19
Boe ma gubernor Pilatus nadenu soldadu nara fo fepa-li'u Yesus pake cambuk.a 2-3 Soldadu ra hai ra ai makou' a rana nara, de ralanen tao silaka. Ara poro' silaka koo-kau' ria neu' Yesus laka Na, do'o-tabe ramimina' Ana, sama leo' ara so'u mane' bebeu' de feen pake silaka mana pareta. Ara fee Yesus pake badu manaru pila barakeo' esa, sama leo' biasa mane' ara pake. Ara ramumulu-ramamae' Ana rae, “Soda-mole', lahenda Yahudi ra mane' na!” Ara fapa ramimina' Ana.4 Gubernor a dea' mai selu' bali, de ana nafada lahenda kadodou' sira nae, “Leo ia'! Au oo Ni leo dea' mai feen neu' emi. Ela emi muste bubulu', te au parisa' Ana so, tehuu au ta hapu Ni sala hata esa boe'.” 5 Yesus dea' mai a, Ana pake silaka koo-kau', ma badu manaru pila barakeo'. Ma gubernor a nafada lahenda sira nae, “Mita'! Lahenda a ri ia'.”
6 Malaka agama ra malaka nara ro lahenda manea ra rita Yesus, boe ma ara rahara bela' a rae, “Maisa Ni! Paku Ni neu' ai kake' a!”
Tehuu gubernor a nafada si nae, “Emi ri' moo Ni fo maisan nai ai kake' a. Huu fo au ta hapu sala Na, naraa huku mate' Ana.”
7 Lahenda Yahudi ra rataa ni rae, “Ami manuu Atoran fo ri' Manetualain naonda fee ami. Tuka Atoran ria, lahenda ia muste mate, huu fo ana hule aon nae Ria nana Manetualain Ana Na.”
8 Gubernor a namanene sira dedea na, boe ma ana boe-boe bii'. 9 Ana maso' selu' leo soldadu ra benteng na dale' neu, ana natane Yesus nae, “O, lahenda bebea'?” Tehuu Yesus ta sisipo' ana.
10 Gubernor nasapaa Ni nae, “Ubea' taon, de o ta dedea mo au fa? Tantu o bubulu', hete? Au ri' anuu kuasa fo aisa o, do po'i o.”
11 Yesus nataa ni nae, “Leo ia'. Pak ta manuu kuasa soa-neu' Au, kalu Manetualain ta fee pak kuasa ria. Manetualain ta fee pak isin, sona pak ta manuu kuasa fo fee Au dedea. Tehuu lahenda fo fee heni Au leo pak mai, sira sala-sikon bera lena bali.”
12 Mulai neme naa' mai, gubernor saka eno' fo po'i Yesus. Tehuu lahenda Yahudi ra rahara bela' a rae, “Kalu pak po'i Lahenda ia, sona tea na pak nana ta mane' bau-ina' keser a tia-lain. Lahenda fo hule aon ria mane', sona nalena-laka neu' keser.”
13 Gubernor namanene si dedea rae leo' naa, boe ma ana kalua Yesus leo dea' mai. Ana natuu' neu' mana ee dedea' a kadera na, nai mamana' fo ri' ara hule rae, “Moo Loan neme Batu Bebela'”. (Dedea Aram sona rae, Gabata.)
14 Fai ria, Fai Sadia Feta Paska. Bate ledo a namatetu, boe ma gubernor a nafada lahenda Yahudi ra nae, “Mita'! Ia nana emi mane ma!”
15 Tehuu ara rahara rambera-ina rae, “Moo Ni kalua neme ia' mai! Maisa Ni! Paku Ni neu' ai kake' a leo!”
Gubernor natane si nae, “De leo' bea? Emi maksud ma, nana au muste aisa emi mane' ma, do?”
Malaka agama ra malaka nara rataa rae, “Ami manuu noi mane' esa' a, ri' keser! Ta hapu feke' so'!” 16a Boe ma gubernor a fee Yesus leo soldadu ra neu, fo reu paku raisan nai ai kake' a.
Ara londa-lake Ramatua Yesus nai ai kake'
16b Soldadu sira sipo ra Yesus. 17 Boe ma Ana nasaa aon ai kake Na kalua neme bendar a mai. Ara leo mamana' fo ri' hule rae, “Mamana Laka Dui'”. (Nai sira dedea Aram, mamana' ria nade, Golgotaa.)
18 Losa naa, boe ma ara paku Yesus neu' ai kake' a. Ara tao leo naa' soa-neu' lahenda feke' dua boe. Ara londa-lake esa nai Yesus boboa ona Na, ma esa nai boboa ii Na, ma Yesus nai sira talada. 19 Gubernor a nadenu soldadu nara dui' ra papa' esa, boe ma pakun neu' Yesus laka Na poo' lai. Ara dui' nai papa' ria nae,
“Ia nana, Yesus lahenda Nasaret. Ria nana lahenda Yahudi ra Mane na”
20 Ara dui' papa' ria pake dedea' telu: dedea Aram, dedea Yunani, ma dedea Latin. Lahenda Yahudi dodou' lees papa' ria, nana huu mamana fo ri' londa-lake Yesus a, nanenea' no kota Yerusalem. 21 Tehuu malaka agama Yahudi ra malaka nara ta rataa fa. De ara rafada gubernor a rae, “Pak! Boso' dui', ‘Lahenda Yahudi ra Mane na’! Malole lena' dui', ‘Lahenda ia nae ria nana, lahenda Yahudi ra Mane na.’”
22 Tehuu gubernor a nataa nae, “Au ri' adenu si dui' leo naa'. De neme' naa leo!”
23 Soldadu ra londa-lake basa Yesus nai ai kake', boe ma ara bati Ria kakao-papaken neu' babati' haa. Soldadu esa na hapu babati' esa. Ara hai ra Ria badu manarun. Badu ria manarau' taa' neme lain losa dae', noi tema' mana tenu'. 24 Ara dedea-rao' rae, “Ita boso' sii talutu Ria badun ia. Malole lena', ita hela lot fo ela bubulu' bea ri' hapun.” Ria natetu no hata fo mana dui' nai Manetualain Susura Makamoi Na nae,
“Ara rabati' au kakao-papake ki,
ara hela lot fo hapu au badu ka.”
Soldadu sira tao leo naa'.b
Ramatua Yesus nadenu Yohanis nanea Ria mama Na
25 Ina' hida rapadei rai naa boe. Sira nana: Yesus mama Na, Yesus te'o Na, Klopas saon Maria, ma Maria neme koro' Magdala. 26 Yesus nita mama Na napadei nai naa, sama-sama no ana mana tuka dea susuen, fo ri' au Yohanis. Boe ma Ana nafada mama Na nae, “Mama. Ana ma ria'.”
27 Boe ma Ana nafada au nae, “Mulai neme besa' ia mai, o mama ma ria'!” Hatemata' ria boe, Yesus mama na leo no au.
Ramatua Yesus mamate Na
28 Huu fo Yesus bubulu', Ana tao nabasa Ria nonoi-laka nara katema' so. Ela natetu na basa-basan fo mana dui' mema' neme fai a ulu na mai, nai Manetualain Susura Makamoi Na. Boe ma Ana nae, “Au maa Ka mada' a.”c
29 Nai naa, hapu anggor ma'eis nai kusi ana' esa dale'. Soldadu ra hai ra lopu, de raboron leo anggor ria dale' neu, basa de naton neu' ai esad peda na, de loo ni neu' Yesus bafa Na. 30 Yesus nasamusi na anggor ria, boe ma Ana nafada nae, “Basa so.” Ana naloe laka Na, boe ma maten.
Soldadu ra pau Ramatua Yesus nai ai kake' a
31 Fai ria la'e soda lima'. Tuka atoran agama, lahenda Yahudi ra muste sadia nai fai ria, fo balahaa' nana ara sipo' sira fai mamaso' lahenda Yahudi. Huu ria naa, ara ta nau lahenda popora na nana londa' nahere nai ai kake' a, naraa la'e fai mamaso' lahenda Yahudi. Huu fo fai mamaso' lahenda Yahudi a nana, fai malole. De lahenda Yahudi ra malaka nara hule gubernor a, fo ana nadenu lahenda fepa ratepa lahenda fo ri' rai ai kake' a, ei nara. No ria naa, bisa mate si lalai', ela lahenda bisa ra'onda ra popora nara dai fai. 32 Boe ma soldadu ra leo naa' reu, de fepa ratepa lahenda esa ei nara. Basa nana ara fepa lahenda esa ei nara bali. Sira dua nana, lahenda fo londa-lake si sama-sama ro Yesus. 33 Tehuu ara losa Yesus, te rita Ni maten so. Huu ria naa, ara ta fepa ratepa ei nara. 34 Tehuu soldadu esa hai na tee na, de paun neu' Yesus poo dui Na. Boe ma daa ma oe faa dea' mai.
35 (Lahenda fo sakasii a, nana ri' au. Au ita basa-basan, ma au dui' matetu' nai ia. Au bubulu' hata fo au tui a la'e, ela emi bisa mamahere au dedea ka.) 36 Basa hihii-nanau' ia ra dadi, nana huu mana dui' nai Manetualain Susura Makamoi Na nae, “Ria dui nara ta tepa esa boe'.”e 37 Nai Susura Makamoi' a, babati-lalane feke' boe mana dui' nae, “Neu' ko rita lahenda fo ri' ara pau ni a.”f
Ara ratoi Ramatua Yesus
38 Lahenda esa nade Yusuf, neme koro' Arimatea. Ria boe namahere Yesus, tehuu namaninino' a, nana huu ana bii' lahenda Yahudi malaka nara. Ana leo gubernor Pilatus neu fo hule isin gubernor a, ela naonda na Yesus popora Na. Gubernor a nataa. Boe ma Yusuf neu naonda na Yesus popora Na, fo neu natoin. 39 Nikodemus neu sama-sama no Yusuf boe. Ria ri' maulu na leo Yesus neu hatu na. Ana asa neni rampe dodou-ina', bate kilo telu hulu telu, ela tao neu' Yesus popora Na.g 40 Ara popoti Yesus popora Na reni' tema' balanau mabeli. Poti tada' esa, na ara tao rampe neu. Ara tao leo naa', tuka lahenda Yahudi ra hadas natoi-natonon.
41 Yesus maten nai mamana' a, nana nanenea' no oka' esa nai naa. Nai oka' ria, lahenda ra besa' ko paa ra bolo natoi' esa. Ara bei ta parnaa ratoi popora' nai naa. 42 Fai ria, saka' basa lahenda Yahudi ra fai sadian fo sipo' sira fai mamaso lahenda Yahudi. Huu no mamana' ria ta nai doo' a, de ara rapeu' Yesus popora na neu' bolo natoi' ria dale'.