'in. Hotu, Abraham boi nasai tu'an bibi malae inan salak matan hitu. 29 Naree nunia, Na'i Abimelek nusu nia na'ak, “Tan saa o malo nunia?”

30 Abraham nataa na'ak, “Ama na'i simu bibi malae matan hitu ne'e ona, atu dadi tadak na'ak, ama na'i simu ha'u mak ke'e wee knuuk nia.”

31 Tan sia rua narai aan iha nia, sia moos nanaran fatin nia na'ak, Beer Syeba. Ne'e na'ak, ‘wee knuuk harai aan’.^b

32 Hotu ti'an, Na'i Abimelek no niakaan meo ulun fila nikar baa siakaan rai Filistin. 33 Hotu, Abraham taman ai tamariska^c huun ida iha Beer Syeba. Nahuu baa oras nia, ai huun nia foo natene baa Abraham na'ak, fatin nia, fatin lo'u-sudur baa MAROMAK Mak Moris Nima-nimak. 34 Hotu Abraham nein heik to'o kleur iha ema Filistin rain nia.