Ara roo Ramatua Yesus leo gubernor Pilatus neu
23
Tehuu mana urus dedea agama Yahudi sira, ta ranuu haak huku ramate lahenda. Huu ria naa ara roo Yesus leo gubernor Pilatus, mana pareta Roma ria. Ara nau gubernor huku na mate Ni. 2 Ara losa gubernor mata na, boe ma tui Yesus sala nara rae, “Lahenda ia, nalena-laka neu' mana pareta Roma. Ana horo lahenda boso' bae doi-bea fee mana pareta. Ma so'u aon nae ria nana Kristus, mane' lahenda Yahudi.”3 Gubernor namanene leo' naa, boe ma ana natane Ni nae, “Tebe, do? O nana mane' lahenda Yahudi, do?”
Yesus nataa nae, “Tebe leo' pak hara ma.”
4 Parisa' basa, boe ma gubernor nasare na malaka agama malaka nara ma lahenda kadodou-ina' sira, de nae, “Leo ia'. Au ta hapu Lahenda ia sala na bai' boe'.”
5 Tehuu ara rahere rae, “Ta'a, pak gubernor. Lahenda ia nanori-nafada nai basa mamana' ain, duduku' anaraun ara fo ralena laka. Ana tao kaco mulai neme propensi Galilea losa kota Yerusalem ia.”
Gubernor fee Yesus leo mane' Herodes neu
6 Gubernor namanene leo' naa, boe ma ana natane si nae, “Kalu leo' naa, sona ria lahenda Galilea, do?”
Ara rataa rae, “Tebe, papa. Ria lahenda Galilea!” 7 Gubernor bubulu' leo' naa, boe ma ana fee Yesus neu nataa mane' Herodes, fo ri' ana pareta propensi Galilea. Tepo' ria, ana nai kota Yerusalem.
8 Mane' Herodes namanene lahenda dodou' tui la'e-neu' Yesus, ma neme ulu' mai ana nahii' nita na Yesus seli. Ana namahehena' bisa nita Yesus natudu tanda heran esa do dua. Huu ria naa, ara roo Yesus neu, boe ma dale na namaho'o. 9 Ana natane Yesus hihii-nanau' rupa' ara, tehuu Ana ta nataa hata-hata esa boe'. 10 Herodes bei dea-dea no Yesus, tehuu malaka agama a malaka nara ro mesen agama ra mulai tui selu' Yesus sala' rupa nara neu' mane' a. 11 Boe ma mane' Herodes no soldadu nara mulai ramumulu-ramamae' ma radadae Yesus. Ara ramumulu-ramamae' raroo Ni, feen pake badu malole esa sama leo' biasa mane' ara pake. Basa de ara roo fali' Ana leo gubernor Pilatus neu. 12 Maulu na gubernor ria no mane' Herodes ramananasa ao'. Tehuu mulai fai' ria boe ma dua si ratia'.
Gubernor naetu' fo huku ramate Ramatua Yesus
13 Boe ma gubernor Pilatus naloo na malaka agama Yahudi malaka nara ma lasi' feke' ara sama-sama ro lahenda kadodou' sira, basa si rabua ela ramanene ria naetu na. 14 Ana nafada si nae, “Emi moo Yesus leo au mai, ma kolaa' mae, Ana duduku' anaraun ara fo ralena laka mana pareta Roma. Au parisa' alulutu' Ana nai emi mata mara, tehuu au ta hapu Ni sala hata esa boe'. 15 Mane' Herodes boe parisa' Ana so, tehuu ana ta hapu sala Na. Huu ria naa, ana fee fali' Lahenda ia leo au mai. Lahenda ia salan ta'a, de au ta bisa huku a mate Ni. 16 De au aetu' leo ia': au adenu fo fepa-li'un, basa nana au po'i Ni.”
17-18 Ara ramanene leo' naa, boe ma mulai rahara bela' a rae, “Ta bisa fa! Maisa Ni. Po'i Barabas.”
[Ara rahara rae leo' naa, huu fo tuka-tuka teu' kalu lahenda Yahudi ra tao feta Paska, sona gubernor biasa po'i lahenda mana huku' esa tuka sira hihii-nanaun.]a 19 (Barabas maso' bui a, nana huu ana dadi mana kikifu', nalena-laka mana pareta Roma nai kota Yerusalem, ma naisa lahenda boe.)
20 Tehuu gubernor nau po'i Yesus. De ana natane selu' lahenda kadodou' sira nae, “Kalu au po'i Yesus, sona leo' bea?”
21 Tehuu basa si rahara bela' a rae, “Ta'a! Paku maisa Ni neu' ai kake'! Paku maisa Ni neu' ai kake'!”
22 Tehuu gubernor nameda naan ria ta la'e, de ana natane si kalai' telu na nae, “Sala' ubea' de au paku aisa Ni? Ana tao tadalu ubea'? Au parisa' Ana so, tehuu ta hapu eno' naraa la'e, huku ta mate Ni.” De au adenu fo fepa-li'un, basa nana po'i Ni.”
23 Tehuu basa lahenda sira rahara rambera bali, raseti fo nau paku raisa Ni neu' ai kake' a. Mate'e na, ara raseki gubernor, 24 de naetu' tuka sira hihii-nanaun. 25 Boe ma ana po'i Barabas, madedea laka' ma kanisa' ria. Tehuu ana fee Yesus leo lahenda sira lima dale nara neu, ela ara raisa Ni tuka sira hihii-nanaun.
Ara londa-lake raisa Ramatua Yesus nai ai kake'
26 Boe ma soldadu Roma ra hela roo Yesus kalua neme kota Yerusalem. Nai eno talada' ara raneta ro lahenda kota Kirene esa nade Simon. Ana besa' ko neme kota dea' mai. Ara raseti ni fo nasaa Yesus ai kake' Na, ma ana la'o tuka Yesus dea na.
27 Fai ria, lahenda dodou' tuka ro Yesus. Ina' ara dola Ni. 28 Yesus namanene si dola, boe ma Ana nasare na si, ma dedea nae, “Mama Yerusalem kara emin. Boso' dola huu Au. Malole lena' dola huu ao-ina mara, ma emi ana mara. 29 Huu fo balahaa-binesa' susa bau-ina' a mai, neu' ko lahenda rafada rae, ‘Ina maua-manale' a nana ri' ina' fo ta parnaa boki, ma ta parnaa nasusu' ana boki beu'.’ 30 Tepo' fo susa bau-ina' a mai, lahenda ra doidoso raan seli, losa' ara hule rae, ‘Malole lena', lete' ara refa mai fo ranete ra ami leo!’ Ma ara dedea rae, ‘No doidoso leo ia' a, malole lena' pupuku' ara tatana ra ami leo!’b 31 Huu fo lahenda bisa tao susa leo ia' soa-neu' lahenda sala' taa' a, sona lahenda tadalu' a leo bea' bali?”c
32 Fai ria soldadu ra roo Yesus a, ara hela roo lahenda tadalu' dua boe, ela huku ramate si sama-sama ro Ni. 33 Ara losa mamana' esa, nade ‘Laka Dui'’. Boe ma ara paku Yesus no lahenda tadalu kadua' sira, esa' ko neu' ria ai kake' na. Boe ma rapadei' ai kake' ara. Ara londa-lake lahenda tadalu' esa nai Yesus boboa ona Na, ma esa nai boboa ii Na.
34 [Fai ria, Yesus hule-haradoi nae, “Papa! Fee ampon neu' lahenda ia ra sala nara, huu no ara ta bubulu' hata fo ri' sira tao ni.”]d Ma soldadu ra hela lot, ela ara bubulu' bea ri' hapu Ria kakao-papaken.e
35 Lahenda dodou' rapadei ranilu nai mamana' ria. Lahenda Yahudi ra malaka nara ramumulu-ramamae' Yesus rae, “Ana po'i-tata na lahenda feke', tehuu Ana ta bisa po'i-tata na ao-ina heheli Na. Kalu tetebes ara Ria nana Kristus, fo ri' Manetualain here mema' ana, sona neme' naa ela Ana onda neme ai kake' ria mai leo.”f
36 Soldadu sira boe ramumulu-ramamae' Ana. Ara fee Ni ninu anggor ma'eis,g 37 ma raloo ramumulu-ramamae' rae, “Kalu o tebe-tebe lahenda Yahudi ra mane' na, sona po'i-tata ma aom leo!” 38 Ara dui' nai papa' esa nae,
“Ia nana lahenda Yahudi ra mane' na.”
Ara paku papa' ria neu' Yesus laka Na poo' lain, ela rafada rae huku Ni nana huu tute' a ri' naa'.
39 Lahenda tadalu' esa fo ri' londa-laken nai Yesus boboa Na boe namumulu-namamae' nae, “Tebe-tebe O nana Kristus, do? Kalu leo' naa, sona po'i-tata ma ita basa leo!”
40 Tehuu lahenda tadalu' esa nasa'ai ni nae, “O ta bii' Manetualain? Huu fo o hapu huhuku mamates sama leo' Ria boe. 41 Ita dua hapu huhuku' naraa no ita tadalu nara. Tehuu Lahenda ia ta tao tadalu' esa boe'.” 42 Boe ma ana dedea tamba bali nae, “Yesus! Fai bea ma Papa maso' leo nusa-namo ma muu, sona mafarene au, dei.”
43 Yesus nataa nae, “Au helu! Fai ia boe, o sama-sama mo Au maso' leo nusatetu-ikutema' a dale' teu.”
Ramatua Yesus mamate Na
44-45 Fai ria, ledo a namatetu so. Tehuu ledo a ta nahaa, ma maiu' a napoti na mamana' ria losa li'u telu leodaen. Nai Uma Mamaso Yahudi Ina a, tema' maloa ina esa mana pepele' babaa Manetualain Kama Malalao-malalafu Naan Seli. Kekeneu te, tema' ria sii bati duan.h
46 Nai mamana' ‘Laka Dui'’, Yesus naloo nambera nae, “Ou, Ama'! Besa' ia Au fee sumane Ka neu' Ama' a lima dale Ma.” Ana dedea basa nae leo' naa, boe ma mate Ni.i
47 Komendaan soldadu Roma napadei nanenea' nai Yesus ai kake Na. Nita Yesus mamaten ria, boe ma ana io-oa Manetualain nae, “Tebe-tebe Lahenda ia, Lahenda dale roo-tetu'!”j
48 Lahenda kadodou' fo rabua rai naa a, rita Yesus mamate Na, boe ma rasaledale, de basa si fali reus no dale hedi'. 49 Yesus lahenda nara rita Yesus mamate Na, tehuu rapadei' rai doo' a. Ina' fo ri' ara tuka Ni neme Galilea losa Yerusalem a, rai naa boe.k
Ara ratoi Ramatua Yesus
50-51 Fai fo Yesus maten, boe ma lahenda esa saka eno' fo nau naonda na popora Na neme ai kake' a mai. Lahenda ria nade Yusuf, lahenda kota Arimatea. Ria dale na roo-tetu', ana tao hata malole dodou'. Ana nahani Manetualain natudu Ria hohomu pareta Na. Ria boe ei-lima' neme mana ee dedea agama Yahudi, tehuu ana ta sipo' sira raetu' huku ramate Yesus. 52 Huu no ana nau naonda Yesus popora Na neme ai kake' a mai, ana leo gubernor Pilatus neu hule fo urus popora' ria. 53 Ana hapu isin, boe ma neu naonda popora' ria. Ana poti popora' ria neni' tema' balanau'. Boe ma neu napeu' Ana neu' bolo batu esa dale', fo ri' lahenda besa' ko paa basan. Mamana natoi' ria lahenda bei ta parnaa pake ni. 54 Yesus maten la'e soda Lima'. Yusuf asa ratoi basa, nana ledo leodae' so. Kalu ledo a tena, sona mulai lahenda Yahudi ra fai huhule-haradoin.
55 Ina' fo sama-sama ro Yesus reme Galilea mai, ara tuka Yusuf, ela ara bubulu' ana napeu' popora' ria nai rates bea. 56 Ina' sira rita ratalolole rates ria mamana na, boe ma ara fali fo sadia rampe no mina maboo-meni'. Ledo a tena, boe ma ara hahae nonoi' a, tuka lahenda Yahudi ra atoran fai huhule-haradoin. Ara rahani basa fai huhule-haradoi', besa' ko reu kari rampe ma pisi mina neu' Yesus popora Na.l