Sara mate
23
1-2 Nosi ikus, Sara mate baa otas tinan atus ida rua nulu resin hitu. Oras mate, Abraham sia nein iha rai Kana'an, iha leo Kiryat-Arba (ne'e mak Hebron). Abraham tanis nade'un aan, daka feen maten.3 Nia baa nasoru ema Het sia, hotu katak na'ak, 4 “Ha'u ne'e, ema maktabar dei iha emikaan leet. Ha'u la koo rai atu kakoi ha'ukaan feen. Dadi, kalo bele, ha'u ksosa kola emikaan rai rohan ida, bodik kakoi ha'ukaan feen.”
5 Sia nataa na'ak, 6 “Nune'e, ama! Hori wain ne'e, ami filak ama, hanesan ema matas mak ami hakneter. Dadi, ama boi du'uk dei rai kabaas mak ama nakara. Ami nanis simu dei. La noo ida dudu.”
7 Rona nola nunia, Abraham sudur kedan, foo kneter baa rai na'in, mak ema Het sia. 8 Hotu, nia dale na'ak, “Kalo emi simu ha'u, ha'u kusu tulun nebee emi dale ho katuas Sohar oan mane Efron. 9 Emi husu, kalo bele, nia fa'an fatuk kuak naran Makpela iha niakaan to'os di'in. Nusu folin hira-hira, nanis ha'u kselu. Ha'u kakara selu kotu iha emikaan oin, nebee rai nia dadi baa ha'ukaan rai du'uk. Ha'u atu kalo baa amikaan rate fatik.”
10 Baa oras nia, Efron du'uk tuur namutuk no ema Het sia. Nia moos rona Abraham dalen nia. Hotu, nia nariik nataa Abraham iha fukun hotu-hotu oin na'ak, 11 “Keta nunia, ama! Nune'e. Ha'u klatan to'os no fatuk kuak Makpela nia bodik ama! Ama nakoi ama feen iha nia. Ha'u klatan rai nia baa ama iha ha'ukaan ema oin, nebee sia hotu-hotu dadi saksiin!”
12 Rona nola nunia, Abraham sudur tenik baa ema Het sia. 13 Hotu, nia moos dale no Efron na'ak, “Nunia moos di'ak, mais emi hotu-hotu rona ha'u lai. Ha'u kakara sosa kotu rai nia, nebee ha'u kbele kakoi ha'ukaan ema sia iha nia.”
14-15 Rona nola nunia, Efron moos nataa na'ak, “Rai nia folin, osan murak tomak atus haat dei! Halo saa, ita rua hatuun folin baa-mai tan osan oan nia? Ama baa makoi o feen iha nebaa ona.”
16 Abraham moos simu rai folin nia tuir Efron dalen. Hotu, nia sura nola osan murak tomak atus haat iha ema Het sia oin, nodi selu baa Efron.
17-19 Hodi nunia, Abraham netan Efron rain, nalo baa niakaan rain du'uk. Rai nia, iha Makpela, kre'is Mamre. Nia sosa kotu rai nia no to'os, fatuk kuak, no ai huun hotu-hotu. Fukun Het hotu-hotu dadi saksiin na'ak, rai nia no isin hotu-hotu, dadi ti'an baa Abraham niakaan.