Ramatua Yesus lahenda
Nadedenu nara Tutui na
Manetualain sohelu saka' fee Ria Dula-dale Malalao-malalafu Na mai
1
1-3 Papa Teofilusa malole. Soda-mole' neme au, Lukas.Nai au susura maulu ka, au dui' basa-basan la'e-neu' Ramatua Yesus masoda Na. Ri' basa-basan fo Ana taon, ma basa-basan fo Ana nanori-nafada neme masososa na. Nae, Ana teka-here na lahenda nadedenu nara. Leo mae lahenda tao rasususa' Ana, ma ramaten Ni, tehuu Manetualain feen nasoda selu'. Ana nasoda selu', boe ma natudu ao-ina Na neu' lahenda nadedenu nara. Ara ritan kose-kose losa' fai' haa hulu, de ara bubulu', tebe-tebe Ana nasoda selu'. Ana nafada si nae, Manetualain sama leo Mane' mana homu pareta. Ana nadenu si pake Manetualain Dula-dale Malalao-malalafu Na kuasa Na. Losa' Ramatua Yesus hene-ae leo nusatetu-ikutema' a neu.
Sira nana au dui' asa so.
4-5 Fai' esa, boe ma Yesus nabua no lahenda nadedenu nara nai lete Saitun. Ana pareta si nae,
“Mafarerene'! Maulu na Yohanis sarani lahenda pake oe, tehuu besa' ia emi muste mahani fai' hida bali, te Manetualain saka' tao bau-ina' fee emi, huu fo Ana fee emi Dula-dale Malalao-malalafu Na. De emi boso' foa ela kota Yerusalem. Tehuu emi mahani losa' Au Ama Ki fee Dula-dale Malalao-malalafu Na neu' emi, sama leo' Ana parnaa helu a. Ma Au boe afada emi leo naa'.”b
Ramatua Yesus hene-ae leo nusatetu-ikutema' a neu
6 Fai fo Yesus nabua no lahenda nadedenu nara, boe ma ara ratane Ni rae, “Papa! Besa' ia Papa nau po'i ma nusa Israel ela ami pareta ao mara sama leo maulu na, do ami bei mahani ledo-fai feke' bali?”
7 Yesus nataa nae, “Emi boso' bubulu' leo ledo-fai ria neu. Noi Au Papa Ka nanuu haak ator ledo-fai ria. 8 Tehuu kalu Manetualain Dula-dale Malalao-malalafu Na maso' nai emi dale', besa' ko emi hapu kuasa. Ma emi muste meu tui-beka fee basa lahenda ra la'e-neu' Au. Emi meu tui-beka fee basa lahenda nai kota Yerusalem, ma basa koro' nai propensi Yudea, propensi Samaria, losa dae-bafo' a bukun haas.”c 9 Yesus dedea basa leo' naa, boe ma Ana hene-ae leo lalai neu nai sira mata nara, losa' oa' a napoti naan, de ta rita Ni so'.d
10 Ara bei relu leo lalai reu, kekeneu te lahenda dua rapadei' reu' boboa nara, pake kakao-papake fula makadila'. 11 Dua si dedea rae, “Lahenda Galilea emin! Ubea' taon emi mamakokoa relu leo lalai meu? Bisinaa' a emi mita Yesus hene-ae leo lalai neu losa' oa' a napoti naan. Emi mita mata', Ana hene-ae leo lalai neu leo' bea, neu' ko Ana onda main leo' naa boe.”
Ara saka lahenda feke' kati Yudas
12 Boe ma Yesus lahenda nadedenu nara onda reme lete Saitun mai, leo kota Yerusalem reu. Lete' ria dodoo na neme kota a bate kilo esa.e
13 Losa kota dale', boe ma ara kodi leo uma esa dale' reu fo leo lalai. Ara ae leo kama misi lai' a reu. Lahenda nadedenu' sira nade nara si':
Petrus,
Yohanis,
Yakobis,
Anderias,
Filipus,
Tomas,
Bertolomeos,
Mateos,
Yakobis (Alpius anan),
Simon (lahenda partei Selot),f
ma Yudas (Yakobis anan).g
14 Ara biasa rabua fo hule-haradoi no dale' esa. Ara hule-haradoi sama-sama ro Yesus maman Maria, ina feke' hida ma Yesus fadi nara.
15 Fai' esa boe ma ara rabua selu', bate lahenda natun esa dua hulu. Boe ma Petrus foa napadei, de dedea nae, 16 “Ina-ama toranoo kara emin! Emi bei mafarene Yudas fo ri' maulu na, noo lahenda bubua' esa reu hopu Yesus. Basa-basan fo Yudas tao a, mema' muste leo naa'. Huu fo fai a ulu na, Manetualain Dula-dale Malalao-malalafu Na pake mane' Daud fo dui' leo naa' la'e-neu Yudas. 17 Maulu na, ita lahendan ria, ma ana noi-tao no ita.”
18 (Tehuu Yudas se'o basa Yesus, boe ma ana hai na doi makekeo-makakanu' ria, de asa na dae bibia' esa. Dae ria nana Yudas mamana mamaten, huu fo ana tuda dala ara na neu' naa, losa tei na paa-kakaan, de tei lutu na loo mai. 19 Boe ma lahenda ra mulai esa tui esa, losa' basa lahenda fo leo rai kota Yerusalem ramanene la'e-neu' Yudas mamate na. Huu ria naa, ara hule dae ria, tuka sira dedea Aram rae, ‘Hakeldama’, sosoa na nae ‘Dae Daa’.)h
20 Petrus dedea naroo nae, “Fai a ulu na, mane' Daud dui' mema' leo naa' nai susura Sosoda I'io-o'oa'. Ana dui' nae,
‘Neme' naa ela ria mamana leleo na dadi lino-nees;
ta bole lahenda esa leo nai naa boe'.’
Ana dui' selu' nae,
‘Neme' naa ela ria nonoin ria, ara feen leo lahenda feke' neu.’i
21-22 Huu ria naa, ita muste saka lahenda fo kati Yudas. Ita parluu lahenda esa fo ri' tuka sama-sama no ita doo' a so. Ria nana lahenda fo tutuka' Ramatua Yesus mulai neme Yohanis sarani Yesus. Ria boe muste nita mata' Ramatua Yesus nasoda selu' neme mamate Na mai, losa Ana hene-ae leo nusatetu-ikutema' a neu.”j
23 Petrus dedea basa nae leo' naa, boe ma lahenda fo rabua rai naa, ara fee nade' dua. Esa nade Matias, ma esa nade Yusuf (ara biasa raloon rae Barsabas, naden esa bali ri' Yustus). 24-25 Boe ma ara hule-haradoi rae, “Ama' nai nusatetu-ikutema'! Ama' malela' matetu' basa lahenda ra dalen. Yudas maten foa ela ria nonoi-laka na. De Ama' a matudu fee ami esa neme lahenda kadua ia ra, bea ri' Ama' a heren fo kati Yudas, ela ami so'un dadi Ramatua Yesus lahenda nadedenun.” 26 Boe ma ara hela lot pake dua si nade nara. Ara hela ra Matias nade na. Huu ria naa, ara so'un dadi lahenda nadedenu', sama-sama no lahenda kasanahulu esa' sira.