2 Petrus
Hakerek dala rua nosi Petrus
Tabe
1
Hakerek ne'e nosi ha'u, Simon Petrus. Ha'u ne'e,a Yesus Kristus ain-liman. Ha'u moos Niakaan klosan mak Nia solok atu baa katak Niakaan lia baa ema iha nabee dei.Ha'u kakerek ne'e bodik emi mak fiar baa Yesus Kristus ti'an. Tan Na'i Maromak neon loos, Nia loke dalan nebee emi bele fiar baa Kristus hanesan ami. Fiar nia folin kaliuk bodik ita, tan Kristus nia, mak itakaan Maromak no itakaan Maksorin.
2 Ha'u kusu, nebee emi bele kre'is ho Na'i Maromak no kre'is ho itakaan Na'in Yesus. Nebee Sia natudu laran di'ak baa emi, nalo emi moris manek no dame.
Na'i Maromak boi ita, hotu bolu nola ita mai baa Nia
3 Na'i Maromak bolu nola ita dadi baa Niakaan ema mak moris tuir Niakaan hakara. Kalo ita kre'is ho Nia, Nia nodi Niakaan beran maka'as, foo lia hotu-hotu mak ita buka atu moris loos tuir Niakaan hakara nia. 4 Lia mak Nia foo baa ita, lia folin kaliuk. Tan hori uluk, Nia nameno kedan atu foo lia kabaas kaliuk baa ita, nebee ita bele moris hodi haninu Niakaan lisan. Hodi nunia, ita sasin hosi lia aat hotu-hotu mak ema raiklaran nalo, tan sia moris tuir siakaan hakara dei.
5 Ita musti harui aan nune'e:
Ita fiar Na'i Maromak ti'an, mais keta tuka baa nia dei,
tan ita moos musti serwisu bodik Nia.
Ita serwisu bodik Nia, mais keta tuka baa nia dei,
tan ita moos musti hetak kre'is ho Nia.
6 Ita hetak kre'is ho Nia, mais keta tuka baa nia dei,
tan ita moos musti babilan aan to'o moris hetu aan.
Ita moris hetu aan, mais keta tuka baa nia dei,
tan ita moos musti haterus aan iha susar laran.
Ita haterus aan iha susar laran, mais keta tuka baa nia dei,
tan ita moos musti halo lia hotu-hotu tuir Na'i Maromak hakaran.
7 Ita halo lia hotu-hotu tuir Na'i Maromak hakaran, ne'e na'ak,
ita hadomi mamaluk makfiar sia.
Mais keta tuka baa nia dei,
tan ita moos musti hadomi ema hotu-hotu.
8 Kalo ita harui aan halo nunia, ita la soe lakon leet, tan lisan nunia noo folin. Kalo lisan nunia hetak tu'an iha itakaan moris, ne'e na'ak, ita kre'is ti'an ho itakaan Na'in Yesus Kristus. 9 Mais, kalo ema la no'uk nalo nunia, nia nanoin la to'o. Nia neon makukun, hanesan ema delek. Tuir loos, Na'i Maromak kasu mohu niakaan salan, nebee nia bele moris moos. Mais, nia nalu'a ti'an!
10 Mamaluk sia! Oras ne'e emi musti hetak harui aan tenik. Na'i Maromak boi nola emi nebee emi mai baa Nia. Oras ne'e emi musti hatudu ha'ak, emi dadi ti'an baa Niakaan ema. Kalo lia di'ak mak ha'u kfoti ohin nia sia hetak tu'an iha emikaan moris, emi la hakloti. 11 Hodi nunia, Na'i Maromak foo lia kabaas baa emi, nebee emi bele tama Yesus Kristus hutun-renun no moris nima-nimak ho Nia. Lia ne'e, kabaas tebes, tan Nia, itakaan Na'in. Nia moos, itakaan Maksorin.
Tan saa Petrus nakerek nunia?
12 Emi hatene ti'an lia nia sia mak ha'u katak ohin nia. Emi moos haterus aan biit, tan fiar hanorin loos. Masik nunia moos, ha'u kfoo katene bei-beik, nebee emi keta halu'a. 13 Tebes. Tosak ha'u ksei moris, ha'u atu kfoo katene lia ne'e sia baa emi nohuun. 14 Mais la kleur ona, ha'u atu kmate. Itakaan Na'in Yesus Kristus natudu ti'an lia nia baa ha'u. 15 Masik nunia moos, ha'u karui aan baa oras ne'e, nebee, kalo ha'u kmate ti'an, emi bele hanoin nohuun lia ne'e sia.
Yesus Niakaan maka'as
16 Uluk, ha'u ko ha'ukaan mamaluk sia katak baa emi hosi itakaan Na'in Yesus Kristus. Ami moos katak ha'ak, nosi ikus, baa oras Nia namaan aan mai nikar, Nia atu mai nodi beran maka'as kaliuk. Saa mak ami katak nia, ami hatene tan ami haree hodi matan du'uk baa oras Yesus sei namutuk no ami. Lia nia, lahoos lia aikanoik. 17-18 Baa loron nia, ami hamutuk ho Yesus iha Na'i Maromak Niakaan foho lulik leten. Hotu Ama Maromak du'uk katak nosi Yesus Niakaan maka'as baa ami. Iha foho lulik leten nia, ami rona lia maliak ida mak kabaas kaliuk. Lia maliak nia sai nosi lale'an nodi na'ak,
“Ema ne'e, Ha'ukaan Oan mak Ha'u kadomi.
Nia nalo Ha'u neon di'ak.”b
19 Lia fuan nia sia nalo ami hetak fiar baa lia mamenon mak ami simu hola hosi Maromak mako'an uluk aan sia. Di'ak liu, emi moos hanono baa siakaan lia mamenon, tan lia nia sia nu'u badut mak laka iha fatin makukun. Hanono baa sia, to'o Yesus namaan aan mai nikar. Oras nia, foin emi hatene malorek lia nia sia, hanesan ema ida mak uluk titu-naree fitun na'in dei, mais oras ne'e, loro sa'e ti'an, naroma hotu-hotu.