“Papa Boki'. Losa Au ledo-fai Ki, fo Papa io-oa Au. Au nana, Papa Anam. Papa fee Au haak fo ator basa lahenda nai dae-bafo' ia. Papa fee haak, ela fee soda' matetu' mana basa taa' neu' lahenda fo Papa fee Au si, ela dadi reu' Au lahenda Ki. De besa' ia Au hule Papa io-oa Au, ela Au atudu Papa marela-masa'am. 3 Eno' fo hapu soda' matetu' mana basa taa' a, leo ia': lahenda muste ralela' Papa nana Manetualain roo-tetu'. Ta hapu eno feke' so'. Sira muste ralela' Au, Yesus Kristus, fo ri' Papa madenun leo dae-bafo' a mai. 4 Au atudu Papa marela-masa'am nai dae-bafo' a so. Au tao abasa nonoi-laka' fo ri' Papa feen neu Au. 5 Fai a ulu na, Ita bei ta adu dae-bafo' ia, Au sama-sama oo Papa. Tepo' ria Au marela-masa'a Ka sama leo' Papa marela-masa'a Ma boe. Besa' ia Au saka' fali selu' leo Papa uu. De Au hule fo Papa io-oa Au, ela Au arela-asa'a selu' sama leo' maulu na.”

6 Yesus hule-haradoi tamba nae, “Papa fee Au lahenda dae-bafo' a fo dadi reu' Au lahenda kara. Au anori-afada si, ela ara ralela' Papa. Ara dadi reu' Papa nuu-enam, ma Papa fee Au si, fo dadi reu' Au nuu-ena Ki boe. Ma ara tao tuka Papa Hara-dasim. 7 Besa' ia ara bubulu' basa hihii-nanau' fo ri' Papa fee Au si, nana raoka-rasamu reme Papa mai. 8 Huu fo Au anori-afada si, basa Hara-dasi' fo ri' Papa mafada Au. Ara sipo Hara-dasi' sira. Ara bubulu', Au eme Papa mai. Ma ara ramahere, Papa ri' madenu Au leo dae-bafo' ia mai.

9 Au hule-haradoi fee si. Au ta hule-haradoi soa-neu' basa lahenda nai dae-bafo' a. Tehuu Au hule-haradoi fee noi lahenda fo Papa fee Au si a, nana huu Papa nuu-enam sira. 10 Te basa-basan fo dadi reu' Au nuu-ena Ki, dadi reu' Papa nuu-enam boe. Ma basa-basan fo dadi reu' Papa nuu-enam, dadi reu' Au nuu-ena Ki boe. Boe ma Au lahenda Kara io-oa Au. 11 Au ta leo ahani' dae-bafo' a, huu fo ta doo' a so', te Au fali selu' leo Papa Ka uu. Tehuu lahenda ia ra muste leo rahani' dae-bafo' a. Papa, nana Malalao-malalafu'. De Au hule Papa manea si, pake Papa kuasam fo ri' feen neu' Au a. Au hule ela sira dadi esa', sama leo' Au oo Papa boe dadi esa'. 12 Doo-naru basa ia Au sama-sama oo si nai dae-bafo' a, Au aboi-asamao si nana huu sira dadi reu' Papa nuu-enam. Au anea atalolole si, ela sira rabua-raesa rahere ro Papa. Ta mopo esa boe'. Noi Yudas ri' heo heni aon, natetu na mana dui' mema' neme ulu' mai nai Manetualain Susura Makamoi Na.^a

13 Besa' ia Au saka' fali selu' leo Ama' a uu. Au afada hihii-nanau' ia ra, tepo' fo Au bei nai dae-bafo' a. No ria naa, Au lahenda Kara ramaho'o-ratadale, sama leo' Au amaho'o-atadale. 14 Au tui-beka fee si Papa Hara-dasim so. Lahenda feke' nai dae-bafo' ia ete' ao nara ro Au lahenda Kara, nana huu Au lahenda Kara ta rasoda sama leo' sira. Au boe leo naa', huu fo Au ta sama leo' lahenda feke' rai dae-bafo' ia. 15 Au hule-haradoi, Au ta hule fo Papa kalua heni si reme dae-bafo' ia mai. Tehuu Au hule fo Papa masuru-mahapa si, ela ara doo' a reme tadalu' a mai. 16 Ara ta sama ro lahenda feke' nai dae-bafo' ia, sama leo' Au boe ta sama oo lahenda feke' nai dae-bafo' ia.

17 Tao lalao-lalafu' dale nara, pake hata roo-tetu'. Huu fo Papa Hara-dasim roo-tetu'. 18 Papa madenu Au leo dae-bafo' a mai. Leo' naa boe, Au adenu si rasoda kofela rai basa lahenda dae-bafo' a talada. 19 Au anea ao-ina Ka, ela lalao-lalafu' la'o naroo soa-neu' Papa. No ria naa, Au lahenda Kara boe ranea ao-ina nara, ela lalao-lalafu' la'o naroo soa-neu' Papa. Huu fo Papa Hara-dasi roo-tetu Ma, ri' tao naa si fee katema' ao-ina nara reu' Papa.”

20 Yesus hule-haradoi tamba nae, “Au ta hule-haradoi fee noi sira fo rai besa' ia. Tehuu Au boe hule-haradoi soa-neu' lahenda fo neu' ko ramahere Au, nana huu lahenda ia ra tutui-bebekan.

21 Papa. Au hule fo sira basa rabua-raesa, sama leo' Ita boe tabua-taesa. Au ahii' sira rabua-raesa ro Ita, ela lahenda feke' nai dae-bafo' a bisa ramahere rae, Papa ri' madenu Au. 22 Papa matudu Au rela-sa'a Ka neu' lahenda ra so. Boe ma Au io-oa si, sama leo' Papa io-oa Au. No ria naa, sira dadi esa', sama leo' Ita boe dadi esa'. 23 Au abua-aesa oo si. Papa boe mabua-maesa moo Au. Sira muste dadi esa' leo naa', losa' ara rasoda dale' esa, ma roo-tetu'. Kalu ara dadi esa' leo' naa, neu' ko lahenda feke' nai dae-bafo' a bubulu', Papa sue-lai lahenda kamahere' sira sama leo' Papa sue-lai Au. No ria naa sira boe bubulu', Papa ri' madenu Au.

24 Papa. Au ahii' basa lahenda fo ri' Papa fee Au si a, sama-sama ro Au. Au nau ara rita Au marela-masa'a Ki fo Papa fee Au a. Huu fo Ita bei ta adu dae-bafo' a, te Papa sue-lai mema' Au so.

25 Papa Boki' dale roo-tetu'. Mema' lahenda rai dae-bafo' ia ta ralela' Papa. Tehuu Au alela' Papa. Ma Au lahenda Kara boe bubulu', Papa ri' madenu Au leo dae-bafo' a mai. 26 Au afada si ae, Papa nana Bea. Ma neu' ko Au afada aroo si ae leo' naa, nana huu Au nau sira rameda matetu' Papa susue Ma. Susue' fo ri' ara rameda ni a, sama leo' Papa susue Ma neu' Au. Ela Au abua-aesa oo si.”