Ramatua Yesus nafada mema' Uma Mamaso Yahudi Ina a hehea henin
24
Yesus saka' la'o ela Uma Mamaso Yahudi Ina a. Ana kalua, boe ma ana mana tuka dea nara mai ratudun Uma Mamaso' ria lole-napun. 2 Tehuu Ana nataa si nae, “Tebe Uma ia malole na seli'! Nenene! Ta doo' a so', te lahenda ra fate heni batu ia ra katema'.”Ramatua Yesus nafada nae, neu' ko ana mana tuka dea nara hapu doidoso
3 Yesus neu natuu' nai lete Saitun. Ana mana tuka dea nara mai dedea ro noi mesa' Ana rae, “Papa! Soba tui selu' bisinaa' a Papa dedea ma. Fai bea ri' Papa matafali mai? Ma tanda nara leo bea'? Dae-bafo' a nonoe na boe leo bea'?”
4 Yesus nataa si nae, “Manea matalolole ao mara! Ela boso' lahenda tipu-dai rala' emi. 5 Neu' ko lahenda rupa' ara mai fapa ara nara rae, ‘Au nana Kristus, Lahenda fo ri' Manetualain helu neme ulu' mai.’ No ria naa, ara tipu-dai lahenda dodou'. 6 Kalu emi mita lahenda ratati ao, do emi mamanene hara' rae, natati ao' nai basa mamana' ain, sona emi boso' bii. Huu fo hihii-nanau' rupa leo naa' a, muste dadi. Tehuu dae-bafo' a nonoe na bei ta losa fa. 7 Neu' ko leo esa natati soa' leo feke'. Nusa' esa natati soa' nusa' feke'. Dae a natakeko nai basa mamana' ain. Ma fai laa-roes ina' a boe! 8 Tehuu basa sira nana besa' ko tanda masososa', fo natudu nae dae-bafo' a nonoe na nanenea' so. Ria sama leo' ina' fo nameda hedis boboki', nana huu ria ledo-fai boboki na nanenea'.
9 De emi muste manea matalolole ao mara! Neu' ko ara mai ese-rumu raisa emi. Ma neu' ko basa lahenda nusa' ara ete' ao nara ro emi, nana huu emi tuka Au.a 10 Tepo' ria, te lahenda hiru rasadea Au, ma ta nau ramahere so'. Ara ramananasa ao' ma esa nase'o esa. 11 Neu' ko manatipu-manadai' ara rae sira, nana Manetualain mana nesi matan. Ma lahenda dodou' ramahere si. 12 Neu' ko lahenda ra tadalu nara boe-boe tamba dodou', losa' ta rasue-ralai ao so'. 13 Tehuu lahenda fo nanenete losa' mate, tantu Manetualain po'i-tata naan.b 14 Lahenda muste tui-beka Manetualain Tutui Malolen, losa dae-bafo' a buku nara, fo ela basa lahenda bisa ralela' Manetualain eno masoda roo-tetu Na. Basa ria, besa' ko dae-bafo' a noe.”
Ramatua Yesus nafada nae, neu' ko lahenda makaresi' mana tao malulutu' esa mai
15 Yesus dedea naroo nae, “Manetualain mana nesi matan Daniel dui' la'e-neu' lahenda makaresi' esa. Neu' ko ana maso' neu napadei nai mamana luli' nai Manetualain Uma Mamaso Yahudi Ina Na. De ana tao nakekeo-nakakanu mamana' ria. Huu ria naa, Manetualain foa ela mamana' ria. Kalu emi mita leo naa', sona besa-besa! (Bea ri' lees dudui' ia, muste bubulu-nalela' natalolole!)c 16 Huu fo ria dadi tanda nae, fai susa-lela a nai lelesu bafa' a so. Kalu lahenda rai propensi Yudea rita leo' naa, sona ara ralai lete' reu leo. 17 Kalu bea kalua neme uma mai, sona boso' fali neu hai hata-nuun bali. Nalai ina' a, ela boso' hapu soe. 18 Lahenda fo nai oka-tine, boso' fali hai lafa hanas bali. Nalai naroo leo!d 19 Ina kairus ara, ma ina anutu ra kasian raan seli. Huu fo ara ta ralai rala. 20 De malole lena' emi hule-haradoi ela soe ria, boso' naraa la'e fai uda, do fai mamaso'. 21 Huu fo fai ria susa na bau na seli! Mulai neme Manetualain adu dae-bafo' a losa' besa' ia, lahenda bei ta parnaa nita susa bau-ina rupa leo naa'. Ma neu' ko lahenda ta nita selu' susa rupa leo naa' a so'.e 22 Tehuu emi maua-manale maan seli, huu fo Manetualain tao eetu fai ria. Kalu ta'a, sona ta hapu lahenda esa bisa nasoda boe'. Tehuu no Manetualain sue-lai Ria lahenda teteka-hehere nara, de Ana tao eetu fai susa sira.
23 Kalu fai sira losa, sona emi mamanene lahenda rae, ‘Mita'! Kristus nai ia!’ Ma lahenda feke' rae, ‘Kristus nai ele!’ Tehuu emi boso' mamahere! 24 Neu' ko lahenda kalua mai fapa ara na nae, ‘Au nana Kristus!’ Ma feke' a bali nae, ‘Au nana Manetualain mana nesi matan.’ Neu' ko ara tao tanda heran rupa' ara pake nitu a kuasa na, fo rapuputa' lahenda. Ara soba tipu-dai Manetualain lahenda nara! 25 De emi muste manea matalolole ao mara! Fai susa sira bei ta losa, tehuu Au afarerene' mema' fee emi!
26 Kalu lahenda rafada emi rae, ‘Kristus nai moo loan ele!’ sona emi boso' leo naa' meu. Ma kalu ruma rae, ‘Kristus nai uma ia dale'!’, sona emi boso' mamahere sira napuputan. 27 Au Lahenda Dae-bafo' Tetea'. Kalu Au atafali selu' leo dae-bafo' ia mai, neu' ko basa lahenda rita Au, sama leo' lahenda rita relas a nahate neme dulu mai losa muri neu.f
28 Kalu Au atafali mai, neu' ko emi bubulu' Au nai bea. Sama leo' lahenda bubulu' rae, kalu manupui' mana naa popora' ara rabubuta rai mamana' esa, sona tantu hapu popora' nai naa.”g
Ramatua Yesus nafada Ria natafali mai Na
29 Yesus nafada selu' ana mana tuka dea nara nae, “Kalu basa fai susa-lela sira,
‘Neu' ko ledo a dadi maiu',
bula' a ta nahaa.
Ruu' ara ramomonu ao reme lalai mai,
ma basa-basa kuasa rai lalai liuaari.’h
30 Boe ma basa lahenda ra rita tanda nai lalai rae, Lahenda Dae-bafo' Tetea' a saka' natafali mai. Basa lahenda nusa' nai dae-bafo' ia rita leo' naa, boe ma bii losa' ara dola. Huu fo neu' ko Au onda mai oo oa' a, besa' ko ara rita Au kuasa Ka ma Au marela-masa'ak katema'.i 31 Fai fo saki a nalii bau-ina', boe ma Au pareta Manetualain eila'o-limalopen rai nusatetu-ikutema' a, reu rabubua basa Au lahenda teteka-hehere kara reme dae-bafo' a bukun haas, neme dulu losa muri; ma neme ii losa ona.”
Fai susa-lela sira dadi tanda neu' Ramatua Yesus mamai Na
32 “Au hai conto neme ai huu' a. Kalu doo na mulai mofa, ria natudu tanda nae, fai hanas a nanenea' so. 33 Leo' naa boe, kalu emi mita fai susa-lela sira mai, sama leo' bisinaa' a Au afada a, ria natudu tanda nae, Au mamai Ka nanenea'. 34 Besa' ia, nenene matalolole! Neme basa lahenda fo rasoda nai besa' ia, neu' ko ruma bei ta mate, te fai susa-lela sira mai so. 35 Leo mae lalai ma dae-ina' a sapu-lalo, tehuu Au dedea-nafada Ki natea-namepe ma ta moi-mosa.”
Ramatua Yesus nafada nae, Ria ledo-fai mamai Na namaninino'
36 “Ta hapu lahenda bubulu' fai hida' Au atafali mai. Manetualain eila'o-limalopen rai nusatetu-ikutema' a boe ta bubulu'. Au boe ta bubulu'. Noi Au Papa Ka ri' bubulu'. 37 Au Lahenda Dae-bafo' Tetea' a. Kalu Au atafali mai, ria sama leo' fai a ulu na tepo' fo Noh bei nasoda.j 38 Faa ina ria bei ta mai, te lahenda raa-rinu mina-malada, ma rasao ao sama leo biasa na. Ara tao leo naa' raroo losa' Noh maso' leo ofa bau-ina' ria dale' neu. 39 Tehuu tepo' fo faa ina a mai de lepa neni katema' asa, besa' ko mata nara radila', de bubulu' mana dadi ubea' ria. Neu' ko Au mamai Ka boe leo' naa.k 40 Tepo' ria kalu lahenda dua roi nonoi' nai oka', kekeneu te Manetualain noo esa, ma feke' a sona Ana foa elan. 41 Kalu ina' dua rapau hade, kekeneu te, Manetualain noo esa, ma feke' a sona Ana foa elan.
42 Huu ria naa, emi boe muste manea hatu-leledon, huu fo emi ta bubulu' fai hida' emi Ramatua ma natafali mai. 43 Afi matalolole! Kalu uma ramatua' a bubulu' selubai' hatu na na'o a saka' mai, sona tantu ana nanea naroo, ela na'o a boso' maso' leo uman dale' neu. 44 De emi boe muste sadia. Huu fo Au natafali mai Ka, noi nakeke' a!”l
Ramatua Yesus nanori-nafada nae, ata a muste tuka naroo malaka na hihii-nanaun
45 Yesus dedea tamba nae, “Emi muste dadi sama leo' ata fo ri' tuka naroo ria malaka na hihii-nanaun. Kalu malaka na saka' leo dae doo' neu, ana so'u ata leo naa', fo urus basa uma isi' a nanaa-nininun. 46 Kalu ramatua na fali ma nita ata na noi-tao natalolole, tantu dale na namaho'o. 47 Mamahere Au, neu' ko malaka ria fee ata a kuasa fo urus ria hata-heton katema'.
48 Tehuu kalu ata ria tadalu' a, tantu ana dedea nai dale na nae, 49 ‘Malole a! Malaka a la'o so, bea bubulu' fai hida' ana fali!’ Afi nae leo' naa, boe ma ana mulai popo'o tia-lain ata feke' ara. Ma ana naa-ninu mina-malada sama-sama no mana mafu' ara. 50 Tehuu ta bubulu' fa, kekeneu te malaka na fali main. 51 Boe ma malaka ria ese-rumun naan seli, basa de tu'un leo dea' neu, fo ana leo sama-sama no lahenda dea-mata' ara. Nai mamana' ria, basa si dola-ramatani, nana huu ara doidoso raan seli.”